1. Muloñadi mpinji yitunakushakamamu chiyinambukiliku?

TUNAKUSHAKAMA mumpinji yambukaku chikupu. Neyi chashimwineñahu dehi Bayibolu, Yehova nakupompesha “izaza deneni . . . dawantu [kufuma] kunyuza yejima, kunyichidi yejima, kudi antu ejima nikumadimi ejima.” Antu anapompeshiwu ‘himuza wañovu’ wawantu akubadika ha 8 miliyoni akweti muzañalu “anakumukalakela [Nzambi] mudimu wajila mwaana niwufuku.” (Chim. 7:9, 15; Isa. 60:22) Kanda kwikaleñahu dehi antu amavulu amukeña Nzambi niakwawu antu neyi awaku.

2. Kukeña kwamuchidinyi kwakutwamba kwamwekeshañawu antu adambula kudi Nzambi? (Talenu mwevulu wakutachikilahu.)

² Hela chochu, Nsona yonenawu yashimwineñahu dehi nawu kukeña kwakutwamba kwakuditiyisha muntu yomweni kuwaha akakwimwekeshaña kudi antu adambula kudi Nzambi. Kapostolu Pawulu wasonekeli nindi: “Mumafuku akukuminina . . . , antu akekala akwakudikeña awenawu, asweja kukeña mali, . . . akwakukeña jakuzañalesha chatela akeñi Nzambi.” (2 Tim. 3:1-4) AkwaKristu hiyamwekeshaña kukeña kwamuchidiwuku kwakudikeña muntu yomweniku; kukeña kwawu kwambukaku chikupu. Antu afwilaña yuma yakuditiyisha  aweni kuwaha hiyekalaña namuzañalu neyi chiyakuhwelelañawuku. Mwamweni, kukeña kwamuchidiwu kunaleñeli yuma mukaayi kwikala ‘yakala.’

3. Yumanyi yitukuhanjekahu muchinu chibaaba, nawa muloñadi?

³ Pawulu welukili nindi iku kukeña kwakavulilaku nawa akwaKristu anateli kwikala nakukeña kwamuchidiwu. Dichi, wayisoñamishili ‘kudambula’ kudi antu amwekeshaña kukeña kwakutwamba. (2 Tim. 3:5) Hela chochu, hitunateli kutwesha kutondolwela antu ejima amuchidiwuku. Hanu tunateli kudambula ñahi kuyilwilu yidi mukaayi kulonda tumuzañalesheña Yehova, Nzambi wakukeña? Twayenu tushinshikenu chaambu chekala hakukeña kutwamukeña Nzambi nakukeña kwashimunawu ha 2 Timotewu 3:2-4. Neyi twiluka chaambu, chikutukwasha kwiluka kukeña kutwatela kumwekesha, kukeña kunateli kutukwasha kwikala namuzañalu walala.

4. Muloñadi chichabulila kutamina kudikeña munjila yayiwahi?

⁴ Kapostolu Pawulu amoneneni kusoneka nawu: “Antu akekala akwakudikeña awenawu.” Komana chatama kudikeña etu aweni? Inehi!, chatama wanyi, kudikeña etu aweni kwakuwahi nawa kwalema. Dichatuleñayi Yehova. Yesu wahosheli nindi: “Keñaku mukwenu neyi chiwadikeña eyi aweni.” (Maku 12:31) Neyi twadikeña wanyi etu aweni, hitunateli kukeña akwetuku. Twatañaña cheñi muNsona netu: “Amayala atela kukeña añodi jawu neyi chakeñawu nyijimba yawu aweni. Iyala wakeña ñodindi, wadikeña yomweni, muloña kwosi muntu wahelahu dehi mujimba windiku, ilaña wawudiishaña nikuwuhemba chiwahi.” (Efwe. 5:28, 29) Dichi chatama wanyi kudikeña munjila yayiwahi.

5. Antu asweja kudikeña aweni munateli kuyilumbulula ñahi?

⁵ Kukeña kwakwakudikeña etu aweni kwashimunawu ha 2 Timotewu 3:2 kwakuwahi wanyi, kwatama. Hikukeña kwakudimbana. Antu asweja kudikeña aweni, kakavulu atoñojokaña hohu yuma yakuditiyisha aweni kuwaha. (Tañenu Aroma 12:3.) Yuma yafwilañawu muchihandilu hikuditiyisha kuwaha. Akamenaña akwawu wanyi. Neyi yuma yinatami, enkaña akwawu nyiloña chatela eteji yuma yineliwu. Muntu wumu wahosha haBayibolu wesekejeli antu adikeña aweni “nakanyama katenañawu nawu chisaka . . . kadivuñaña nakuditiyisha iyena . . . nikutalisha nyima yidi nanyiña kudi akwawu abula nyiña.” Antu amuchidiwu ekala wanyi namuzañalu.

6. Yumanyi yafumaña mukumukeña Nzambi?

⁶ Antu adiza Bayibolu ahoshaña nawu kukeña kwakudikeña muntu yomweni akwisha kumatachikili ayilwilu yatama yashimwiniyi kapostolu Pawulu nindi yikamwekanaña mumafuku akukuminina, muloña yilwilu yatama yikwawu yenzaña namuloña wakudikeña. Kwambukaku, antu amukeña Nzambi asoñaña nyikaabu yambukaku. Bayibolu yahosha nawu mukumukeña Nzambi mwabombela, muzañalu, kuwunda, kudiwunjika, luwi, kuwaha, chikuhwelelu, kwovwaha, kudihemba. (Ñal. 5:22, 23) Ñimbi yamasamu wasonekeli nindi; ‘Adi namuzañalu wowu antu akweti Nzambi yawu Yehova!’ (Mas. 144:15) Yehova hiNzambi wukweti muzañalu nawa antu jindi amwekeshaña ichi chilwilu. Kubombelahu, kwambukaku nawantu adikeña aweni nawa asha maana hohu hakutambwila, ambuña aYehova atiyaña kuwaha kudihana aweni kukwasha antu amakwawu.—Yilw. 20:35.

7. Malwihwinyi akutukwasha kwiluka neyi twamukeña Nzambi?

⁷ Tunateli kwiluka ñahi netu tunasweji kudikeña etu aweni kubadika Nzambi? Shinshikenu kufumba kwekala haAfwilipi 2:3, 4 kwahosha nawu: “Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu  ayibadika enu, iku munakufwila yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.” Twatela kudihula etu aweni netu: Komana nazatishaña iku kufumba muchihandilu chami? Nafwilaña kwila nkeñelu yaNzambi chakufuma hamuchima? Komana nafwilaña kukwasha antu mumudimu wakushimwina niakwetu muchipompelu? Chapela wanyi kudihana etu aweni. Chakeñekaña kuzata nañovu nikudihana. Chumanyi chinateli kutuletela muzañalu kubadika wutwekela nawu hakwiluka nawu atwiluka kudi Mwanta wakuleña kwejima?

8. Kumukeña Nzambi kunaleteshi antu amakwawu kwiladi?

⁸ Kumukeña Nzambi kunaleñeli antu amakwawu kuleka nyidimu yawu yamali nakutachika kumukalakela Yehova chikupu. Ericka hindotolu, washakamaña kuUnited States. Chatela yafwili chifulu cheneni mujawundotolu, wafuukwilihu kwikala payiniya nawa nazatili mumatuña amavulu hamu nanfumwindi. Wahosheli nindi: “Yuma yitunamoni mukuzatila mumatuña mwazatishañawu madimi itwabula kwiluka niamabwambu itunawani, kunatukwashi kwikala nachihandilu chamuzañalu. Naleka wanyi wundotolu, ilaña kuzatisha mpinji niñovu yami kuuka antu kuspiritu nikukwasha chipompelu chidi mukukaankila kunankwashi kwikala namuzañalu waweni.”

9. Muloñadi kukeña mali chikwabulilaña kuleta muzañalu?

⁹ Pawulu wasonekeli nindi antu akekala “akwakukeña mali.” Mpinji yimu, payiniya wumu muIreland wahanjikili neyala wumu hadi Nzambi. Iwu iyala wedishili chikwama, wanonelimu mali nakuhosha namuzañalu nindi: “Iwu diyi nzambi yami!” Hela chakwila antu amavulu hiyanateli kwila chuma chamuchidiwuku, ilaña mukaayi munenzali antu akeña mali niyuma yinateli kulandawu. Dichi, Bayibolu yatusoñamishaña nawu: “Wakeña siliva hakela nindi yinanwaninuku; niwakeña yayivulu hakela nindi yinavuli dehuku.” (Mukwa. 5:10) Antu amuchidiwu atwalekañahu kukeñakeña mali amakwawu, nikuwana njila yakuyivulishilamu, adiletelaña hohu “yihuñu yayivulu.”—1 Tim. 6:9, 10.

10. Aguri wasonekeli nindidi kutalisha hamaheta nihawuzweñi?

¹⁰ Hela chochu, wejima wetu twatela kwikala namali. Mali atukwashaña kudihemba nachu. (Mukwa. 7:12) Komana muntu nateli kwikala namuzañalu neyi wudi nayuma yakudikwashamu kumujimba? Eña! (Tañenu Mukwakutañisha 5:12.) Aguri mwana kaYake wasonekeli nindi: “Bayi wunyinka hela wuzweñi hela mahetaku. Ndiishi yakudya yantelela.” Tunateli kwiteja chuma chaletesheli yakaani kwiteja wuzweñi wasweja. Walumbulwili nindi, hakeñeleña chuma chikumuleñela yeyiku muloña kwiya kwaletaña kasawuntu hejina daNzambi. Hanu dinu muloñadi chalombeleliyi kubula kwikala namaheta amavulu? Wasonekeli nindi: “Nakenda kasweja kwikuta hinakadikaleyi nami, Yehova hinyi?’” (Yish. 30:8, 9) Chakadi nikujina, mweluka antu alemesha maheta awu chatela amulemeshi Nzambi.

11. Kufumbanyi kwahaniniyi Yesu kutalisha hamali?

¹¹ Antu akeña mali hiyanateli kumuzañalesha Nzambiku. Yesu wahosheli nindi: “Hikudi muntu wunateli kukalakela anyanta ayediku; watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.” Watachikili namazu akwila nawu: “Lekenu kudilumbikila maheta hamaseki hekala tunzembula nindala janoñeshaña nawa hekala amakombi eñilaña nakwiya. Ilaña, dilumbikilenu maheta mwiwulu mwabula tunzembula hela ndala janoñeshaña nawa mwabulaña kwiñilawu amakombi nakwiya.”—Mat. 6:19, 20, 24.

12. Chihandilu chapela chinateli ñahi kuyikwasha kumukalakela Nzambi? Shimunenu chakutalilahu.

 ¹² Amavulu eluka nawu kushakama chihandilu chapela kwayizañaleshaña nawa kwayikwashaña kwikala nampinji yeneni yakumukalakela Yehova. Jack, washakamaña kuUnited States, walandishili itala dindi deneni nikuleka bizinisi yindi muloña welukili nindi neyi yela mwemimu wukukalakala chiwahi wupayiniya hamu nañodindi. Wahosheli nindi: “Chadiña chakala kushiya mukala wetu wawuwahi niyuma yetu. Hayaaka yayivulu henohu kanda, nafuntileña kwitala iku nahili muloña wakukala kunamweneña kumudimu. Ñodami, yena wadiña payiniya wampinji yejima nawa wadiña namuzañalu mpinji yejima. Wahosheleña nindi, ‘Nikweti mukulumpi wami wamudimu wamuwahi!’ Ichi ninami nazataña wupayiniya, wejima wetu twazatilaña mukulumpi wamudimu wumu, Yehova.”

13. Tunateli kwiluka ñahi neyi twalemesha mali hela nehi?

¹³ Hakwila twiluki neyi twalemesha mali hela nehi, twatela kwakula awa malwihu chakubula kutwamba: ‘Komana nakuhwelela nikulondela chahoshaña Bayibolu kutalisha hamali? Nalemesha nankashi kuwana mali muchihandilu chami? Nalemesha nankashi yuma yakumujimba kubadika wubwambu wami naYehova niakwetu antu? Namukuhwelela Yehova nami wukunkwasha muyuma yejima yinakaankili?’ Twatela kwiluka netu hanateli kukañanya kukwasha antu amukuhwelelaku.—Mat. 6:33.

14. Twatela kumona ñahi yuma yakuditiyisha nachu kuwaha?

¹⁴ Neyi chashimwineñahu dehi, antu amavulu makonu “akeñaña yakuditiyisha aweni kuwaha.” Chatama wanyi kuditiyisha kuwaha munjila yayiwahi, neyi chichabula kutama kudikeña etu aweni nikukeña mali munjila yayiwahi. Yehova watukanishaña wanyi kwila yuma yitwakeña yinateli kutuzañalesha. Bayibolu yakoleshaña antu ashinshika nawu: “Yaña kweyi, dyaña yakudya yeyi nakuluña, nwaña vinyu yeyi nakutiya kuwaha mumuchima weyi.”—Mukwa. 9:7.

15. Kuditiyisha kuwaha kwamuchidinyi kwashimunawu ha 2 Timotewu 3:4?

 ¹⁵ 2 Timotewu 3:4 yatenaña antu afwilaña yuma yakudizañalesha aweni. Neyi mushinshika, iyi vasi yahosha wanyi nawu antu akakeña jakudizañalesha aweni kubadika Nzambi, neyi kwiji amukeñahu chanti. Ilaña yahosha nawu “chatela akeñi Nzambi.” Muntu wadiza Bayibolu chikupu wasonekeli nindi: “Iyi [vasi] yatalisha wanyi mukwila nawu amukeñahu Nzambi chanti. Yatalisha mukwila nawu amukeña wanyi Nzambi.” Hikufumba kwakuwahi chikupu kudi antu akeña yuma yakuditiyisha kuwaha! Nhoshelu yakwila nawu “antu akeñaña jakuditiyisha aweni kuwaha” yalumbula antu ‘akamaña yuma yawumi wunu yakuzañalesha.’—Luka 8:14.

16, 17. Tunateli kumwimbujola ñahi Yesu kutalisha hakuditiyisha kuwaha?

¹⁶ Yesu wamwekesheli njila yayiwahi yakuditiyishilamu kuwaha. Wayili ‘kuchawija chawulu,’ nawa wayili ‘kuchawija cheneni.’ (Yow. 2:1-10; Luka 5:29) Hachawija chawulu, wabalumwini menji kwikala vinyu muchihayamisha, chelili vinyu yikehi. Nawa mpinji yimu, wayikaaninini antu amwilileña nawu wakeña kuda nikunwa.—Luka 7:33-36.

¹⁷ Hela chochu, Yesu weñijili wanyi mutu muyuma yakuditiyisha kuwaha. Watwamijiliku Yehova nawa wazatili nañovu kukwasha amakwawu. Hakwila nawu antu amavulu apuluki, wadihanini kufwa kwayeña hamutondu wakuyandishila. Yesu wayilejeli antu akumulondaña nindi: “Mudi namuzañalu enu ahoshañawu kasawuntu kudi antu nikuyikabisha nakuyitwambila yuma yatama yeñi-nayeñi kukoola ami. Zañalalenu nawa tiyenu kuwaha chikupu, muloña wufwetu wenu weneni mwiwulu, dichakabishiliwu niatuprofwetu adiñaku henohu enu kanda muvwaliki.”—Mat. 5:11, 12.

18. Malwihwinyi akutukwasha kwiluka neyi twakeñesha yuma kuditiyisha etu aweni kuwaha?

¹⁸ Tunateli kwiluka ñahi neyi twaseja kukeña kuditiyisha kuwaha hela nehi? Chikuwaha neyi tudihula netu: ‘Komana natwamijaku kuditiyisha kuwaha kubadika kupompa nikushimwina? Komana nafwilaña kuleka yuma yimu yinakeña kulonda nimukalakeleña Nzambi chikupu? Neyi inakutonda yuma yakuditiyisha kuwaha, natoñojokaña chinateli kumonayi Yehova yuma yinnafuukuli?’ Neyi chalala twamukeña Nzambi, tukwikala asoñama kutondolwela yuma yinateli kumutiyisha kutama niyuma yitwabulaña kutoñojoka chikupu netu yinateli kumuneñesha.—Read Matthew 22:37, 38.

19. Antu amuchidinyi anateli kubula kwikala namuzañalu walala?

¹⁹ Hadi yaaka 6,000 yinahitihu, antu anamoni yihuñu chikupu. Ilaña muyinu mpinji yakukuma kwanshakaminu yamakonu, mukaayi munenzali antu adikeña aweni, akeña mali nawa akeña yuma yakuditiyisha aweni kuwaha. Antu anashi maana hayuma yinakufwilawu kwikala nayu nawa anashi muchima hachihandilu kubadika yuma yejima. Antu amuchidiwu hiyanateli kwikala namuzañalu walalaku. Ilaña ñimbi yamasamu washimwini chitunateli kwikala namuzañalu walala, wasonekeli nindi: ‘Wudi namuzañalu yowu muntu wukweti Nzambi yaYakoba wakumukwashaku, Wachiñejaña kwindi Yehova Nzambi yindi.’—Mas. 146:5.

20. Muzañalwinyi wumukweti muloña wakumukeña Nzambi?

²⁰ Antu jaYehova anakumwekesha nawu amukeña Nzambi, nawa anakuvulilaku hachaaka-hachaaka. Chumichi chinakumwekesha nawu Wanta waNzambi wunakuyuula nawa keña wuleti nkisu yayivulu hamaseki. Muzañalu walala nawa wabulaña kumana wenzaña neyi tunakwila nkeñelu yaNzambi nihakwiluka nawu tunakuzañalesha Muntu wasweja kulema. Nawa antu amukeña Yehova akazañalalaña haya nyaaka! Muchibaaba chinalondelihu, tukashinshika hayilwilu yikwawu yafumaña mukusweja kudikeña nawa tukamona iyi yilwilu chiyambuka nayilwilu yekala nawambuña aYehova.