1. Mpanji yahaniniwu hakupompa kweneni mu 1935 yamukwashili ñahi iwu mukwenzi?

MUKWENZI wumu wadiña nayaaka 18 hampinji yapapatisheweliyi mu 1926. Anvwali jindi adiña Atudizi aBayibolu, dichayilukiliwu aYinsahu jaYehova hayina mpinji. Adiña nawanyana awamayala asatu niawambanda ayedi, ayidizishili kumukalakela Yehova Nzambi nikumwimbujola Yesu Kristu. Neyi chelileñawu Atudizi aBayibolu hayina mpinji, iwu mukwenzi wadiileña kudinkendi nikunwa vinyu haChanukishu chaKuda kwaMwanta kwaMelela hachaaka-hachaaka. Hela chochu, kuchiñeja kwindi kwahimpikili chelili yatiyi mpanji yahosheleña nawu, “Izaza Deneni.” Iyi mpanji ayihanini kudi manakwetu J. F. Rutherford hakupompa kweneni kwadiñaku muWashington, D.C., U.S.A. mu 1935. Yumanyi yadiziliwu haniku kupompa?

2. Chalalanyi chalumbulwiliwu mumpanji yahaniniyi manakwetu Rutherford?

² Mumpanji yahaniniyi Manakwetu Rutherford, walumbulwili “izaza deneni” (King James Version), dashimunawu haChimwekeshu 7:9. Kushika tuhu nihaniyi mpinji, Atudizi aBayibolu elukili nawu izaza deneni dadiña hiizanvu dawantu akaya mwiwulu abulili kwikala ashinshika nankashi neyi awayishewa. Manakwetu Rutherford walumbulwili kuzatisha Nsona nindi izaza deneni hiyaditondaña kuya nakushakama mwiwuluku, ilaña hinyikoku yikwawu yaKristu * yikapuluka lukadi lwasweja nawa yikashakama hamaseki  haya nyaaka. (Chim. 7:14) Yesu wakanini nindi: “Nikweti anyikoku amakwawu, ilaña hiyamwiyinda dinuku; awa anyikoku niwena natela kuyileta mudinu iyinda, niwena akatiya izu dami nawa akekala mukanka wumu nikabiña wumu.” (Yow. 10:16) Awa anyikoku amakwawu hiyaYinsahu jaYehova ashinshika akweti kuchiñeja kwakushakama hamaseki muParadisa haya nyaaka. (Mat. 25:31-33, 46) Tutalenu iyi ntiyishishilu yayiha yachalala chamuBayibolu chiyahimpili yitoñojoka yawantu jaYehova amavulu kushilahu ninona manakwetu wakansi wadiña nayaaka 18.—Mas. 97:11; Yish. 4:18.

3-4. Hakupompa kweneni kwadiñaku mu 1935, antu amavulu elukili nawudi kutalisha hakuchiñeja kwawu, nawa muloñadi?

³ Haniku kupompa antu azañaleli hama chelili nhoshi yehuli izaza nindi: “Antu ejima akwetu kuchiñeja kwakushakama hamaseki haya nyaaka emani mwani?” Manakwetu wumu wadiña haniku kupompa wahosheli nindi wamweni antu akubadika hachikunku cha 20,000 apompeli, emeni. Kuhiñahu Manakwetu Rutherford wahosheli nindi: “Talenu izaza deneni!” Nawa antu azañaleli nankashi. Antu emeni elukili nawu hiyadiña nakuchiñeja kwakuya mwiwuluku. Elukili nawu hiyayiwayishili naspiritu yajila yaNzambiku. Hefuku damuchiyedi haniku kupompa, antu 840 apapatisheweli nakwikala aYinsahu, amavulu adaña amudi anyikoku amakwawu.

⁴ Hanyima yaniyi mpanji, ona mukwenzi itwashimuna hakusambila niantu amavulu amakwawu alekeli kuda kudinkendi nikunwa kuvinyu haKuda kwaMwanta kwaMelela. Manakwetu wumu wahosheli neyi chatiyiliwu antu amavulu nindi: “Nalekeli kuda kuyifwikija yahaChanukishu mu 1935, muloña nelukili nami Yehova hantondeli naspiritu yindi yajila kwikala nakuchiñeja kwakuya mwiwuluku, ilaña nadiña nakuchiñeja kwakushakama hamaseki kulonda nakazatiku mudimu wakuwahisha iseki kwikala Paradisa.” (Rom. 8:16, 17; 2 Kor. 1:21, 22) Kufuma yina mpinji, izaza deneni dinakutohelaku nawa dinakuzatila hamu nawawayishewa ashalahu. *

5. Yehova wamonaña ñahi antu analeki kuda kuyifwikija yahaChanukishu?

⁵ Yehova wayimonaña ñahi antu alekeli kuda kuyifwikija yahaChanukishu hanyima ya 1935? Indi Yehova wamonaña ñahi Chinsahu wapapatishewa wadaña kudinkendi nikunwa kuvinyu haKuda kwaMwanta kwaMelela ilaña mukuhita kwampinji yenza nakwiluka nindi hiyamuwayishaku? (1 Kor. 11:28) Amakwawu adaña kuyifwikija muloña eluka wanyi kuchiñeja kwawu. Ilaña neyi eluka nawu aluwañeshaña, aleka kuda nawa atwalekahu kumukalakela Yehova nakashinshi, wukuyitambwila nakwikala kukabadi kanyikoku yikwawu. Hela chakwila adaña wanyi dinkendi nikunwa kuvinyu, atwalekañahu kuya kuChanukishu muloña asakililaña hayuma yayililayi Yehova niYesu.

6. Yesu wayilejeli añelu kwiladi?

⁶ Chineli lukadi lweneni keña lushiki chikuwaha nankashi kuhanjeka chahosha cheñi Chimwekeshu kapetulu 7 hadi akwaKristu awayishewa niizaza deneni dawanyikoku amakwawu. Yesu walejeli añelu nindi  atwalekihu kukwatisha kumpepela jiwana jakujilumuna nachu. Ayilejeli kubula kuleka kuniji mpepela sampu akwaKristu ejima awayishewa anayilamiki, dikwila nawu anayiteji kudi Yehova. (Chim. 7:1-4) Hamuloña wakwikala ashinshika, amana kwaKristu awayishewa akekala anyanta nawa atupristu hamu nindi mwiwulu. (Chim. 20:6) Ejima ekala muchisaka chaNzambi chamwiwulu akatiya kuwaha kumona a 144,000 awayishewa anatambwili wuloku wawu wamwiwulu.

7. Kwesekeja naChimwekeshu 7:9, 10, Yowanu wamweni anyi muchimwenu, nawa adiña nakwiladi? (Talenu mwevulu wudi hakava.)

⁷ Chelili Yowanu nahoshi dehi hadi awa anyanta a 144,000 niatupristu, wamweni chuma chakuhayamisha, “izaza deneni” dikapuluka hanjita yaAmagedoni. Kwambukaku nezanvu datachi, idi izanvu damuchiyedi deneni nawa dakadi kutwesha kuchinda. (Tañenu Chimwekeshu 7:9, 10.) Anavwali nyinkukumba yitooka nakumwekesha nawu adaambula “kuyuma yatama” yamukaayi kaSatana nawa anatwalekihu kwikala ashinshika kudi Nzambi nikudi Kristu. (Yak. 1:27) Abidikaña nawu ayamwini hamuloña wachuma cheliliyi Yehova niYesu, Mukoku waNzambi. Cheñi anakwati nyitayi yanyitondu yanyikoma kumakasa awu chinakumwekesha nawu anazañalali muloña Yesu amutonda kudi Yehova kwikala Mwanta.—Esekejenu Yowanu 12:12, 13.

8. Nsona yaChimwekeshu 7:11, 12 yahosha nawudi kutalisha hachisaka chaYehova chamwiwulu?

⁸ Tañenu Chimwekeshu 7:11, 12. Chumanyi chamwekeni Mwiwulu chelili amoni izaza deneni? Yowanu wamweni chisaka chaYehova chejima chamwiwulu chinazañalali hakumona izaza deneni dinakumushimeka Nzambi. Chisaka chaYehova chamwiwulu chikazañalala chikashikijewa ichi chimwenu hakafuma izaza deneni mulukadi lwasweja.

9. Kwesekeja naChimwekeshu 7:13-15, mudimwinyi wunakuzata izaza deneni chayinu mpinji?

⁹ Tañenu Chimwekeshu 7:13-15. Yowanu washimwini nindi antu amwizaza deneni “anakosi nyinkukumba yawu nakuyitookesha mumashi aMwana kaMukoku.” Chumichi chinakumwekesha nawu akweti chinleji chitooka nawa Yehova wayitiyaña kuwaha. (Isa. 1:18) Adihana, hiyakwaKristu apapatishewa, akweti chikuhwelelu chakola mumulambu waYesu nawa akweti wubwambu wawuwahi naYehova. (Yow. 3:36; 1 Pet. 3:21) Dichaletesha Nzambi yayitiyeña kuwaha nawa amukalakelaña mudimu wajila “mwaana niwufuku” hanu hamaseki. Chayinu mpinji, ashimwinaña nsañu yaWanta nikwilisha atumbanji nawa atwamijaku Wanta waNzambi kubadika yuma yawu.—Mat. 6:33; 24:14; 28:19, 20.

10. Izaza deneni dakuhwelela nawudi, nawa chikaninwinyi chikashikijewa?

¹⁰ Izaza deneni dikapuluka halukadi lweneni dakuhwelela nawu Nzambi wakatwalekahu kudakamena, muloña “Owu washakama hetanda wakalemena itenti dindi hadi wena.” Chikaninu chatalilaña nyikoku yikwawu chikamwekana, chikaninu chakwila nawu: “[Nzambi] wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.”—Chim. 21:3, 4.

11-12. (a) Neyi chinamwekeshiwu haChimwekeshu 7:16, 17, yumanyi yayiwahi yatalilaña izaza deneni? (b) Chumanyi chatela kwilawu anyikoku amakwawu haChanukishu, nawa muloñadi?

¹¹ Tañenu Chimwekeshu 7:16, 17. Chayinu  mpinji, antu jaYehova anakukabakana muloña wakubula kwikala namali akulandamu yakuda hela kukala kukwawu kunakwinza hamuloña wanjita. Amakwawu anakuyikasa muloña wachikuhwelelu chawu. Hela chochu, izaza deneni datiyaña kuwaha muloña deluka nawu hanyima yakujilumuka kwakanu kaayi katama, akekala nayakuda yayivulu yakumujimba niyakuspiritu. Hampinji yakajilumunañawu kaayi kaSatana, izaza deneni akadikiña kukuzuwa kwaYehova kudi neyi ‘nkanza yinakochana.’ Hanyima yakumana kwalukadi lweneni, Yesu wakalombola antu akapuluka “kumenji awumi [wahaya nyaaka].” Ilukenu nenu: Izaza deneni dikweti kuchiñeja kwambukaku. Antu amavulu akekalaku hiyakafwañaku!—Yow. 11:26.

¹² Anyikoku amakwawu akweti kuchiñeja kwakuwahi kwayileteshaña amusakilileña Yehova niYesu. Hela chakwila Yehova hayitondeli nindi akashakameña mwiwuluku, wayikeña neyi chayikeñayi awayishewa. Wejima wawu, awayishewa nianyikoku amakwawu amushimekaña Nzambi niKristu. Njila yimu mwamushimekelañawu hikuya kuChanukishu chaKuda kwaMwanta kwaMelela.

13-14. Muloñadi awayishewa nianyikoku amakwawu chanakenañawu Chanukishu chakufwa kwaKristu?

¹³ Hadi yaaka yinahitihu, hakachi kawantu 1,000 anapompi kuChanukishu hekalaña muntu wumu wadaña kudinkendi nikunwa vinyu. Dikwila nawu yipompelu yayivulu hiyekalaña nawantu adaña kudinkendi nikunwa kuvinyu haChanukishuku. Antu amavulu enzaña kuChanukishu akweti kuchiñeja kwakushakama hamaseki. Hanu dinu muloñadi chayilañawu kuChanukishu chaKuda kwaMwanta kwaMelela? Ayaña muloña afwila kwila neyi chelaña antu ayeña kuchawija chawulu webwambu dawu. Awa antu akeñaña kumwekesha nawu akeña antu anakudisumbula nawa anakukeña kuyikwasha. Munjila yoyimu anyikoku amakwawu ayaña kuChanukishu muloña akeñaña kumwekesha kukeña kwawu nikukwasha Kristu niawayishewa. Anyikoku amakwawu ayaña  cheñi kulonda amwekeshi kusakilila hamulambu waYesu, mulambu waletesha ekali nakuchiñeja kwakushakama hamaseki haya nyaaka.

¹⁴ Chuma chikwawu chalema chaleteshaña anyikoku amakwawu ayeña kuChanukishu, hikwovwahila lushimbi lwaYesu. Yesu chatachikiliyi ichi chawija hamu nawapostolu indi wayilejeli nindi: “Dichi mwileña mwenimu hakuñanakana.” (1 Kor. 11:23-26) Dichi anyikoku amakwawu akutwalekahu kwanuka Kuda kwaMwanta kwaMelela chakala hohu awayishewa achidi hanu hamaseki. Nawa anyikoku amakwawu atambikaña antu ejima kwinza nakwanakana nawu Chanukishu.

15. Munateli kumushimeka ñahi Nzambi niKristu haChanukishu?

¹⁵ Twamushimekaña Nzambi niKristu mutumina nimukulomba haChanukishu. Mpanji yikahanawu chinu chaaka yikahoshaña nawu, “Hamekenu Chuma Chayikoñelayi Nzambi niKristu!” Yikatukwasha kumusakilila Yehova niKristu. Chakahitañeshañawu yifwikija tukatoñojokaña chuma chiyemenañaku, dikwila nawu mujimba waYesu nimashi indi. Tukanukaña netu Yehova wamwitejeli Mwanindi kutufwila kulonda twakekali nawumi. (Mat. 20:28) Antu ejima amukeña Tata yetu wamwiwulu niMwanindi akenza kuChanukishu.

16. Awayishewa nianyikoku amakwawu ekala ñahi chochimu?

¹⁶ Awayishewa nianyikoku amakwawu ekala chochimu muloña wejima wawu alema kudi Nzambi. Cheñi, wayifweteleli wuseya wowumu, waMwanindi akeñayi kulonda yalandi nachu awayishewa nianyikoku amakwawu. Chaambu chidi hanawa mazanvu ayedi chidi chakwila nawu wejima wawu akweti kuchiñeja kwambuka. Ilaña wejima wawu atela kwikala ashinshika kudi Nzambi nikudi Kristu. (Mas. 31:23) Nawa ilukenu nenu spiritu yaNzambi yazatikaña chochimu kudi wejima wetu. Yehova wahanaña spiritu yindi yajila kudi antu ejima kwesekeja nachinakukeñayi.

17. Chumanyi chatalilañawu awayishewa ashalahu?

¹⁷ AkwaKristu awayishewa hiyavwalikaña nakuchiñeja kwakuya mwiwuluku. Nzambi diyi wayinkaña iku kuchiñeja. Atoñojokaña haniku kuchiñeja kwawu, alombelañahu nawa afwilaña kutambwila wuloku wawu wamwiwulu. Eluka wanyi chikekala nyijimba yawu mwiwulu. (Fwi. 3:20, 21; 1 Yow. 3:2) Hela chochu, atalilaña kumumona Yehova, Yesu, añelu niakwawu awayishewa nikwikala nawu muWanta wamwiwulu.

18. Yumanyi yatalilañawu anyikoku amakwawu?

¹⁸ Anyikoku amakwawu atalilaña kuchiñeja  kwakushakama hamaseki haya nyaaka, chuma chafwilañawu ejima. (Mukwa. 3:11) Atalilaña mpinji yakelishawu iseki dejima kwikala Paradisa, yakatuñawu matala awu, kudima matempa awu nikukulisha anyanawu nanyijimba yakola. (Isa. 65:21-23) Atalilaña cheñi mpinji yakahitañanawu iseki dejima nakumona jimpidi, mavunda, tuluñalwiji nikwiluka yuma yejima yaleñayi Yehova. Chuma chasweja kulema, azañalalaña hakwiluka nawu wubwambu wawu naYehova wukakolelaku.

19. Chanukishu chatukwashaña wejima wetu kwiladi, nawa Chanukishu chachinu chaaka chikekalaku ifukwinyi?

¹⁹ Yehova wayinka ambuñindi adihana kuchiñeja kwakuwahi kumbidi. (Yere. 29:11) Chanukishu chakufwa kwaKristu chayinkaña awayishewa nianyikoku amakwawu mpinji yakumushimeka Nzambi niKristu hayuma yatwililayi kulonda tukadiluñisheña wumi wahaya nyaaka. Chanukishu dikupompa kwasweja kulema kwekalaña nawakwaKristu chaaka nichaaka. Chikekalaku hanyima yakuhuma kwetañwa haMposu, March 27, 2021. Chinu chaaka antu amavulu akanakana ichi chanukishu kwejima kwakekalawu. Amakwawu akanakana hela chakwila anakuyikañesha. Amakwawu akanakanaña iku adi mutuleya. Chineli Yehova, Yesu, añelu niawayishewa asañulawu akamonañaku, yipompelu yejima, mazanvu niantu ejima akadiluñisha ichi Chanukishu.