Hela chochu, Yehova wakeñaña nindi tumuhembeleleña nakudiwunjika sampu nazatilihu hampinji yindi yatoñolayi. Muloñadi chakeñelañayi nindi twileña mwenimu? Yumanyi yinateli kutukwasha kutwalekahu kuzañalala hampinji yitunakumuhembelela?

MULOÑADI YEHOVA CHAKEÑELAÑAYI NINDI TUHEMBELELEÑA?

Bayibolu yahosha nawu: “Yehova nadiwunjiki nakuhembelela kulonda ayimwekesheli wuselewa, nawa wakemana kulonda akayitiyili luwi. Muloña Yehova hiNzambi wawuñanji. Adi namuzañalu wowu antu atwalekañahu kumutalila.” (Isa. 30:18) Awa mazu aIsaya ayisonekeleli aYudeya adiña achinchika. (Isa. 30:1) Ilaña hakachi kawaYudeya hadiña amakwawu adiña ashinshika, nawa awa mazu ayikwashili kwikala nakuchiñeja. Awa mazu wowamu akwashaña niambuña aYehova ashinshika makonu kwikala nakuchiñeja.

Dichi twatela kuhembelela nakudiwunjika muloña Yehova nakuhembelela nakudiwunjika. Watoñola dehi mpinji yakakisañanayi ayinu nshakaminu yamakonu yatama, nawa nakuhembelela kushika kwanidi ifuku niora. (Mat. 24:36) Hayina mpinji, chakamwekana hatooka nawu nyiloña yamutwikañawu Yehova niantu amukalakelaña kudi Diyabolu, yakutwamba. Wakamufumishahu Satana niejima amuhakwilañaku, ilaña etu ‘wakatutiyila luwi.’

Chayinu mpinji, Yehova hanateli kufumishahu kukala kutunakumonaku, ilaña watuleja nindi tunateli kwikala namuzañalu hampinji yitunakuhembelela. Neyi chahosha Isaya, tunateli kwikala namuzañalu hampinji yitunakufwila hela kuchiñeja chuma chachiwahi kumwekana. (Isa. 30:18) a Tunateli kwikala ñahi naniwu muzañalu? Kudi yuma yiwana yinateli kutukwasha.

YUMA YIKUYIKWASHA KWIKALA NAMUZAÑALU HAMPNJI YIMUNAKUHEMBELELA

Shenuña muchima hayuma yayiwahi. Muchihandilu chindi chejima, Mwanta Davidi wamweni antu amavulu akoñeleña yuma yatama. (Mas. 37:35) Ilaña wasonekeli nindi: “Diwunjiki kumesu aYehova nawa twalekakuhu kumuchiñilila chikupu. Bayi akuhilisha kudi muntu owu watweshaña kuzatisha tufuta twindiku.” (Mas. 37:7) Davidi yomweni wazatishili iku kufumba kuhitila mukusha muchima hachikaninu  chamukaniniwu kudi Yehova nindi wakamwamwina. Cheñi, wasakilileña hayuma yayiwahi yejima yamwililileñawu kudi Yehova. (Mas. 40:5) Neyi tushaña muchima hayuma yayiwahi yinakumwekana muchihandilu chetu nakutondolwela kusha muchima hayuma yatama yinakutumwekena, chikutupelelaña kumuhembelela Yehova.

Mushimekenuña Yehova mpinji yejima. Nsoneki yaIsamu 71, hadaha Davidi, wamulejeli Yehova nindi: “Nukutwalekahu kuchiñilila; nukukushimeka chikupu kubadika hakusambila.” (Mas. 71:14) Wamushimekeleña ñahi Yehova? Walejeleña antu hachekalayi Yehova nikumwimbila tumina twakumushimeka. (Mas. 71:​16, 23) Kufwana Davidi, ninetu tunateli kwikala namuzañalu hampinji yitunakumuhembelela Yehova. Twamushimekaña neyi tuya nakushimwina, neyi tulejaku antaña niamabwambu jetu chekalayi, nawa neyi twimbaña tumina twaWanta. Mpinji yimwakembaña kamina kaWanta, mwakashi muchima kunsañu yidimu yakuzañalesha.

Itejenuña amanakwenu niahela ayikolesheña. Davidi chamweniyi kukala, wamulejeli Yehova nindi: “Hamesu awantu jeyi ashinshika, nukuchiñejaña mwijina deyi.” (Mas. 52:9) Ninetu anateli kutukolesha kudi akwetu mutwadifukwilaña, bayi neyi hampinji yitunakupompa niyitunakushimwina hohuku, ilaña nihampinji yitunabulakani nakuhemena hamu.—Rom. 1:​11, 12.

Kuhwelelenuña chikupu muyuma yimwachiñejaña. Isamu 62:5 yahosha nawu: “Namuhembelelaña Nzambi nakudiwunjika muloña kuchiñeja kwami kwafumaña kudi yena.” Chalema nankashi kukuhwelela chikupu muyuma yitwachiñejaña, sweje-e dinu neyi kukuma hikunakwinza swayi kwesekeja nachitwakuhweleleliku. Twatela kukuhwelela chikupu netu yuma yakanayi Yehova yakashikijewa hela chakwila tunakumona netu yinashimbuli. Tunateli kukuhwelela chikupu muyuma yitwachiñejaña neyi tudizaña Izu daNzambi, chidi neyi kudiza hawuprofwetu, hakunuñañana kwansañu yawansoneki aBayibolu nihansañu yashimunayi Yehova yomweni hachekalayi. (Mas. 1:​2, 3) Twatela cheñi kutwalekahu “[kulomba] naspiritu yajila” kulonda twikaleña nawubwambu wawuwahi naYehova hampinji yitunakuhembelela kushikijewa kwachikaninu chatukanayi chawumi wahaya nyaaka.—Yuda 20, 21.

Kufwana Mwanta Davidi, kuhwelelenu chikupu nenu Yehova watalaña antu ejima amuchiñililaña nawa wayimwekeshelaña kukeña kwindi kwakashinshi. (Mas. 33:​18, 22) Muhembelelenuña Yehova nakudiwunjika kuhitila mukusha muchima hayuma yayiwahi yinakumwekana muchihandilu chenu, mukumushimeka, mukwiteja akwenu aYinsahu ayikolesheña nimukutwalekahu kukuhwelela chikupu muyuma yayiwahi yimwachiñejaña.