NSAÑU yamuBayibolu yidi haKutachika 22:6 yahoshaña nawu, hakwila yaloñeshi kuya kwakulehi nakuhana mulambu, Abarahama “wanoneni yibalu yamulambu wakushita, watwikili mwanindi Isaka; wasendeli muchikasa nikesi, nimpoku; hiyakuya hamu mwayedi wawu.”

Kwosi hashimunawu muNsona chabutwileñawu antu kesi kushankulu. Neyi kukunka kunsañu yitunateni, nhoshi wumu watoñojokaña nindi wakwatishili kesi “kabutukileña njila yejima yendeliyi” Abarahama niIsaka. Ilaña chuma chitunakukeña kwiluka hichuma chazatishileñawu hakubutula kesi.

Amakwawu niwena nawu, chayikalileña nankashi antu kushankulu kubutula kesi. Chayipeleleña kookola kesi hadi antuñi nawu chatela atachiki kukeña njila yakubutwilamu kesi. Ankuluñaña amavulu niwena atoñojokaña nawu Abarahama wasendeli chuma, hekwawu chadiña neyi ndehu kwakukasila ileñi, mwadiña malasha akesi hela makala okweliwu hakesi kabutwiliwu ifuku dekwawu. (Isa. 30:14) Makala amuchidiwu adiña aswayi kuzatisha muloña ashileñahu hohu tusonsu nakubutula kesi hamateeku.