1-2. (a) Tukuhosheladi netu Yesu watuloñesheleli njila yapela yakwanakenamu kufwa kwindi? (b) Yilwilwinyi yaYesu yitukuhanjekahu?

MUNATELI kulumbulula yuma yamwekanaña haChanukishu chakwanakana kufwa kwaYesu kwekalañaku hachaaka-hachaaka? Chakadi nikujina, wejima wetu tunateli kwanuka yuma yekalañaku haKuda kwaMwanta kwaMelela. Muloñadi? Muloña kwekalaña yuma yayivulu wanyi. Hela chochu, iyi mpinji yekala yalema. Dichi tunateli kudihula netu: ‘Muloñadi iyi ntanjikilu chiyekalila yapela?’

² Hampinji yadiñayi Yesu hanu heseki nakushimwina, wadizishileña antu chalala munjila yapela, yatiyakana nawa yaswayi kutiya. (Mat. 7:28, 29) Munjila yoyimu, watuloñesheleli njila yapela yakwanakenamu * kufwa kwindi. Tushinshikenu hayakuda yekalañaku haChanukishu niyuma yahosheliyi Yesu niyeliliyi. Tukwiluka cheñi kudizoza, kuhamuka nikukeña kukwetiyi Yesu. Tukudiza cheñi chitunateli kumwimbujola chikupu.

3. Neyi chinashimuniwu haMatewu 26:26-28, Chanukishu chaloñesheliyi Yesu chadiña chapela munjilanyi, nawa yuma yazatishiliyi yemenañaku yumanyi?

³ Yesu wadiña hamu nawapostolu indi ashinshika 11, hampinji yatachikiliyi Chanukishu chakufwa kwindi. Wanoneli yakuda yashalilihu haChipandakenu kulonda yayizatishi hakwanakana  kufwa kwindi. (Tañenu Matewu 26:26-28.) Wazatishili hohu dinkendi dakadi iluñi nivinyu yadiñahu. Yesu walejeli apostolu indi nindi iyi yuma yadiña nakwimenaku mujimba windi nimashi indi, ahanineñayi hanyijimba yawu. Apostolu atela ahayamini wanyi chaloñesheliyi ichi chawija chalema munjila yapela. Muloñadi?

4. Kufumba kwamufumbiliwu Mata kudi Yesu kwatukwashaña ñahi kwiluka chaletesheli Yesu yaloñeshi yakuda yantesha haChanukishu?

⁴ Shinshikenu chuma chamwekeni tukweji twafuminihu, muchaaka chamuchisatu chamudimu waYesu wakushimwina, hampinji yendeleliyi amabwambu jindi, Lazaru, Mata niMariya. Hampinji yanookeleñayi, Yesu watachikili kutañisha. Mata wadiña hohu, ilaña washili maana hakumuloñeshela yakuda yayivulu. Yesu chamweniyi chumichi, wamufumbili Mata nakumuleja nindi hikwakeñekeleña yakuda yayivuluku. (Luka 10:40-42) Chikwashalili maora antesha nakufwa kwindi, Yesu wazatishili kuna kufumba kwindi. Waloñesheli yakuda yantesha haChanukishu. Chumichi chinakutudizisha ñahi chekalayi Yesu?

5. Njila yapela yaloñeshelelimu Yesu Chanukishu yatudizishaña nawu wadiña muntu wamuchidinyi, nawa chumichi chinesakani ñahi na Afwilipi 2:5-8?

⁵ Yesu wadiña wadizoza muyuma yejima yahosheleñayi niyelileñayi. Dichi chatela kutuhayamisha wanyi hakwiluka netu Yesu wamwekesheli nindi wadiña wadizoza hawufuku wakukumishaku hanu heseki. (Mat. 11:29) Welukili nindi wadiña kwakwihi nakuhana mulambu wabadika nawa welukili nindi Yehova wukumusañula nakumwinka chifulu cheneni mwiwulu. Hela chochu, hashili muchima hakudilemesha yomweni nakuloñesha yuma yayivulu yakwanakana kufwa kwindiku. Ilaña wayilejeli atumbanji twindi nindi atela kumwanakanaña kamu hachaaka kuzatisha yuma yantesha. (Yow. 13:15; 1 Kor. 11:23-25) Yesu wamwekesheli nindi wadiña wadizoza chaloñesheliyi chawija chalema munjila yapela. Twatela kwiluka netu kudizoza hichilwilu chimu chekala naMwanta wetu wamwiwulu.—Tañenu Afwilipi 2:5-8.

6. Tunateli kwimbujola ñahi kudizoza kwaYesu neyi tudi mukukala?

⁶ Tunateli kwimbujola ñahi kudizoza kwaYesu? Tunateli kumwimbujola neyi tutwamijaku yuma yinakukeñawu akwetu. (Fwi. 2:3, 4) Toñojokenu cheñi yuma yamwekeni hefuku dakukumisha dakufwa kwaYesu. Yesu welukili nindi keña  yafwi, kufwa kwayeña; hela chochu, wayakameneni apostolu indi ashinshika, akushala nachineñi. Wachishili wufuku wejima nakuyidizisha, kuyikolesha chikupu. (Yow. 14:25-31) Yesu wadiña nakutoñojokelaku nikwakamena yuma yakeñeleñawu antu amakwawu kubadika yomweni. Wamwekesheli chuma chachiwahi chitwatela kwila.

7. Yesu wamwekesheli ñahi kuhamuka chikupu hanyima yaKuda kwaMwanta kwaMelela?

⁷ Hanyima yakwila Yesu nanakani dehi Kuda kwaMwanta kwaMelela, wamwekesheli kuhamuka chikupu. Munjilanyi? Yesu wetejeli kwila nkeñelu yaTata yindi hela chakwila welukili nindi neyi yela mwenimu akumujaha muloña wakumutwambila nawu wahoshaña mazu akasawuntu. (Mat. 26:65, 66; Luka 22:41, 42.) Yesu watwalekelihu kwikala washinshika kulonda yalemeshi ijina daYehova, kuhakwilaku chiyuulu chaNzambi nikwenzununa njila yakupulukilamu antu akubalumuka mumuchima. Cheñi, Yesu wayikwashileña atumbanji twindi kwiluka kukala kwakayimwekena.

8. (a) Yesu wayilejeli apostolu indi nindidi? (b) Atumbanji twaYesu amwimbujoleli ñahi Yesu chimwahitili yaaka hanyima yakufwa kwindi?

⁸ Yesu wamwekesheli cheñi kuhamuka hakubula kwakama hakukala kwindi, ilaña washili muchima hakukwasha apostolu indi ashinshika. Chanukishu cheliliyi hanyima yakwila namuhañi dehi Yudasi, chanukishileña ana enjileña nakwikala atumbanji twindi awayishewa yuma yayiwahi yafumaña mumashi apwekesheliyi Yesu nikwikala muchitiyañenu chachiha. (1 Kor. 10:16, 17) Hakwila nawu atwalekihu kwikala ashinshika nawa akekali hamu naYesu mwiwulu, Yesu wayilejeli atumbanji twindi yuma yakeñañayi  yena niTata yindi nindi eleña. (Yow. 15:12-15) Yesu wayilejeli cheñi apostolu kukala kukamonawu kumbidi. Chahosheliyi nindi amwimbujoleña, wayilejeli nindi ekali ‘akola.’ (Yow. 16:1-4a, 33) Chimwahitili yaaka, atumbanji twaYesu achidiña nakwimbujola muchima windi wakudihana nawa adiña ahamuka. Hela chakwila amweni yihuñu, adikwashileña wumu namukwawu mukukala kwamweneñawu.—Heb. 10:33, 34.

9. Tunateli kumwimbujola ñahi Yesu hakumwekesha kuhamuka?

⁹ Ninetu makonu, twamwimbujolaña Yesu hakumwekesha kuhamuka. Chakutalilahu, twatela kwikala ahamuka hakwila tukwashi amanakwetu anakukabishawu muloña wachikuhwelelu chawu. Mpinji yikwawu amanakwetu anateli kuyikasa chakadi muloña. Neyi chuma chamuchidiwu chimwekana, twatela kuzata nañovu kulonda tuyikwashi nikuyihakwilaku. (Fwi. 1:14; Heb. 13:19) Njila yikwawu mutunateli kumwekeshela kuhamuka, hikutwalekahu kushimwina “nakuhamuka.” (Yil. 14:3) Kufwana Yesu, tunakufwila chikupu kushimwina nsañu yaWanta hela chakwila antu anakutudimbulula nikutukabisha. Mpinji yikwawu, chatukalilaña kwikala ahamuka. Chumanyi chitwatela kwila?

10. Yumanyi yitwatela kwila munyilungu yakutwala kuChanukishu, nawa muloñadi?

¹⁰ Tunateli kwikala ahamuka neyi tutoñojokaña hakuchiñeja kutukweti muloña wamulambu wefutu danyiloña daKristu. (Yow. 3:16; Efwes. 1:7) Munyilungu yakutwala kuChanukishu, tukweti kukooleka kwakumwekesha netu twalemesha ifutu danyiloña. Haniyi mpinji, londelenuña Kutaña Bayibolu muMpinji yaChanukishu nawa toñojokenuña chikupu hayuma yamwekeni kwakwihi nakufwa kwaYesu. Dichi neyi tunapompi  hamu nakuda Kuda kwaMwanta kwaMelela, tukwiluka chikupu chalemena yifwikija yahaChanukishu nimulambu wemenañaku iyi yifwikija. Neyi twiluka yuma yinatwililiwu kudi Yesu niYehova nawa twiluka iyi yuma chiyatukwashaña nichiyakwashaña akwetu, tukutwalekahu kuchiñeja nawa chikutukwasha kuumika nakuhamuka kushika tuhu nikunsa.—Heb. 12:3.

11-12. Yumanyi yitunadizi?

¹¹ Tunadizi netu Kuda kwaMwanta kwaMelela kwatwanukishaña kulema kwefutu danyiloña niyilwilu yaYesu, kudizoza nikuhamuka. Twatiyaña kuwaha muloña Yesu, Kapristu Muneni wudi mwiwulu watuhoshelañaku, wuchidi kumwekesha iyi yilwilu. (Heb. 7:24, 25) Hakwila nawu tumwekesheña kusakilila, twatela kwanakanaña kufwa kwaYesu neyi chahosheliyi. (Luka 22:19, 20) Twanakanaña haNisani 14, ifuku dasweja kulema muchaaka.

¹² Kuyuma yaloñesheliwu haKuda kwaMwanta kwaMelela, tunateli kudizila cheñi chilwilu chikwawu chalema chaletesheli Yesu yatufwili. Mpinji yadiñayi heseki, antu amwilukili nawu wadiña nanichi chilwilu. Chilwilwinyi chenichi?

13. Yowanu 15:9 ni 1 Yowanu 4:8-10 yashimuna ñahi kukeña kwamwekesheli Yehova ni Yesu, nawa anyi ahetelaña muniku kukeña?

¹³ Yesu wamwekesheleña kukeña kwaTata yindi muyuma yejima yelileñayi. (Tañenu Yowanu 15:9; 1 Yowanu 4:8-10.) Chasweja kulema, Yesu wahanini wumi windi kulonda yatukuuli. Hela chakwila tudi awahishewa hela “anyikoku amakwawu,” wejima wetu twahetelaña mukukeña kwamwekesheliyi Yehova niMwanindi hakutwinka iwu mulambu. (Yow. 10:16; 1 Yow. 2:2) Toñojokenu, cheñi hayuma yazatishiliwu haChanukishu; yumiyi yamwekeshaña kukeña kwaYesu nichayakameneniyi atumbanji twindi. Munjilanyi?

14. Yesu wamwekesheli ñahi nindi wayikeña atumbanji twindi?

¹⁴ Yesu wayimwekesheleli awayishewa kukeña, hakushaku chanukishu chapela kwanakana. Chimwahitili mpinji, awa atumbanji awayishewa ateleleli kwanakana Chanukishu hachaaka-hachaaka, ateleleli kwila mwenimu hela chakwila anakumona kukala kwashiyashana hela adi mutuleya. (Chim. 2:10) Komana amwovwahili Yesu? Eña amwovwahili!

15-16. Antu amakwawu anakeni ñahi Kuda kwaMwanta kwaMelela hampinji yadiñawu mukukala?

¹⁵ Kufuma tuhu mumafuku awapostolu kushika nimakonu akwaKristu alala anakanaña kufwa kwaYesu. Hela chakwila adi mukukala, adiileña Kuda kwaMwanta kwaMelela. Talenu iyi yakutalilahu. Hampinji yamukasiliwu mukaleya, Manakwetu Harold King wazatili nañovu hakwila nawu yanakani Chanukishu. Wazatishili yuma yadiñayi nayu kuloñesha yifwikija yahaChanukishu mukuswamujoka. Wachindili cheñi mafuku kulonda yeluki ifuku daChanukishu. Chashikili ifuku daChanukishu, wembili kamina nkawindi mukaleya, walombeli nawa wahanini mpanji.

¹⁶ Shinshikenu chakutalilahu chikwawu. Izanvu dawahela akasiliwu muchilombu chakuyandishila haNjita yaKaayi yamuchiyedi, ashili wumi wawu muwubanji kulonda anakani Kuda kwaMwanta kwaMelela. Hela chochu, muloña wakwila yuma yitwazatishaña yapela kuwana, anakeni Chanukishu mukuswamujoka. Ashimwini nawu: “Wejima wetu twadikuñulwili hamu, twashili mesa yadiña nayifwikija hakachi nawa twabutilihu ihina ditooka. Twambwili kandulu mukapeka  muloña twatiyili woma netu neyi twambula manoñu akesi kawuneñu akumona yuma yitwelileña. . . . Twamulombeli Tata yetu netu yatukwashi kulonda tuhakwiliku ijina Dindi dajila.” Amwekesheli nawu adiña nachikuhwelelu chakola chikupu! Yesu wamwekesheli kukeña chaloñesheliyi njila yapela yakwanakenamu Chanukishu hela chakwila tudi mukukala.

17. Malwihwinyi itwatela kudihula?

¹⁷ Chineli Chanukishu hichikuswila kwakwihi, twatela kudihula awa malwihu: ‘Nateli kumwimbujola ñahi Yesu hakumwekesha kukeña? Komana natoñojokaña hayuma yakeñañawu akwetu akwakudifukula tahindi natoñojokaña hohu hakuditiyisha ami aweni kuwaha? Komana nakeñaña amanakwetu niahela kwila yuma yikubula kutweshawu, tahindi neluka hakumina ñovu yawu? Tumwimbujolenuña Yesu mpinji yejima ‘nikudakamena.’—1 Pet. 3:8.

18-19. (a) Chumanyi chitwatela kwiluka? (b) Chumanyi chimunakufwila kwila?

¹⁸ Hitwakatwalekahu kwanakana Chanukishu chakufwa kwaKristuku. Yesu neyi ‘nenzi’ hampinji yalukadi lwasweja wakapompesha antu indi “atondewa” akashalahu nakuyitwala mwiwulu nawa twakaleka kwanakana Chanukishu.—1 Kor. 11:26; Mat. 24:31.

¹⁹ Nihampinji yitukaleka kwanakana Chanukishu, antu jaYehova akanukaña ichi chanukishu nawu hichinjikijilu chakudizoza, kuhamuka nikukeña kwabulahu dehi kumwekesha kudi muntu wejima. Haniyi mpinji, antu anakeneña chanukishu akalejañaku antu akekalaku yuma yamwekeneña. Ilaña hakwila nawu tuhetelimu munichi chanukishu, twatela kudikita chikupu kulonda twimbujoleña kudizoza, kuhamuka nikukeña kwaYesu. Neyi tumwimbujola, Yehova wakatusomwena.—2 Pet. 1:10, 11.