1-2. (a) Chumanyi chamonañayi Yehova neyi antu amavulu anapompi kuKuda kwaMwanta kwamelela? (Talenu mwevulu wudi hakava.) (b) Chumanyi chitukuhanjekahu muchinu chibaaba?

TOÑOJOKENU yuma yamonañayi Yehova hadi antu amavulu neyi anapompi kuKuda kwaMwanta kwaMelela. Hakuminaña hohu dakushinshika hakuvula kwawantu anenziku; ilaña washinshikaña hadi muntu wejima wunapompi. Chakutalilahu, wamonaña antu ashinshika enzaña yaaka yejima. Hakachi kawu amakwawu enzaña hela chakwila anakuyikabisha nankashi. Amakwawu hiyenzaña mpinji yejima kukupompa kukwawuku, ilaña amonaña nawu Chanukishu chalema nankashi. Yehova washinshikaña cheñi antu anenzi kuChanukishu katachi, hamwaha hamuloña wakwila anakukeña kwiluka yuma yamwekanaña.

² Chakadi nikujina, Yehova watiyaña kuwaha hakumona antu amavulu anapompi kuChanukishu. (Luka 22:19) Hela chochu, Bayi neyi Yehova washaña hohu maana hakuvula kwawantu anenziku. Chuma chaleteshaña antu enzeña kuchanukishu dichuma chasweja kulema kudi Yehova. Muchinu chibaaba tukuhanjeka halwihu lunakwila nawu: Muloñadi chitwayilaña kukupompa kwejima kwamulungu nimulungu kwaloñeshayi Yehova chatela tuyeña hohu kuChanukishu chekalañaku kamu hachaaka?

3-4. (a) Muloñadi chitwayilaña kukupompa? (b) Neyi tuya nakupompa chamwekeshaña nawudi? (c) Kwesekeja nachahosha 1 Akorinda 11:23-26, muloñadi chitwatela kubula kujiñila kuChanukishu?

³ Kudifukula kudi Yehova dichuma chasweja kulema chatuleteshaña kuya nakupompa. Twayaña cheñi nakupompa muloña  Yehova watudizishaña hakupompa. Antu adivwimba akaanaña nawu kwosi muntu wunateli kuyidizisha yuma yidi yejima. (3 Yow. 9) Kwambukaku, twafwilaña kutudizisha kudi Yehova nikuloñesha kunakuzatishayi.—Isa. 30:20; Yow. 6:45.

⁴ Neyi tunayi nakupompa twamwekeshaña netu twadizoza nawa tunakukeña netu atudizishi. Hawufuku wakwanakana Chanukishu chakufwa kwaYesu, twayaña nakupompa muloña hichuma chatulejawu nawu twileña, twayaña cheñi muloña twovwahilaña lushimbi lwaYesu lwakwila nawu: “Ilenuña mwenimu hakuñanakana.” (Tañenu 1 Akorinda 11:23-26.) Iku kupompa kwakoleshaña chikuhwelelu chetu hayuma yitwachiñejaña kumbidi nawa kwatwanukishaña chatukeñayi Yehova. Hela chochu, Yehova weluka nindi twakeñekaña kutukolesha mpinji yejima, bayi kamu hohu hachaakaku. Dichi watuloñeshela kupompa kwamulungu nimulungu nawa watulejaña nindi twatela kuya kuniku kupompa. Kudizoza kwatuleñelaña kwovwahila. Mulungu nimulungu twekalaña nampinji yakuloñesha nikuya nakupompa.

5. Muloñadi antu adizoza chetejelañawu neyi anayitambiki kudi Yehova?

⁵ Chaaka nichaaka, Yehova watambikaña antu kulonda yayidizishi nawa antu amavulu adizoza etejaña kuyidizisha. (Isa. 50:4) Atiyaña kuwaha kuya kuChanukishu nawa atachikaña kuya nikukupompa kwejima. (Zek. 8:20-23) Wejima wetu twatiyaña kuwaha kutudizisha nikutulombola kudi Yehova, ‘nkwashi yetu nawa watupulwishaña.’ (Mas. 40:17) Chumanyi chasweja kulema kubadika kwiteja neyi anatutambiki kudi Yehova niYesu, Mwanindi wakeñayi chikupu kulonda atudizishi?—Mat. 17:5; 18:20; 28:20.

6. Kudizoza kwakwashili ñahi muntu kwinza kuChanukishu?

⁶ Chaaka nichaaka, twazataña nañovu kulonda tutambiki antu amavulu kuChanukishu chakufwa kwaYesu. Antu amavulu adizoza chinayikwashi chikupu muloña wakwiteja neyi tunayitambiki kuchanukishu. Shinshikenu chakutalilahu. Yaaka yinahitihu, muntu wumu watambwilili mutambi wakuya kuChanukishu, ilaña wamulejeli manakwetu wamwinkeli chipapilu nindi wakayaku wanyi. Hela chochu, hefuku daChanukishu, manakwetu watiyili kuwaha hakumona iwu iyala nakwiñila Mwitala daWanta. Iwu iyala watiyili kuwaha chamutambwililiwu chiwahi nawa watachikili kuya kukupompa kwejima. Dichi, muchaaka chejima chalondelelihu wajiñilimu kapampa kasatu hohu. Chumanyi chamukwashili kutachika kupompa mpinji yejima? Wadiña wadizoza hakuhimpa yitoñojoka yindi. Manakwetu wamutambikili wahosheli nindi: “Himuntu wadikehesha chikupu.” Chakadi nikujina, Yehova diyi wamukokeli kulonda yadifukuleña kudi Yena nawa chayinu mpinji himanakwetu wapapatishewa.—2 Sam. 22:28; Yow. 6:44.

7. Yuma yitwadizaña hakupompa niyitwatañaña muBayibolu yinateli kutukwasha ñahi kwikala adizoza?

⁷ Yuma yitwadizaña hakupompa nimuBayibolu yinateli kutukwasha kwikala adizoza. Munyilungu yakwila Chanukishu kanda, kupompa kwetu kwahoshaña hachakutalilahu chaYesu nikudizoza kwamwekesheliyi hakuhana wumi windi kwikala ifutu danyiloña. Nawa mumafuku akutwala kuChanukishu, atulejaña kutaña nsañu yamuBayibolu yahosha hayuma yamwekeni henohu Yesu kanda yafwi nihanyima yakusañuka. Yuma yitwadizaña haniku kupompa ninsañu yitwatañaña muBayibolu yatuleñelaña kulemesha mulambu wahaniniyi Yesu kukoola etu. Chatuleñelaña kwimbujola chilwilu chindi chakudizoza nikwila nkeñelu  yaYehova hela chakwila chinateli kutukalila.—Luka 22:41, 42.

8. Yesu wamwekesheli ñahi kuhamuka?

⁸ Twafwilaña cheñi kwikala ahamuka neyi Yesu. Toñojokenu hakuhamuka kwamwekesheliyi mafuku akwila kanda yafwi. Welukili chikupu nindi ayilumbu jindi akumusawula, akumweta nikumujaha. (Mat. 20:17-19) Ilaña hatiyili woma kufwaku. Chashikili mpinji, wayilejeli apostolu indi ashinshika adiñayi nawu muÑesemani nindi “Nyamukenu, tuyenu. Talenu! Mukwakunfukejela nashiki dehi kwakwihi.” (Mat. 26:36, 46) Mpinji yenjili izanvu dawamashidika nakumukwata, waswinini kwakwihi nakudilumbulula yomweni nawa wayilejeli amashidika nindi alekiku apostolu indi kulonda adiyili. (Yow. 18:3-8) Yesu wamwekesheli kuhamuka chikupu! Makonu, akwaKristu awayishewa nianyikoku amakwawu azataña nañovu kulonda amwekesheña kuhamuka neyi Yesu. Munjilanyi?

9. (a) Muloñadi chitwatela kwikala ahamuka hakwila tupompeña mpinji yejima? (b) Yuma yitwelaña yinateli kukwasha ñahi amanakwetu akasawu muloña wachikuhwelelu chawu?

⁹ Hakwila nawu tupompeña mpinji yejima, twatela kwikala ahamuka hampinji yitunakumona kukala. Amanakwetu niahela amakwawu ayaña nakupompa hela chakwila ananeñi, neyi kudi yuma yinakuyikañesha hela kukata kumujimba. Amakwawu niwena amwekeshaña kuhamuka kulonda ayi nakupompa hela chakwila anakuyidimbulula kudi yisaka yawu hela nfulumendi. Toñojokenu yuma yitwelaña chiyakwashaña amanakwetu akasawu mukaleya muloña wachikuhwelelu chawu. (Heb. 13:3) Neyi atiya nawu tunatwalekihu kumukalakela Yehova hela chakwila tunakumona kukala, chikuhwelelu chawu chakolaña, ekalaña ahamuka nawa ashinshika. Chumichi dichamumwekeneni nikapostolu Pawulu. Hampinji yadiñayi mukaleya muRoma, wazañaleleña neyi yatiya nawu amanakwindi anakumukalakela Nzambi nakashinshi. (Fwi. 1:3-5, 12-14) Henohu kunashali kwanti nakumufumisha mukaleya hela hanyima yakwila anamufumishi dehi mukaleya, Pawulu wayisonekeleli aHeberu mukanda. Muniwu mukanda wayilejeli akwaKristu ashinshika nindi atela ‘kutwalekahu nakukeña kwawu kwakukeña anakwetu’ nikupompa hamu.—Heb. 10:24, 25; 13: 1.

10-11. (a) Anyi itwatela kutambika kuChanukishu? (b) Aefwesesa 1:7 yashimuna muloñanyi watuleñelaña kwila mwenimu?

¹⁰ Twamwekeshaña kuhamuka neyi tutambika antaña jetu, akwetu mutwazatilaña niantuñi netu kwinza kuChanukishu. Twayitambikilañadi? Twamwekeshaña kusakilila hayuma yatwililawu kudi Yehova niYesu nawa dichaleteshaña tutambikeña antu amakwawu kuChanukishu. Twakeñaña netu niwena eluki chiyanateli kuhetela ‘muluwi lwaYehova lwasweja’ kuhitila mwifutu danyiloña.—Tañenu Aefwesesa 1:7; Chim. 22:17.

 ¹¹ Twamwekeshaña chilwilu chikwawu chalema chamwekesheliyi Nzambi niMwanindi munjila yakuhayamisha, neyi tumwekesha kuhamuka kuya nakupompa hamu nawakwetu.

12. (a) Kupompa kwatukwashaña ñahi kusweja kumukeña Yehova niYesu? (b) 2 Akorinda 5:14, 15 yatukoleshaña kwila yumanyi hakumwimbujola Yesu?

¹² Kukeña kutwamukeña Yehova niYesu kwatusañumunaña kuya kukupompa. Yuma yitwadizaña hakupompa yatukwashaña kusweja kumukeña Yehova niMwanindi. Mpinji yejima kupompa kwatwanukishaña yuma yatwililawu kudi Nzambi niYesu. (Rom. 5:8) Chanukishu nichena chatwanukishaña nawu Nzambi niYesu atukeña, kushilahu tuhu niantu abula kwiluka kulema kwefutu danyiloña. Muloña wayuma yatwililawu, twafwilaña kumwimbujola Yesu muchihandilu chetu chejima. (Tañenu 2 Akorinda 5:14, 15.) Kubombelahu, muchima wetu watuleñelaña kumushimeka Yehova hakutwinka ifutu danyiloña. Njila yimu mutunateli kumushimekela hikwakulahu hakupompa chakufuma hamuchima.

13. Tunateli kumwekesha ñahi netu twamukeña Yehova niMwanindi? Lumbululenu.

¹³ Tunateli kumwekesha netu twamukeña Yehova niMwanindi neyi tudibondahu yuma yimu. Kakavulu, twelaña mwenimu kulonda tuyeña nakupompa. Yipompelu yayivulu yapompaña melela hampinji yinafumiwu antu kunyidimu iku anazeyi. Kupompa kukwawu kwekalañaku kunsa yanyilungu mafuku anookañawu antu amakwawu. Komana Yehova wamonaña chitwayaña nakupompa hela chakwila tunazeyi? Eña wamonaña! Yehova wamonaña nawa watiyaña kuwaha chitwazataña nañovu kuya nakupompa.—Maku 12:41-44.

14. Yesu wamwekesheli ñahi chitwatela kumwekesha kukeña kwakufuma hamuchima?

¹⁴ Yesu wamwekesheli chitunateli kumwekesha kukeña kwakudihana. Bayi neyi Yesu wadihanini kulonda yafwili atumbanji twindi hohuku, ilaña washili cheñi muchima hayuma yakeñeleñawu. Chakutalilahu, wadiña nakuwanika nawatumbanji twindi hela chakwila nazeyi kumujimba hela muyitoñojoka. (Luka 22:39-46) Washili muchima hayuma yatela kwinkayi antu amakwawu bayi yinateli kumwinkawuku. (Mat. 20:28) Neyi tumukeña  chikupu Yehova niamanakwetu, tukuzataña nañovu kulonda tuwanikeña kuChanukishu kushilahu nikuya kukupompa kwejima kwachipompelu.

15. Anyi itwakeñaña kukwasha chikupu?

¹⁵ Twekala muchisaka chawakwaKristu alala nawa twatiyaña kuwaha kutambikaku antu amakwawu kulonda tudibombi nawu. Hela chochu, twakeñaña nankashi kukwasha “akwetu akwakwitiya” aleka dehi kushimwina nikupompa. (Ñal. 6:10) Twamwekeshaña netu twayikeña neyi tuyikoleshaña netu enzeña kukupompa, sweje-e kuChanukishu. Kufwana Yehova niYesu, twatiyaña kuwaha neyi muntu wazeya yafunta kudi Yehova, Tata yetu nawa Kabiña ketu.—Mat. 18:14.

16. (a) Tunateli kudikolesha ñahi wumu namukwawu, nawa kupompa kwetu kukutukwasha ñahi? (b) Muloñadi iyi chiyekalila mpinji yayiwahi yakwanuka mazu aYesu ekala haYowanu 3:16?

¹⁶ Munyilungu yinakwinza, mukatambiki antu amavulu kulonda akenzi kuChanukishu Hachitanu namelela, April 19, 2019. (Talenu chikasha chinakwila nawu “Mwakayitambika?”) Tudikolesheña wumu namukwawu kuhitila mukuya kukupompa kwejima kwatuloñeshelayi Yehova. Chineli kukuma kunakuswila kwakwihi, kupompa kukutukwasha kwikala adizoza, ahamuka nawa akweti kukeña. (1 Tesa. 5:8-11) Dichi tumwekesheña chitwatiyaña namuchima wetu wejima hakukeña kwatumwekesheleliyi Yehova niMwanindi!—Tañenu Yowanu 3:16.