1-2. ( a) Mazu ekala haIsaya 41:10 amukwashili ñahi muhela Yoshiko? (b) Anyi asonekeleliyi Yehova awa mazu?

MUHELA Yoshiko amulejeli nsañu yamuneñesheli. Ndotolu wamulejeli nindi kunashali hohu tukweji twantesha nakufwa. Welili ñahi? Yoshiko wanukili nsona yakeñeliyi, Isaya 41:10. (Tañenu.) Wamulejeli ndotolu nindi wadiña nakutiya woma wanyi muloña Yehova wamukwatili kuchikasa. * Mazu akukundeja ekala haniyi vasi, amukwashili iwu muhela kumukuhwelela Yehova chikupu. Iyi vasi yinateli kutukwasha ninetu kwikala awunda neyi tudi mukukala. Hakwila nawu twiluki chiyinateli kutukwasha, tushinshikenu chaletesheli Nzambi yamuleji Isaya kusoneka awa mazu.

² Hakusambila, Yehova wamulejeli Isaya kusoneka awa mazu kulonda akundeji aYudeya ayileña muwunkoli muBabiloni. Hela chochu, bayi neyi Yehova wasonekeleli hohu aYudeya ayileña muwunkoli awa mazu akukundejaku, ilaña antu ejima kushilahu ninetu. (Isa. 40:8; Rom. 15:4) Makonu tunakushakama ‘mumpinji jakala,’ dichi tunakukeñeka kutukundeja namazu ekala haIsaya.—2 Tim. 3:1.

3. (a) Yikaninwinyi yekala haIsaya 41:10, nsona yinatondiwu kwikala nsona yachaaka cha 2019? (b) Muloñadi chitwakeñekelaña iyi yikaninu?

³ Muchinu chibaaba, tukuhanjeka hayikaninu yisatu yatukanayi Yehova yakoleshaña chikuhwelelu chetu, yekala haIsaya 41:10: (1) Yehova wukwikalaña nanetu, (2) diyi Nzambi yetu, (3) nawa wukutukwashaña. Kufwana Yoshiko, tunakukeñeka  iyi yikaninu * muloña ninetu twamonaña kukala muchihandilu. Twamonaña kukala muloña wayuma yatama yidi mukaayi. Etu amakwawu atukabishaña kudi jinfulumendi jikweti ñovu. Tushinshikenu yikaninu yisatu.

4. (a) Chikaninwinyi chatachi chitukuhanjekahu? (Talenu cheñi tumazu twaheshina.) (b) Yehova wamwekeshaña ñahi nindi watukeña? (c) Mazu aNzambi ayikwashaña ñahi?

⁴ Yehova wasambilaña kutukundeja nindi: “Bayi wutiyaña womaku, ami nidi neyi.” * Yehova wamwekeshaña nindi wudi nanetu chatwakamenañayi nikutumwekeshela kukeña. Talenu chamwekeshañayi nindi watwakamenaña nawa nindi watukeña. Yehova watulejaña nindi: “Chiwasweja wuseya kumesu ami, walema nawa nakukeña.” (Isa. 43:4) Kwosi ñovu mukuleña kwejima yinateli kumukañesha Yehova kukeña antu amukalakelañaku; watwalekañahu kutukwasha. (Isa. 54:10) Kukeña niwubwambu wutukweti nayena jatukwashaña kwikala ahamuka. Wukutukiñaña neyi chamukiñiliyi ibwambu dindi Abarama (Abarahama). Yehova wamulejeli nindi: “Bayi wutiyaña womaku, eyi Abarama; ami yami nkebu yeyi.”—Kutach. 15:1.

5-6. ( a) Tuneluki ñahi netu Yehova wukutukwashaña hampinji yitukumonaña kukala muchihandilu chetu? (b) Chumanyi chitunateli kudizila kudi Yoshiko?

⁵ Tweluka netu Yehova watukwashaña neyi tumona kukala muloña wayikana antu jindi nindi: “Chiwukuhitaña [mumenji] nukwikalaña neyi. Chiwukuhitaña mutuloña hitwakakuhita hamutuku. Chiwukuhitaña mukesi hiwakasukumaku; kwosi [mulañi] wakakwochaku.” (Isa. 43:2) Awa mazu atalisha mudihi?

⁶ Yehova wakana wanyi nindi wukufumishahu kukala kutukumonaña muchihandilu, ilaña haketeja kukala kudi neyi ‘tuloña’ kutukañesha kumukalakela hela kukala kudi neyi  ‘mulañi’ kutwalekahu haya nyaakaku. Watukana nindi wukwikalaña nanetu, wukutukwashaña kumanisha kukala kwejima ‘kutukuhitañamu.’ Yehova wukutukwashaña ñahi? Wukutukwashaña kubula kwikala nawoma kulonda tutwalekihu kwikala ashinshika kudi yena hela chakwila tukufwa. (Isa. 41:13) Yoshiko itwatena hakusambila, welukili nindi Yehova wamukwashileña. Mwanindi wamumbanda wahosheli nindi: “Twahayamini aMama chadiñawu ahamuka. Twelukili chikupu netu Yehova diyi wayikwashileña kwikala nakuwunda kwamuyitoñojoka. Amama adiña nakuyishimwina andotolu niayeji kulonda amwiluki Yehova niyuma yakanayi kushika tuhu nimpinji yafwiliwu.” Chumanyi chitunadizili kudi Yoshiko? Neyi tukuhwelela muchikaninu chaNzambi chakwila nawu: “Nukwikalaña neyi,” ninetu tukwikalaña ahamuka nawa akola hampinji yitukumonaña kukala.

7-8. ( a) Chikaninwinyi chamuchiyedi chitukuhanjekahu, nawa chatalisha mudihi? (b) Muloñadi Yehova chayilejeleliyi aYudeya adiña muwunkoli nindi: ‘Bayi wakamaku’? (c) Mazwinyi ekala haIsaya 46:3, 4 akolesheli antu jaNzambi?

⁷ Talenu chikaninu chamuchiyedi chasonekeliyi Isaya: ‘Bayi wakamaku ami yami Nzambi yeyi.’ Indi izu dakwila nawu kwakama datalisha mudihi? Muniyi vasi izu dakwila nawu ‘kwakama,’ datalisha kudi “muntu wunakutalatala muloña wakutiya woma nindi kudi chuma indi kwiji kudi muntu wunateli kumulukuka.” Hela “muntu wunakutiya woma muloña wakwikala muwubanji.”

⁸ Muloñadi Yehova chayilejeleliyi aYudeya ayileña muwunkoli muBabiloni kubula ‘kwakama’? Welukili nindi antu amunidi ituña akatiya woma. Chumanyi chadi kuyiletesha kutiya woma? Muloña kwakwihi nakukuma kwayaaka 70 yakwila aYudeya adi muwunkoli, musumba waBabiloni ayileña nakuwulukuka kudi amashidika añovu aMediya naPeresi. Yehova wayileña nakuzatisha awa amashidika kulonda yafumishi antu jindi adiña muwunkoli muBabiloni. (Isa. 41:2-4) Antu ashakamineña muBabiloni niakumatuña acheñi chelukiliwu nawu ayilumbu jawu adi kwakwihi nakuyilukuka, adilejeli wumu namukwawu nawu: “Dikoleshi.” Atuñili cheñi ankishi amavulu muloña atoñojokeleña nawu akuyikiña. (Isa. 41:5-7) Dichi Yehova wayikolesheli aYudeya adiña muwunkoli nindi: ‘Eyi Isarela [kwambukaku nawantuñi neyi] eyi ñamba yami . . . Bayi wakamaku ami yami Nzambi yeyi.’ (Isa. 41:8-10) Talenu chahosheliyi Yehova nindi: “Ami yami Nzambi yeyi.” Yehova chahosheliyi awa mazu wadiña nakuyikolesha antu adifukwileña kudi yena nindi wayijimbeli wanyi, hiNzambi yawu nawa nindi adiña antu jindi. Wayilejeli nindi: ‘Nukuyelekaña . . . nikuyipulwisha.’ Chakadi nikujina, awa mazu ayikolesheli aYudeya adiña muwunkoli.—Tañenu Isaya 46:3, 4.

9-10. Muloñadi chitwatela kubula kutiya woma? Lumbululenu.

⁹ Antu amavulu makonu anakwakama chikupu muloña wayuma yinakutaminaku mukaayi. Hela chochu, ninetu twakamaña naniku kukala. Ilaña hitwatela kutiya womaku. Yehova watulejaña nindi: “Ami yami Nzambi yeyi.” Muloñadi awa mazu chatuwundishilañawu?

¹⁰ Shinshikenu ichi chakutalilahu: Jim niBen adi mundeki yinakukañeshawu kwenda kudi mpepela yeneni. Hampinji yinakulelulawu ndeki kudi mpepela, ñendeshi hakuleja antu adi mundeki nindi: “Dikasenu nyishipi. Tukwenda iluña datama hadi mpinji  yayilehi.” Jim hakutiya woma chikupu. Dichi ñendeshi hakuhosha cheñi nindi: “Bayi wakamaku. Yami ñendeshi wunakuhosha.” Haniyi mpinji, Jim hakudipukumuna kumutu nakuhosha nindi: “Wukwashu wamuchidinyi weniwu?” Ilaña, Ben hanakwakamaku. Dichi Jim hakumwihula nindi: “Muloñadi chiwunakubulila kutiya woma?” Ben hakumwemweta nakuhosha nindi: “Namwiluka chikupu iwu ñendeshi, hitata yami!” Kuhiñahu, Ben hakuhosha nindi: “Wundaku nikuleji chekala atata. Neyi wiluka chekalawu nichendeshañawu ndeki, wukuleka kwakama.”

11. Yumanyi yitunadizili kudi aJim niBen?

¹¹ Ichi chakutalilahu chinakutudizishadi? Kufwana Ben, twakamaña wanyi muloña twamwiluka chikupu Tata yetu wamwiwulu, Yehova. Tweluka netu wukutukiñaña hampinji yitunakuhita mukukala kwasweja munanu mafuku akukuminina. (Isa. 35:4) Twamukuhwelela Yehova, dichi tukutiyaña woma wanyi mukanu kaayi mudi antu anasweji woma. (Isa. 30:15) Neyi tuyishimwinaña akwetu yuma yaletesha tumukuhweleli Nzambi, dikwila nawu tunakwila neyi cheliliyi Ben. Dichi niwena akukuhwelela nawu hela chakwila akumona kukala kwamuchidinyi, Yehova wukuyikwashaña.

12. (a) Chikaninwinyi chamuchisatu chitukuhanjekahu? (b) Mazu akwila nawu “chikasa” chaYehova atwanukishañadi?

¹² Shinshikenu chikaninu chamuchisatu chasonekeliyi Isaya nindi: “Nakakwinkaña ñovu; chalala nakakukwashañaku.” Isaya washimwineñahu dehi chakayinkayi Yehova antu jindi ñovu hela kuyikolesha, chahosheliyi nindi: “[Yehova] wakenza neyi chenzaña mukwañovu, chikasa chindi chikamuyulila.” (Isa 40:10) Kakavulu, Bayibolu yazatisha izu  dakwila nawu “chikasa” kwimenaku ñovu. Dichi mazu akwila nawu “chikasa [chaYehova] chikamuyulila” atwanukishaña nawu Yehova hiMwanta wañovu. Wazatishili ñovu yindi yabadika hakukwasha nikukiña ambuñindi akunyima nawa natwalekihu kukolesha nikukiña antu amukuhwelela makonu.—Kuhit. 1:30, 31; Isa. 43:10.

13. (a) Mpinjinyi yaswejaña kuzatika chikaninu chaYehova chakwila nawu nakakwinkaña ñovu? (b) Chikaninwinyi chatukoleshaña chikupu?

¹³ Sweje-e neyi ayilumbu jetu anakutukabisha, Yehova watulejaña nindi: ‘Nukukwinkaña ñovu.’ Mumatuña amakwawu, ayilumbu jetu anakuzata nañovu kulonda alekeshi mudimu wetu wakushimwina nikuloñesha kwetu. Hela chakwila yuma yamuchidiwu yinakumwekana, ilaña hitwakamaña nankashiku. Yehova watukana mazu atukoleshaña nikwikala nachikuhwelelu. Watukana nindi: “Hikwakekala chitwa, chakachilawu nawu akukatishi nachu, chakakolaku.” (Isa. 54:17) Awa mazu atwanukishaña yuma yisatu yalema.

14. Muloñadi chitunateli kubula kuhayamina neyi anakutukabisha kudi ayilumbu jaNzambi?

¹⁴ Chatachi, chineli tudi akwakumulondela Kristu, akutuhelaña kudi antu. (Mat. 10:22) Yesu washimwineñahu dehi nindi mumafuku akukuminina, atumbanji twindi akayikabisha. (Mat. 24:9; Yow. 15:20) Chamuchiyedi, wuprofwetu waIsaya watusoñamishaña nawu ayilumbu jetu hiyakatuhela hohuku; ilaña akazatishaña yitwa yamboka mboka hakutuyandisha. Ayilumbu jetu anateli kutuleja nsañu yakutwamba nawa tunateli kukuhwelela netu yalala, cheñi anateli kututwambila hela kutukabisha. (Mat. 5:11) Yehova wukuyilekesha wanyi ayilumbu jetu kuzatisha yitwa hakuzuña nanetu. (Efwes. 6:12; Chim. 12:17) Ilaña hitunateli kutiya womaku. Muloñadi?

15-16. ( a) Chumanyi chamuchisatu chitwatela kwanukaña, nawa Isaya 25:4, 5 yinakumwekesha ñahi ichi chuma? (b) Isaya 41:11, 12 yashimuna yumanyi yikayimwekena antu azuñaña nanetu?

¹⁵ Shinshikenu chikuma chamuchisatu chitwatela kwanuka. Yehova wahosheli nindi,  “hikwakekala chitwa” chakazatishawu nawu atukatishi nachu, “chakakolaku.” Neyi chochatukiñaña mbañu kunvula yampepela, Yehova watukiñaña kudi ‘antu atutiyishaña woma.’ (Tañenu Isaya 25:4, 5.) Ayilumbu jetu hiyakatwalekahu kutukabishaku.—Isa. 65:17.

¹⁶ Yehova watukoleshaña kumukuhwelela chikupu chatulejañayi yuma yikayimwekena “antu ejima [azuwaña]” nanetu. (Tañenu Isaya 41:11, 12.) Hela chakwila ayilumbu akuzata nañovu chamuchidinyi kuzuña nanetu, ilaña chakafumamu: Ayilumbu jawantu aNzambi ejima “akekala neyi hikudi nichumaku, akanoña.”

17-18. ( a) Kutaña Bayibolu kunateli kutukwasha ñahi kumukuhwelela Nzambi? Shimunenu chakutalilahu. (b) Kutoñojoka chikupu hansona yachaaka cha 2019, kunateli kutukwasha ñahi?

¹⁷ Twaswejaña kumukuhwelela Yehova neyi tumwiluka chikupu. Njila yimu yakumwilukilamu Yehova chikupu hikutaña Bayibolu nikutoñojokahu chikupu hansañu yitwatañaña. MuBayibolu mwekala nsañu yashimuna chakiñiliyi Yehova antu jindi kunyima. Iyi nsañu yatukwashaña kwiluka netu watwakamenaña.

¹⁸ Shinshikenu mazu azatishiliyi Isaya hakulumbulula chatukiñañayi Yehova. Wamutena Yehova nindi kabiña nawa antu jaNzambi wayitena nindi anyana kanyikoku. Isaya wahosheli nindi: Yehova “wakakuñwila anyana muchikasa chindi, wakayisendela hantulu yindi.” (Isa. 40:11) Neyi twiluka netu Yehova natukwati mumakasa indi añovu, twakiñewaña nawa twekalaña awunda. Nduñu wamaana nikashinshi natondi Isaya 41:10 kwikala nsona yachaaka cha 2019 yinakwila nawu: ‘Bayi Wakamaku Ami Yami Nzambi Yeyi,’ kulonda yitukwasheña kwikala awunda hela chakwila tunakumona kukala. Toñojokenuña chikupu hanawa mazu. Akuyikoleshaña chikupu hampinji yimukumona kukala.