1, 2. (a) Yitoñojokanyi yashiyashana yikwetiwu antu kutalisha hansañu yakudifuukwila? (b) Bayibolu yatulejañadi kutalisha hawuswa wutukweti wakudifuukwila, nawa malwihwinyi itukuhanjeka?

HAMPINJI yafuukwileñayi, mumbanda wumu wamulejeli ibwambu dindi nindi: “Bayi wunfuukwilaku; eyi nleji hohu yuma yinatela kwila. Chikunkwashaku.” Iwu mumbanda wakeñeli nindi amuleji mwakwilila chatela yakabakaneña nakuzatisha chawaana chamwinkawu kudi Nleñi, chakudifuukwila. Indochu enu? Mwakeñaña kudifuukwila tahindi mwakeñaña akwenu ayifuukwili? Mwatiyaña ñahi hansañu yakudifuukwila?

² Antu anahoshi chikupu haniyi nsañu hadi yaaka yayivulu. Antu amakwawu ahoshaña nawu kwosi muntu watela kudifuukwila muloña Nzambi weluka dehi yuma yejima yitwelaña. Amakwawu nawu muntu watela kudifuukwila chiwahi neyi wasubuka chikupu. Hela chochu, hakwila twiluki iyi nsañu chiwahi, twatela kutaña Izu daNzambi, Bayibolu. Muloñadi? Muloña datulejaña nawu Yehova watuleñeli nawuswa wakudifuukwila, dikwila nawu twekala asubuka kwila yuma yitunakukeña. (Tañenu Yoshuwa 24:15.) Bayibolu yakulaña cheñi malwihu adi neyi: Tunateli kuzatisha ñahi chawaana chetu chakudifuukwila? Kudihu chipimu hakukumina? Njila mutwazatishilaña chawaana chetu chakudifuukwila yamwekeshaña  ñahi nawu twamukeña Yehova chikupu? Tunateli kulemesha ñahi mwafuukulañawu akwetu?

3. Chakutalilahwinyi chemikayi Yehova chakuzatisa wuswa wakudifuukwila?

³ Yehova nkawindi hohu diyi wukweti wuswa wakwila yuma yejima, nawa tunateli kumwimbujola munjila yazatishilañamu wuswa windi. Chakutalilahu, watondeli muza wawaIsarela kwikala antu ejina dindi, ‘chuma chindi chalema.’ (Kuhit. 7:6-8) Kudi chuma chaletesheli yafuukuli mwenimu. Yehova wakeñeleña kuhemba chikaninu chashiikiliyi ibwambu dindi Abarahama kunyima. (Kutach. 22:15-18) Cheñi, Yehova wazatishaña wuswa wukwetiyi kwesekeja nayilwilu yindi yakukeña niwuñanji. Chumichi chamwekeni hayibabesheliyi aIsarela adiña nachaaku chakuleka kudifukula kwalala. Chabalumukiliwu chikupu mumuchima, Yehova wayikeñeli nakuyimwekeshela luwi nakuhosha nindi: “Nakayuka kukuselumukila kwaselumukañawu hanyima, nakayikeña namuchima wejima.” (Hos. 14:4) Yehova wazatishaña chiwahi ichi chawaana kulonda antu amakwawu ahetelimu.

4, 5. (a) Hinyi wadiña watachi kutambwila chawaana chaNzambi chakudifuukwila, nawa wachizatishili ñahi? (b) Lwihwinyi lutwatela kudihula hamuntu-hamuntu?

⁴ Chatachikiliyi Yehova kuleña yuma, wamwekesheli kukeña kuhitila mukuyinka yileñaleña yindi yikweti maana wuswa wakudifuukwila. Mwanindi wawedi, “chifwanisha chaNzambi abulaña kumonawu,” diyi wadiña watachi kwikala nanichi chawaana. (Kol. 1:15) Henohu kanda yenzi hamaseki, Yesu wadiña washinshika kudi Tata yindi nawa hadibombeli naSatana mukudikañaku. Nkumininaku, chenjiliyi Yesu hamaseki, wazatishili wuswa windi wakudifuukwila kulonda yakaani kumweseka kudi Chilumbu muneni. (Mat. 4:10) Henohu kanda yafwi, Yesu walombeli nawufuku chakufuma hamuchima nindi, yatwalekihu kwila nkeñelu yaNzambi. Dichi wahosheli nindi: “Tata, neyi wunakukeña, fumishaku aka kaapu kudi ami. Hela chochu, itejaku nkeñelu yeyi yishikijewi, bayi yamiku.” (Luka 22:42) Dichi, tumwimbujolenu Yesu kulonda tuzatisheña chawaana chitukweti nakumulemesha Yehova nawa twileña nkeñelu yindi. Tunateli kwila mwenimu?

⁵ Tunateli kwila yuma yelileñayi Yesu, muloña ninetu atuleña muchifwanisha chaNzambi. (Kutach. 1:26) Hela chochu, hadi hitwatela kukumina. Tukweti wanyi wuswa wakwila yuma neyi chelañayi Yehova. Izu daNzambi datulejaña nawu wuswa wetu wukweti hakukumina nawa twatela kulondela nshimbi jajiwahi jatwinkayi Yehova. Cheñi, ambanda atela kwovwahila anfumu jawu, anyana niwena atela kwovwahila anvwali jawu. (Efwes. 5:22; 6:1) Kwiluka hakukumina kwatukwashaña ñahi hampinji yitwazatishaña wuswa wetu wakudifuukwila? Chihandilu chetu kumbidi chashindamena hachitukwakula ilu lwihu.

6. Shimunenu chakutalilahu chinakumwekesha nawu chawaana chetu chatela kwikala nahakukumina.

⁶ Neyi muntu wudi nachawaana chakudifuukwila ilaña chakuminamu, komana wasubuka chikupu? Eña. Muloñadi? Kwikala nawuswa wukweti hakukumina kwayikiñaña antu. Chakutalilahu, tunateli kufuukulahu kuya kwiluña dadilehi namotoka. Mukutiya kuwaha kwenda mumukwakwa mwabulaña kulondelawu añendeshi nshimbi, muyendeshañawu nyotoka lufuchi nawa mwendeshelañawu kukabadi kejima kanakeñiyi muntu? Inehi. Kwikala nahakukumina kwakuwahi hakwila tudiluñishi kukasunuka kwalala. Tutalenu yakutalilahu yamuBayibolu kulonda tumoni kuwaha kwafumaña mukuzatisha wuswa wetu wakufuukula kwesekeja nachakeñañayi Yehova.

7. (a) Indi chawaana chakudifuukwila chamwambwili ñahi Adama kuyileñaleña yikwawu yamuEdeni? (b) Shimunenu njila yimu mwazatishiliyi Adama ichi chawaana.

 ⁷ Hakuleña muntu watachi, Adama, Nzambi wamwinkeli chochenichi chawaana chenkeliyi yileñaleña yamwiwulu, chawaana chakudifuukwila. Dihafumini Adama kwambukaku nawanyama, muloña anyama hiyakweti maanaku. Talenu chazatishiliyi Adama ichi chawaana munjila yayiwahi. Anyama diwu asambilili kuleñawu henohu antu kanda. Ilaña Yehova wamwinkeli muntu watachi mudimu wakutumba yileñaleña majina. Nzambi ‘wayitweli kudi muntu kulonda atali mwakuyitumbilayi majina.’ Neyi Adama namushinshiki dehi kanyama, wamutumbileña ijina, ilaña Yehova wamukaanishileña wanyi nindi ijina dinamwinkiyi owu kanyama damutelela. Dichi ‘majina ejima atumbiliyi muntu yuma yejima yikweti wumi, ekalili majina awu.’—Kutach. 2:19.

8. Adama wazatishili ñahi chatama chawaana chindi chakudifuukwila, nawa mwafumadi?

⁸ Chawushona, Adama wasekesheli mudimu wamwinkeliwu kudi Nzambi wakudima nikuhemba paradisa hamaseki. Wasekesheli wuswa wamwinkeliwu wakulondela lushimbi lwamwinkeliwu kudi Nzambi nawu: “Semununenu, muvuleña, muwanini heseki, mudovwahishi; ikalenu anyanta niawanshi . . . , niawatujila ahaluzwizu, niayuma yayumi yejima yendaña hamaseki.” (Kutach. 1:28) Dichi, wafuukwilihu kubula kulondela lushimbi lwamwinkeliyi Nzambi lwakubula kuda kumukabu wamukaanishiliwu. Chineli wazatishili iwu wuswa chatama, anyana kaAdama adi mukukala kweneni. (Rom. 5:12) Twatela kuzatisha chiwahi ichi chawaana kwesekeja namwakukumina mwatwinkayi Yehova muloña tuneluki yuma yatama yinafumi mukufuukula kwaAdama.

9. Yehova wayinkeli antu jindi aIsarela wuswanyi, nawa ahosheli nawudi?

⁹ Anyana kaAdama naEva aswana kubula kuwanina nikufwa kudi anvwali jawu adikañili. Hela chochu, atwalekelihu nanichi chawaana chakudifuukwila. Tuneluki mwenimu kwesekeja nachayihembeliwu aIsarela kudi Nzambi. Kuhitila mudi kambuñindi Mosi, Yehova wayinkeli antu wuswa wakwiteja hela kukaana kukooleka kwakwikala chuma Chindi chalema. (Kwid. 19:3-6) Ahosheli nawudi? Aditejeleli aweni kuhemba nshimbi yakundama kukwikala antu ejina daNzambi nawa wonsu wawu ahosheli nawu: “Mwejima mwanahoshiyi Yehova tukwilamu.” (Kwid. 19:8) Chawushona, mukuhita kwamafuku, iwu muza watachikili kuzatisha ichi chawaana munjila yatama nawa wafumpili chikaninu. Dichi tudizilenu kuyuma yamwekeni nawa tulemesheña ichi chawaana chakudifuukwila kuhitila mukukundama kudi Yehova nikwovwahila nshimbi jindi jaloña.—1 Kor. 10:11.

10. Yakutalilahwinyi yinakumwekesha nawu antu abula kuwanina anateli kuzatisha chawaana chakudifuukwila hakumulemesha Nzambi? (Talenu mwevulu wakutachikilahu.)

¹⁰ Aheberu kapetulu 11, kashimuna majina 16 awambuña Nzambi azatishili wuswa wawu wakudifuukwila kwesekeja mwaheniyi Yehova. Chafuminimu, atambwilili wuloku nawa achiñejeleña yuma yakumbidi. Chakutalilahu, Nowa wamwekesheli chikuhwelelu cheneni nawa walondeleli nshimbi yaNzambi yakutuña waatu mwahandilili chisaka chindi nawa mwafumini yisaka yawantu ejima. (Heb. 11:7) Abarahama niSara amwitejeli Nzambi kuyilombola nichashikiliwu mwituña dachikaninu. Hela chakwila atachikili kwenda ilu lwendu lwalulehi, “mutenowu atwesheli kufunta cheñi” kumusumba wawu wasweja maheta waUri. Ilaña, ashili mesu awu achikuhwelelu ‘hakushikijewa kwayikaninu yaNzambi’; ‘akeñeli ituña dasweja kuwaha.’ (Heb. 11:8, 13, 15, 16) Mosi wakaanini maheta amuEjipitu, “watondelihu kukabakena hamu nawantu jaNzambi kubadika kudiluñisha chiseki chanshidi chahakapinji kantesha.” (Heb. 11:24-26) Twimbujoleña chikuhwelelu chanawa antu akushankulu kuhitila mukulemesha  chawaana chakudifuukwila nikuchizatisha hakwila nkeñelu yaNzambi.

11. (a) Chumanyi chabadika chafumaña muchawaana chakudifuukwila? (b) Chumanyi chayikwashaña kulonda muzatisheña wuswa wenu wakudifuukwila chiwahi?

¹¹ Hela chakwila muntu nateli kutufuukwila, kwila mwenimu kunateli kutukañesha kutambwila chuma chafumaña mukudifuukwila. Ichi chuma achishimuna haKuhituluka 30:19, 20. (Tañenu.) Vasi 19 yashimunaña wuswa wayinkeliwu aIsarela kudi Nzambi. Vasi 20 twatañaña nsañu yahosha hachayinkeliyi Yehova kukooleka kwakumwekesha yuma yadiña munyichima yawu. Ninetu tunateli kutondahu kudifukula kudi Yehova. Kwosi chuma chikwawu chitwatela kuzatisha kumwekeshelamu kukeña nikumulemesha Nzambi chabadika chawaana chatwinkayi chawuswa wakudifuukwila.

12. Yumanyi yitwatela kubula kwila nachawaana chetu chakudifuukwila?

¹² Fwikijenu munamwinki ibwambu denu chawaana chachiwahi nankashi. Mukuneña chikupu neyi mutiya nawu wachinatila mwibuku damajilu, hela nawu wakatishilahu mukwawu hanichi chawaana. Toñojokenu chatiyañayi Yehova hakumona antu anakuzatisha ichi chawaana mujila yatama nawa anakuyandisha nachu akwawu. Neyi chochashimwineñahu dehi Bayibolu, nawu “mumafuku akukuminina” antu “abulaña kusakilila.” (2 Tim. 3:1, 2) Dichi tulekenu kuzatisha chatama ichi chawaana hela kuchidiwula. Hanu dinu, tunateli kuleka ñahi kuzatisha ichi chawaana munjila yatama?

13. Njilanyi yimu yitwatela kubula kuzatishilamu chatama chawaana chawaKwakristu chakusubuka?

¹³ Wonsu wetu tudi nawuswa wakudifuukwila kutalisha hakutonda amabwambu, nvwalilu, mmwekenu niyisela. Hela chochu neyi kubabala nehi naniku kusubuka tunateli kukutachika ‘kukoña yuma yatama’ neyi tutondahu kwikala anduñu akufwila yakumujimba hela neyi tutachika kwimbujola yilwilu yikwetiwu antu mukaayi. (Tañenu 1 Petulu 2:16.) Chatela tuzatisheña kusubuka kwetu ‘nakutachika kufwila yuma yafwilaña mujimba,’ twatela kuzata nañovu kulonda tufuukuleña yuma yikutukwasha kulondela kufumba kwakwila nawu: “Ilenuña yuma yejima yikumulemesha Nzambi.”—Ñal. 5:13; 1 Kor. 10:31.

14. Indi kumukuhwelela Yehova kunesekani ñahi nakuzatisha chawaana chakudifuukwila?

 ¹⁴ Njila yikwawu mutwatela kuhembela chawaana chetu chakudifuukwila hikumukuhwelela Yehova nikumwiteja kutulombola nakushika mwakukumina mwatuloñeshelayi. Yena nkawindi diyi ‘watulejaña yuma yatukwashaña, diyi watulombolaña munjila yitwatela kuya.’ (Isa. 48:17) Twatela kwiteja awa mazu onenewa akwila nawu: “Njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yere. 10:23) Dichi bayi tufwa muniwu muhetu wakufwila kushindamena hamaana etu etaweni neyi cheliliyi Adama niaIsarela adikañiliku. Ilaña, ‘tumukuhweleli Yehova namuchima wetu wejima.’—Yish. 3:5.

15. Yumanyi yitwadizilaña kulushimbi ludi haAñalija 6:5?

¹⁵ Njila yimu yikumwekesha nawu tukweti mwakumina kusubuka kwetu hikulemesha wuswa wukwetiwu akwetu wakudifuukwila muchihandilu chawu. Muloñadi? Chineli wonsu wetu tudi nachawaana chakudifuukwila, akwaKristu ayedi hiyanateli kufuukula mwomumu mpinji yejimaku. Chumichi chinateli kumwekana nimunsañu yakundama kuyilwilu nimukudifukula. Anukenu lushimbi ludi haAñalija 6:5. (Tañenu.) Neyi twiluka netu akwaKristu ejima atela ‘kudisendela yiteli yawu,’ tukulemesha wuswa wukwetiwu akwetu wakuzatisha chawaana chawu chakudifuukwila.

16, 17. (a) Indi kuzatisha wuswa wakudifuukwila kwayikalilili ñahi akwaKorinda? (b) Indi Pawulu wamanishili ñahi iku kukala, nawa tukudizila kwodi kuwuswa wukwetiwu akwetu?

¹⁶ Tutalenu chakutalilahu chamuBayibolu chamwekeshaña chitwatela kulemeshela wuswa wukwetiwu amanakwetu wakudifuukwila yuma yimu yakeñekaña kuzatisha chinleji. AkwaKristu muKorinda adambwili kukoola kuda mbiji yiyalambwiliwu kudi ankishi nkumininaku aya nakuyilandisha hachisankanu. Amakwawu ahosheleña nawu: ‘Nkishi hichumaku, mbiji atela kuyida chakadi nikukala.’ Ilaña, amakwawu chineli kunyima apesheleña ankishi atoñojokeleña nawu chadawu yina mbiji chidi neyi anakupesha. (1 Kor. 8:4, 7) Iyi nsañu yakalili nankashi, muloña yakeñeleña kwambula chipompelu. Indi Pawulu wayikwashili ñahi akwaKristu muKorinda kumona yuma neyi chayimonañayi Nzambi?

¹⁷ Chatachi, Pawulu wayilejeli wejima wawu nindi yakuda hiyakundamishaña muntu kudi Nzambiku. (1 Kor. 8:8) Chamuchiyedi, wayilejeli nindi bayi eteja ‘wuswa wawu wakutonda’ wikali “chuma chakuhukesha kudi antu azeyaku.” (1 Kor. 8:9) Nkumininaku, wayilejeli adiña nachinleji chakola nindi bayi asompesha antu atondelihu kuda mbiji. (1 Kor. 10:25, 29, 30) Dichi, muniyi nsañu yalema yakudifukula, akwakudifukula akwaKrstu atela kufuukula kuzatisha chinleji chawu. Tunateli kulemesha wuswa wukwetiwu amanakwetu wakufuukula yuma yinakukeñawu hela mutuyuma twanyanya, netu?—1 Kor. 10:32, 33.

18. Mukumwekesha ñahi nenu mwalemesha chawaana chakudifuukwila?

¹⁸ Yehova watwinka chawaana chakudifuukwila nawa twasubuka chikupu. (2 Kor. 3:17) Ichi chawaana twachilemesha muloña chatukwashaña kufuukula yuma yamwekeshaña nawu twamukeña Yehova. Dichi, tutwalekenuhu kuhameka hachawaana chabadika chatwinkawu kuhitila mukuchizatisha munjila yaletaña mpuhu kudi Nzambi nikulemesha munafuukuliwu akwetu kuzatisha chawaana chawu.