Munateli Kwikala Adikehesha Neyi Anayeseki
“Endaku naNzambi yeyi nakudikehesha!”—MIKA 6:8, NWT.
TUMINA: 48, 95
1-3. Indi kaprofwetu wabula ijina wafumini kuYuda welilidi, nawa mwafuminidi? (Talenu mwevulu wakutachikilahu.)
MUMAFUKU adiña nakuyuula Mwanta Yerobowami, Yehova watemesheli kaprofwetu kufuma kuYuda kulonda yashimuni nsañu yawunsompeshi kudi mwanta wawaIsarela wakasekesha. Ona kaprofwetu wadizoza washimwini mazu aNzambi, Yehova wakiñili ambuñindi kudi kukuzuwa kwaYerobowami.—1 Anya. 13:1-10.
2 Chafuntileñayi, iwu kaprofwetu wadibulakeni nakashinakaji wakuBeteli. Iwu muntu watwambili nindi niyena hikaprofwetu kaYehova. Wamudimbili kubula kwovwahila nshimbi jaYehova jakubula ‘kudya yakudya hela kunwa menji hela kufunta njila yenjililiyi.’ Yehova watiyili kutama. Dichi, chafuntileñayi, mutupa wamuwanini hanjila nakujaha kaprofwetu kaYehova.—1 Anya. 13:11-24.
3 Muloñadi kaprofwetu wadiña wadikehesha chadinkeliyi wanta nakwila mwamulejeliwu kudi ona kashinakaji? Bayibolu yashimuna wanyi. Ilaña wajimbeli chikupu nindi watela ‘kwenda naNzambi yindi nakudikehesha.’ (Mika 6:8.) MuBayibolu, kwenda naYehova kwatalisha mukumukuhwelela, kuhakwilaku chiyuulu chindi nikulondela munakutulejayi. Muntu wadikehesha welukaña chikupu nindi watela kutiyañanaña chikupu naTata yindi wabadika nawa wukweti kukeña. Kaprofwetu wateleli kumwihula Yehova kulonda yamulumbulwili chachiwahi, ilaña Nsona yamwekeshaña nawu wehwili wanyi. Mpinji yikwawu, twafuukulañahu yuma yakala nawa twelukaña wanyi njila yaloña. Kulomba wukwashu waYehova nakudikehesha kukutukwasha kubula kutonda njila yinateli kutwijahisha.
4. Tukudizadi muchinu chibaaba?
4 Muchibaaba chinafumiku, twadizili kudikehesha chikwalemena kudi akwaKristu nichitwatela kudikehesha. Hanu dinu, yumanyi yinateli kuletesha muntu kubula kudikehesha? Nawa tunateli kwikala ñahi nanichi chilwilu chachiwahi kulonda twikaleña adikehesha hela anatweseki? Hakwila twakuli awa malwihu, tukushinshika hayuma yisatu yinateli kuletesha tubuli kudikehesha nawa tukumona chitunateli kwila.—Yish. 11:2.
NEYI YUMA YINAHIMPIKI
5, 6. Bazilayi wamwekesheli ñahi nawu wadikehesha?
5 Neyi yuma hela mudimu wuhimpa tunateli kukañanya kwikala adizoza. Chelili Davidi yamwili Bazilayi wadiña nayaaka 80 yeteji kushakama muchipañu, Bazilayi watoñojokeli nindi anamulemeshi chikupu. Neyi wetejeli kushakama naDavidi muchipañu wadi kudikundaña namwanta mpinji yejima. Ilaña, Bazilayi wakaanini. Muloñadi? Muloña wawushinakaji, wamulejeli Davidi nindi hakeñeleña kumwinka mwanta chiteliku. Bazilayi wamulejeli nindi mwanta yasendelimu Chimihami, hadaha wadiña mwanindi.—2 Sam. 19:31-37.
6 Kudikehesha kwamukwashili Bazilayi kufuukula chiwahi. Wakaanini kuya naDavidi muloña wakeñeleña kushakama kwamwena muwushinakaji bayi neyi hadi kutwesha kuzataku. Welukili nawa wetejeli nindi wazeya dehi muloña wakukula. Hakeñeleña kwikala nanyidimu yayivulu yadi kukañanyayi kwilaku. (Tañenu Añalija 6:4, 5.) Ilaña neyi tukukinka manuñu hachifulu, mpuhu hela kutuumbakana, tukutachika kudivwimba, kwikala nayilwilu yakudibecha nawa mukuhita kwampinji chakatuneñesha. (Ñal. 5:26) Ilaña, antu adikehesha etejaña akwawu kuyikwasha kulonda amulemeshi Nzambi nawa adishañaku kulonda akwashi akwawu.—1 Kor. 10:31.
7, 8. Kudikehesha kwatukwashaña ñahi kubula kudikuhwelela?
7 Muntu neyi wudi nakukooleka kweneni wekalaña nawuswa chikupu nawa nateli kubula kudikehesha. Chelili Nehemiya yatiyi yihuñu yamweneñawu antu muYerusalema, walombeli chikupu kudi Yehova. (Nehe. 1:4, 11) Yehova wamukwashili chelili Mwanta Aratasheshe yamutondi Nehemiya kwikala ñuvulu weluña. Hela wadiña nachifulu cheneni nimaheta niwuswa, Nehemiya hashindameneni hañovu niyuma yelukiliyiku. Wendeleña naNzambi. Wamukeñeleña Yehova kuhitila mukutaña Nshimbi jaNzambi kulonda yamulomboli. (Nehe. 8:1, 8, 9) Nehemiya hayandishileña antuku, ilaña, wayikalakeleleña chiwahi.—Nehe. 5:14-19.
8 Chuma cheliliyi Nehemiya chikwatukwashaña kudikehesha neyi mudimu wunahimpiki hela atwinkelihu kukooleka kukwawu. Neyi eluda wukushindamena hayuma yelukayi, wukutachika kuzata mudimu wachipompelu chakadi kusambila kumulejamu Yehova mukulomba. Amakwawu asambilaña Yishimu 3:5, 6.) Chineli tudi amwitala daNzambi, twelukaña chakuzata nyidimu yetu muchisaka hela muchipompelu bayi neyi kwikala namuchima wakufwila chifulu cheneniku.—1 Tim. 3:15.
kuwana mwakwilila dinu hiyakulomba kudi Yehova nawu yakiswili munafuukuliwu. Munakutoñojoka nenu muntu wamuchidiwu wadikehesha? Muntu wadikehesha wanukaña nindi wakehelamu kudi Nzambi nikukooleka kukwetiyi munkeñelu yaNzambi. Twatela kwanuka netu twatela wanyi kudinka wanta hawuswa watwinkawu. Sweje-e neyi tudi nakukala kwaswayi kumanisha, twatela kubabala tubuli kudikuhwelela. (TañenuNEYI ANAKUTWINKA NYILOÑA HELA KUTUHAMEKA
9, 10. Indi kudikehesha kwatukwashaña ñahi kuumika neyi anatuluwañeshi?
9 Mpinji jikwawu chakalaña kuwundisha muchima neyi anakutuhoshola hayuma yitunabuli kwila. Hana wadilileña muloña waPenina muhadi nindi wamukabishileña. Nfumwa Hana wamukeñeli, ilaña wadiña nshinta. Ifuku dimu, Hana walombeleña mutabanaka, Kapristu Muneni Eli watoñojokeli neyi Hana nasheti. Waluwañesheli. Ilaña, Hana wadikehesheli nawa wadifwomweni chakwila wamwakwili Eli nakalemesha. Kulomba kwindi kwakufuma hamuchima akusoneka muBayibolu. Hikulomba kwachikuhwelelu, kuhameka nikusakilila.—1 Sam. 1:5-7, 12-16; 2:1-10.
10 Kudikehesha kwatukwashaña cheñi ‘kwimika mushindu kutama kuhitila mukwila yuma yayiwahi.’ (Rom. 12:21) Mudinu ituña daSatana yuma yakalaña, dichi twatela kubabala kulonda tubuleña kulendumoka nayilwilu yawantu atama. (Mas. 37:1) Neyi manakwetu hela muhela wakuspiritu natuluwañeshi, twaneñaña nankashi. Ilaña muntu wadikehesha wamwimbujolaña Yesu. Bayibolu yahoshaña nawu, “Chadiña nakumutukawu, yena hafuntishili cheñi matukaku . . . , ilaña wadikunjikili yomweni kudi Owu wasompaña mwaloña.” (1 Pet. 2:23) Yesu welukili nindi Yehova hohu diyi watela kutendana. (Rom. 12:19) AkwaKristu niwena ayileja kudizoza bayi “mufuntisha katama kudi muntu wunayili katamaku.”—1 Pet. 3:8, 9.
11, 12. (a) Kudikehesha kwatukwashaña ñahi neyi amanakwetu anakutuhameka? (b) Tunateli kumwekesha ñahi kudikehesha munvwalilu nimumwekenu nimuyilwilu yetu?
11 Tunateli kutachika kudinka wanta neyi antu atachika kutuhameka. Toñojokenu hañakwilu yayiwahi yaEsita chiyafwomweni kukala kwejima. Wadiña mumbanda walubanji nankashi nawa hachaaka-hachaaka amwinkeleña yuma yayiwahi nankashi. Wahanjikileña cheñi hefuku-hefuku nawatunkaña amuChiyuulu chawaPeresi wejima afwilileña nawu mwanta yayimoni kuwaha. Ilaña, wadiwunjikili nawa wahosheleña nakalemesha. Watwalekelihu kudikehesha nicheliliyi mwanta yamutondi kwikala mwadi.—Esita 2:9, 12, 15, 17.
Komana nvwalilu nimmwekenu yetu yamwekeshaña kalemesha kudi Yehova niakwetu, tahindi yamwekeshaña nawu twadikehesha wanyi? (Talenu paragilafu 12)
12 Kudikehesha kwatukwashaña kulemesha akwetu ninetu aweni kuhitila munvwalilu nimummwekenu yetu. Chatela tutachiki kuditiya hela kwila yuma yimu yikuletesha antu atulemesheña, twatela kumwekesha ‘spiritu yakuwunda nikwovwaha.’ (Tañenu 1 Petulu 3:3, 4; Yere. 9:23, 24) Mukuhita kwampinji, twakadimwekesha chitwekala muyilwilu yetu. Chakutalilahu, tukutachika kumwekesha yilwilu yimu yinakumwekesha nawu twakeña nyidimu yikwawu yitukweti, tweluka yuma yayivulu, hela twadiluka chikupu nawamanakwetu alombolaña. Hadaha, tukutachika kuhosha yuma chakwila antu akutachika kutuhameka hayuma yitwazatili nawakwetu. Yesu niyena watwimikila chakutalilahu chachiwahi. Yuma yayiwahi yikwawu yahosheliyi hayifumishileña hela hiyakundamini kuNsona yachiHeberuku. Wahosheli muniyi njila kulonda antu eluki nawu yuma yahosheleñayi yafumineña kudi Yehova bayi chatoñojokeleñayiku.—Yow. 8:28.
NEYI KUDI YUMA YITUNAFUUKULI
13, 14. Kudikehesha kwatukwashaña ñahi kufuukula chiwahi?
13 Tunateli kubula kudikehesha neyi kudi yuma yitunakukeña kwila. Hampinji yashakamineñayi kapostolu Pawulu muKesareya, kaprofwetu Agibusa wamulejeli nindi neyi wukuya nindi kuYerusalema, akumukasa. Hadaha akumujaha. Chumichi, chakojejeli amanakwindi hiyakumulembelela Pawulu kubula kuya. Hela chochu, Pawulu hahuñumukili nanawa mazuku. Chumichi hichamuletesheli yasweji kudikuhwelela hela kufwa mutentuku. Washindameneni chikupu hadi Yehova nawa wadiloñesheli kuzata mudimu windi kwejima kwadi kumwitejayi Yehova kumutemesha. Hakutiya awa mazu, amanakwetu alekeli kukaana mwafuukwiliyi Pawulu kuya kuYerusalema.—Yil. 21:10-14.
14 Kudikehesha kunateli kutukwasha cheñi kufuukula chiwahi hela chakwila hitukutwesha kwiluka hela kwolola yuma yikufumamuku. Chakutalilahu, neyi twiñila mumudimu wampinji yejima, tukela ñahi neyi tukata? Indi neyi anvwali jetu ashinakaja dehi anakukeña nawu tuyihembeña? Tukutwesha ñahi kudihemba mudinu ituña datama? Hitukutwesha kuwana ñakwilu yanawa malwihu hela chakwila tukulomba hela kusandujola chamuchidinyi. (Mukwa. 8:16, 17) Kumukuhwelela Yehova kukutukwasha kwiluka nikwiteja netu twakuminamu. Hanyima yakusandujola, kwihujola nikulomba kudi Nzambi, twatela kuzatilahu kwesekeja nachinakutulombola spiritu yaNzambi. (Tañenu Mukwakutañisha 11:4-6.) Yehova nateli kukiswila chuma chitunafuukuli hela nateli kutukwasha chachiwahi kufuukula mwacheñi.—Yish. 16:3, 9.
CHITWATELA KUDIKEHESHA
15. Kutoñojoka hadi Yehova kwatukwashaña ñahi kwikala adizoza?
15 Chineli kudikehesha kwatukwashaña, tunateli kukumwekesha ñahi chikupu? Tuhanjekenu hanjila jiwana. Yatachi, tunateli kumwekesha netu twadikehesha nawa twamwakama Yehova chikupu neyi tukutoñojokaña hayilwilu yindi yayivulu yabadika nichifulu chikwetiyi. (Isa. 8:13) Anukenu, tunakwenda naNzambi Wabadika Ñovu, bayi neyi nakañelu hela namuntuku. Chumichi chikutuleñela twikali ‘adizoza mwishina dachikasa chaNzambi.’—1 Pet. 5:6.
16. Kutoñojoka hakukeña kwaNzambi kwatukwashaña ñahi kudikehesha?
16 Chamuchiyedi, kutoñojoka hakukeña kwaYehova kukutukwasha kudikehesha. Kapostolu Pawulu wasonekeli nindi Yehova wakuchika yiidi yetu yabula kulema yamujimba ‘nakulema kwakweni.’ (1 Kor. 12:23) Munjila yoyimu, Yehova watwakamenaña wonsu wetu hela chakwila twawanina wanyi. Hatwesekejaña nawakwetu hela kutuhela neyi tunaluwañeshiku. Muloña Yehova diyi kukeña, twekalaña akiñewa kwejima kutunakumukalakela mwitala dindi.
17. Nkiswinyi yitukutambwila neyi tukumonaña yayiwahi mudi akwetu?
17 Chamuchisatu, neyi tukumonaña kakawahi mudi akwetu neyi chelañayi Yehova, tukusweja kulemesha mudimu wutukweti mukuloñesha kwaYehova. Chatela tufwileña yifulu hela kudiñija munyidimu yawakwetu kulonda tutambuli oku kukooleka, twatela kudikehesha kulonda tulombeña wukwashu nikulondela munafuukuliwu akwetu. (Yish. 13:10) Twazañalalaña neyi akwetu anayinki kukooleka. Nawa tukumuhameka Yehova hakumona chinakukiswilayi ‘anakwetu ejima mukaayi.’—1 Pet. 5:9.
18. Tunateli kudizisha ñahi chinleji chetu kulonda twikali adikehesha?
18 Chamuchiwana, tukwikala adikehesha neyi tukuzatishaña nshimbi jamuBayibolu kulonda tudizisheña chinleji chetu. Tukufuukulaña chiwahi neyi tudikehesha kulonda tumoneña yuma neyi chayimonañayi Yehova. Kuhitila mukudiza mpinji yejima, kulomba nikuzatisha yuma yitwadizaña kukutukwasha kwikala nachinleji chachiwahi. (1 Tim. 1:5) Tukulemeshaña akwetu nankashi. Neyi tuzata nañovu, chikaninu chaYehova chakwila nawu ‘wakamanisha kutudizisha,’ chakatukwasha kusoña mukabu wakudikehesha niyilwilu yikwawu yayiwahi.—1 Pet. 5:10.
19. Chumanyi chikutukwashaku kwikala adikehesha haya nyaaka?
19 Kaprofwetu wumu wamuYuda wabula kutenawu ijina wakoñeli hohu chiluwa chimu chamujahishili nikutamisha wubwambu windi wawuwahi naNzambi. Ilaña, tunateli kudikehesha hela tunaholokeli mukweseka. Antu ashinshika akunyaka niantu adikehesha adiku makonu anakumwekesha nawu tunateli kwikala ashinshika. Tukusweja kudikehesha neyi tukwendaña naYehova chikupu. (Yish. 8:13) Hela tukweti kukooleka kwamuchidinyi, kwenda naYehova hohu hikukooleka kweneni nankashi. Dichi, lemeshenu kukooleka kumukweti nawa dishenuku chikupu kulonda mutwalekuhu kwenda naYehova mukudikehesha haya nyaaka.