1, 2. Yehova wazatishaña ñahi yuma yahetayi?

YEHOVA hiNzambi wukweti chisambu. Yuma yejima yitukweti yafuma kudi yena. Yehova waheta wuru nisiliva kushilahu niyuma yejima yidi hamaseki, nawa wayizatishaña kukwasha mawumi ejima. (Mas. 104:13-15; Hag. 2:8) MuBayibolu mwekala nsañu yashimunaña hadi Yehova chazatishiliyi yuma muchihayamisha hakukwasha antu jindi.

² Hadi yaaka 40, Yehova wayinkeleña aIsarela manina nimenji hampinji yadiñawu muchinkalampata. (Kwid. 16:35) Dichi, “hiyabulili chumaku.” (Nehe. 9:20, 21) Yehova welili chihayamisha kuhitila mudi kaprofwetu Elisha chakuvulisha manji antuluwa washinshika. Chawaana chaNzambi chamukwashili kufweta nyikudi nawa chumichi chamukwashili kwikala namali akudikwashamu yena nimwanindi. (2 Anya. 4:1-7) Nawukwashu waYehova, Yesu welishileña yakuda nimali muchihayamisha.—Mat. 15:35-38; 17:27.

3. Tukuhanjekadi muchinu chibaaba?

 ³ Yehova wukweti maheta amavulu anateli kukwasha yileñaleña yindi yejima yahamaseki. Hela chochu, walejaña ambuñindi kuzatisha maheta awu kulonda akwashi mudimu wamukuloñesha kwindi. (Kwid. 36:3-7; tañenu Yishimu 3:9.) Muloñadi Yehova chakeñelañayi nindi tuzatisheña maheta etu kulonda tumufuntishileña cheñi? Antu ashinshika akunyima akwashili ñahi nyidimu yawantu amwimeneneñaku Yehova? Kuloñesha kwazatishaña ñahi yawaana yamali itwahanaña? Ñakwilu yanawa malwihu tukuyihanjeka muchinu chibaaba.

4. Twamwekeshañadi neyi tukwasha mudimu waYehova?

⁴ Twamwinkaña Yehova muloña twamukeña nawa twamwekeshaña kusakilila. Twazañalalaña chikupu neyi tutoñojoka yuma yatwililayi Yehova. Hampinji yashimwineñayi yuma yakuzatisha hakutuña tembeli, Mwanta Davidi walumbulwili nindi yuma yejima yitukweti yafuma kudi Yehova nawa yuma yejima yitwamwinkaña Yehova yafumaña hayuma yatwinkayi.—Tañenu 1 Kushindulula 29:11-14.

5. Nsona yamwekeshaña ñahi nawu kuhana chakufuma hamuchima himbadi yakudifukula kwalala?

⁵ Kuhana cheñi kwekala hikudifukula kudi Yehova. Kapostolu Yowanu watiyili muchimwenu ambuña aYehova mwiwulu anakuhosha nawu: “Eyi Yehova wetu, eyi Nzambi yetu, wunateli kutambula kulema nimpuhu niñovu. Muloña yeyi waleñeli yuma yejima kulonda yili mwaya muchima weyi; dichi chiyekala, dichi chayileñeluwu.” (Chim. 4:11) Komana himukwiteja nenu Yehova watelela kutambwila kulema nikalemesha kuhitila mukumwinka yuma yitukwetiku? Yehova walejeli muza wawaIsarela kuhitila mudi Mosi nindi amwekeneña kuyawija yisatu hachaaka. Chineli adifukwileña haniyi yawija, A Isarela ateleleli wanyi kumwekena “kumesu aYehova makasakasa.” (Kuhit. 16:16) Nimakonu, kuhana yawaana chakufuma hamuchima hakukwasha mudimu wachibalu chakuloñesha kwaYehova kwahamaseki himbadi yalema yakudifukula.

6. Muloñadi chitwatelela kuhana? (Talenu mwevulu wakutachikilahu.)

⁶ Kuhana kwakuwahi. Chachiwahi kuhana bayi kukuminaña hohu dakutambwilaku. (Tañenu Yishimu 29:21.) Fwikijenu mwana nakwinka anvwali jindi chawaana chamali amwinkeliwu. Anvwali atiyaña kuwaha chikupu! Mwana wunakushakama nawanvwali jindi nawa wunakuzata wupayiniya nateli kuyinka anvwali jindi mali akulandamu yuma yinakukeñeka hetala. Hela chakwila anvwali akuhwelela wanyi kuyinka, anateli kutambwila ichi chawaana muloña aneluki nawu mwanawu watela kusakilila hayuma yejima yamwililañawu. Munjila yoyimu, Yehova wakeñaña nindi tuhaneña.

7, 8. Tunateli kwimbujola ñahi antu jaYehova ashimunawu muBayibolu hakuhana yawaana (a) kunyidimu yadimena? (b) kunyidimu yejima?

⁷ MuNsona, ashimunamu antu ahanineña yawaana kufuma hayuma yaheteliwu. Mpinji yikwawu antu jaYehova ahanineña yawaana kunyidimu yadimena. Chakutalilahu, Mosi wayilejeli antu kuhana yawaana yakuzatisha hakutuña nachu tabanaka, neyi cheliliyi Mwanta Davidi hakutuña tembeli. (Kwid. 35:5;1 Kushi. 29:5-9) Mumpinji yadiñaku Mwanta Yowashi, atupristu azatishili mali atambwiliwu kulonda aloñeshi nachu itala daYehova. (2 Anya. 12:4, 5) Muchipompelu  chakusambila chawakwaKristu amanakwetu chayilejeliwu nawu kudi nzala yakapwelendendi, “afuukwilihu hamuntu-hamuntu kuhana yuma yakutemesha kudi anakwawu ashakamineña muYudeya kwesekeja nahakuminini ñovu jawu.”—Yilw. 11:27-30.

⁸ Mpinji yikwawu, antu jaYehova enkeleña mali antu adiña nakulombola mudimu. MuNshimbi jaMosi, Alevi atambwilili wanyi iseka neyi chatambwililiwu nyichidi yikwawu. Ilaña, aIsarela ayinkeleña Alevi yamwikumi nawa chumichi chayikwashileña kusha maana hamudimu wawu wadiña hatabanaka. (Kuch. 18:21) Munjila yoyimu, Yesu niapostolu azatishileña yawaana yahanineñawu ambanda “adiña nakuzatisha yuma yawu hakuyikalakela.”—Luka 8:1-3.

9. Yawaana yahanineñawu kunyima yafumineña kudi?

⁹ Hela chochu, iyi yawaana yafumineña kuyuma yashiyashana. Yawaana yahaniniwu aIsarela yakutuña nachu tabanaka muchinkalampata, afumini nayu muEjipitu. (Kwid. 3:21, 22; 35:22-24) Mumafuku awapostolu, akwaKristu amakwawu alandishileña yuma yawu, yidi neyi maha hela matala nakwinka apostolu mali. Apostolu ahanineña awa mali kudi antu adiña mukukaankila. (Yilw. 4:34, 35) Amakwawu ahembeleña mali hambadi kulonda ahaneña yawaana mpinji yejima kulonda akwashi mudimu. (1 Kor. 16:2) Dichi, antu ejima, aheta niatuzweñi adiña nakuhana yawaana.—Luka 21:1-4.

10, 11. (a) Tunateli kwimbujola ñahi chisambu chawambuña aYehova adiñaku kunyima? (b) Mwatiyaña ñahi namudimu wutwekala nawu wakukwasha mudimu waWanta?

¹⁰ Makonu, ninetu anateli kutuleja kuhana yawaana kunyidimu yimu yadimena. Chakutalilahu, komana chipompelu chenu chinakukeña kutuña Itala daWanta dadiha? Indi kwiji Itala daWanta dimwazatishaña anakudiloñesha? Hadaha anatuleji kuhana yawaana yakukwasha kuloñesha kasanji kamutayi, kukwasha kupompa kweluña hela kukwasha amanakwetu anamoni kukala kwadimwekenaña. Twahanaña cheñi yawaana yakwashaña antu akalakelaña hakasanji kamutayi keneni nitusanji twamumatuña ejima. Yawaana yetu cheñi yakwashaña amishonali, apayiniya adimena niankoñi añinza. Muchipompelu chenu cheñi mwekala njila yakuhaninamu yawaana yamukaayi kejima yazatishañawu hakutuña Matala Akupompela Kupompa Kweneni niMatala aWanta, azatishañawu amanakwetu mukaayi kejima.

¹¹ Ejima wetu twatela kukwasha mudimu waYehova wunakuzatewa munanu mafuku akukuminina. Yawaana yayivulu yekala yakujinda. Twajindaña hakusha yawaana muchikasha chekala Mwitala daWanta hela tunateli kuhanina haintaneti kuzatisha jw.org/lun. Tunateli kutoñojoka netu yawaana yantesha yitunahani kwosi mudimu wuyikuzata. Ilaña, yawaana yayivulu yafumaña kudi antu ahanaña yawaana yantesha kubadika yawaana yahanañawu kudi antu ahanaña yayivulu. Niamanakwetu ekala mumatuña mwakala kuwana mali ahanaña, neyi akwaMasidoniya adiña ‘muwuzweñi wasweja,’ ilaña akeñeleña kuhana nawa ahanineña namuchima wumu.—2 Kor. 8:1-4.

12. Kuloñesha kwazataña ñahi nañovu hakuzatisha chiwahi yawaana?

¹² Izanvu Dalombolaña dalombaña chikupu nikuzata nañovu kulonda ekali namaana nikashinshi kakuzatisha chiwahi mali amukuloñesha. (Mat. 24:45) Mali atambwilañawu ayizatishaña kuyuma yakeñekaña.  (Luka 14:28) Mumpinji yakunyima, añamba atalileña mali alondeleleña nshimbi yakuzatisha yawaana kwesekeja namudimu wunayihaniniwu. Chakutalilahu, Ezera wafuntili kuYerusalema nayawaana yatambwiliyi kudi mwanta wakuPeresi, iyi yawaana yadiña wuru, siliva niyuma yikwawu yabadikili ha $100 miliyoni mali aku U.S.A. Ezera wamweneña iyi yawaana yahanineñawu chakufuma hamuchima nindi yaYehova nawa walondeleli nshimbi yakuhemba awa maheta hampinji yahitileñayi mumaluña akala. (Ezera 8:24-34) Kapostolu Pawulu diyi wahembeleña yawaana yakukwasha amanakwetu akabakeneña muYudeya. Wazatili nañovu kulonda antu atwalileña yawaana eli “yuma yejima nakashinshi, bayi neyi kumesu aYehova hohuku, ilaña nikumesu awantu.” (Tañenu 2 Akorinda 8:18-21.) Kuloñesha kwetu makonu kwalondelaña nshimbi hakuzatisha yawaana yahanañawu neyi cheliliwu aEzera naPawulu.

13. Muloñadi mukuloñesha chimwadiñilaña kuhimpika?

¹³ Chisaka chinateli kukeheshaku yuma yimu hampinji yinakukeña kuzatishawu mali hela neyi anakukeña kushakama chihandilu chapela akukeheshaku jakulandalanda kulonda ashi maana hakumuzatila Yehova. Dichazataña nikuloñesha kwaYehova. Hadi yaaka yinahitihu, kwadiña yuma yayivulu yazatika. Chumichi chaletesheli tuzatishi mali amavulu kubadika mali itwatambilaña. Dichi, kuloñesha kwakeñeli njila yakukeheshelamu chakuzatisha mali nikukeheshaku nyidimu kulonda yawaana yimwahanaña yizatikeña chiwahi.

14-16. (a) Yumanyi yinazati yawaana yenu yimwahanaña? (b) Nawa yumiyi yinayikwashi ñahi?

¹⁴ Antu anamukalakeli Yehova yaaka yayivulu ahoshaña nawu kanda amoneñahu dehi yuma kuhimpa muniyi njila. Toñojokenu yuma yinazatiki mukuloñesha! Hayaaka yinahitihu, jw.org/lun ni JW Broadcasting yatachikili. Bayibolu yaNew World Translation of the Holy Scriptures anayidishi mumadimi amavulu. Mu 2014/2015, twazatishili mabulu amaneni munyisumba 14 kupompelamu mafuku asatu, Kupompa Kwamatuña Amavulu kwahosheleña nawu ‘Sambilenuña Kukeña Wanta waNzambi!’ Antu apompeli azañaleli chikupu.

¹⁵ Antu amavulu asakililaña hayuma yayiwahi yinakuyilila kuloñesha kwaYehova. Chakutalilahu,  kutalisha ha JW Broadcasting, adisumbula azatilaña kuAsia asonekeli nawu: “Twazatilaña mumusumba wanyanya. Dichi, mpinji yikwawu twatiyaña wudi nawa twatachikaña kujimbala mudimu weneni waYehova. Ilaña chitwatala maprogilamu ashiyashana aha JW Broadcasting, twanukaña netu tudi hakachi kawamanakwetu mukaayi kejima. Amanakwetu niahela atiyaña kuwaha kutala JW Broadcasting. Kakavulu twatiyaña anakuhosha nawu hanyima yakutala progilamu, twatiyaña neyi tunakuswina kwakwihi nawamamembala aMwizanvu Dalombolaña. Ichi atiyaña kuwaha chikupu kwikala mukuloñesha kwaNzambi.”

¹⁶ Matala aWanta kwakwihi 2,500 mukaayi kejima, anakukeñeka kuyituña hela kuyuwahisha. Chatachikiliwu kuzatisha Itala daWanta dadiha, akwakushimwina amuchipompelu chimu chamuHonduras asonekeli nawu: “Twazañalaña kwikala muchisaka chaYehova chanuñañana mukaayi kejima nawa twadiluñishaña kunuñañana kwekala hakachi kwawamanakwetu mukaayi kejima, yumiyi diyinatukwashi kwikala Netala daWanta ditwafwilileña mwiluña detu.” Antu amavulu asakililaña munjila yoyimu hanyima yakutambwila Bayibolu ninyikanda yikwawu yinayibalumwiniwu mwidimi dawu nawa asakililaña cheñi hanyima yakuyikwasha neyi kunamwekani wubanji wadimwekenaña hela hayuma yafumaña mukushimwina kuzatisha ngolofwana nikushimwina kudi antu amavulu mwiluña dawu.

17. Nyidimu yinakuzata kuloñesha makonu yinakumwekesha ñahi nawu Yehova diyi watukwashaña?

¹⁷ Antu abula kwikala aYinsahu akaanaña nawu nyidimu yejimiyi hitwayizataña nayawaana yitwahanaña mukudikeñelaku. Hanyima yakuhempula kasanji ketu kamu kakupulintila, mukulumpi wamudimu kukampani yeneni wahayamini hakutiya nawu nyidimu yejima ayizataña kudi akwakudihana, yazatikaña nayawaana yitwahanaña mukudikeñela nawa hitwelaña bizinisi yaletaña mali akuzatishaku. Wahosheli nindi chapela wanyi kuzata nyidimu yitwazataña. Dimu chapela wanyi! Ilaña twatweshaña muloña Yehova watukwashaña.—Yoba 42:2.

18. (a) Nkinswinyi yitwatambwilaña neyi tudihana kukwasha mudimu waWanta? (b) Tunateli kudizisha ñahi anyanetu niamaha kukwasha mudimu waWanta?

¹⁸ Yehova watwinka kukoleka kwakukwasha mudimu weneni wunakuzatika makonu. Watushiika nindi wakatukiswila neyi tukwashaña mudimu waWanta. (Mal. 3:10) Yehova wakana nindi muntu wahanaña chakufuma hamuchima akamukolekesha. (Tañenu Yishimu 11:24, 25.) Kuhana cheñi kwatuzañaleshaña, muloña “mukuhana mwekala muzañalu chikupu kubadika wekala mukutambwila.” (Yilw. 20:35) Tukweti mudimu wakudizisha anyanetu niamaha kuhanawu nikudiluñisha nkisu jafumañamu. Tunateli kwila mwenimu mumazu nimuyuma yitwelaña.

19. Chinu chibaaba chinayikoleshi kwiladi?

¹⁹ Yuma yejima yitukweti Yehova diyi watwinka. Chitwamufuntishilaña twamekeshaña netu twamukeña nawa twasakililaña hayuma yejima yatwililayi. (1 Kushi. 29:17) Chahanineñawu yawaana yakutuña nachu tembeli, ‘antu azañaleli nanochu chalambwiluwu chakufuma hamuchima muloña amulambwili Yehova namuchima walala chikupu chakutiya kuwaha.’ (1 Kushi. 29:9) Ninetu tutwalekihu kwikala namuzañalu wakumufuntishili cheñi Yehova yuma yatwinkañayi yafumaña kuchikasa chindi.