1, 2. Ifukwinyi dakanuñañesha antu mu 2018, nawa muloñadi? (Talenu mwevulu wakutachikilahu.)

HA MARCH 31, 2018, hakahumaña itwañwa, antu jaNzambi niantu akweti mpwila akapompa nakwanakana Kuda kwaMwanta Kwamelela. Neyi mpinji yinashikili, mamiliyoni awantu akapompa nakwanakana Chanukishu chakufwa kwaKristu. Chaaka nichaaka iku kwanakana kunanuñañeshi antu mwahita Iseki dejima munjila yakuhayamisha.

² Yehova niYesu azañalalaña hakumona yihita yawantu anakwanakana idi ifuku dalema ninochu chakukumishawu. Bayibolu yashimwineñahu dehi nawu, “izaza deneni dakwila kwosi muntu niwumu wadi kutwesha kudichinda, dawantu afumini kunyuza yejima, kunyichidi yejima, kudi antu ejima nikumadimi ejima” dikabidika nadu: “Wamwinu wetu wafuma kudi Nzambi yetu washakama hetanda nikudi Mwana kaMukoku.” (Chim. 7:9, 10) Twamulemeshaña Yehova niYesu kuhitila mukwanakana Chanukishu hachaaka-hachaaka.

3. Achinu chibaaba chikwakula malwihwinyi?

 ³ Kudi malwihu enhulañawu antu itukwakula muchinu chibaaba. (1) Tunateli kudiloñesha ñahi hamuntu-hamuntu kulonda twakawaniki Kuchanukishu nawa tukahetelimu? (2) Munjilanyi chanukishu muchakwashilaña antu jaNzambi kwikala anuñañana? (3) Yumanyi yitwatela kwila hamuntu-hamuntu kulonda twikali anuñañana? (4) Kwakekalahu mpinji yitwakaleka kwanakana Chanukishu? Neyi yakekala kwoku, mpinjinyi?

4. Muloñadi chichalemena kuwanika kuChanukishu mpinji yejima?

⁴ Toñojokenu chichalemena kuwanika kuChanukishu. Anukenu nenu, kupompa kwachipompelu hinjila yimu yitwadifukwilañamu. Yehova niYesu eluka antu ejima azataña nañovu hakwila nawu awaniki kuniku kupompa kwahachaaka. Chakadi nikuhita mumbadi, tunakukeña eluki nawu twakawanika kuChanukishu, chiña hohu neyi yuma yinakali chikupu. Neyi tumwekesha muyilwilu yetu netu twalemesha kupompa, tukuletesha Yehova yabuli kufuta majina etu “mumukanda wakwanukaña nachu”—“mumukanda wawumi”—mudi majina awantu akatambwila wumi wahaya nyaaka.—Mal. 3:16; Chim. 20:15.

5. Mumafuku akutwala kuChanukishu, tunateli kudeseka ñahi ‘neyi tudi muchikuhwelelu’?

⁵ Mumafuku akutwala kuChanukishu, twatela kwikala nampinji yakulomba nikushinshika chidi wubwambu wetu naYehova. (Tañenu 2 Akorinda 13:5.) Tunateli kwila ñahi mwenimu? Kuhitila ‘mukudeseka kulonda twiluki neyi tudi muchikuhwelelu.’ Hakwila tudeseki, twatela kudihula netu: ‘Komana nakuhwelela nami nekala mukuloñesha kwetejayi Yehova kunakuzatishayi hakushikija nkeñelu yindi? Komana nazataña hakumina ñovu yami kudizisha nikushimwina nsañu yayiwahi yaWanta? Komana yilwilu yami yamwekeshaña nawu neluka nami tunakushakama mumafuku akukuminina nawa chiyuulu chaSatana keña chikumi? Komana nichidi namukuhwelela Yehova niYesu neyi chinayikuhweleleli hampinji yinahanini wumi wami kudi Yehova Nzambi?’ (Mat. 24:14; 2 Tim. 3:1; Heb. 3:14) Kutoñojoka hañakwilu yanawa malwihu kunateli kutukwasha kwiluka chitudi.

6. (a) Njilanyi yinateli kuyikwasha kwikala nawumi wahaya nyaaka? (b) Eluda wumu wadiloñeshaña ñahi mpinji yaChanukishu, ninenu munateli kwila ñahi mwenimu?

⁶ Tañenu nikutoñojoka haNsona yahosha hakulema kwaChanukishu. (Tañenu Yowanu 3:16; 17:3.) Njila yaya kuwumi wahaya nyaaka yabombelamu ‘kumwiluka’ Yehova ‘nikumukuhwelela’ Yesu, Mwanindi wumu hohu. Neyi munadiloñeshi kwanakana Chanukishu, kwila mudiza nsañu yikuyikwasha kuswina kwakwihi naYehova niYesu nehi? Talenu chelañayi eluda wumu wunazati yaaka yayivulu. Hadi yaaka yayivulu, wahembaña yibaaba yamu Kaposhi Kakutalila yahosha haChanukishu nikukeña kwatumwekesheleliyi Yehova niYesu. Munyilungu yakutwala kuChanukishu, watañaña iyi yibaaba nikutoñojokahu chikupu chichalemena kwanakana Chanukishu. Mpinji yikwawu, wabombelañahu chibaaba chimu hela yiyedi hatuposhi twahembañayi. Nawa watañaña cheñi Bayibolu muMpinji yaChanukishu nikutoñojokahu chikupu. Kwila mwenimu kwamukwashaña kwiluka yuma yayiha hachaaka-hachaaka. Chasweja kubadika, wubwambu windi naYehova niYesu wakolelañaku hachaaka-hachaaka. Kudiza muniyi njila kunateli kuyikwasha kumukeña nikumusakilila Yehova niYesu nawa kukuyikwasha kudiza yuma yayivulu neyi mwanakanaña Chanukishu.

7. (a) Yesu walombeli nindidi hawufuku wadiileñawu Kuda kwaMwanta kwaMelela kwatachi? (b) Chumanyi chamwekeshaña nawu Yehova wakula kulomba kwaYesu?

⁷ Hawufuku hadiileñawu Kuda kwaMwanta kwaMelela kwatachi, Yesu walombeli nindi atumbanji twindi akekali anuñañana neyi chanuñañayi yena naTata yindi. (Tañenu Yowanu. 17:20, 21.) Yehova nakuli kuna kulomba kwamwanindi akeñayi nawa mamiliyoni awantu anakuhweleli nawu Yehova watemesheli mwanindi. Chanukishu, dikupompa hohu kwapompañawu antu jaNzambi kwamwekeshaña hatooka nawu aYinsahu jaYehova anuñañana. Antu akunyuza nawa akweti makowa ashiyashana abulakanaña hamaluña akupompela mukaayi kejima. Kumaluña amakwawu, nsakililu yikwawu yapompaña wanyi hamu nawantu akweti makowa ashiyashana nawa neyi apompa hamu ayidiwulaña kudi akwawu. Ilaña Yehova niYesu atiyaña kuwaha kunuñañana kwamuchidiwu!

8. Nsañwinyi yamulejeliwu Ezekeli kudi Yehova kutalisha hakunuñañana?

⁸ Etu aYinsahu jaYehova twahayamaña wanyi chitwekala anuñañana. Yehova niyena washimwineñahu dehi nindi twakekala anuñañana. Talenu nsañu yamulejeliyi kaprofwetu Ezekeli kutalisha hakubomba tunyitondu tuyedi, kamutondu ‘kaYuda’ nikamutondu ‘kaYosefu.’ (Tañenu Ezekeli 37:15-17.) Chibaaba “chaMalwihu Kufuma Kudi Antañi” chadiña muKaposhi Kakutalila kaJuly 2016 chalumbulwili nawu: “Yehova wamulejeli Ezekeli nsañu yakuchiñeja yakunuñañana kwawaIsarela neyi aneñili dehi Mwituña daChikaninu. Iyi nsañu yakundama cheñi kukunuñañana kwawantu jaNzambi kwatachikili mumafuku akukuminina.”

9. Wuprofwetu waEzekeli washikijewaña ñahi haChanukishu hachaaka-hachaaka?

⁹ Kufuma tuhu mu 1919 nikuya kumbidi, Yehova watachikili kuloñesha nikunuñañesha chovu-chovu awayishewa emeneneñaku kamutondu ‘kaYuda.’ Kuhiñahu, watachikili kunuñañesha antu akweti kuchiñeja kwakushakama hamaseki, emeneneñaku kamutondu ‘kaYosefu.’ Nawa ayibombeli nawawayishewa, awa mazanvu ayedi ekalili “mukanka wumu.” (Yow. 10:16; Zek. 8:23) Yehova wakanini nindi wakanuña itu tunyitondu tuyedi kulonda twakekali kamutondu kamu muchikasa chindi. (Ezek. 37:19) Ichi awa mazanvu ayedi ejima azatilaña hamu mukunuñañana nawa ayilombolaña kudi Mwanta wumu, Yesu Kristu ajilikawu dehi, iyashimwiniwu muwuprofwetu kudi Nzambi nawu “kambuñami Davidi.” (Ezek. 37:24, 25) Kunuñañana kwakuwahi kwashimunawu mumukanda waEzekeli kwamwekanaña hachaaka-hachaaka hampinji yabulakanañawu awayishewa “ninyikoku yacheñi” nakwanakana Chanukishu chakufwa kwaKristu! Hanu dinu, tunateli kwiladi hamuntu-hamuntu kulonda kunuñañana kwetu kutwalekihu?

10. Tunateli kuleta ñahi kunuñañana hakachi kawantu jaNzambi?

¹⁰ Njila yimu mutwaletelaña kunuñañana hakachi kawantu jaNzambi hikwikala adizoza. Hampinji yadiñayi Yesu hamaseki, wayifumbili atumbanji twindi kwikala adizoza. (Mat. 23:12) Neyi twadizoza mumuchima, tukwikala wanyi nayilwilu yidi mukaayi yakudivwimba. Ilaña, kudizoza kwetu kukutukwasha kwovwahila antu anakulombola, nawa kwovwahila kwamuchidiwu dikwaletaña kunuñañana muchipompelu. Chasweja kulema, kudizoza kwetu kukumutiyisha Nzambi kuwaha, muloña “wadikañaña nawakwakudivwimba, ilaña akwakudizoza wayitiyilaña luwi lwasweja.”—1 Pet. 5:5.

11. Kutoñojoka chemenañaku yifwikija yahaChanukishu kukutukwasha ñahi kwikala anuñañana?

 ¹¹ Njila yamuchiyedi yitwaletelañamu kunuñañana hikwiluka chemenañaku yifwikija yitwazatishaña haChanukishu. Toñojokenu hakulema kwadinkendi dakadi iluñi nivinyu yichinana henohu ifuku daChanukishu kanda nihawufuku wekalañaku Chanukukishu. (1 Kor. 11:23-25) Dinkendi demenañaku mujimba wakadi nshidi wahaniniyi Yesu nawa vinyu yemenañaku mashi indi apwekeli. Ilaña hitwatela hohu kwiluka chemenañaku iyi yifwikijaku. Anukenu nenu ifutu danyiloña daKristu mwabombela yuma yiyedi yamwekeshaña kukeña kwabadika. Kukeña kwamwekesheliyi Yehova hakutwinka Mwanindi nikukeña kwamwekesheliyi Yesu hakuhana wumi windi hadetu. Kutoñojoka hakukeña kwamwekesheliwu kukutukwasha ninetu kuyimwekeshela kukeña. Kukeña kutwamukeña Yehova nikukeña kwamukeñawu akwetu akwakwitiya kudi neyi monji watukasawu ejima wetu nawa kwakoleshaña mpaanda yetu yakunuñañana.

12. Muchishimu chamwanta akeñeleñawu kufweta mukudi, Yesu wamwekesheli ñahi nindi Yehova wakeñaña nindi twanakeneña?

¹² Njila yamuchisatu yakuletelamu kunuñañana hikwanakena akwetu chakufuma hamuchima. Neyi twanakena antu anatuvulumuni, tukumwekesha netu twalemesha chiyatwanakeneniwu nshidi jetu etu aweni nefutu danyiloña daheniyi Kristu. Talenu chishimu chaYesu chekala haMatewu 18:23-34. Dihulenu nenu: ‘Nazatishaña kufumba kwaYesu? Namwekeshaña kudiwunjika nikwiluka chekalawu akwetu? Nadiloñesha kwanakena antu anvulumunaña?’ Kuhosha hohu chalala, kudi nshidi jimu jakala kwanakena kudi antu abula kuwanina. Hela chochu, ichi chakutalilahu chatukwashaña kwiluka yuma yakeñañayi Yehova nindi twileña. (Tañenu Matewu 18:35.) Yesu walumbulwili hatooka nindi Yehova wukutwanakena wanyi neyi tubula kwanakena amanakwetu hachuma chitunateli kuyanakena. Dichi twatela kutoñojokahu chikupu. Twaletaña kunuñañana neyi twanakena akwetu neyi chatulejeliyi Yesu.

13. Kuleta kuwunda kwatukwashaña ñahi kuleta kunuñañana?

 ¹³ Neyi twanakena akwetu, tukumwekesha netu tudi akwakuleta kuwunda. Anukenu kufumba kwakapostolu Pawulu kwakwila nawu “ikalenu mukuwunda wumu namukwawu nawa fwilenuña chikupu kuhemba kunuñañana kwenu kumwekalaña naku kuhitila mudi spiritu yajila.” (Efwe. 4:3) Mumpinji yaChanukishu nawa sweje-e hawufuku waChanukishu, toñojokenu chikupu chimwayimonaña akwenu. Dihulenu nenu: ‘Komana namwekeshaña wanyi nami nahembelaña akwetu nkunyi? Komana akwetu añiluka nawu naletaña kuwunda nikunuñañana’? Twatela kutoñojokahu hanawa malwihu alema muniyi mpinji.

14. Tunateli kumwekesha ñahi netu ‘tunakuditiyilila wumu namukwawu mukukeña’?

¹⁴ Njila yamuchiwana yitwaletelañamu kunuñañana hikwikala nakukeña kwekalayi naku Yehova, Nzambi wakukeña. (1 Yow. 4:8) Bayi tuhosha nakutena akwetu akwakwitiya netu “namukeña kumesu, ilaña kumuchima namuhelaku.” Neyi twilaña chamuchidiwu dikwila nawu tunakwila chuma chambukaku nakufumba kwaPawulu kwakwila nawu ‘ditiyililenuña wumu namukwawu mukukeña.’ (Efwe. 4:2) Mwatela kwiluka nenu Pawulu hakuminini dakuhosha nindi twatela ‘dakuditiyilila wumu namukwawu hohuku’ ilaña wabombelelihu nindi twatela kwila mwenimu “mukukeña.” Hadi chaambu. Yehova waletaña antu akweti yitachi yashiyashana muchipompelu. (Yow. 6:44) Chineli Yehova diyi wayiletaña, twatela kuyikeña. Muloñadi chitukuyihelela akwetu akwakudifukula? Dichi twatela kuyikeña muloña Yehova watuleja nindi tuyikeñeña!—1 Yow. 4:20, 21.

15. Tuneluki ñahi netu kwakekala Chanukishu chakukumishaku?

¹⁵ Ifuku dimu twakanakana Chanukishu chakukumishaku. Tuneluki ñahi? Pawulu wasonekeleli akwaKristu awayishewa mumukanda windi watachi kudi akwaKorinda nindi chitwanakanaña kufwa kwaYesu hachaaka-hachaaka, ashimwinaña “kufwa kwaMwanta kushika nimpinji yakenzayi.” (1 Kor. 11:26) Izu dakwila nawu “yakenzayi” dinesekani nezu dakwila nawu “nakwinza” dazatishiliyi Yesu muwuprofwetu windi kutalisha hampinji yakukuminina. Wahosheli kutalisha halukadi lwasweja lunakwinza nindi: “Chinjikijilu chaMwana kamuntu chikamwekana mwiwulu, nyichidi yejima yekala hanu hamaseki yakadineña nankashi nawa yakamona Mwana kamuntu nakwinza hamavu amwiwulu nañovu nikulema kwasweja. Cheñi, [Yesu] wakatemesha añelu jindi nampuña yasweja kuvuma nawa wena akapompesha hamu antu indi atondewa kufuma kuyibalu yiwana, kufumisha kunsa yewulu yimu ndo-o nikunsa yewulu yikwawu.” (Mat. 24:29-31) Iku ‘kupompesha kwawantu atondewa’ kwahosha hampinji yikatambwilawu akwaKristu ejima awiyishewa achidi haseki wuloku wawu wamwiwulu. Chumichi chikamwekana kumatachikilu alukadi lwasweja henohu njita yaAmagedoni kanda yitachiki. Kuhiñahu dinu a 144,000 ejima akazatila hamu naYesu kujilumuna anyanta ahamaseki. (Chim. 17:12-14) Chanukishu chakanakanawu haniyi mpinji yakapompeshañawu awayishewa nakuya mwiwulu dichakekala chakukumishaku, muloña Yesu wakela ‘wenza’ dehi.

16. Muloñadi chimunakufwila kuwanika kuChanukishu chachinu chaaka?

¹⁶ Twatela kuzata nañovu kulonda twakawaniki kuChanukishu chakekalaku haMarch 31, 2018. Nawa tumulombenu Yehova kulonda yatukwashi kwikala anuñañana nawantu jindi! (Tañenu Masamu 133:1.) Anukenu nenu, ifuku dimu twakaleka kwanakana Chanukishu. Chayinu mpinji, tuzatenuña nañovu kulonda tuwanikeñaku nawa tulemesheña kunuñañana kwekalañaku haChanukishu.