1. Lwihwinyi lwehwiliyi Mwanta Davidi lutunateli kwihula ninetu?

WEJIMA wetu twakeñaña kushakama mukuwunda. Kwosi muntu wakeñaña kwakamaku. Hela chochu, mpinji jikwawu tunateli kwakama. Dichinateli kuletesha ambuña aYehova amakwawu kwihula lwihu lwolumu neyi lwamwihwiliwu Yehova kudi Mwanta Davidi nindi: “Nakushika kumwaka wudihi nakadileja mumuchima wami nakutiya chikela hohu mumuchima wami mwaana wonsu?”—Mas. 13:2.

2. Yumanyi yitukuhanjekahu muchinu chibaaba?

² Hela chakwila wejima wetu twakamaña, kudi yuma yitwatela kwila hakwila nawu tuleki kwakama. Muchinu chibaaba tukusambila kuhanjeka hayuma yinateli kutuletesha kwakama. Kuhiñahu tukuhanjeka yuma 6 yitunateli kwila yinateli kutukwasha kubula kwakama neyi tunakumona kukala.

3. Yumanyi yatwakamishaña, nawa tunateli kuyikañesha ñahi iyi yuma?

³ Kudi yuma yayivulu yinateli kutwakamisha, ilaña hitunateli kukañesha yumiyi kutwakamishaku. Chakutalilahu wuseya wayakuda, wayakuvwala hela wamatala wunakukandaminaku hachaaka-hachaaka, hitunateli kuwukañeshaku. Kwila tukañesha mapampa anateli kutwesekawu akwetu mutwazatilaña, akwetu akwashikola nawu tubuli kwikala ashinshika hela kwila wuvumbi nehi. Nawa hitunateli kukañesha wubanji wunakumwekana muchituñilu mutwashakamañaku. Twamonaña  iku kukala muloña twashakamaña mukaayi mudi antu akweti yitoñojoka yabula kushindamena hayishina yamuBayibolu. Satana, nzambi wakanu kaayi weluka nindi antu amakwawu akwiteja kwakama kwanshakaminu yamakonu kuyikañesha kumukalakela Yehova. (Mat. 13:22; 1 Yow. 5:19) Dichinaleteshi mukaayi mwikali kukala kwakuvulu kunakuletesha antu kwakama nankashi.

4. Kukalanyi kunateli kutuletesha kusweja kwakama?

⁴ Tunateli kwakama nankashi hakukala chakwila tunateli nikukañanya kutoñojoka hayuma yikwawu. Chakutalilahu, tunateli kwakama netu hadaha hitunateli kwikala namali ashikila akulandamu yuma yitunakukeñaku, hela netu tunateli kukata chakwila tukukañanyaña kuya kumudimu hela mudimu wunateli kumana. Tunateli cheñi kwakama netu tunateli kufumpa nshimbi jaNzambi neyi atweseka. Katataka Satana yazatishi antu ayuulañayi kulonda alukuki antu jaNzambi, dichi tunateli kwakama chitwakela hampinji yakatulukukawu. Tunateli kudihula netu ‘Komana chatama kwakama hayuma yamuchidi iwu?’

5. Yesu watalishili mudihi chahosheliyi nindi: “Lekenu kwakama”?

⁵ Tweluka netu Yesu wayilejeli akwakumulondela nindi: “Lekenu kwakama.” (Mat. 6:25) Komana watalishili mukwila nindi hitwatela kwakama hayuma yidi yejimaku? Dimwatalishiliyi wanyi! Ambuña aYehova ashinshika niwena kunyima adiña nakwakama, ilaña Yehova watwalekelihu kuyitiya kuwaha. * (1 Anya. 19:4; Mas. 6:3) Kafwampi, Yesu wadiña nakutukolesha kulonda tubuleña kusweja kwakama nayuma yitwakeñaña. Neyi nehi tukutoñojokaña netu kumukalakela Nzambi hidichuma chalema muchihandilu chetuku. Hanu dinu tunateli kwila ñahi neyi tunakwakama?—Talenu chikasha chinakwila nawu “ Chakwila.”

6. Kwesekeja naAfwilipi 4:6, 7, chumanyi chinateli kutukwasha kubula kwakama?

⁶ (1) Lombenuña mpinji yejima. AkwaKristu anakwakama muloña wakukala kunakumonawu anateli kumulomba chikupu Yehova kulonda yayikundeji. (1 Pet. 5:7) Yehova Nzambi nateli kwakula kulomba kwenu kuhitila mukuyinka “kuwunda kwaNzambi kwabadika kwiluka [kwawantu ejima.]” (Tañenu Afwilipi 4:6, 7.) Yehova wawundishaña yitoñojoka yetu kuhitila mukutwinka spiritu yindi yajila.—Ñal. 5:22.

7. Yumanyi yitwatela kwanukaña neyi tunakulomba kudi Nzambi?

⁷ Neyi munakulomba kudi Yehova mulejenuña yuma yejima yidi kumuchima wenu. Mulejenu kukala kumukweti nawa mulumbulwilenu chimunakutiya. Neyi kudi njila mumunateli kumanishila oku kukala, mulombenu yayinki maana akuwana oyu njila niñovu yakwilamu. Neyi mukutwesha wanyi kumanisha oku kukala, mulombenu Yehova yayikwashi kulonda mubuleña kusweja kwakama. Neyi mukumulejaña kukala kumukweti mukulomba, mukuhita kwampinji mukumonaña chinakwakulayi Yehova kulomba kwenu. Neyi kulomba kwenu anakwakuli wanyi hanoyu mpinji, bayi muzeyaku. Yehova nakukeña nindi mumulejeña kukala kumukweti, ilaña lombenuña nanyikoyu.—Luka 11:8-10.

8. Yumanyi yitwatela kutena mukulomba kwetu?

⁸ Hampinji yimunakumulejamu Yehova yuma yidi kumuchima wenu, bayi muvulamenaña kumusakililaku. Twatela cheñi  kutoñojoka hayuma yayiwahi yatwinkañayi hela chakwila tunakumona kukala kwakuvulu. Neyi mpinji jikwawu chatukalilaña kuwana mazu amawahi akuhosha mukulomba, twatela kwanukaña netu Yehova wakulaña kulomba hela tukulomba hohu netu ‘Mwani nkwashenu.’—2 Kushi. 18:31; Rom. 8:26.

9. Chumanyi chitwatela kwila neyi tunatiyi woma?

⁹ (2) Shindamenenuña hamaana aYehova bayi enuku. Mumafuku akaprofwetu Isaya, antu amuYuda atiyili woma wakuyilukuka kudi aSiriya. Chineli achiinineña kuyilukuka kudi aSiriya, aYuda ayili nakulomba wukwashu kudi aEjipitu. (Isa. 30:1, 2) Yehova wayisoñamishili nindi neyi ayishindamena aEjipitu, mwakafuma kukala. (Isa. 30:7, 12, 13) Yehova wayilejeli kuhitila mudi Isaya chinateli kwilawu hakwila ekali akiñewa chikupu. Wahosheli nindi: “Ñovu jenu yowu kudiwunjika zo-o nakukuhwelela” mudi Yehova.—Isa. 30:15b.

10. Muyuma yamuchidinyi mutunateli kumwekesha netu twamukuhwelela Yehova?

¹⁰ Tunateli kumukuhwelela ñahi Yehova? Talenu iyi yakutalilahu. Twili netu anayiñiji mudimu wamali amavulu ilaña wukukeñekaña kuzata mpinji yeneni nawa wukuyikañeshaña kumukalakela Yehova neyi chimunakwila chayinu mpinji. Hela twili netu kumudimu kumwazataña, mukwenu imwazataña nindi wayifwilaña chikupu, ilaña owu muntu hikambuña Nzambiku. Indi neyi ntaña yenu yayileja nindi: “Hadi ami naNzambi yenu mutonduhu wumu,” mukwila ñahi? Muyuma yejimiyi chinateli kuyikalila kufuukulahu, ilaña Yehova Nzambi nateli kuyikwasha kufuukulahu chiwahi. (Mat. 6:33; 10:37; 1 Kor. 7:39) Twatela kudihula netu, Komana nukumukuhwelela Yehova nikulondela nshimbi jindi?

11. Nsañwinyi yamuBayibolu yitunateli kudiza hakwila nawu twikali adiwunjika neyi tunakumona ikañesha?

¹¹ (3) Dizilenu kudi antu amawahi niantu atama. MuBayibolu mudi nsañu yayivulu yamwekeshaña nawu chalema kudiwunjika nikumukuhwelela Yehova. Chimukudizaña iyi nsañu, talenu yuma yayikwashili ambuña aNzambi kutwalekahu kwikala adiwunjika hela chakwila amweneña ikañesha dasweja. Chakutalilahu, chelili chota chanyiloña cheneni chawaYudeya chiyileji apostolu nawu aleki kushimwina, hiyatiyili womaku. Ilaña ahosheli nawu: “Nzambi diyi nyuuli wutwatela kwovwahila bayi antuku.” (Yilw. 5:29) Nihanyima yakwila anayivupoli dehi yikoti, hiyatiyili womaku. Muloñadi? Muloña elukili nawu Yehova wadiña nawena. Wayitiyileña kuwaha. Dichi atwalekelihu kushimwina nsañu yayiwahi. (Yilw. 5:40-42) Nihampinji yamujahileñawu kambanji Stefwanu, waduñumikili chakwila “kumesu indi kwamwekeneña neyi kumesu akañelu.” (Yilw. 6:12-15) Muloñadi? Muloña welukili nindi Yehova wamutiyileña kuwaha.

12. Kwesekeja na 1 Petulu 3:14; 4:14, muloñadi chitwatela kuzañalela neyi anakutukabisha?

¹² Apostolu adiña nawunsahu chikupu wamwekesheleña nawu Yehova wadiña nawena. Wayinkeli ñovu yakukoña yihayamisha. (Yilw. 5:12-16; 6:8) Ilaña etu Yehova watwinka wanyi ñovu yakukoña yihayamisha. Hela chochu, Yehova watulejaña kuhitila mwiizu dindi nindi, neyi tunakukabakana hamuloña wakufwila kuloña, watutiyaña kuwaha nawa spiritu yindi yekalaña hadi etu. (Tañenu 1 Petulu 3:14; 4:14.) Dichi bayi twakamaña hayuma yitwakela neyi anakutukabisha kumbidiku, ilaña twatela kuzata nañovu nakumukuhwelela chikupu Yehova netu nateli kutukwasha nikutwamwina. Neyi chelili  atumbanji akusambila, twatela kukuhwelela muchikaninu chaYesu chakwila nawu: “Ami nakayinka mazu nimaana owu akakañanyawu akwakudikaña nenu ejima kuyikaana hela kuyitaadika.” Nawa atukana nawu: “Neyi mwakomika, mwakapulwisha mawumi enu.” (Luka 21:12-19) Nawa mwatela kwanukaña nenu Yehova wuchidi kuyanuka ambuña indi ashinshika afwa dehi kulonda yakayisañuli.

13. Yumanyi yitunateli kudizilaku neyi tunakudiza nsañu yawantu akañenyi kudiwunjika nikumukuhwelela Yehova?

¹³ Ninetu tunateli kudizila kudi antu akañenyi kudiwunjika nikumukuhwelela Yehova. Neyi tudizaña yuma yeliliwu awa antu, chinateli kutukwasha kutondolwela kukoña yiluwa yoyimu neyi yakoñeliwu. Chakutalilahu, chelili Asa yekali Mwanta wawaYuda nawa amashidika amavulu enzi nakumulukuka, wamushindameneni Yehova nawa washindili. (2 Kushi. 14:9-12) Nkumininaku, chelili Bayasha Mwanta wawaIsarela yenzi nakuzuña naAsa, Asa walombeli wukwashu kudi aSiriya chatela yalombi wukwashu kudi Yehova neyi cheliliyi hakusambila. (2 Kushi. 16:1-3) Hampinji yakatiliyi chikupu kwakwihi nakufwa, hamushindameneni Yehova nindi yamukwashiku.—2 Kushi. 16:12.

14. Yumanyi yitunateli kudizila kuyiluwa yaAsa?

¹⁴ Hakusambila, Asa neyi wudi nakukala wadiña nakulomba kudi Yehova nindi yamukwashi. Chimwahitili mpinji walekeli kushindamena hadi Nzambi nindi yamukwashi, ilaña wafuukwilihu kumanisha kukala yomweni. Hakusambila yitoñojoka yaAsa yakulomba wukwashu kudi aSiriya nindi amukwashiku kuzuña nawaIsarela yamwekeneña neyi hiyitoñojoka yayiwahi. Ilaña, hiyadiña mukuwunda nawaIsarela hadi mpinji yayilehiku. Yehova wamulejeli kuhitila mudi kaprofwetu nindi: “Chiwunashindameni hadi mwanta wakuSiriya kushindamena hadi Yehova Nzambi yeyi nehi dichi njita yamwanta wakuSiriya yinapuluki dehi kudeyi.” (2 Kushi. 16:7) Twatela kwikala asoñama kulonda tubuleña kutoñojoka netu tunateli kumanisha kukala etu aweni chakadi kulomba wukwashu kudi Yehova kuhitila Mwiizu dindi Bayibolu. Hela chakwila tunamoni kukala kunakukeñeka kuzatilahu swayi-swayi, twatela kudiwunjika nakumushindamena Yehova nawa nateli kutukwasha kufuukulahu chiwahi.

15. Chumanyi chitwatela kwila neyi tunakutaña Bayibolu?

¹⁵ (4) Hembelenuña nsañu yamuBayibolu kumutu. Neyi muwana mavasi amuBayibolu anakumwekesha chichalemena kudiwunjika nikumukuhwelela Yehova, yihembelenu kumutu. Hakwila chiyikwashiku kwanuka, yitañilenuña hewulu hela kuyisoneka nawa hitulukenuñamu kapampa kakavulu. Yoshuwa amulejeli kutañaña mukanda waNshimbi mpinji yejima nikutoñojokañahu chikupu hakwila nawu yakamoni kuwaha. Yeniyi nshimbi yatañileñayi yadi kumukwasha kubula kutiya woma nikwikala wahamuka hampinji yamweneñayi kukala kudi kwejima. (Yosh. 1:8, 9) Mavasi amavulu adi Mwiizu daNzambi anateli kuyikwasha kwikala awunda hampinji yimunakumona kukala kunateli kuyakamisha hela kuyitiyisha woma.—Mas. 27:1-3; Yish. 3:25, 26.

16. Yehova wazatishaña ñahi chipompelu kutukwasha kulonda tubuleña kwakama nawa tumukuhweleli?

¹⁶ (5) Dikundenuña nawantu jaNzambi. Yehova wazatishaña amanakwetu niahela kutukwasha kulonda tubuleña kwakama nawa tumukuhweleleña. Hakupompa, jimpanji jahanañawu hachinañamu, ñakwilu yahanaña izaza nimazu amawahi ahoshañawu amanakwetu niahela atukoleshaña. (Heb. 10:24, 25) Tunateli cheñi kukoleshewa neyi tulejañaku  akwetu itwakuhwelela muchipompelu yuma yinakutwakamisha. “Izu dadiwahi” dafumaña kudi ibwambu dinateli kutukwasha kubula kwakama nankashi.—Yish. 12:25.

17. Kwesekeja naAheberu 6:19, indi kuchiñeja kwetu kwaWanta kunateli kutukwasha ñahi kwikala adiwunjika mumpinji yalukadi?

¹⁷ (6) Twalekenuhu nakuchiñeja. Kuchiñeja kwetu kwaWanta kudi “neyi chikuñu chakwimika nachu wumi wetu,” kwatukwashaña kuumika kukala kudi kwejima hela kwakama. (Tañenu Aheberu 6:19.) Toñojokenuña hayikaninu yatukanayi Yehova kumbidi hampinji yitwakabulaña kwakama chuma chidi chejima. (Isa. 65:17) Fwikijenuña munakushakama mwituña dadiha mudi kuwunda, mwakabula yuma yejima yatama. (Mika 4:4) Mukutwalekahu kuchiñeja neyi mukulejañaku antu amakwawu yuma yimwachiñejaña. Zatenuña hanakumini ñovu jenu mumudimu wakushimwina nikwilisha atumbanji. Neyi mutwalekahu kushimwina nikwilisha atumbanji, ‘kuchiñeja kwenu kukutwalekahu ndo-o nikunsa.’—Heb. 6:11.

18. Kukalanyi kutunateli kumona kumbidi, nawa tunateli kukushinda ñahi?

¹⁸ Chitunakuswina kwakwihi nakukuma kwanshakaminu yamakonu, tukumonaña kukala kwakuvulu kukutuleteshaña kwakama. Nsona yetu yachaaka cha 2021 yinateli kutukwasha kushinda iku kukala nikutwalekahu kwikala adiwunjika, bayi muñovu jetu etu aweniku, ilaña kuhitila mukumukuhwelela Yehova. Muchinu chaaka, tumwekesheña muyilwilu yetu netu twakuhwelela muchikaninu chaYehova chakwila nawu: “Ñovu jenu yowu kudiwunjika zo-o nakukuhwelela.”—Isa. 30:15.