1. Chumanyi cheliliyi Davidi kudi Yehova, nawa chumichi chamusañumwini kwiladi?

MWANTA DAVIDI wasonekeli nindi: “Yehova himuneni, chiña kumuhameka nankashi.” (Mas. 145:3) Wamukeñeli Yehova nawa iku kukeña kwamusañumwini kumushimeka Nzambi “mukachi kachipompelu.” (Mas. 22:22; 40:5) Chakadi nikujina, mwamukeña Yehova nawa mwetejaña mazu ahosheliyi Davidi nindi: ‘Eyi Yehova Nzambi yankakulula yetu Isarela, akakushimekaña haya nyaaka.’—1 Kushi. 29:10-13.

2. (a) Tunateli kumushimeka ñahi Yehova? (b) Kukalanyi kwamonañawu antu amakwawu, nawa yumanyi yitukuhanjekahu?

² Makonu, njila yimu yitwamushimekelañamu Yehova, hikwakulahu hakupompa. Hela chochu, amanakwetu niahela amakwawu chayikalilaña kwakulahu. Akeñaña kwakulahu ilaña akañanyaña muloña wakutiya woma. Anateli kuleka ñahi kutiya woma? Nawa yumanyi yinateli kutukwasha wejima wetu kwakula chiwahi? Henohu kanda twakuli awa malwihu, tuhanjekenu yuma yiwana yaleteshaña twakuleñahu hakupompa.

3-5. (a) Kwesekeja nachinalumbululiwu haAheberu 13:15, muloñadi chitwakwilañahu hakupompa? (b) Komana wejima wetu tunateli kuhana ñakwilu yoyimu? Lumbululenu.

³ Yehova watwinka kukooleka kwakumushimeka. (Mas. 119:108) Kwakulahu hakupompa kwekala hakachi ‘kamulambu wakuhameka’ nawa kwosi muntu wunateli  kutulambwilaku. (Tañenu Aheberu 13:15.) Komana Yehova wakeñaña nindi wejima wetu tuhaneña mulambu wowumu hela ñakwilu yoyimu? Inehi!

⁴ Yehova weluka nindi twashiyashana nawa walemeshaña nyilambu yetu yitwamulambulaña. Toñojokenu nyilambu yamulambwileñawu kudi aIsarela. A Isarela amakwawu alambwileña mwana kamukoku hela mpembi. Ilaña aIsarela adiña atuzweñi alambwileña “tutela tuyedi, hela anyana katupompa ayedi.” Neyi kaIsarela yakañanya kulambula tutela tuyedi hela tupompa, Yehova wadiña nakutambwila yamwikumi, ibañu “dawuña walembuluka.” (Lev. 5:7, 11) Wuña wadiña nawuseya wanyi, ilaña Yehova wadiña nakulemesha iwu mulambu chakala hohu ‘hiwuña walembuluka.’

⁵ Nimakonu, Nzambi dichelañayi. Neyi tunakuhana ñakwilu, hakeñaña nindi wejima wetu tuhosheña neyi chahosheleñayi Apolosi hela Pawuluku. (Yil. 18:24; 26:28) Yehova wakeñaña nindi tuhaneña ñakwilu yayiwahi yituneluki. Anukenu mumbanda nfwila wahanini tumawayawaya twanyanya tuyedi. Amulemesheli kudi Yehova muloña wahanini kwesekeja nahakuminini ñovu yindi.—Luka 21:1-4.

6. (a) Kwesekeja na Aheberu 10:24, 25, ñakwilu yitwatiyaña hakupompa yatukwashaña ñahi? (b) Munateli kumwekesha ñahi nenu mwatiyaña kuwaha chakulañawu akwenu?

⁶ Twadikoleshaña wumu namukwawu neyi twakulañahu. (Tañenu Aheberu 10:24, 25.) Wejima wetu twatiyaña kuwaha kutiyilila kuñakwilu yashiyashana neyi tunakupompa. Twatiyaña kuwaha ñakwilu yayihi yahanañawu atwansi. Neyi manakwetu nakuhaña ñakwilu yinashindameni hayuma yinadiziyi, twatiyaña kuwaha. Nawa twatiyaña kuwaha antu ‘ahamukaña’ nakuhana ñakwilu hela chakwila atiyaña nsonyi indi kwiji anakudiza idimi. (1 Tesa. 2:2) Tunateli kumwekesha ñahi netu twatiyaña kuwaha chakulañawu? Hanyima yakupompa, twatela kuyisakilila hañakwilu yawu yayiwahi. Tunateli cheñi kumwekesha kusakilila neyi ninetu twakulañahu. Neyi twila mwenimu dikwila nawu tunakudikolesha wumu namukwawu.—Rom. 1:11, 12.

7. Kwakulahu hakupompa kwatukwashaña ñahi?

 ⁷ Neyi twakulahu, twadikoleshaña etu aweni. (Isa. 48:17) Munjilanyi? Chatachi, twaloñeshaña chiwahi sweje-e neyi tunakukeña netu twakulihu hakupompa. Neyi tuloñesha chiwahi, twatiyishishaña chikupu nsañu yekala Mwizu daNzambi. Nawa neyi tutiyishisha nsañu yitunadizi, tukuyizatishaña muchihandilu chetu. Chamuchiyedi, kupompa kwawahaña neyi ninetu twakulañahu. Chamuchisatu, chineli twazataña nañovu hakwila nawu twakulihu, twanukaña mazu itwakulahu hakupompa.

8-9. (a) Neyi chinamwekeshiwu haMalaki 3:16, Yehova watiyaña ñahi chitwakulañahu hakupompa? (b) Antu amakwawu atiyaña woma wankahi?

⁸ Twamutiyishaña Yehova kuwaha neyi tumwekesha chikuhwelelu chetu. Neyi tunakuhana ñakwilu, Yehova watiyililaña nawa watiyaña kuwaha chitwakulañahu hakupompa. (Tañenu Malaki 3:16.) Wamwekeshaña nindi watiyaña kuwaha chatukiswilañayi hampinji yitwazataña nañovu kulonda tumuzañalesheña.—Mal. 3:10.

⁹ Mwamweni, kudi yuma yayivulu yatuleñelaña kwakulahu hakupompa. Ilaña antu amakwawu atiyaña woma kwimika chikasa. Neyi dichimwatiyaña, bayi muneñaku. Tushinshikenu hayishina yamuBayibolu, yakutalilahu niyuma yinateli kutukwasha kulonda twakuleñahu hakupompa.

10. (a) Wejima wetu twatiyaña woma wankahi? (b) Neyi mwatiyaña woma wakwakulahu, mwamwekeshaña nawu mudi antu amuchidinyi?

¹⁰ Komana muchima wenu wetaña neyi munakukeña kwimika chikasa kulonda mwakulihu? Neyi muchima wenu wetaña, himudi nkawenuku. Walala wudi wakwila nawu wejima wetu twatiyaña woma neyi tunakukeña kwakulahu. Hakwila nawu muleki kutiya woma, mwatela kwiluka chuma chaleteshaña mutiyeña woma. Komana mwatiyaña woma muloña  wakwila nenu mukujimbala ñakwilu ntahindi nenu mukuhana ñakwilu yakutwamba? Komana mwatiya woma nenu ñakwilu yenu yikuwaha neyi yawakwenu wanyi? Chidi hohu chiwahi kutiya woma, muloña chamwekeshaña nawu mwekala adizoza nawa mwamonaña akwenu nenu ayibadika. Yehova wakeña antu adizoza. (Mas. 138:6; Fwi. 2:3) Yehova wakeñaña cheñi nindi mumushimekeña nawa mukolesheña amanakwetu niahela hakupompa. (1 Tesa. 5:11) Wayikeña nawa wukuyikwashaña kwikala ahamuka.

11. Nsañwinyi yamuNsona yinateli kutukwasha?

¹¹ Shinshikenu chahosha Nsona. Bayibolu yashimuna nawu wejima wetu twaluwañeshaña munhoshelu yetu. (Yak. 3:2) Yehova, amanakwetu kushilahu tuhu niahela eluka nawu twaluwañeshaña. (Mas. 103:12-14) Twekala nawu muchisaka chimu nawa atukeña. (Maku 10:29, 30; Yow. 13:35) Eluka nawu mpinji yikwawu twaluwañeshaña hakwakula.

12-13. Yumanyi yitunadizili kudi Nehemiya niYona?

¹² Toñojokenu hadi antu ashimunawu muBayibolu chalekeliwu kutiya woma nichimunateli kudizilaku. Toñojokenu hadi Nehemiya. Wakalakeleleña muchota chamwanta wañovu. Nehemiya chatiyiliyi nawu mpwembu yaYerusalema anakuyihumuna nawa yenzelu anakuyocha, watiyili woma. (Nehe. 1:1-4) Fwikijenu woma watiyiliyi hampinji yamwihwiliwu kudi mwanta chuma chaletesheli yaneñi. Hohenohu Nehemiya walombeli, kuhiñahu wamwakwili mwanta. Chafuminimu, mwanta wakwashili antu jaNzambi chikupu. (Nehe. 2:1-8) Toñojokenu cheñi hadi Yona. Yona chamulejeliwu kudi Yehova nawu yayi nakusoñamisha antu amuNineve, watiyili woma nawa watemukili nakuya kwiluña dacheñi. (Yona 1:1-3) Ilaña Yehova wamukwashili Yona kuyishimwina antu amuNineve. Nawa mazu ashimwiniyi akwashili antu amuNineve. (Yona 3:5-10) Kudi Nehemiya tunadiziliku netu twatela kulomba henohu kanda twakuli. Nawa kudi Yona tunadiziliku netu Yehova nateli kutukwasha kumukalakela hela chakwila tunakutiya woma. Komana kwakulahu muchipompelu kunesekani nakushimwina kudi antu amumusumba waNineve?

¹³ Yumanyi yinateli kutukwasha kwakula chiwahi hakupompa? Tuhanjekenu hayuma yantesha.

14. Muloñadi chitwatela kuloñeshela henohu kanda tuyi nakupompa, nawa mpinjinyi yitunateli kuloñesha?

¹⁴ Loñeshenuña chadimu henohu kanda muyi nakupompa. Neyi muloñesha chadimu, chikuyikalilaña wanyi kwakulahu. (Yish. 21:5) Wejima wetu twaloñeshaña mpinji yashiyashana. Muhela Eloise wudi nayaaka yamuma 80, nawa wafwisha nfumwindi, waloñeshaña Kaposhi Kakutalila kukutachika  kwamulungu. Wahosheli nindi: “Kupompa kwawahaña chikupu neyi niloñesha chadimu.” Muhela Joy wazataña mudimu wakumujimba mafuku ejima, waloñeshaña Kaposhi Kakutalila Hamposu. Wahosheli nindi: “Champelelaña kwanuka yuma neyi niloñesha henohu kunashali mpinji yantesha nakupompa.” Ike, mukulumpi nawa payiniya, wahosheli nindi: “Kuloñesha hadi kampinji kantesha mumulungu kwakuwahi chatela niloñesheña hadi mpinji yeneni.”

15. Munateli kuloñesha ñahi chiwahi?

¹⁵ Yumanyi yinadibombeli mukuloñesha chiwahi? Mulombenu Yehova yayinki spiritu yajila henohu kanda mutachiki kuloñesha. (Luka 11:13; 1 Yow. 5:14) Shinshikenu chikupu chidi mutu wansañu, tunyitu twanyanya tudimu, yakutalilahu niyikasha yidimu. Hampinji yimunakuloñesha, tañenu nsona jejima jidi mumaparagilafu. Toñojokenu chikupu hansañu yimunakuloñesha nawa shenu muchima hayikuma yimukwakulahu. Neyi muloñeshaña chiwahi, chikuyipelela kwakula nawa mukudiluñishaña.—2 Kor. 9:6.

16. Yozelwinyi yimukweti, nawa mwayizatishaña ñahi?

¹⁶ Neyi chinatwesheki, zatishenu yozelu yahaintaneti yidi mwidimi dimweluka. Yehova nakuzatisha kuloñesha kwindi kutwinka yozelu yinateli kutukwasha kuloñesha chiwahi kupompa. Tunateli kuloñolola nyikanda yakudizamu ha JW Library^® app kuzatisha foni. Neyi tunaloñololi, tunateli kudiza, kutaña hela kutiyililaku hadi mpinji yidi yejima. Amakwawu azatishaña iyi yozelu hampinji yinakunookawu kumudimu, kushikola hela neyi adi halwendu. Watchtower Library niWatchtower ONLINE LIBRARY^™ yikutukwasha kusandujola swayi yikuma yitunakukeña kudiza.

17. (a) Muloñadi kuloñesha ñakwilu yayivulu chikwawahila? (b) Yumanyi yimunadizili kuvidiyo yaIkalenu Amabwambu jaYehova—Prepare Your Comment?

¹⁷ Neyi chinatwesheki, Loñeshenu ñakwilu yayivulu hakudiza kudi kwejima. Muloñadi? Hadaha hiyanateli kuyinyika mpinji yejima yimukwimika chikasaku. Amavulu anateli kwimika makasa hampinji yoyimu nawa manakwetu wunakulombola wukwinyikahu wumu hohu. Hakwila nawu yabuli kuhita mumpinji, manakwetu wunakulombola nateli kutena antu antesha hohu kwakulahu. Dichi bayi mutiya kutama hela kuneña neyi hiyanayiteni swayiku. Neyi muloñesha ñakwilu yayivulu, mukwikala nakukooleka kwakwakulahu. Hadaha munateli kuloñesha kutaña nsona. Munateli cheñi kuloñesha kwakulahu mumazu enu. *

18. Muloñadi chitwatela kwakula ñakwilu yayihi?

 ¹⁸ Hanenu ñakwilu yayihi. Kakavulu ñakwilu yayihi nawa yapela diyi yakoleshaña antu. Dichi hanenuña ñakwilu yayihi. Esekenuña kwakula mumasekondi 30. (Yish. 10:19; 15:23) Neyi mwakulañahu mpinji yejima, mwatela kwakulaña ñakwilu yayihi kulonda akwenu adiziliku. Neyi muhanaña ñakwilu yayilehi, mukuletesha akwenu akutachika kutoñojoka nawu hiyakutwesha kwakula neyi chimwakulaña enuku. Cheñi, neyi mwakulaña muwihi, akwenu niwena akwikala nampinji yakwakulahu. Sweje-e dinu neyi yenu munakwakula ñakwilu yatachi, hanenu ñakwilu yapela nawa yinafumi muparagilafu. Bayi mwakula yikuma yejima yidi muparagilafuku. Neyi yikuma yejima yidi muparagilafu anayakuli dehi, munateli kubombelahu yikuma yikwawu.—Talenu chikasha chinakwila nawu “ Yumanyi yinatela kwakulahu?”

19. Chumanyi chimwatela kwila neyi munakukeña kwakulahu?

¹⁹ Mulejenu manakwetu wunakulombola paragilafu yimunakukeña kwakulahu. Neyi munakukeña kwakulahu, mulejenu manakwetu wunakulombola chadimu henohu kanda mutachiki kupompa. Neyi munashiki muparagilafu yenu, imikenu swayi chikasa nawa chololenu kulonda manakwetu wunakulombola yayimoni.

20. Tukuhosheladi netu kupompa kudi neyi kudiila hamu nawamabwambu?

²⁰ Mwatela kumona kupompa neyi hiyakuda yimunakuda hamu nawamabwambu jenu. Fwikijenu neyi amabwambu jenu amuchipompelu ayitambika nawu mukadiili hamu yakuda nawa ayileja nawu mwakaloñeshihu yakuda yantesha. Munateli kwila ñahi? Munateli kwakama, ilaña mukuzata nañovu kulonda mwakasendihu yakuda yinateli kudiluñisha antu ejima. Yehova, Muntu Watutambikaña, watuloñeshela yakuda yayivulu nawa yayiwahi yitwadiluñishaña hakupompa. (Mas. 23:5; Mat. 24:45) Watiyaña kuwaha neyi tuhana chawaana chidi chejima chitunateli kutwesha. Dichi loñeshenuña chiwahi kulonda mwakuleñahu. Chimwela mwenimu, himukudaña hohu kumesha yaYehovaku, ilaña ninenu mukuhanaña chawaana chimukudiluñishilaña hamu nachipompelu.