1. Kukalanyi kutwamonaña, ilaña Yehova wakeñaña ambuñindi ashinshika kukuhwelela nawudi? (Talenu nyevulu yakutachikilahu.)

NEYI chimuneluki, chihandilu chanshakaminu yamakonu chayihuñu. Enu amanakwetu niahela munakuumika yikatu yamaneni. Amakwawu niwena hela chakwila anakuli, anakuhemba antaña jawu ashinakaja dehi chikupu. Nawa amakwawu anakukañanya nikukeñela yisaka yawu yakuda nihakukama. Amakwawu niwena anakumona kukala kwakuvulu hampinji yimu! Yuma yejimiyi yakeñekaña mpinji yeneni niñovu hakwila nawu mumanishi iku kukala kwejima. Hela chochu, kukuhwelela yuma yakanayi Nzambi kunateli kuyikwasha kukuhwelela chikupu chihandilu chachiwahi chakumbidi. Yehova watiyaña kuwaha chikupu neyi tukuhwelela yuma yakanayi kumbidi.

2. Nsona yaIsaya 40:29 yatukoleshaña nawudi, ilaña chiluwanyi chitunateli kukoña?

² Hela chochu, komana mpinji yikwawu mwatiyaña nenu kukala kwamuchihandilu kunakuyizeyesha? Yenu hohu wanyi. Bayibolu yashimuna nawu ambuña ashinshika akunyima kakavulu amweneña nawu ñovu jinayimani. (1 Anya. 19:4; Yoba 7:7) Hela chochu, chatela aleki, atwalekelihu kulomba ñovu kudi Yehova.  Nzambi wayikwashili, muloña yena “wamwinkaña muntu wazeya wuswa.” (Isa. 40:29) Chawushona, antu amakwawu anu mafuku elaña neyi amona kukala ‘akunooka chanti kunyidimu yakuspiritu,’ amonaña neyi kwiji nyidimu yanetu akwaKristu hichiteli. Dichi alekaña kutaña Izu daNzambi, kupompa nikuya nakushimwina, neyi chakeñañayi Satana nindi eleña.

3. (a) Tunateli kudikaña ñahi naSatana chafwilañayi kutuzeyesha? (b) Yumanyi yitukuhanjeka muchinu chibaaba?

³ Diyabolu weluka chikupu nindi neyi tuzataña chikupu nyidimu yakuspiritu tukwikala nañovu, nawa wakeñaña wanyi nindi twikali nañovu. Neyi muzeya kumujimba nimuyitoñojoka, kufuma kudi Yehova nehi. Swinenu kwakwihi nayena, muloña yena “wakayikolesha, wakayinka ñovu.” (1 Pet. 5:10; Yak. 4:8) Muchinu chibaaba, tukuhanjeka hayuma yiyedi yinateli kutufuntisha hanyima mumudimu waNzambi nawa tukuhanjeka kuzatisha yishina yamuBayibolu chikunateli kutukwasha. Ilaña henohu kanda, tuhanjekenu ntahi Yehova chatwinkañayi ñovu, neyi chashimuna Isaya 40:26-31.

4. Yumanyi yitwadizilaña kunsona yaIsaya 40:26?

⁴ Tañenu Isaya 40:26. Kwosi muntu wachindahu dehi tutumbwa twekala mwiwuluku. Asayantisiti akuhwelela nawu mulalanji wetu waMilky Way wekala natutumbwa 400 biliyoni. Hela chochu, Yehova watwitumba majina nawa weluka hitwekala. Yumanyi yitunateli kudizilaku? Neyi Yehova washa maana yileñaleña yabula wumi, indi enu antu mwamukalakelaña, bayi neyi mwamukalakelaña muloña wayileña munjila yakwila nawu mumukalakeleñaku, ilaña mwamukalakelaña muloña wakumukeña. (Mas. 19:1, 3, 14) Tata yetu watukeña wayiluka chikupu hamuntu-hamuntu. “Ninsuki jenu jakumutu jejima ajichinda dehi” kudi yena. (Mat. 10:30) Nawa nsoneki yamasamu wahosheli nindi: ‘Yehova weluka kukala kwamonañawu antu alala.’ (Mas. 37:18) Mwamweni, wamonaña kukala kwejima kumwamonaña nawa wukuyinka ñovu yakuumika kukala kudi kwejima kumunateli kumona.

5. Tuneluki ñahi netu Yehova wukutukolesha?

⁵ Tañenu Isaya 40:28. Yehova diyi Mukwakuhana ñovu jabadika. Chakutalilahu, fwikijenu iyena dafumaña kwitañwa. David Bodanis mukwakusoneka jasayansi wahosheli nindi: “Iyena dafumaña kwitañwa hasekondi yimu dikwesekana namabiliyoni amatenda nzumbu akutuña nama atomu.” Mukwakusandujola mukwawu niyena wahosheli nindi “iyena dafumaña kwitañwa hasekondi yimu dinateli kukwasha antu hadi yaaka 200,000”! Kudihu muntu wukujinooka nindi Muntu waleteshaña itañwa kufumisha iyena damuchidiwu kwila yatwinka ñovu yakuumika kukala kutunakumona nehi?

6. Munjilanyi mpaanda yaYesu chiyekalila yaswayi kusenda, nawa kwiluka chumichi kunateli kutukwasha ñahi?

⁶ Tañenu Isaya 40:29. Mukumukalakela Yehova mwekala muzañalu chikupu. Yesu wayilejeli atumbanji twindi nindi: “Sendenu mpaanda yami.” Wabombelelelihu nindi: “Mukuhizumuka. Muloña mpaanda yami yaswayi kusenda nawa chiteli chami chapepela.” (Mat. 11:28-30) Awa mazu alala chikupu. Mpinji yikwawu neyi tunayi kukupompa hela mumudimu wakushimwina twazeyaña. Hanu mwatiyaña ñahi neyi munafunti kwitala? Mwahizumukaña, nawa mwatiyaña nenu mukushinda kukala kudi kwejima kwamuchihandilu. Mpaanda yaYesu mwamweni yaswayi kusenda.

7. Lumbululenu chakutalilahu chinakumwekesha nawu nsona yaMatewu 11:28-30 yahosha mwalala.

 ⁷ Muhela wejina daKayla wadiña nakuyekela nayikatu yamuyitoñojoka, chineñi nimutu wambaloli (wanzaji). Chamukalilileña kuya nakupompa. Hela chochu, chelili yadishiku yayi nakupompa, wasonekeli nindi: “Mpanji yahosheleña hayuma yatukañeshaña. Mpanji ayihanini chiwahi chakwila nadilili nikudila. Yañanukishili nawu natela kuyaña nakupompa mpinji yejima.” Dichi wazañaleli chazatiliyi nañovu kulonda yayi nakupompa.

8, 9. Kapostolu Pawulu watalishili mudihi chasonekeliyi nindi: “Neyi nazeyi, dihu hinekalaña nañovu”?

⁸ Tañenu Isaya 40:30. Hela chakwila twadiza chikupu, kwila tutwesha kwila yuma yejima muñovu jetu nehi. Dichuma chitwatela kwiluka wejima wetu. Hela chakwila kapostolu Pawulu welukili yuma yayivulu, wadiña wanyi nañovu yakwila yuma yejima yakeñeleñayi kwila. Chamulejelimu Nzambi kwakama kwindi, amulejeli nawu: “Mukuzeyazeya kweyi dimunakulumbulukila ñovu jami.” Pawulu watiyishishili mwamulejeliwu. Wakunkulwili nindi: “Neyi nazeyi, dihu hinekalaña nañovu.” (2 Kor. 12:7-10) Watalishili mudi chahosheliyi awa mazu?

⁹ Pawulu welukili nindi wukutwesha wanyi kuzata nyidimu yayivulu chakadi wukwashu waMukwakuhana ñovu. Spiritu yaNzambi yamwinkeleña Pawulu ñovu yabuliliyi. Bayi neyi yamwinkeleña hohu ñovuku, ilaña Spiritu yaNzambi yamukwashileña kuzata nyidimu yamaneni yadi kukañanyayi kuzata nañovu yindi. Ninetu dichiyatukwashaña. Neyi Yehova yatwinka ñovu, tukwikala akola chikupu!

10. Yehova wamukwashili ñahi Davidi kushinda kukala kwamweneñayi?

¹⁰ Davidi ñimbi yamasamu wamweni spiritu yajila yaNzambi chiyamukwashili. Wembili nindi: “Muloña naneyi hinukulotokela mukanka; naNzambi yami hinukumotoka ikoli.” (Mas. 18:29) Kudi makoli amakwawu, hela netu kukala kukwawu kutunateli kubula “kumotoka” nañovu jetu; chiña hohu nañovu jaYehova.

11. Lumbululenu chazataña spiritu yajila hakutukwasha kumanisha kukala.

¹¹ Tañenu Isaya 40:31. Mbuulu chatukañayi nakuya haheni hamalela wazatishaña ñovu jindi yomweni wanyi. Mpepela yitata diyamutwalaña hamalela nawa yamukwashaña kubula kuzeya swayi. Dichi neyi munamoni kukala kwasweja, anukenu mbuulu. Mulembelelenu Yehova kulonda “yayinyamuni” kuhitila mudi “nkwashi, spiritu yajila.” (Yow. 14:26) Chamuzañalu, tunateli kulomba spiritu yindi mpinji yidi yejima, mwaana niwufuku. Nawa neyi tunadivulumuni namanakwetu muchipompelu, twatela kulomba wukwashu waNzambi. Hanu muloñadi chitwadivulumwinaña nawamanakwetu?

12, 13. (a) Muloñadi akwaKristu chadivulumwinañawu? (b) Chakutalilahu chaYosefu chatudizishañadi hadi Yehova?

¹² Twadivulumunaña nawamanakwetu muloña wejima wetu hitwawaninaku. Dichi, kukwikalaña mpinji yitukutiyaña kutama namazu niyilwilu yawakwetu akwakwitiya hela etu kuyineñesha wena. Iku kunateli kwikala kweseka kweneni. Neyi chekala kweseka kwejima, Yehova wetejaña kutweseka kulonda tumwekeshi kashinshi ketu kuhitila mukuzata mukuwunda nawamayala niambanda adihana nawa akeñayi hela chakwila hiyawaninaku.

¹³ Chakutalilahu chaYosefu chamwekeshaña nawu Yehova wetejaña ambuñindi kuyeseka. Yosefu hadiñayi kansi, amanakwindi amutiyilili ichima nakumulandisha muwuduñu kuEjipitu. (Kutach. 37:28) Yehova wamweneña yuma yejima yamwekeneña nawa  waneñeli kumona ibwambu dindi Yosefu washinshika anakumuyandisha. Hela chochu, Nzambi helilihu chumaku. Chimwahitili mpinji, Yosefu amutwambilili nawu wakeñeleña kumukaama ñoda Potifwari nawa amushili mukaleya. Chochimu, kwosi chuma cheliliyi Yehova. Komana Nzambi wamushiyili Yosefu nkawindi? Inehi: “Yuma yeliliyi Yosefu yejima Yehova wayiwahishili.”—Kutach. 39:21-23.

14. Yumanyi yayiwahi yakuspiritu niyakumujimba yafumañamu neyi ‘tuleka’ kuzuwa?

¹⁴ Talenu chakutalilahu chikwawu. Antu antesha hohu diwu akabishawu dehi neyi chamukabishiliwu Davidi. Hela chochu, ona ibwambu daNzambi wahilili wanyi. Ilaña wasonekeli nindi: “Lekaku kuzuwa, shiyaku ndombu; muchima weyi bayi wubimbañaku, chaleta kwila yuma yatama.” (Mas. 37:8) Twatela ‘kuleka’ kuzuwa muloña twamwimbujolaña Yehova, yena “hanatwili mwesekena nshidi jetuku.” (Mas. 103:10) Ilaña kudi cheñi yuma yayiwahi yafumañamu neyi ‘tuleka’ kuzuwa. Kuzuwa kwaletaña yikatu yidi neyi BP nikukañanya kwona chiwahi. Cheñi kunateli kuleñela muchima wachida mbanda nidimbelema kubula kuzata chiwahi nawa yakuda akañanyaña kuyichika mwivumu. Neyi tunazuwi, twakañanyaña kutoñojoka chiwahi. Nawa mpinji yikwawu kuzuwa kunateli kumuleñela muntu kuneña hadi mpinji yayilehi. Ilaña, Bayibolu yahoshaña nawu, “muchima wadiwunjika wahandishaña muntu.” (Yish. 14:30) Hanu dinu tunateli kuleka ñahi kuzuwa kulonda tutiyañani namanakwetu? Tunateli kutwesha neyi tuzatisha kufumba kwekala muBayibolu.

15, 16. Tunateli kuhanjeka ñahi namuntu wunatuvulumuni?

¹⁵ Tañenu Aefwesesa 4:26. Neyi antu amukaayi anakutuhilisha twomikaña chakubula kuneña. Ilaña neyi mukwetu mukwakwitiya hela ntaña yetu yahosha mazu atama, chatukataña kumuchima nawa tunateli kuhila. Hanu fwikijenu neyi chakwila tutwalekahu kutoñojoka haniyi nsañu. Komana tukutwalekahu kuhila hadi yaaka yayivulu? Indi kwiji tukulondela kufumba kwamaana kwamuBayibolu kwakumanisha kukala swayi? Neyi tushimbula kumanisha kukala, chikwikala chakala kumanisha kukala namanakwetu.

¹⁶ Twili netu manakwenu nayineñeshi nawa munatwalekihu kutoñojoka hanoku kukala. Yumanyi yimwatela kwila hakwila nawu muleti kuwunda? Chatachi, mulombenu Yehova chakufuma hamuchima. Mulombenu yayikwashi kuhanjeka chiwahi namanakwenu. Mwatela kwanuka nenu niyena hibwambu daYehova. (Mas. 25:14) Niyena amukeña kudi  Nzambi. Yehova watiyilaña amabwambu jindi luwi, nawa nakukeña nindi ninetu twileña chochimu. (Yish. 15:23; Mat. 7:12; Kol. 4:6) Chamuchiyedi, toñojokenu yuma yimukuya nakuhosha. Bayi mutoñojoka nenu manakwenu welilamu hohu mumushikila kulonda yayitishi kutamaku, kumutoñojokela munoyu njila nehi. Nawa hoshenu chakubula kuhita mumbadi nenu ninenu mwaletesha mukwenu yahili. Munateli kutachika kuhanjeka nakuhosha nenu: “Hadaha natiyishisha wanyi, ilaña chiwahosha nanami haloshi, natiya neyi . . .” Neyi kuleta kuwunda nehi, keñenu cheñi njila yikwawu kulonda muleti kuwunda. Hampinji yimunakukeña njila yikwawu, mulombelenuku manakwenu kudi Yehova kulonda yamukiswili. Mulombenu Nzambi yayikwashi kusha maana hayilwilu yayiwahi yekala namanakwenu. Hichikweti kukala nachuma chejima chikufumamuku, kuhwelelenu nenu Yehova wakutiya kuwaha chimunazati nañovu hakumukwasha manakwenu, ibwambu daNzambi.

17. Njilanyi yazatishañayi Yehova hakutwanakena neyi tunakoñi nshidi yahamesu bwi-i, nawa muloñadi chitwatela kuzatishila iyi njila?

¹⁷ Antu amakwawu atoñojokaña nawu ashikilamu wanyi kuzatila Yehova muloña wanshidi yasweja yakoñeliwu. Kudinka nyiloña hichisenda cheneni. Mwanta Davidi wadinkeleña nyiloña wasonekeli nindi: “Chinashakamini nakumwena zo-o, mafwahami hiyakushinakaja, nachina chinadiñi nakwaba mwaana wejima. Chikasa cheyi chinanlemeni nimwaana niwufuku.” Davidi washindili kukala kwindi neyi iyala wanha kuspiritu. Wasonekeli nindi: “Netejeli munakuvulumwini . . . Nineyi hiwukuñanakena kuluwa kwanshidi yami.” (Mas. 32:3-5) Neyi mwakoñeli nshidi yasweja, Yehova nateli kuyikwasha kuleka kudinka nyiloña. Ilaña mwatela kwiteja wukwashu waloñeshayi kuhitila muchipompelu. (Yish. 24:16; Yak. 5:13-15) Bayi mulabaku, muloña wumi wenu wahaya nyaaka wudi muwubanji. Indi neyi ayanakena dehi, ilaña muchidi kudinka nyiloña muloña wanshidi yimwakoñeli kunyima?

18. Chakutalilahu chaPawulu chinateli kukwasha ñahi antu adinkaña nyiloña?

¹⁸ Kudi mpinji yimu kapostolu Pawulu watiyileña kutama muloña wayiluwa yakoñeliyi kunyima. Wahosheli nindi: “Ami yami nakehelamu hakachi kawapostolu, nawa ami nateleli wanyi kuntena nawu kapostolu, muloña nakabishili chipompelu chaNzambi.” Hela chochu Pawulu wabombelelelihu nindi; “ilaña hamuloña waluwi lwaNzambi lwasweja, dilu lunanleñeli niikali ichi chinidi.” (1 Kor. 15:9, 10) Yehova wamwanakeneni Pawulu nawa wakeñeleña yeluki nindi anamwanakeni. Neyi mubalumuka chikupu nakuleka nshidi yimwakoñeli kunyima nawa mulondela njila yashaku Nzambi, ilukenu nenu Yehova wukuyanakena. Itejenu mwanayilejiyi Yehova nawa ilukenu nenu nayanakeni!—Isa. 55:6, 7.

19. Nsona yachaaka cha 2018 yinakuhosha nawudi, nawa yinawahilidi?

¹⁹ Chineli kukuma kwanshakaminu yamakonu kudi mukamwihi, twatela kukuhwelela netu tukumonaña kukala muchihandilu. Hela chochu, ilukenu nenu Owu “wamwinkaña muntu wazeya wuswa” nateli kuyikwasha ninenu kuumika kulonda mutwalekihu. (Isa. 40:29; Mas. 55:22; 68:19) Muchaaka cha 2018 chejima, akutwanukishaña ichi chalala chalema mpinji yejima yitukuyaña nakupompa Mwitala daWanta. Chidi mumazu adi munsona yachaaka yinakwila nawu: ‘Antu amuchiñililaña Yehova akekala cheñi nañovu.’—Isa. 40:31.