1. Yehova waleñeli antu nawuswanyi?

YEHOVA waleñeli antu nawuswa wawuwahi. Watuleñeli nawuswa wakutoñojoka kulonda twilukeña chakumanisha kukala nikufuukula yuma yitukela kumbidi. (Yish. 2:11) Watwinka ñovu yakwila yuma yitunafuukuli nikuzata nañovu kushikija mutunakukeña kwila. (Fwi. 2:13) Watuleña cheñi nachinleji chamuchima chatukwashaña kwiluka yuma yayiwahi niyatama kulonda tubuleña kwila yuma yatama nikuzatilahu neyi tuluwañesha.—Rom. 2:15.

2. Yehova wakeñaña nindi tuzatisheña ñahi wuswa wetu?

² Yehova wakeñaña nindi tuzatisheña wuswa wetu munjila yayiwahi. Muloñadi? Muloña watukeña nawa weluka nindi twekalaña namuzañalu neyi tuzatisha iyi yawaana. Yehova watulejaña kuzatisha wuswa wetu munjila yayiwahi kuhitila Mwizu dindi. Chakutalilahu, muNsona yachiHeberu twatañañamu netu:  “Yitoñojoka yamukwakudikita yatwala kwamukuvulisha hohu”; nawa “yuma yejima yinawani chikasa cheyi kwila, ilaku nañovu jeyi.” (Yish. 21:5; Mukwa. 9:10) Nsona yachiGiriki niyena yahosha nawu: “Neyi twikala nampinji yakwila mwenimu, dichi tukoñeña yuma yayiwahi kudi antu ejima”; nawa “kwesekeja nachawaana chatambulayi muntu-himuntu, yachizatisheña hakudikalakela wumu namukwawu.” (Ñal. 6:10; 1 Pet. 4:10) Mwamweni, Yehova nakukeña nindi twileña yuma yikutukwasha nawa yikukwasha amakwawu.

3. Antu anateli kubula kwila yumanyi?

³ Hampinji yoyimu, Yehova weluka nindi antu adana ñovu yakwila yuma yejima. Tudana ñovu yakufumishahu kubula kuwanina, nshidi nikufwa nawa kwila tuleja antu chatela kwilawu nehi, muloña niwena akweti wuswa wakudifuukwila. (1 Anya. 8:46) Hela chakwila tukwiluka yuma yayivulu, tunateli kwesekana wanyi naYehova.—Isa. 55:9.

4. Tukuhanjekadi muchinu chibaaba?

⁴ Muyuma yejima, twatela kushindamena hawunlomboli waYehova, kumukuhwelela netu wukutukwasha nikutwilila yuma yitukukañanya kwila. Hampinji yoyimu, twatela kuzata nañovu kumanisha kukala nikukwasha amakwawu. (Tañenu Masamu 37:3.) Munjila yikwawu, twatela ‘kumukuhwelela Yehova nawa twileña yayiwahi’; nawa twatela kwikala ‘ashinshika.’ Hakwila twili mwenimu, twayenu tutali chitunateli kudizila kudi Nowa, Davidi niambuña aNzambi ashinshika ashindameneni hadi Yehova nawa azatilili hakukala kuyadiñawu naku. Neyi chitukumona, mwabombeleli yuma yadi kubula kwilawu niyadi kwilawu nikuyila mujila yaloña.

5. Nowa washakamineña mwituña damuchidinyi?

⁵ Nowa washakamineña mwituña ‘mwenzeli madombu’ niyilwilu yatama. (Kutach. 6:4, 9-13) Welukili nindi ifuku dimu Yehova wukajilumuna kaayi katama. Hela chochu, Nowa watiyileña kutama naniyi yilwilu yatama. Ilaña Nowa welukili yuma yadi kutweshayi kwila niyadi kukañanyayi kwila.

6, 7. (a) Yumanyi yadi kukañanyayi Nowa kwila? (b) Tunadifwani ñahi naNowa?

⁶ Yuma yadi kukañanyayi Nowa kwila: Hela  chakwila Nowa washimwinini nsañu yaYehova yakusoñamisha, hadi kukakeja antu atama kwiteja iyi nsañu hela kuletesha Dibaji kwinza swayiku. Nowa wamukuhweleleli Yehova nindi wukafumishahu yuma yatama nawa nindi wukela mwenimu hampinji yatelela.—Kutach. 6:17.

⁷ Ninetu tunakushakama mukaayi mudi yuma yatama, nawa tuneluki netu Yehova washiika nindi wakakijilumuna. (1 Yow. 2:17) Chayinu mpinji kwila tukakeja antu kwiteja nsañu “yaWanta yayiwahi” nehi. Nawa kwosi chuma chitunateli kwila kulonda “lukadi lwasweja” lutachiki swayi. (Mat. 24:14, 21) Kufwana Nowa, twatela kwikala nachikuhwelelu chakola, nakukuhwelela netu Nzambi keña yafumishihu yuma yatama. (Mas. 37:10, 11) Tuneluki netu Yehova waketeja wanyi aka kaayi kutwalekahu kubadika chinakukeñayi.—Hab. 2:3.

8. Nowa washili ñahi maana hayuma yadi kutweshayi kwila? (Talenu mwevulu wakutachikilahu.)

⁸ Yuma yadi kutweshayi Nowa kwila: Chatela yazeyi nayuma yadi kukañanyayi kwila, Nowa washili maana hayuma yadi kutweshayi kwila. Chineli wadiña “mukwakushimwina kuloña,” Nowa washimwinini nsañu yamwinkeliwu yakusoñamisha nakashinshi. (2 Pet. 2:5) Chakubula nikujina, kwila mwenimu kwamukwashili Nowa kwikala nachikuhwelelu chakola. Kubombela hakushimwina, wazatishili cheñi wuswa windi wakutoñojoka hakuzata mudimu wamwinkeliwu kudi Nzambi wakutuña watu.—Tañenu Aheberu 11:7.

9. Tunateli kumwimbujola ñahi Nowa?

⁹ Neyi chocheliyi Nowa, twafwilaña ‘kwikala nayuma yayivulu yakuzata mumudimu waMwanta.’ (1 Kor. 15:58) Iyi nyidimu yinabombelimu kutuña nikuwahisha maluña akudifukwila, kukwasha hakupompa kwañinza nikwamaluña hela kuzatila hakasanji kamutayi hela kakubalumwinahu nyikanda. Kubombelahu, twadikitaña mumudimu wakushimwina muloña tweluka netu iwu mudimu watukoleshaña. Muhela wumu washinshika wahosheli nindi: “Neyi wuhosha nawantu amakwawu hayuma yakaleta Wanta waNzambi, [wu]kumona neyi adana kuchiñeja nawa amonaña nawu kukala kwawu kukamana wanyi.” Mwamweni, kushimwina  kwatukwashaña kukuhwelela chikupu yuma yitwachiñejaña nikutwalekahu kutemuka lufuchi lwakuwumi.—1 Kor. 9:24.

10. Davidi welilidi?

¹⁰ Yehova wamuteneni Davidi nindi “iyala [watiyiliyi] kuwaha mumuchima.” (Yil.13:22) Davidi wadiña washinshika muchihandilu chindi chejima. Hela chochu, mpinji yikwawu wakoñeleña nshidi yahamesu bwi-i. Welili wuvumbi naBatisheba. Nawa wakeñeleña nikusweka iyi nsañu kuhitila mukumujahisha Uriya kunjita. Davidi watemesheli mazu akumujaha Uriya mumukanda wasonekeliyi nawa Uriya yomweni diyi wawusendeli! (2 Sam. 11:1-21) Nshidi yaDavidi yasolokeli hatooka. (Maku 4:22) Chiyasolokeli, Davidi welilidi?

11, 12. (a) Yumanyi yadi kukañanyayi Davidi kwila hanyima yakuvulumuna? (b) Neyi tubalumuka mumuchima, tukukuhwelela netu Yehova wukutwililadi?

¹¹ Yuma yadi kukañanyayi Davidi kwila: Davidi wadi kufumishahu wanyi yuma yeliliyi. Nawa wadi kutemuka yuma yafumini muyiluwa yakoñeliyiku. Yuma yikwawu yafuminimu wadi kushakama nayu mukuhanda kwindi kwejima. (2 Sam. 12:10-12, 14) Dichi wateleli kwikala nachikuhwelelu. Wateleli kukuhwelela nindi neyi yabalumuka mumuchima chikupu Yehova wukumwanakena nikumukwasha kuumika kukala kwadi kufumamu.

¹² Chineli wejima wetu twawanina wanyi, twavulumunaña. Nshidi yikwawu yamaneni kubadika yikwawu. Mpinji yikwawu tunateli wanyi kujima nshidi yetu. Tukukabakanaña hohu nayuma yafumañamu. (Ñal. 6:7) Ilaña twakuhwelela chahoshayi Nzambi nindi neyi tubalumuka Yehova wukutwanakena, wukutukwasha kuumika kukala hela chakwila yetu tunakuleti.—Tañenu Isaya 1:18, 19; Yilwilu 3:19.

13. Davidi wawahishili ñahi wubwambu windi?

¹³ Yuma yadi kutweshayi Davidi kwila: Davidi wetejeli Yehova kumukwasha kuwahisha wubwambu windi nayena. Welili mwenimu kuhitila mukwiteja kufumba kwamufumbiliwu kudi Kaprofwetu waYehova Natani. (2 Sam. 12:13) Davidi walombeli cheñi kudi Yehova, nakushimuna nshidi jindi nawa wamulombeli Yehova chakufuma hamuchima kumwanakena. (Mas. 51:1-17) Chatela yatwalekihu kuneña nanshidi yakoñeliyi, Davidi wadizilili kuyiluwa yindi. Wafuntishilihu wanyi nshidi yakoñeliyi. Wadiña washinshika kushika nimpinji yafwiliyi; niyinu mpinji Yehova wuchidi kwanuka kashinshi kindi.—Heb. 11:32-34.

14. Tukudizilaku kwodi kudi Davidi?

¹⁴ Tukudizilaku kwodi kudi Davidi? Neyi tukoña nshidi yahamesu bwi-i, twatela kubalumuka chikupu mumuchima nikulomba kwanakena kudi Yehova. Twatela kushimuna nshidi jetu. (1 Yow.1:9) Twatela cheñi kudimona nawa eluda akutukwasha kuspiritu. (Tañenu Yakoba 5:14-16.) Neyi tulondelaña ntanjikilu yaYehova twamwekeshaña netu twakuhwelela netu wukuutuka nikutwanakeña. Dichi twatela kudizila kuyiluwa yetu, kusha maana hakumukalakela Yehova nikutalila yuma yatushiikayi.—Heb. 12:12, 13.

15. Tukudizilaku kwodi kudi Hana?

¹⁵ Munateli kwanuka ambuña aNzambi ashinshika akunyima amukuhweleleli Yehova. Chakutalilahu, Hana wadi kumanisha wanyi kukala kwakwikala nshiinta. Ilaña wamukuhweleli  Yehova nindi wukumukundeja, dichi watwalekelihu kudifukula hatabanaka nikulomba chakufuma hamuchima. (1 Sam. 1:9-11) Komana kwila tudizilaku nehi? Neyi twakata hela tudi nakukala kudi kwejima kutukukañanya kumanisha, twombilaña kwakama kwetu hadi Yehova nakukuhwelela netu wukutwakamena. (1 Pet. 5:6, 7) Nawa twazataña nañovu kulonda tuheteleñamu mukupompa kwawakwaKristu niyuma yikwawu yakuspiritu.—Heb. 10:24, 25.

16. Anvwali anateli kudizilaku kwodi kudi Samweli?

¹⁶ Indi anvwali ashinshika akweti anyana ahañewa? Samweli wakanjikijileña wanyi anyanindi akula dehi kutwalekahu kwikala ashinshika kunshimbi jayidizishiliyi. (1 Sam. 8:1-3) Washili yuma yejima mumakasa aYehova. Hela chochu, Samweli watwalekelihu kwikala washinshika nikumutiyisha Tata yindi wamwiwulu Yehova kuwaha. (Yish. 27:11) Makonu, chuma chamuchidiwu chinakuyimwekena nianvwali akwaKristu. Eluka nawu kufwana nvwali wamuchishimu chamwana wajimbeli, Yehova watambwilaña akwanshidi abalumukaña mumuchima. (Luka 15:20) Hampinji yoyimu, awa anvwali azataña nañovu kulonda ekali ashinshika kudi Yehova, nakukuhwelela nawu yakutalilahu yawu yikukwasha anyanawu kufunta mwiyinda.

17. Muloñadi chakutalilahu chamumbanda nfwila kazweñi chichatukoleshelaña?

¹⁷ Toñojokenu cheñi hadi mumbanda nfwila kazweñi wamumafuku aYesu. (Tañenu Luka 21:1-4.) Kwosi chuma chadi kwilayi nayuma yatama yamwekeneña hatembeli. (Mat. 21:12, 13) Nawa kwosi chuma chadi kwilayi kulonda yekali nachihandilu chachiwahi. Ilaña wahanini chakufuma hamuchima “tumawayawaya twanyanya tuyedi,” nawa diwu “adiñayi nawu akuhandilamu.” Iwu mumbanda washinshika wamukuhweleleli Yehova nawa welukili nindi neyi yatwamijaku yuma yakuspiritu, wukumwinka yuma yakumujimba. Chikuhwelelu chaniwu nfwila chamusañumwini kukwasha ntanjikilu yakudifukula kwalala. Munjila yoyimu, twatela kukuhwelela netu neyi tutwamijaku Wanta, Yehova wukutwinkaña yuma yitunakukeña.—Mat. 6:33.

18. Shimunenu chakutalilahu chamanakwetu watwalekelihu kwikala washinshika.

¹⁸ Akwetu akwakwitiya amavula makonu niwena amukuhwelela Yehova nawa anakuzata nañovu. Shinshikenu manakwetu wejina daMalcolm, watwalekelihu kwikala washinshika sampu nichafwiliyi mu 2015. Hayaaka yejima yamukalakeleliwu Yehova wena niamwini kwawu, amweneña kukala. Ahosheli nawu “chihandilu mpinji yikwawu chakala, wukwiluka niwanyi yuma yikumwekana. Ilaña Yehova wakiswilaña antu ashindamenaña hadi yena.” A Malcolm ahosheli nawudi? “Lombenuña kulonda mutwesheña kuzata mumudimu waYehova hakumina ñovu jenu. Shenu maana hayuma yimukutwesha kwila bayi hayimukukañanya.” *

19. (a) Muloñadi nsona yetu yachaaka cha 2017 chiyinateleli? (b) Mukuzatisha ñahi nsona yachaaka ya 2017 muwumi wenu?

¹⁹ Tuneluki netu yuma yikukalilañaku chineli kanu kaayi ‘kanakutaminaku.’ (2 Tim. 3:1, 13) Dichi twatela wanyi kusha maana hayuma yatama yinakumwekana. Ilaña twatela kumukuhwelela chikupu Yehova nikuzata hakumina ñovu yetu. Nsona yetu yachaaka cha 2017 yinateleli muloña yinakuhosha nawu: ‘Mukuhweleli Yehova nawa ilaña yayiwahi’!—Mas. 37:3.