AHELA amavulu ajiki adi hakachi kawaYinsahu anakudikita mumudimu wawaWanta kumaluña kudi kukankila. Amakwawu anazatili kumatuña acheñi hadi yaaka yayivulu. Yumanyi yayikwashili kuya nakuzatila kumatuña acheñi? Yumanyi yinadiziwu hakuzatila kumatuña acheñi? Anahetelimu ñahi? Twehujoleli ahela amavulu akuluka yitembi. Neyi mudi muhela mujiki nawa munakukeña kuzataku iwu mudimu, yuma yahosheliwu yikuyikwasha. Niantu jaNzambi ejima anateli kudizilaku kuniyi nsañu.

Komana mwatoñojokaña nenu munateli kukañanya kuya nakuzatila kwituña dacheñi? A Anita, adi nayaaka 75, adijonekeleña nawu akutwesha wanyi. Avwalikili muEngland, nawa atachikili wupayiniya henohu adi nayaaka 18. Ahosheli nawu: “Natiyileña kuwaha kudizisha antu kumwiluka Yehova, ilaña najinokeleña neyi nukutwesha kuya nakuzatila kwituña dacheñi. Kwosi idimi dakwituña dacheñi dinelukili, dichi natoñojokeleña nami nakatwesha wanyi kudiza idimi dacheñi. Dichi chiyantambikili kuShikola yaGileyadi, nahayamini nankashi. Nahayamini nami muntu wudi neyi ami wabula kulema amutambiki! Ilaña natoñojokeli nami, ‘neyi Yehova nakumona nindi nukutwesha, nukweseka.’ Munahiti dehi yaaka 50 hamwekeni chumichi. Kufuma tuhu hayina mpinji, nazataña wumishonali muJapan.” A Anita abombelelihu nawu: “Mpinji jikwawu, iku natumbi chimwemweta hakanwa nayilejaña atwansi awambanda nami, ‘Ninenu mwakayi nakuzatila kumatuña acheñi.’ Nawa amavulu etejaña.”

Ahela amavulu anazatili kumatuña acheñi, hatachi adiña nakushintajala kuya nakuzatila kwacheñi. Hanu dinu atwesheli ñahi?

A Maureen adi nayaaka 64 ahosheli nawu: “Nakeñeleña kwikala nachihandilu chachiwahi chinateli kukwasha antu amakwawu.” Chiyashikijili yaaka 20, ayili nakuzatila kuQuebec, Canada, kwakeñekeleña apayiniya amavulu. “Nkumininaku antambikili kuya kuShikola yaGileyadi, ilaña nachinineña kuya kwiluña kwabula amabwambu jami.” Ahosheli cheñi nawu: “Nakameneneña kushiya amama nkawawu muloña adiña nakuhemba atata akata. Nalombeleña mpinji yejima nawufuku kudi Yehova nami yankwashi. Chinayilejeli anvwali jami yuma yinakamineña, anlejeli kwiteja mutambi.  Chipompelu nichena chakwashileña anvwali jami. Kumona Yehova chakwashañayi, kwanletesheli nikuhweleli nami wukunkwasha ninami. Dichi, nadiloñesheli kuya!” Kufuma mu 1979, aMaureen anakalakali mudimu wawumishonali hadi yaaka 30 kuWest Africa. Chayinu mpinji, aMaureen anakuhemba amama yawu muCanada, nawa anakukalakala neyi apayiniya adimena. Chanukawu yaaka yinakalakaliwu kumatuña acheñi, ahoshaña nawu: “Yehova wanyinkeleña yuma yejima yinakeñeleña nawa hampinji yatelela.”

A Wendy, adi nayaaka 65 atachikili wupayiniya henohu achidi akampululu muAustralia. Ahosheli nawu: “Natiyileña woma kuhosha nawantu inabula kwiluka. Ilaña wupayiniya wankwashili kuhosha nawantu ejima, nawa nekalili wahamuka. Kuhiñahu, nalekeli kutiya woma. Wupayiniya wankwashili kushindamena hadi Yehova nawa natachikili kukeña kuya nakuzatila kumatuña acheñi. Cheñi, antambikili kudi muhela mujiki wazatili wumishonali muJapan hadi yaaka 30 kulonda tuyi nakuzatila kuJapan hadi tukweji tusatu. Chitwazatili hamu nindi chanyinkeli mpwila yakuya nakuzatila kwituña dacheñi.” Mu 1986, aWendy ayili kuVanuatu, kachitutu kekalila kumusela waAustralia hadi makilomita 1,770.

A Wendy achidi kuVanuatu, anakuzatila hakasanji kakubalumwinahu nyikanda. Ahosheli nawu: “Natiyaña kuwaha kumona yipompelu chiyinakuvulilaku kumaluña akwakulehi. Kumuzatila Yehova kuniyi yitutu hikukooleka chikupu.”

A Kumiko adi nayaaka 65, adiña nakuzata wupayiniya wampinji yejima muJapan, dichi mukwawu mwazatilileñawu wayilili nindi ayi kuNepal. A Kumiko ahosheli nawu: “Mukwetu wankanjikijileña mpinji yejima, ilaña nakaanineña. Muloña nadiña nakwakamena neyi nikatwesha kudiza idimi dadiha nikwinjilila iluña dacheñi. Nadiña cheñi nakwakamena kwakuwana mali akeñekeleña hakwila nawu niyi kwituña dacheñi. Henohu inakwakamena iku kukala nawanikili mumaposu nahonda yami nawa antentekeli muchipatela. Haniyi mpinji natoñojokeli nami hinyi wuneluki chuma chikwawu chikummwekena? Hadaha nukukata chikatu cheneni chakwila nakakañanya kuzata wupayiniya kwituña dacheñi. Komana kwila nizatilaku kwituña dacheñi chaaka chimu nehi?’ Namudililili Yehova mukulomba nami yankwashi.” A Kumiko chayikombweliwu muchipatela, ayili kuNepal, chihahitili mpinji atachikili kuzata wupayiniya namukwawu wadiñawu nindi.

 Hanyima yakuzata wupayiniya hadi yaaka kwakwihi na 10 kuNepal aKumiko ahosheli nawu: “Kukala kunadiña naku kwomini neyi chikomini Kaluñalwiji Kachinana. Nidi namuzañalu muloña natondelihu kuzatila kudi kukankila. Kakavulu neyi inakuhanjeka nsañu yamuBayibolu nachisaka chimu, antu amavulu enzaña nakutiyilila. Nianyana anyanya anlombaña matilakiti. Natiyaña kuwaha kuzatila munawa maluña.”

Chakadi nikujina, awa ahela ahamuka itunateni, amweneña kukala. Hanu akwimanishili ñahi?

A Diane akuCanada ahosheli nawu: “Hakusambila, chankalilileña kushakama kwiluña dadilehi nachisaka chami.” Ichi anashikiji dehi yaaka 62, anazati wumishonali hadi yaaka 20 muIvory Coast (danakutenawu makonu nawu Côte d’Ivoire). “Namulombeli Yehova kunkwasha kukeña antu mumudimu wami. Ntañishi yetu wumu kuGileyadi, Manakwetu Jack Redford, watulejeli nindi hakutachika tukahayama, nikutiya kutama nayuma yitukamonaña mumudimu wetu, sweje-e neyi tumona antu anakukabakana. Ilaña watulejeli nindi: ‘Bayi mutala hachinakukabakana antu. Ilaña yitalenu chinakumwekanawu kumesu. Talenu chakwilawu neyi atiya chalala chamuBayibolu.’ Dimunelili nawa mwafumini yuma yayiwahi! Neyi inakuhanjeka nawantu nsañu yaWanta yakukundeja, namweneña chatiyileñawu kuwaha!” Chumanyi chikwawu chakwashili aDiane kuzatila kwituña dacheñi? “Nakwatili wubwambu nawatudizi ami aBayibolu nawa natiyileña kuwaha kumona chekaliliwu ambuña aYehova ashinshika. Natiyileña kuwaha kuzata iwu mudimu. Nekalili nawamama, atata, amanakwami niahela akuspiritu neyi chahosheliyi Yesu.”—Maku 10:29, 30.

A Anne, adi nayaaka 46 azatilaña mwituña dimu dakuAsia mwakaanishawu mudimu wetu. Ahosheli nawu: “Hayaaka yayivulu hinadiña nakukalakela kumatuña acheñi, nashakamini nawahela afuma kuyitachi yashiyashana niyilwilu yambuka nayami. Mpinji yikwawu, chumichi chaletesheleña kubula kutiyashana nikudikatisha kunyichima. Neyi chumichi chinamwekani, nenhwileña akwetu itwashakamineña nawu mwitala kulonda anleji chekala chisemwa chawu. Nazatili cheñi nañovu kulonda niyikeñi nikwikala chiwahi nawena. Nidi namuzañalu muloña yuma yinelileña mwafumini yuma yayiwahi nawa twekalili nawubwambu wawuwahi wankwashili kuzata chiwahi mudimu wami.”

 Mu 1993, aUte, akuGermany, adi nayaaka 53, ayitumini kuya nakuzata wumishonali kuMadagascar. Ahosheli nawu: “Hatachi, nakabakeni kudiza idimi, kwenda munkanza, kukata mashika nikunsumona kudi tububu. Ilaña ankwashileña nankashi. Ahela amuchipompelu, anyanawu niatudizi aBayibolu andizishili idimi. Mukwetu kamishonali wadiña nakuñakamena neyi nakati. Yehova niyena wankwashili chikupu. Namulejeleña kwakama kwami kwejima mukulomba. Kuhiñahu, hinukuhembelela hadi mafuku, tukweji kulonda yakuli kulomba kwami. Yehova wankwashileña muyuma yejima.” A Ute anakalakali muMadagascar hadi yaaka 23.

Kufwana ayaña nakuzatila kudi kukankila, ahela ajiki adi kumatuña acheñi ahoshaña nawu kuzatila kumatuña acheñi kwayiletelaña muzañalu. Nkiswinyi jinatambwiliwu?

A Heidi, akuGermany, adiña nayaaka 73, azatili wumishonali muIvory Coast (danakutenawu makonu nawu Côte d’Ivoire) kufuma mu1968. Ahosheli nawu “chuma cheneni chanletelaña muzañalu hikumona anyanami akuspiritu ‘anakwenda muchalala.’ Antu inadizishileña Bayibolu chayinu mpinji amakwawu hiyapayiniya amakwawu hiyaeluda muchipompelu. Amavulu antambikaña nawu Mama hela Nkaka. Hakachi kanawa aeluda, eluda wumu niñodindi, nianyanawu ammonaña nawu nidi ntaña yawu. Yehova nanyinki mwana weyala, mukuwami wamumbanda niejikulu ami asatu.”—3 Yow. 4.

A Karen akuCanada, adi nayaaka 72 anazati yaaka kubadika ha 20 kuWest Africa. Ahosheli nawu: “Wumishonali wandizishili kwikala wadihana, wukweti kukeña nikudiwunjika. Cheñi, kuzatila hamu nawantu afuma kumatuña ashiyashana kwaletesheli niluki yuma yayivulu. Nadizili nami kwekala njila jajivulu jakwililamu yuma. Hinkisu yeneni kwikala nawamabwambu mukaayi kejima. Hela chakwila chihandilu nimudimu wetu wunahimpi, wubwambu wetu wuchidi wakola.”

A Margaret, akuEngland, adi nayaaka 79, azatili wumishonali kuLaos. Ahosheli nawu: “Kuzatila kumatuña acheñi kwankwashili kumona Yehova chakokañayi antu akweti makowa ambuka nawa akweti yitachi yashiyashana kwinza mukuloñesha kwindi. Chumichi chakolesheli chikuhwelelu chami. Chaletesheli nikuhweleli nami Yehova nakulombola kuloñesha kwindi nawa katataka yashikiji nkeñelu yindi.”

Mwamweni, ahela ajiki anakuzatila kumatuña acheñi anemiki chakutalilahu chachiwahi chakudikita mumudimu wawakwaKristu. Twatela kuyihameka chikupu. (Ansomp. 11:40) Nawa ahela anakuvulilaku chikupu. (Mas. 68:11) Komana kwila muhimpa yuma kulonda mulondeli mumahaji anawa ahela adikita itunehujoli muchinu chibaaba nehi? Neyi mwila mwenimu, ‘mukutompa chawahayi Yehova.’—Mas. 34:8.