1, 2. Antu amavulu amonaña ñahi mudimu wawu?

KAKAVULU antu adilumbululaña kwesekeja nanyidimu yazatañawu. Amavulu, atuumbakanaña muloña wamudimu hela chifulu chikwetiwu. Mumatuña amakwawu, neyi muntu nakukeña kudiluka namukwawu, wasambilaña kwihula nindi, “Mudimwinyi wumwazataña?”

² Mpinji yikwawu Bayibolu yatenaña antu kwesekeja namudimu wazatileñawu. Yamutena “Matewu mukwakutambula nyisonku”; “Shimona, mukwakuloomba yitembi”; ‘niLuka, ndotolu itwakeña.’ (Mat. 10:3; Yil. 10:6; Kol. 4:14) Amakwawu ayitena kwesekeja nanyidimu yakuspiritu hela kukooleka kwadiñawu naku. Twataña nsañu yaMwanta Davidi, kaprofwetu Elija nikapostolu Pawulu. Awa amayala alemesheli mudimu wayinkeliwu kudi Nzambi. Dichi neyi tukweti mudimu mukuloñesha, twatela kuwulemesha.

3. Muloñadi akulumpi chatela kudizishilawu atwansi? (Talenu mwevulu wakutachikilahu.)

³ Etu amavulu twakeña mudimu wutwazataña nawa twakeñaña kuwuzata haya nyaaka. Chawushona, kufuma  tuhu mumafuku aAdama, makiñu ejima akulaña nakuyisinsa kudi amakwawu. (Mukwa. 1:4) Munanu mafuku, iku kuhimpa kunateli kuleta kukala kwashiyashana kudi akwaKristu alala. Mudimu wawantu jaYehova wunatandi kwejima. Chitunakuzata nyidimu yayiha, kunakwinza njila yayiha yakuzatilamu nawa iyi njila yinabombelimu kuzatisha tekinoloji. Akulumpi amakwawu chinakuyikalila kwendela hamu naniku kuhimpa. (Luka 5:39) Hela chakwila amakwawu anakutwesha, atwansi akweti ñovu yakuzata kubadika akulumpi. (Yish. 20:29) Dichi, akulumpi akumwekesha kukeña neyi akwasha atwansi kudiloñesha kuzata nyidimu yikwawu.—Tañenu Masamu 71:18.

4. Muloñadi amakwawu chakañenyañawu kwinka amakwawu mudimu? (Talenu chikasha chinakuhosha nawu “Amakwawu Chabulilañawu kuhana nyidimu.”)

⁴ Chinateli kuyikalila amanakwetu adi nakukooleka kweneni mukuloñesha kudizisha atwansi. Amakwawu achinaña nawu akuyitambula kukooleka kukwetiwu. Amakwawu atoñojokaña nawu akuyitambula ñovu nawa atoñojokaña nawu atwansi hiyakutwesha kuzata neyi chazatañawuku. Amakwawu niwena nawu hiyakweti mpinji yakudizisha amakwawuku. Ilaña atwansi, atela kudizoza neyi anayinki wanyi kukooleka.

5. Tukuhanjeka malwihwinyi muchinu chibaaba?

⁵ Tuhanjekenu hanjila jiyedi kutalisha hakuhana nyidimu. Yatachi, akulumpi chinateli kukwashawu atwansi kuzata nyidimu nawa chumichi chalemenadi? (2 Tim. 2:2) Chamuchiyedi, muloñadi atwansi chatela kwikalilawu nayilwilu yayiwahi hampinji yinakukwasha amanakwetu eluka nyidimu nikudizila kudi wena? Tusambilenu kuhanjeka hadi Mwanta Davidi chakwashiliyi mwanindi kudiloñesha kuzata mudimu walema.

6. Mwanta Davidi wakeñeleña kwiladi, nawa Yehova wahosheli nindidi?

⁶ Hanyima yakutemoka hadi yaaka yayivulu, Davidi wekalili mwanta nawa washakamineña  mwitala dadiwahi. Chatiyiliyi kutama nindi kwadiña wanyi “itala,” hela tembeli, yahaniniwu kudi Yehova, wakeñeleña kutuña. Dichi wamulejeli kaprofwetu Natani nindi: “Tala ami nashakama mwitala danyisida hakwila chimbañu chachitiyañenu chaYehova chidi mumahina.” Natani wamwakwili nindi: “Ilaku chejima chidi mumuchima weyi muloña Nzambi wudi naneyi.” Hela chochu Yehova wahosheli mwacheñi. Wamulejeli Natani kuleja Davidi nindi: “Eyi kuntuñila itala dakushakama nehi.” Hela chakwila Yehova watwalekelihu kumukolesha Davidi nikumukiswila, Nzambi wahosheli nindi mwana kaDavidi Solomoni diyi wakatuña tembeli. Davidi welili ñahi?—1 Kush. 17:1-4, 8, 11, 12; 29:1.

7. Davidi welili ñahi namwamulejeliwu kudi Yehova?

⁷ Davidi walekeli wanyi kumukwasha, nakuchina nindi wakaya mpuhu wanyi chineli diwakatuña wanyi tembeli. Tembeli yatuñiliwu ayiteneneña nawu tembeli yaSolomoni, bayi yaDavidi. Hela chakwila Davidi waneñeli hamuloña wakubula kwila chuma chakeñeleñayi, wamukwashili Solomoni. Waloñesheli akwakuzata niyuma yakuzatisha yidi neyi yikuñu, wuneñu, siliva niwuru kushilahu nimbawu janyisida. Wamukolesheli Solomoni nindi :“Eyi mwanami, Yehova ekali naneyi wumonaña kuwaha wakatuñi itala daYehova Nzambi yeyi mwakuteneneniyi.”—1 Kush. 22:11, 14-16.

8. Davidi watela watoñojokelelidi nindi Solomoni nashikilimu wanyi, ilaña welilidi?

⁸ Tañenu 1 Kushindulula 22:5. Hadaha Davidi watoñojokeli nindi Solomoni washikililimu wanyi kuzata iwu mudimu walema. Muloña tembeli yadi kwikala ‘yeneni nankashi’ nawa Solomoni haniyi mpinji ‘wachidiña kansi nawa kanda apami.’ Ilaña, Davidi welukili nindi Yehova wukumukwasha Solomoni kuzata iwu mudimu wunamwinkiyi. Dichi Davidi washili maana hakumukwasha nawa waloñesheli yuma yayivulu yakuzatisha.

9. Akulumpi anateli kutiya ñahi kuwaha neyi anakwinka atwansi nyidimu yinakuzatawu? Shimunenu chakutalilahu.

⁹ Amanakwetu achikulumpi bayi atiya kutama neyi hiyakwinka amanakwawu atwansi nyidimu yazatañawu. Ilaña mudimu wendaña chiwahi neyi atwansi ayidizisha chakuzata nyidimu. Amanakwetu atondewa atela kutiya kuwaha neyi atwansi anadizishiwu ashikahu kuzata mudimu. Chakutalilahu, toñojokenu hadi tata yawantu wunakudizisha mwana kwendesha motoka. Mwana neyi wuchidi kansi, wukutalaña chinakwendeshayi tata yindi. Ilaña neyi mwana nakuli dehi, tata yindi wukumulumbulwilaña chinakwendeshayi. Neyi mwana  nashiki dehi hachipimu chakwendeshelamu motoka, wukutachika kwendesha iku tata yindi nakumuleja chakwila. Mpinji yikwawu akudihimpaña kwendesha, ilaña mukuhita kwampinji mwana diyi wukendeshaña nankashi neyi tata yindi nashinakaji. Nvwali wamuwahi watiyaña kuwaha neyi mwanindi yatachika kuzata nyidimu yazatañayi nawa wamutiyilaña wanyi ichima. Munjila yoyimu, akulumpi atiyaña kuwaha neyi adizisha atwansi kuzata nyidimu yamukuloñesha.

10. Mosi watiyili ñahi hakuya mpuhu nimudimu?

¹⁰ Akulumpi atela kwikala wanyi nalwisu. Talenu cheliliyi Mosi chelili antu amakwawu muchilombu chawaIsarela atachiki kuprofweta. (Tañenu Kuchinda 11:24-29.) Yoshuwa, nkwashi yaMosi wakeñeleña kuyikaanisha. Watela watoñojokeleña nindi amusawileña nikumudiwula Mosi. Ilaña Mosi wahosheli nindi: “Wunatiyi ichima hamujimba wamami? Neyi antu aYehova ejima adiñi atuprofwetu, ayishila spiritu yindi mutenowu o kuwaha!” Mosi welukili nindi Yehova walombweleña mudimu. Hakukaana kutambula mpuhu, Mosi wakeñeleña ambuña aYehova ejima kutambwila yawaana yaspiritu. Kufwana Mosi, komana twatiyaña kuwaha neyi amakwawu atambwila kukooleka kutunateli kutambwila?

11. Manakwetu wumu wahosheli nindidi hakuhana mudimu wazatileñayi?

¹¹ Makonu, kudi amanakwetu amavulu anazati nañovu hadi yaaka yayivulu nawa anadizishi amakwawu kuzata nyidimu yamaneni mukuloñesha. Chakutalilahu, amanakwetu aPeter azatili yaaka kubadika 74 mumudimu wampinji yejima, yaaka 35 ayizatilili hakasanji kamutayi kuEurope. Adiña akulumpi kuDipatimenti yaMudimu. Dichi Paul, manakwetu wachikansi wazatilili hamu nawaPeter hadi yaaka yayivulu, diyi wunakuzata iwu mudimu. Dichi aPeter chayihwiliwu chatiyiliwu haniku kuhimpika, ahosheli nawu, “Natiyaña kuwaha hakumona amanakwetu anadizishiwu kuzata nyidimu yamaneni nawa anakuyizata munjila yayiwahi.”

12. Chumanyi chitukudizila kudi Rehobowami?

¹² Hanyima yakwila Solomoni nafwi dehi, mwanindi Rehobowami wekalili mwanta. Rehobowami chakeñeleñayi wukwashu hakuzata mudimu windi, wehwili akulumpi. Ilaña wakaanini wukwashu wawu! Dichi, watiyilili mwamulejeliwu kudi akwawu atwansi akulilileñayi nawu ekalili atulama twindi. Yuma yafuminimu yadiña yatama chikupu. (2 Kush. 10:6-11, 19) Tukudizilaku kwodi? Chachiwahi kwihula nikuzatisha kuleja kwawakulumpi, akuluka yitembi. Hela chakwila atwansi hiyatelela kulondela njila yayikulu yakwililamu yumaku, ilaña hiyatela kunyakala kukaana kufumba kwawakulumpiku.

13. Atwansi anateli kuzatila ñahi hamu nawakulumpi?

¹³ Atwansi amakwawu anakulombola mudimu mudi niakulumpi akuluka yitembi. Hela chakwila anamwinki wukulumpi, chikuwaha neyi atiyililaña munakuhoshawu akulumpi akuluka yitembi neyi anakufuukula hansañu. Paul, itwahoshahu dehi, wasinsili aPeter wukulumpi kudipatimenti yimu yahaBeteli wahosheli nindi, “Nadiña nakwila mwanlejeleñawu aPeter nawa nalejeleña amakwawu mutwazatilileña kuyitiyilila.”

14. Chumanyi chitwatela kudizila kukunuñañana kwadiña hakachi kaTimotewu naPawulu?

¹⁴ Timotewu, mukwenzi weyala, wazatilili hamu naPawulu hadi yaaka yayivulu. (Tañenu Afwilipi 2:20-22.) Pawulu wayisonekeleli  akwaKorinda nindi: “Dichi chinaleteshi nimutemeshi Timotewu kudi enu, muloña himwanami inakeña nawa washinshika mudi Mwanta. Wakayanukisha njila jami jinelilañamu yuma mumudimu waKristu Yesu, neyi chochinatañishaña kwejima muchipompelu-hichipompelu.” (1 Kor. 4:17) Ichi chinakumwekesha nawu aPawulu naTimotewu azatilileña hamu. Pawulu wadiña nakumudizisha Timotewu njila jindi jelilileñamu “yuma mumudimu waKristu.” Timotewu wadizili chikupu nawa adikundili naPawulu nawa Pawulu welukili chikupu nindi Timotewu wukayakamena chikupu kuspiritu antu amuKorinda. Aeluda makonu atela kumwimbujola kuhitila mukudizisha akwawu muchipompelu kulombola.

15. Neyi yuma yinahimpi, kufumba kwaPawulu kudi akwaKristu amuRoma kunateli kutukwasha ñahi?

¹⁵ Tunakushakama mumpinji yakala. Chibalu chakuloñesha kwaYehova chahamaseki chinakuyilaku hampidi muyuma yayivulu, dichi yuma yalema yinakuhimpika. Neyi iku kuhimpika kutuwana, twikalenu adizoza, nakufwila yuma yamutiyishaña Yehova kuwaha bayi etu aweni. Kwila mwenimu kwaletaña kunuñañana. Pawulu wasonekeleli akwaKristu amuRoma nindi: “Inakuleja muntu-himuntu hakachi kenu nami, bayi yatoñojoka nindi walema kubadika chekalayiku, ilaña muntu-himuntu yatoñojokeña kwesekeja nachekalayi kushindamena hachikuhwelelu chamwinkawu kudi Nzambi. Neyi chochitwekala nayiidi yayivulu kumujimba wumu, ilaña yiidi yejima hiyakalakalaña mudimu wowumuku, dichi chitwekala ninetu nawa, hela tudi amavulu, tudi mujimba wumu mudi Kristu.”—Rom. 12:3-5.

16. Akulumpi, atwansi niambanda asumbuka anateli kwila ñahi kulonda mukuloñesha kwaYehova mwikali kuwunda nikunuñañana?

¹⁶ Hichikweti muloña nachidi yumaku, wejima twatela kuzata nañovu kutwala Wanta waYehova hambidi. Enu akulumpi, dizishenu atwansi nyidimu yimwazataña. Enu amanakwetu atwansi, itejenu nyidimu yanayinkiwu, dikeheshenu nawa tiyililenuña nakalemesha mwanakuyilejawu akulumpi. Enu ambanda mwasumbuka, imbujolenu ñoda Akwila, Prisila, wendeleña hamu nanfumwindi nakumukwasha nihahimpili yuma.—Yil. 18:2.

17. Yesu welukili nindi atumbanji twindi akeladi, nawa wayidizishili kwiladi?

¹⁷ Yesu wemikili chakutalilahu chachiwahi hakudizisha amakwawu kuzata nyidimu. Welukili nindi mudimu windi wahamaseki wukamana nawa amakwawu akatwalekahu kuwuzata. Hela chakwila atumbanji twindi adiña awanina wanyi, wayikuhweleleli nakuyileja nindi akazata nyidimu yamaneni kubadika yazatiliyi. (Yow. 14:12) Wayidizishili chikupu nawa atandishili nsañu yayiwahi mukayi hayina mpinji.—Kol. 1:23.

18. Yumanyi yitunakutalila kumbidi, nawa yumanyi yitwatela kwila chayinu mpinji?

¹⁸ Hanyima yakuhana wumi windi neyi mulambu, Yesu amusañwili nakuya mwiwulu mwamwinkeliwu nyidimu yayivulu niñovu ‘yabadika chikupu jinfulumendi jejima, wuswa wejima, ñovu jejima, mawanta antuumba ejima.’ (Efwe. 1:19-21) Neyi tufwa ashinshika henohu Amagedoni kanda, akatusañula nakwiñila mwituña dadiha dakuloña mukekala nyidimu yayivulu yayiwahi. Ilaña chayinu mpinji, kudi mudimu walema wutwatela kuzata, dikwila nawu kushimwina nsañu yayiwahi nikwilisha atumbanji. Dichi wejima wetu, atwansi niakulumpi, tutwalekihu ‘kwikala nayuma yayivulu yakuzata mumudimu waMwanta.’—1 Kor. 15:58.