1, 2. Muloñadi muntu wadiña washinshika chamukaaniniwu kudi Nzambi (Talenu mwevulu wakutachikilahu.)

MWANTA SAWULU hatachikiliyi kuyuula muIsarela wadiña wadikehesha nawa amulemesheli kudi antu. (1 Sam. 9:1, 2, 21; 10:20-24) Ilaña chekaliliyi hohu mwanta, watachikili kudinka wanta. Kaprofwetu waNzambi Samweli chalabiliyi kushika kuGiligali, Sawulu wakañenyi kudiwunjika. Afwilistinu adiloñesheleña kuzuña njita nawaaIsarela amushili Sawulu. Watela watoñojokeli nindi, ‘Natela kwilahu chuma chimu nawa mukunyakashana.’ Dichi walambwili mulambu kudi Nzambi, chuma chiyabulili kumwiteja kwila. Yehova watiyili kutama.—1 Sam. 13:5-9.

² Samweli chashikiliyi kuGiligali, wamuzuwilili Sawulu. Chatela yeteji kufumba, Sawulu watachikili kuleya, kutwika acheñi muloña nikudihakwilaku yomweni. (1 Sam. 13:10-14) Dihatachikili kudinka wanta nawa chumichi chaletesheli Sawulu amutambuli wanta nawa chaswejeli kutama wubwambu windi  naYehova wamanini. (1 Sam. 15:22, 23) Hela chakwila watachikili chachiwahi, chihandilu chaSawulu chamanini munjila yatama.—1 Sam. 31:1-6.

3. (a) Antu atoñojokaña nawudi kutalisha hakudikehesha? (b) Twatela kwakula malwihwinyi?

³ Makonu mukaayi mudi yilwilu yakudibecha, antu amavulu atoñojokaña nawu atela kudimena hakwila nawu ekali atachi. Kwila mwenimu kwayileteshaña kubula kudikehesha. Chakutalilahu, muntu wadiña waya mpuhu mujamafilimu, chekaliliyi politishani wahosheli nindi: “Ami nekala wanyi wadikehesha nawa hinakekala wadikeheshaku.” Hanu dinu muloñadi kudikehesha chikwalemena? Kudikehesha kwekala ñahi nawa kubula kudikehesha kwatalisha mudihi? Nawa tunateli kutwalekahu ñahi kudikehesha neyi tunakumona kukala hela ikakeja dawakwetu? Muchinu chibaaba, tukwakula awa malwihu ayedi. Lwihu lwamuchisatu akalwakula muchibaaba chinalondelihu.

4. Yilwilu yakudinka wanta’ hiyilwilu yamuchidinyi?

⁴ Bayibolu yashimuna chaambu chekala hakudikehesha nakudinka wanta chiyahosha nawu: “Chikwenzaña kudinka wanta, dihu henzaña nsonyi; ilaña kudi akwakudikehesha kwokwekala maana.” (Yish. 11:2, NWT.) Davidi wamulombeli Yehova, kumukwasha kulonda ‘yabuli yilwilu yakudinka wanta.’ (Mas. 19:13) ‘Yilwilu yakudinka wanta’ hiyilwilu yamuchidinyi? Bayibolu yazatisha iyi nhoshelu hakutena muntu welaña chuma mukunyakashana chinabuli kumwitejawu kwila, dikwila nawu nakudinka wanta. Hamuloña wanshidi yitwaswana, mpinji yikwawu twadinkaña wanta. Ilaña neyi chinamwekeshi chakutalilahu chaMwanta Sawulu, neyi tukwikala nachilwilu chakukeña kwikala atachi, tukwikala hela twakekala mukukala naNzambi. Masamu 119:21 yahoshaña nawu Yehova, ‘wayihosholaña adinka wanta.’ Muloñadi chayihosholelañayi?

5. Yilwilu yakudinka Wanta yataminadi?

⁵ Yilwilu yakudinka wanta yatama kubadika yiluwa yitwakoñaña chakadi kwiluka. Chatachi, neyi tubula kudikehesha, tukukañanya kulemesha Wunyuuli waYehova wakuyuula. Chamuchiyedi, neyi tuzata nyidimu yinabuli kukwinkawu, tukutiyashana wanyi nawakwetu. (Yish. 13:10) Nawa chamuchisatu, neyi antu eluka nawu tunamwekeshi yilwilu yakudinka wanta, chikutwitiyisha nsonyi nawa tukusawuka. (Luka 14:8, 9) Yilwilu yakudinka wanta yayiwahi wanyi. Neyi chochahosha Nsona, kudikehesha kwakuwahi nankashi.

6, 7. Kudizoza kwatalisha mudihi, nawa kwendelaña ñahi hamu nakudikehesha?

⁶ Mukudikehesha mwabombela kwikala wadizoza. Bayibolu yatena kudizoza nawu kubula kudivwimba hela kudinyamuna. Akwitenaña nawu “kwikala namuchima wakudizoza.” (Fwi. 2:3, tumazu twaheshina.) Muntu wadizoza wekala wadikehesha, welukaña hakumina ñovu niyuma yinateli kwilayi, wetejaña neyi naluwañeshi nikwiteja munahoshi akwawu. Kudizoza kwamutiyishaña Yehova kuwaha.

⁷ MuBayibolu, kudikehesha kwatalisha mukwiluka chitwekala niyuma yitunateli kubula kwila. Kwesekeja nachazatishileñawu idi izu mwidimi dadeni kwafumishiliwu, idi izu datela damwekesheleña chitwatela kumona akwetu.

8. Yumanyi yamwekeshaña yitoñojoka niyilwilu yakubula kudikehesha?

 ⁸ Tunateli kwikala ñahi nayitoñojoka hela yilwilu yakubula kudikehesha? Talenu yuma yamwekeshaña kubula kudikehesha. Tunateli kutachika kudimona kulema kubadika amakwawu muloña wakukooleka kutukweti. (Rom. 12:16) Tunateli kutachika kwila yuma yikuletesha antu kutumona nawu twadivwimba. (1 Tim. 2:9, 10) Hela tunateli kutachika kuleja antu yuma yatela kwilawu niyatela kubula kwilawu. (1 Kor. 4:6) Neyi tutachika kwila iyi yuma, tukwiluka wanyi netu tunatachika kudinka wanta.

9. Yumanyi yinaleteshi antu amakwawu kwikala nayilwilu yakudinka wanta? Shimunenu chakutalilahu chamuBayibolu.

⁹ Muntu wejima nateli kudikehesha wanyi neyi yatwalekahu kukeña yuma yafwilaña mujimba. Kudikeña etu aweni, lwisu nikusweja kuzuwa kunateli kuletesha twikali nayilwilu yakudinka wanta. Antu adi neyi Abisalomi, Uziya niNebukaneza elili nyidimu yakumujimba nawa ayibabesheli kudi Yehova muloña wakudinka wanta.—2 Sam. 15:1-6; 18:9-17; 2 Kush. 26:16-21; Dan. 5:18-21.

10. Muloñadi chitwatela kubulila kusompesha antu amakwawu? Shimunenu chakutalilahu chamuBayibolu.

¹⁰ Kudi cheñi yuma yikwawu yinateli kuletesha amakwawu kubula kudikehesha. Chakutalilahu, talenu chahosha Bayibolu haKutachika 20:2-7 niMatewu 26:31-35. Komana Abimeleki niPetulu amwekesheli yilwilu yakudinka wanta muloña wakukeña kwila yuma yakeñeleña nyijimba yawu? Tahindi elukili wanyi yuma yelileñawu hela atoñojokelihu wanyi? Chineli twelukaña wanyi yuma yekalaña munyichima yawantu, chikuwaha neyi tubula kusompesha akwetu.—Tañenu Yakoba 4:12.

11. Tunateli kumwekesha ñahi kudikehesha mukuloñesha kwaNzambi?

¹¹ Kudikehesha kwatachikaña nakulemesha kukoleka kutukweti mukuloñesha kwaNzambi. Hamu neyi Nzambi wakubula kuluwañesha, Yehova watwinkaña mudimu wakuzata mwitala dindi. Twazataña nyidimu yambuka muchipompelu, ilaña yejima yalema. Yehova watwinka wejima wetu yawaana, yozelu, wuswa muloña waluwi lwindi lwasweja. Tunateli kuyizatisha hakumulemesha nikukwasha amakwawu. (Rom. 12:4-8) Yehova watulemesha kuhitila mukutwinka nyidimu yindi.—Tañenu 1 Petulu. 4:10.

12, 13. Tukubuliladi kuhayama neyi mudimu wutunakuzata mukuloñesha kwaNzambi wuhimpika?

¹² Bayi neyi twakatwalekahu kuzata mudimu wowumu mukuloñesha kwaNzambiku. Wunateli kuhimpa mukuya kwampinji. Tushinshikenu chakutalilahu chaYesu. Hakusambila wadiña naYehova. (Yish. 8:22) Kuhiñahu wamukwashili Nzambi kuleña yileñaleña yakuspiritu, mawulu nimaseki ninetu antu. (Kol. 1:16) Chimwahitili mpinji, Yesu wenjili hamaseki, wavwalikili neyi nkemba nawa wakulili. (Fwi. 2:7) Hanyima yakulambula wumi windi, Yesu wafuntili mwiwulu kulonda akekali Mwanta waWanta waNzambi mu 1914. (Heb. 2:9) Bayi neyi wukazataña hohu iwu mudimu haya nyaakaku. Hanyima Yakuyuula Yaaka Ikombakaji, Yesu wakafuntisha Wanta kudi Yehova kulonda “Nzambi yakekali yuma yejima kudi antu ejima.”—1 Kor. 15:28.

¹³ Ninetu twatela kukuhwelela netu mudimu wetu wunateli kuhimpa mukuhita kwampinji, hamuloña wayuma yitwafuukulaña. Chakutalilahu, mwadiña mujiki ilaña  munasumbuki hela munasumbuli? Munatachiki kuvwala anyana? Munapeleshiku chihandilu chenu kulonda mutachiki mudimu wampinji yejima? Yuma yejima yitwafuukwili diyaletesheli twikali nakukooleka ninyidimu. Kuhimpika kwayuma kunateli kutuletesha kuzata nankashi hela nehi. Wudi kansi tahindi munashinakaji dehi? Komana mwakola kumujimba tahindi mwakata? Yehova weluka chinateli kuzatishayi wejima wetu mumudimu windi. Wakeñaña nindi tuzateña hakumina ñovu jetu nawa wahamekaña nyidimu yejima yitwadikitaña.—Heb. 6:10.

14. Kudikehesha kunateli kutukwasha ñahi kuwana muzañalu mumudimu wejima wutunakuzata?

¹⁴ Yesu wazatileña namuzañalu nyidimu yejima, ninetu tunateli kuwana muzañalu. (Yish. 8:30, 31) Muntu wadikehesha wamonaña wanyi kukooleka ninyidimu yamwinkawu muchipompelu nindi yinakehi. Wakamenaña wanyi kwikala nakukooleka kumbidi hela neyi akwawu anayinki kukooleka. Ilaña washaña maana hamudimu wunakuzatayi hanoyu mpinji muloña neluki nindi wunafumi kudi Yehova. Hampinji yoyimu, walemeshaña mudimu wayinkayi Yehova akwawu. Kudikehesha kwatukwashaña kulemesha akwetu nikuyikwasha.—Rom. 12:10.

15. Tunateli kudizilaku kwodi kukudikehesha kwaGideyona?

¹⁵ Gideyona wadiña wadikehesha chikupu. Kañelu kaYehova chamwekeniyi kudi yena, Gideyona wamwekesheli kudikehesha  hakutoñojoka kwafumayi. (Ansomp. 6:15) Hanyima yakwiteja mudimu wamwinkeliwu kudi Yehova, Gideyona wakeñeleña kwiluka chakuzata mudimu nawa walombeli wukwashu kudi Yehova. (Ansomp. 6:36-40) Gideyona wadiña wahamuka. Ilaña wazatileña mukubabala nawa namaana. (Ansomp. 6:11, 27) Wazatishili wanyi chifulu chindi kulonda yayi mpuhu. Ilaña chakumishiliyi mudimu windi, wafuntili kumukala wawu namuzañalu.—Ansomp. 822, 23, 29.

16, 17. Muntu wadikehesha watela kutoñojoka hayumanyi neyi nakukeña kuyilaku hambidi kuspiritu?

¹⁶ Kudikehesha hikwatalisha mukubula kufwila hela kukaana kukooleka kukwawu kwanatwinkiwuku. Nsona yatukoleshaña wejima wetu kuyilaku hambidi. (1 Tim. 4:13-15) Komana twatela kuhimpa mudimu kulonda tuyiliku hambidi? Inehi mwani. Nawukwashu waYehova, tunateli kuyilaku hambidi namudimu wudi wejima wutunakuzata chakatataka. Tunateli kwikala nayilwilu yakeñañayi Nzambi nikuzata nañovu nyidimu yayiwahi.

¹⁷ Henohu kanda yatambwili mudimu wukwawu, muntu wadikehesha wukusambila kukeña kwiluka yuma yatela kwilayi. Dichi wukutoñojoka chadiyi neyi wukutwesha kuzata owu mudimu. Chakutalilahu, komana wukutwesha kuzata nyidimu yikwawu chakadi kuleka yuma yikwawu yalema? Komana wukuhana mudimu wazatañayi kudi muntu wacheñi nakutachika kuzata mudimu wawuha? Neyi ñakwilu yidi nawu inehi kulwihu lumu hela ejima ayedi, dikwila nawu iwu mudimu atela kuwuzata kudi muntu wacheñi. Kulomba nikwiluka nyidimu yitunakuzata kukutukwasha kwiluka nyidimu yitukutwesha kuzata nawa hakumina ñovu jetu. Kudikehesha kukuletesha tukaani nyidimu yikwawu.

18. (a) Kudikehesha kukutukwasha kwiladi neyi atwinka mudimu wawuha? (b) Muntu wadikehesha wukuzatisha ñahi Aroma 12:3?

¹⁸ Neyi twiteja kuzata mudimu wawuha, chakutalilahu chaGideyona chatwanukishaña nawu tukutwesha kuzata chiwahi nawukwashu niwunlomboli waYehova. Wejima wetu atwileja “kwenda naNzambi nakudikehesha!” (Mika 6:8, NWT.) Dichi mpinji yejima yitukutambwilaña nyidimu yayiha, twatela kumulomba Yehova kulonda twiluki chinakutulejayi Mwizu dindi nimukuloñesha kwindi. Twatela kudikehesha kulonda tutweshi kwila yuma yanakukeñayi Yehova. Twanukeña netu ‘twalema’ muloña wakudizoza kwaYehova. (Mas. 18:35) Neyi tudikehesha kudi Nzambi chikutukwasha kubula kutoñojoka netu twalema kubadika amakwawu hela netu tudi amukunkulwayi.—Tañenu Aroma 12:3.

19. Muloñadi chitwatelela kwikala adikehesha?

¹⁹ Muntu wadikehesha wamwinka Yehova kalemesha katelela muloña diyi Nleñi nawa Mwanta Wakuleña Kwejima. (Chim. 4:11) Kudikehesha kwatukwashaña kuzata chiwahi nikumona mudimu wutunakuzata netu wunashikili mukuloñesha kwaNzambi. Kudikehesha kwatukwashaña kwikala ashinshika nikuleta kunuñañana hakachi kawantu jaYehova. Kudikehesha kwatuleñelaña kumona akwetu netu atubadika nawa kwatukwashaña kwikala ababala kulonda tubuleña kukoña yiluwa. Hamuloña waniyi yuma, kudikehesha kwalema chikupu kudi antu jaNzambi nawa Yehova walemeshaña antu adikehesha. Indi neyi tudi mukukala? Chibaaba chinalondelihu chikutukwasha chitwatela kwikala adikehesha.