HACHISATU nantetemena, January 24, 2018, abidikili kuyisaka yaBeteli muUnited States niCanada nawu Kwizanvu Dalombolaña dawaYinsahu jaYehova anabombeluku: Manakwetu Kenneth Cook, Jr.

Manakwetu Cook wasemukilili muPennsylvania, U.S.A nawa dimwakulililiyi. Amudizishili chalala kudi mukwawu mwadiña nakutañilawu hadiñayi kwakwihi nakumanisha shikola nawa wapapatisheweli haJune 7, 1980. Watachikili wupayiniya wampinji yejima haSeptember 1, 1982. Hanyima yakuzata wupayiniya yaaka yiyedi, amutambikili kuBeteli nawa watachikili kuzatila haBeteli yakuWallkill, New York, haOctober 12, 1984.

Chimwahitili yaaka 25, Manakwetu Cook wazatili nyidimu yashiyashana, kudipatiment yaKupulintila nyikanda nikuBethel Office. Mu 1996, wasumbwili muhela Jamie nawa niyena watachikili kukalakela haBeteli yakuWallkill. MuDecember 2009, Manakwetu niMuhela Cook ayitemesheli kuya nakuzatila kuWatchtower Educational Center, muPatterson, New York nawa Manakwetu Cook watachikili kuzatila kuDipatimenti Yakusoneka niKwakula Nyikanda. MuApril 2016, hanyima yakufunta chantesha kuWallkill, Manakwetu niMuhela Cook ayitumini kuBrooklyn, New York. Chimwahitili tukweji tutanu, ayitumini kukasanji kamutayi keneni kuWarwick, New York. MuJanuary 2017, Manakwetu Cook, amutondeli kwikala nkwashi muKometi Yasonekaña Yezanvu Dalombolaña.