1, 2. Kukalanyi kunakumonawu antu jaNzambi makonu? (Talenu nyevulu yakutachikilahu.)

ANDOTOLU amavulu okaña antu akata yikatu yakansambu-nsambu. Ayuukaña ayeji muloña akeñaña kuyikwasha. Hela chochu, hampinji yinakuyuukawu ayeji atela kudikiña kulonda yikatu yinakukeñawu kuuka yibuli kuyisambukila. Munjila yoyimu, etu amavulu twashakamaña nikuzata nawantu akweti yilwilu yatama yinateli kusambukila yilwilu yetu yayiwahi. Yumiyi yatuletelaña kukala.

² Anu mafuku akukuminina, mukaayi mudi ilundu. Mukanda wakapostolu Pawulu wamuchiyedi wamusonekeleliyi Timotewu walumbulwili yilwilu yikekala nawantu adambula kudi Nzambi, yilwilu yikamwekanaña nankashi mumafuku akukuminina akumbidi. (Tañenu 2 Timotewu 3:1-5, 13.) Hela chakwila tunateli kutiya kutama naniyi yilwilu, tunateli kuluwankana nayilwilu niyuma yeleña antu amwekeshaña iyi yilwilu. (Yish. 13:20) Muchinu chibaaba, tukushinshika yilwilu yekala nawantu amumafuku akukuminina chiyambuka nayilwilu yawantu jaNzambi. Tukwiluka cheñi chitunateli kudikiña kuniyi yilwilu yatama hampinji yitunakukwasha antu amakwawu kuspiritu.

3. Anyi amwekeshaña yilwilu yashimunawu ha 2 Timotewu 3:2-5?

 ³ Kapostolu Pawulu wasonekeli nindi: “Mumafuku akukuminina, mwakekala mpinji jakala.” Kufumahu, wasonekeli yilwilu yatama 19, yikamwekeshaña antu amunanu mafuku. Iyi yilwilu yidi neyi yashimunawu haAroma 1:29-31, hela chakwila mukanda wamusonekeleliwu Timotewu kudi Pawulu mudi mazu abulawu dehi kutena hadi hejima muNsona jawakwaKristu jachiGriki. Pawulu hakusoneka yilwilu yatama watachikili namazu akwila nawu “muloña antu akekala. . .” Hela chochu, iyi yilwilu bayi neyi anakuyimwekesha kudi antu ejimaku. AkwaKristu adi nayilwilu yambukaku chikupu.—Tañenu Malaki 3:18.

4. Munateli kulumbulula ñahi chekala antu adivwimba?

⁴ Hanyima yakuhosha nindi antu amavulu akadikeña aweni nikukeña mali, Pawulu wasonekeli nindi antu akekala cheñi akwakudisamba, akwakudinka wanta, nawa akwakudivwimba, yilwilu yamwekeshaña antu aditiya muloña wayuma yelukawu, mmwekenu, maheta hela chifulu chikwetiwu. Antu ekala naniyi yilwilu akeñaña nawu ayikumbweña. Muntu wadiza Bayibolu wumu wasonekeli hadi muntu wejima wadivwimba nindi: “Mumuchima windi mwekala kameña kanyanya kafukaminañayi.” Amakwawu ahoshaña nawu kudivwimba kwatama chikupu chakwila antu adivwimba ayitiyaña kutama kudi antu aditiya.

5. Antu ashinshika anateli kudivwimbaña ñahi?

⁵ Yehova wahela chikupu antu adivwimba. Wahela “mesu akudimujola.” (Yish. 6:16, 17) Muntu wadivwimba kwila yekala ibwambu daNzambi nehi. (Mas. 10:4) Hichilwilu chekala naDiyabolu. (1 Tim. 3:6) Chawushona, ambuña aYehova amakwawu niwena adi nayilwilu yakudivwimba. Uziya, mwanta wawaYuda, wadiña washinshika hadi yaaka yayivulu. “Ilaña,” Bayibolu yashimuna nawu, “chakwatiliyi ñovu hakudivwimba mumuchima windi hakwila nichakudikisañana hakumotoka Yehova Nzambi yindi hakwiñila mutembeli yaYehova nindi ochi insensi hakameña kakwochela insensi.” Chimwahitili mpinji, Mwanta Hezekiya wadivwimbili, hela chakwila wadivwimbili hohu hakapinji kantesha.—2 Kushi. 26:16; 32:25, 26.

6. Yumanyi yadi kuletesha Davidi kwikala wadivwimba, ilaña muloñadi chabuliliyi kudivwimba?

⁶ Antu amakwawu adivwimbaña muloña amwekanaña lubanji, atiyakana, akweti wuswa wakwimba tumina, akuluka yitembi muyuma yimu hela yifulu yamaneni yikwetiwu. Davidi wadiña nayuma yejimiyi, ilaña wadiña wadizoza muchihandilu chindi chejima. Chelili yamujahi Goliyati, amwinkeli mwana kaMwanta Sawulu kulonda yekali ñodindi, Davidi wahosheli nindi: “Yaminyi ntahi hela awusoku wami hela chisaka chatata yami muIsarela hiyanyi ntahi mwaka nimoni nijakwikala Sambanza [muku wamwanta]?” (1 Sam. 18:18) Yumanyi yaletesheli Davidi kwikala wadizoza? Davidi wadiña nayilwilu, wuswa niyifulu muloña Nzambi ‘wadizozeli’ nakumutiyilila. (Mas. 113:5-8) Davidi welukili nindi yuma yejima yadiñayi nayu yafumini kudi Yehova.—Esekejenu 1 Akorinda 4:7.

7. Yumanyi yinateli kutukwasha kwikala adizoza?

⁷ Kufwana Davidi, antu jaYehova makonu azataña nañovu kulonda amwekesheña kudizoza. Twahayamaña chikupu kwiluka netu Yehova, Muntu wabadika kwiwulu nihamaseki, wukweti ichi chilwilu chakudizoza. (Mas. 18:35) Twalondelaña kufumba kwonenawu kwakwila nawu: “Vwalenu muchima wawushona, luwi, kudizoza, kwovwaha nikudiwunjika.”  (Kol. 3:12) Tweluka cheñi netu kukeña “hikwadivwimbañaku, hikwadinkaña wantaku.” (1 Kor. 13:4) Neyi tumwekesha kudizoza, antu akuswina kudi Yehova. Neyi chamukokañawu iyala kudi ñodindi chakadi mazu ilaña muyilwilu, muntu niyena nateli kuswina kudi Nzambi nakudizoza kwamwekeshaña antu jindi.—1 Pet. 3:1.

8. (a) Antu amakwawu makonu anakumona ñahi kubula kwovwahila anvwali? (b) Nsona yashimuna nawudi kutalisha hadi anyana?

⁸ Pawulu walumbulwili antu amumafuku akuminina chakashakamañawu nawakwawu. Wasonekeli nindi mumafuku akukuminina, anyana akwovwahilaña wanyi anvwali jawu. Chineli iyi yilwilu mpinji yikwawu anakuyiteja nawa anakuyisoneka munyikanda, anakuyimwekesha mumafilimu nihama progilamu aha TV, kubula kwovwahila kunakuletesha antu kubula kunuñañana muchisaka. Ichi chikuma antu anachiluki hadi yaaka yayivulu. Mwituña daGreece dakushankulu, neyi iyala yeta nvwali yindi, amutambwileña wuswa wakusuba. Munshimbi jawaRoma, kweta tata yeyi akwimweneña neyi kujahana. Nsona jejima jachiHeberu nijawakwaKristu jachiGriki jayilejaña anyana kulemesha anvwali jawu.—Kwid. 20:12; Efwe. 6:1-3.

9. Chumanyi chinateli kuyikwasha atwansi kwovwahila anvwali jawu?

⁹ Atwansi anateli kutondolwela kwikala nayilwilu yakubula kwovwahila kuhitila mukusakilila anvwali jawu hayuma yayililawu. Hakwila ekali namuchima wakusakilila, chiña eluka nawu Nzambi, Tata yetu wejima wetu wakeñaña nindi twovwahileña anvwali jetu. Atwansi anateli kukwasha akwawu atwansi kulemesha anvwali jawu neyi ahoshaña yuma yayiwahi hadi anvwali jawu. Hela chochu, neyi anvwali abula kukeña anyanawu, anyana chikuyikalilaña kuyovwahila chakufuma hamuchima. Ilaña, neyi kansi yamona nindi anvwali amukeña chakufuma hamuchima, wukwilaña yuma yikuyizañaleshaña hela chakwila yuma yinakali. Austin wahosheli nindi: “Hela chakwila chankalilileña kwiluka yuma yejima, anvwali jami anlejeleña nshimbi jajiwahi, anlumbulwilileña chiyanashiliku oyu nshimbi nawa adiña akasunuka kuhosha nawu. Chumichi chankwashili kwikala wovwahila. Namweneña nami ankeña nawa chumichi chankwashileña kuyovwahila.”

10, 11. (a) Yilwilwinyi yatama yamwekeshaña nawu antu akeña wanyi akwawu? (b) Lumbululenu akwaKristu chatela kukeñawu akwawu antu?

¹⁰ Pawulu wasonekeli yilwilu yikwawu yatama yamwekeshaña nawu antu akeña wanyi akwawu. Kubula kusakilila kwendelaña hamu ‘nakubula kwovwahila anvwali,’ muloña kwamwekeshaña yilwilu yawantu abulaña kusakilila hayuma yayiwahi yinayililiwu kudi akwawu. Antu akekala cheñi abula kushinshika. Akekala abulaña kukeña kutiyañana nawakwawu, kumwekesha yilwilu yakubula kuditeja nawantu amakwawu. Akekala akwakasawuntu nawa akwakufukejela akwawu, kuhosha mazu atama hadi akwawu antu nihadi Nzambi. Nawa kwakekala akwakutwambila akwawu, antu ahoshaña nsañu yakutwamba hadi akwawu kulonda ayitamishili majina. *

¹¹ Kwambukaku nawantu abulaña kumwekesha kukeña makonu, antu adifukulaña kudi Yehova akeña akwawu antu chakufuma hamuchima. Kufuma tuhu kunyima amwekeshaña kukeña. Yesu wahosheli nindi kukeña akwetu, kukeña kwa a·gaʹpe, dilushimbi lwalema  lwamuchiyedi muNshimbi yaMosi, dilushimbi hohu lwalondela halushimbi lwakumukeña Nzambi. (Mat. 22:38, 39) Yesu wahosheli cheñi nindi kukeña akwetu dichilwilu chakuyilukilaku akwaKristu alala. (Tañenu Yowanu 13:34, 35.) Kukeña kwamuchidiwu kwawakwaKristu akakwimwekeshelaña niayilumbu jawu.—Mat. 5:43, 44.

12. Yesu wamwekesheli ñahi nindi wakeña antu?

¹² Yesu wayikeñeli antu chikupu. Wayileña kumusumba nimusumba nakuyileja antu nsañu yayiwahi yaWanta waNzambi. Watonesheli amputa mesu, wokili ayifwayi, akata mbumba niajika matu. Wasañwili afu. (Luka 7:22) Yesu wahanini niwumi windi kukola antu, hela chakwila amavulu amuheleli. Yesu wamwekesheli kukeña kwamwekeshañayi Tata yindi. A Yinsahu jaYehova mukaayi kejima amwekeshaña kukeña kwaNzambi kudi antu amakwawu.

13. Kukeña kutwamwekeshelaña antu kunateli kuyikwasha ñahi antu kuswina kudi Yehova?

¹³ Kukeña kutwamwekeshelaña antu kwayikwashaña antu kuswina kwakwihi naTata yetu wamwiwulu. Chakutalilahu, iyala wumu kuThailand, wahayamini kukeña kwamweniyi hakachi kawamanakwetu hakupompa kweluña. Chafuntiliyi kwitala, walombeli kudiza Bayibolu kayedi mumulungu. Wayishimwinini antaña jindi ejima nawa chimwahitili tukweji 6 hanyima yakuna kupompa, wahanini mpanji yindi yatachi yakutaña Bayibolu Mwitala daWanta. Hakwila twiluki neyi tunakumwekeshela akwetu kukeña, twatela kudihula netu: ‘Komana nakwashaña antaña jami, amanakwetu muchipompelu niantu inawanaña mumudimu wakushimwina? Komana nafwilaña kumona akwetu neyi chayimonañayi Yehova?

14, 15. Yilwilwinyi yawunyama yinakumwekeshawu antu, ilaña amakwawu anahimpi ñahi?

¹⁴ Yilwilu yikwawu yikamwekeshañawu antu mumafuku akukuminina yahanaña wunsahu wukwawu wuyatela akwaKristu kutondolwela antu amuchidiwu. Antu abula kumwakama Nzambi akekala abula kukeña yayiwahi, hela neyi chabalumunawu akwakubalumuna amakwawu  nawu “ahela yuma yayiwahi” hela “ayilumbu ayuma yayiwahi.” Akekala abulaña kudiyuula, asweja kuzuwa. Amakwawu akekala achinchika, hela akola nyichima nawa ashinta.

¹⁵ Antu amavulu adiña nayilwilu yamuchidiwu yawunyama ahimpa chikupu. Iku kuhimpika akwishimwineñahu dehi muwuprofwetu wamuBayibolu. (Tañenu Isaya 11:6, 7.) Twatañañamu nsañu yawatunyama ayisumi, adi neyi atuñwidi ninyitupa nawu akashakamaña hamu mukuwunda nawanyama akutadika, adi neyi anyana kanyikoku nawa ñombi. Ilukenu nenu iku kuwunda kwakekalaku “muloña iseki dejima dakawanina kumwiluka Yehova.” (Isa. 11:9) Chineli atunyama ekala wanyi nawuswa wakudiza hadi Yehova, iwu wuprofwetu wakashikijewa hadi antu.

16. Bayibolu yinakwashi ñahi antu kuhimpa wuntu wawu?

¹⁶ Kudi antu amavulu adiña ashinta neyi atuñwidi ilaña chayinu mpinji anakushakama mukuwunda nawakwawu. Munateli kutaña nsañu yanawa antu muyibaaba yahoshaña nawu “Bayibolu Yahimpaña Yihandilu Yawantu” yaha jw.org/lun. Antu anamwiluki Yehova nawa anatachiki kumukalakela ambukaku nawantu amwekanaña neyi kwiji amwakama Nzambi, ilaña akaanaña ñovu yaniku kwakama, amwekanaña neyi adifukulaña kudi Nzambi ilaña yilwilu yawu yamwekeshaña nawu hiyadifukulaña kudi yenaku. Antu adiña azuwa anavwali “wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.” (Efwe. 4:23, 24) Antu chadizañawu hadi Nzambi, amonaña kulema kwakulondela nshimbi jindi. Dichi ahimpaña yuma yakuhwelelawu, yilwilu ninzatilu yawu. Chapela wanyi kuhimpa ilaña muntu nateli kuhimpa muloña spiritu yaNzambi yakwashaña antu afwilaña kwila nkeñelu yaNzambi namuchima wejima.

17. Tunateli kutondolwela ñahi kutwiluwañesha kudi antu amwekeshaña yilwilu yatama?

¹⁷ Chaambu chidi hadi antu amukalakelaña Nzambi nawantu abulaña kumukalakela chinakumwekana chikupu hatooka. Etu twamukalakelaña Nzambi twatela kwikala asoñama neyi nehi tunateli kwikala nayilwilu yawantu abula kuloña. Twatela kulondela kufumba kwekala ha 2 Timotewu 3:2-5 kwakwila nawu ambukaku kudi antu amuchidiwu. Hela chochu, tukutwesha wanyi kudaambula chikupu nawantu ekala naniyi yilwilu. Tunateli kuzata nawu, kuya nawu kushikola hela kushakama nawu. Ilaña twatela kubabala kuchina twakenda katachika kutoñojoka neyi wena nikwimbujola yilwilu yawu. Twatela kwila mwenimu kuhitila mukukolesha wuspiritu wetu kuhitila mukudiza Bayibolu nikwikala nawubwambu wawuwahi nawantu amukalakelaña Yehova.

18. Nhoshelu niyilwilu yetu yinateli kukwasha ñahi antu amakwawu kwikala amabwambu jaNzambi?

¹⁸ Twatela kuzata nañovu kulonda tukwasheña amakwawu ekali amabwambu jaNzambi. Tushimwinenuña mpinji yejima yinateleli, nikumulomba Yehova kulonda yayikwashi kuhosha yuma yayiwahi hampinji yatelela. Twatela kuyileja amakwawu netu tudi aYinsahu jaYehova. Neyi twila mwenimu, yilwilu yetu yayiwahi yikuleta kalemesha kudi Nzambi bayi kudi etuku. Atudizisha “kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu.” (Tit. 2:11-14) Neyi tumwekeshaña yilwilu yayiwahi, amakwawu akutumona nawa amakwawu anateli kuhosha nawu: “Tuyi nenu, muloña tunatiyi nawu Nzambi mwekala nindi.”—Zek. 8:23.