1. Yumanyi yinakumwekesha nawu muyisaka yikwawu mwosi kukeña nankashi?

BAYIBOLU yashimwineñahu dehi nawu mumafuku akukuminina antu akekala “abulaña kukeña akwawu antu.” (2 Tim. 3:1, 3) Tunakumona iwu wuprofwetu chiwunakushikijewa makonu. Chakutalilahu, yisaka yayivulu yinakudambula muloña wakudiseña, anvwali adihililaña nawa anyanawu atoñojokaña nawu ayikeña wanyi. Yisaka yikwawu yashakamaña mwitala dimu yadikeña nankashi wanyi. Chakutalilahu, nkoñu wumu wahosheli nindi: “Amama jawantu, atata jawantu nianyana ahanjekaña wanyi, mpinji yawu ayikisilaña hamakompyuta, hamatabuleti, hamafoni nikuyisela yahamavidiyo. Hela chakwila ashakamaña mwitala dimu, adiluka chiwahi wanyi.”

2-3. (a) Kwesekeja naAroma 12:10, anyi itwatela kukeña chikupu? (b) Tukuhanjekadi muchinu chibaaba?

² Hitunakukeña kwikala neyi antu adi mukanu kaayi abulaña kumwekesha kukeñaku. (Rom. 12:2) Twatela kumwekeshaña chikupu kukeña kudi antu amuchisaka chetu niamanakwetu niahela muchipompelu. (Tañenu Aroma 12:10.) Kudikeña chikupu kwatalisha mudihi? Idi izu datalisha kukudikunda kwadikundañawu antu amuchisaka. Iku dikukeña kutwatela kuyimwekeshelaña amanakwetu niahela. Neyi tudimwekeshelaña iku kukeña, hakachi ketu hakwikala kunuñañana, dichuma chakeñekaña mukudifukula kwalala.—Mika 2:12.

³ Hakwila twikali naniku kukeña nikukumwekesha, tutalenu yuma yitwatela kudizila kunsañu yamuBayibolu.

4. Yakoba 5:11 yatukwashaña ñahi kwiluka chatukeñayi Yehova?

⁴ Bayibolu yatulejaña yilwilu yaYehova. Chakutalilahu, yahosha nawu “Nzambi hikukeña.” (1 Yow. 4:8) Iyi nsañu yatuleteshaña kuswina kwakwihi nayena. Ilaña Bayibolu yahosha cheñi nawu Yehova “wukweti wushona chikupu.” (Tañenu Yakoba 5:11.) Awa mazu anakumwekesha chatukeñayi Yehova.

5. Yehova watutiyilaña ñahi luwi, nawa tunateli kumwimbujola ñahi?

⁵ Yakoba 5:11 yanuñañesha wushona waYehova nachilwilu chikwawu chatuswijaña kwakwihi nayena, dikwila nawu luwi. (Kwi. 34:6) Njila yimu mwatutiyilañayi Yehova luwi hikutwanakena yiluwa yitwakoñaña. (Mas. 51:1) MuBayibolu, izu dakwila nawu luwi mwabombela yuma yayivulu kubadika hohu kwanakena. Luwi hichuma chekala mudi muntu chamukwashaña kukwasha mukwawu neyi yamona nindi nakukabakana. Yehova washimwini nindi kukeña kwatukeñayi kwabadika kukeña kukwetiyi mama yawantu namwanindi. (Isa. 49:15) Neyi tunakukabakana Yehova watukwashaña muloña waluwi lwindi. (Mas. 37:39; 1 Kor. 10:13) Neyi amanakwetu niahela anatuneñeshi tunateli kuyitiyila luwi kuhitila mukuyanakena nikubula kuyihembela nkunyi. (Efwe. 4:32) Ilaña njila yikwawu yalema mutunateli kuyitiyila amanakwetu luwi hikuyikwasha neyi anakumona kukala. Neyi kukeña kutukwasha kutiyila akwetu luwi, tukumwimbujola Yehova wamwekeshaña wushona kubadika muntu wudi wejima.—Efwe. 5:1.

6. Jonatani naDavidi amwekesheli ñahi nawu adikeña chikupu?

⁶ MuBayibolu mwekala nsañu yawantu abula kuwanina adikeñeli chikupu. Talenu chichadiña hadi aJonatani naDavidi. Bayibolu yahosha nawu: “Muchima waJonatani wudikasa namuchima waDavidi hamu  mbe Jonatani hakumukeña neyi chadikeñeliyi [yomweni].” (1 Sam. 18:1) Davidi amuwayishili kulonda yamusinsi mwanta Sawulu. Hanyima yachumichi, Sawulu wamutiyilili Davidi ichima nawa wakeñeleña kumujaha. Ilaña mwana kaSawulu Jonatani hadikwatili natata yindi nindi yamujahi Davidiku. Yena naDavidi adikanini nawu akutwalekahu kwikala amabwambu nikudikwasha.—1 Sam. 20:42.

7. Chumanyi chadi kuletesha aJonatani naDavidi kubula kwikala amabwambu?

⁷ Hichuma chakuhayamisha nankashi neyi tutoñojoka hakukeña kwadiña hakachi kaJonatani naDavidi muloña kwadiña yuma yayivulu yadi kuletesha abuli kwikala amabwambu. Chakutalilahu, Jonatani wamubadikilimu Davidi nayaaka 30. Jonatani wadi kutoñojoka nindi nateli wanyi kwikala ibwambu dakansi wabula kwiluka yuma yayivulu, ilaña Jonatani dichatoñojokeliyi wanyi. Yena wamulemesheli Davidi.

8. Tukuhosheladi netu Jonatani wadiña ibwambu daDavidi wamuwahi?

⁸ Jonatani neyi wakeñeleña wadi kumutiyila Davidi ichima. Chineli wadiña mwana kaMwanta Sawulu wadi kuhosha nindi yena diyi wadi kumuswana mwanta. (1 Sam. 20:31) Ilaña Jonatani wadiña wadizoza nawa washinshika kudi Yehova. Dichi yena wazatilili hamu namuntu atondeliwu kudi Yehova nindi wakekala mwanta kumbidi. Wadiña washinshika kudi Davidi hela chakwila chumichi chamutiyishileña Sawulu kutama.—1 Sam. 20:32-34.

9. Komana Jonatani wamutiyilili Davidi ichima? Lumbululenu.

⁹ Jonatani wamukeñeli Davidi nawa hamutiyilileña ichimaku. Jonatani wadiña wakulukila mukwasa nsewu nawa wadiña mushidika wahamuka. Yena nitata yindi Sawulu ayilukili nawu “lufuchi lwawu lwabadikili lwawambuulu” nawa “ñovu jawu jabadikili jawanyitupa.” (2 Sam. 1:22, 23) Hela chochu, Jonatani wadi kudisamba hamuloña wakuhamuka kwindi. Ilaña Jonatani hadimweneña nindi wamubadika Davidi hela kumutiyila ichimaku. Dichi yena watiyileña kuwaha nakuhamuka kwaDavidi nichamushindameneniyi Yehova. Dichi hanyima yakwila Davidi namujahi dehi Goliyati, Jonatani watachikili kumukeña Davidi neyi chadikeñayi yomweni. Tunateli kuyikeña ñahi amanakwetu niahela neyi chadikeñeliwu aJonatani naDavidi?

10. Kudikeña chikupu “wumu namukwawu chakufuma kumuchima” kwatalisha mudihi?

¹⁰ Bayibolu yatulejaña nawu, “dikeñenu chikupu wumu namukwawu chakufuma kumuchima.” (1 Pet. 1:22) Yehova wamwekeshaña chitwatela kwila. Kukeña kwindi kwasweja chikupu chakwila neyi twikala ashinshika kudi yena kwosi chuma chinateli kutwambula kudi yenaku. (Rom. 8:38, 39) Izu dachiGiriki dabalumunawu nawu “chikupu” datalisha kudi muntu wunakuzata nañovu kulonda yamwekeshi kukeña. Mpinji yikwawu twatela ‘kuzata’ nañovu’ hakwila nawu tuyikeñi chikupu amanakwetu niahela.” Neyi akwetu anatuhilishi twatela kutwalekahu ‘kuditiyilila wumu namukwawu mukukeña, kwikala mukuwunda wumu namukwawu nikufwila chikupu kuhemba kunuñañana kwetu kutwekalaña naku kuhitila mudi spiritu yajila.’ (Efwe. 4:1-3) Neyi tuzataña nañovu kulonda twikali mukuwunda nawamanakwetu niahela, hitukushaña maana  hayiluwa yawuku. Tukuzataña nañovu kulonda tuyimoneña amanakwetu neyi chayimonañayi Yehova.—1 Sam. 16:7; Mas. 130:3.

11. Muloñadi mpinji yikwawu chichinateli kutukalila kumwekesha kukeña chikupu?

¹¹ Chakala kuyimwekeshela amanakwetu kukeña sweje-e neyi tuneluki yiluwa yawu. Hadaha dikukala kwadiña nawakwaKristu akusambila amakwawu. Chakutalilahu, aEyodiya naSintiki adiña wanyi nakukala hampinji yadikitileñawu “hamu [naPawulu] mumudimu wansañu yayiwahi.” Ilaña mpinji yikwawu atiyañeneña wanyi. Dichi Pawulu wayilembeleli nindi “ekali nayitoñojoka yoyimu mudi Mwanta.”—Fwi. 4:2, 3.

12. Tunateli kwila ñahi hakwila tuyikeñi chikupu amanakwetu niahela?

¹² Tunateli kuyikeña ñahi chikupu amanakwetu niahela makonu? Neyi tuyiluka chiwahi akwetu akwakwitiya chikwikala chaswayi kwiluka yuma yakeñañawu nawa tukuyikeña chikupu. Tunateli kwikala amabwambu jawu hela chakwila hiyakulumpi, atwansi hela afuma kuyitachi yacheñi. Jonatani wamubadikilimu Davidi nayaaka 30, ilaña ekalili amabwambu chikupu. Komana kwila mukwata wubwambu namukulumpi hela kansi nehi? Neyi mwila mwenimu, mukumwekesha nenu ‘mwakeña anakwenu ejima.’—1 Pet. 2:17.

13. Chumanyi chinateli kuletesha tusweji kudikunda nawamabwambu amu kubadika amakwawu muchipompelu?

¹³ Komana kukeña chikupu akwetu akwakwitiya kwatalisha mukwila nawu tukukeñaña ejima muchipompelu munjila yoyimu? Inehi. Chikutwesheka wanyi. Chatama wanyi kudikunda chikupu nawantu amu kubadika nawantu amakwawu muloña twakeña yuma yoyimu. Yesu wayiteneneña apostolu indi ejima nindi ‘amabwambu,’ ilaña wadikundileña nankashi naYowanu. (Yow. 13:23; 15:15; 20:2) Hela chochu, Yesu hamumweneña Yowanu nindi wabadika akwawuku. Chakutalilahu, chelili Yowanu nimanakwindi Yakoba amwili Yesu nawu yakayinki  maluña alema muWanta waNzambi, Yesu wayilejeli nindi: “kushakama kuchikasa chami chachidiilu hela chachimunswa hiyami watela kuhanaku.” (Maku 10:35-40) Kufwana Yesu, hitwatela kumwekesha netu twasweja kukeña amabwambu amu kubadika amakwawuku. (Yak. 2:3, 4) Neyi tusweja kukeña amu tukuleta chaambu, chuma chatela kubula kwikala muchipompelu chawakwaKristu.—Yuda 17-19.

14. Kwesekeja naAfwilipi 2:3, chumanyi chinateli kutukwasha kubula kudimona netu twabadika akwetu?

¹⁴ Neyi tudikeña chikupu wumu namukwawu, kwosi wukumwekeshaña nindi wabadika akwawu muchipompeluku. Anukenu nenu Jonatani hamutiyilili Davidi ichimaku nawa hatoñojokeleña nindi yena diyi watela kwikala mwantaku. Wejima wetu twatela kumwimbujola Jonatani. Bayi muyitiyilaña akwenu ichima hamuloña wawuswa wawuku, “ilaña dizozenuña nakumona akwenu nenu ayibadika enu.” (Tañenu Afwilipi 2:3.) Ilukenu nenu muntu wejima wukweti mudimu watela kuzatayi muchipompelu. Neyi tutwalekahu kwikala adizoza, tukumonaña yuma yayiwahi mudi amanakwetu niahela nawa chikuhwelelu chawu chikutukolesha.—1 Kor. 12:21-25.

15. Yumanyi yimunadizili kuchuma chamumwekeneni muhela Tanya nichisaka chindi?

¹⁵ Neyi tunaholokeli mukukala kwakukasumwisha, Yehova watukundejaña kuhitila mukukeña ninawukwashu wutwatambwilaña kudi amanakwetu niahela. Talenu chuma chamwekeneni chisaka chimu chelili anapompi dehi Hamposu, haKupompa kwaMatuña kwamu 2019, muUnited States kwahosheleña nawu “Kukeña hiKwamanañaku!”  Muhela Tanya wudi nawanyana asatu wahosheli nindi: “Hampinji yitwafuntileña kutwashikeneni, motoka yimu yapwempukili kufuma kuyahitilileña nakwinza nakuhuma mumotoka yetu. Kwosi wadikatishiliku, ilaña twafumini mumotoka nakwimana hambadi. Muntu wumu kwishinadi danjila watulejeli nindi tuyi nakukandama mumotoka yindi. Wadiña himanakwetu wafumineña kukupompa. Bayi neyi yena diyi wemeni hohuku. Ilaña kwadiña niamanakwetu atanu afumini kuSweden emeni. Ahela ankumbatili hamu namwanami, chuma chatukolesheli chikupu. Nayilejeli nami tukwikala chiwahi, ilaña wena hiyatushiyiliku. Atuhembeleleli sampu nichatwinkeliwu yitumbu nawa atukwashili muyuma yejima yakeñekeleña. Haniyi mpinji yakala, twamweni chatukeñayi Yehova. Chuma chamwekeni chatuletesheli kusweja kuyikeña amanakwetu niahela nawa twamukeñeli chikupu Yehova nikumusakilila.” Munakwanukahu wanyi mpinji yimwadiña mukukala nawa akwenu akwakwitiya enza nakuyimwekeshela kukeña?

16. Yumanyi yinateli kutuletesha kudikeña wumu namukwawu?

¹⁶ Talenu yuma yayiwahi yafumañamu neyi tudikeña wumu namukwawu. Twayikundejaña amanakwetu niahela neyi adi mukukala. Twaletaña kuwunda hakachi ketu. Twamwekeshaña netu tudi atumbanji twaYesu nawa chumichi chasañumunaña antu adi nanyichima yashinshika kwinza nakumukalakela Yehova. Chuma chasweja kulema, twamulemeshaña Tata “wasweja luwi nawa Nzambi wakukundeja kwejima,” Yehova. (2 Kor. 1:3) Dichi wejima wetu tutwalekihu kwikala nakukeña nikukumwekesha.