1. Kukeña kwaNzambi kwayitiyishaña ñahi?

KAPOSTOLU YOWANU wasonekeli nindi: “Nzambi hikukeña.” (1 Yow. 4:8) Tweluka netu Nzambi diyi waleñeli wumi, ilaña awa amazu anakutwanukisha nawu kudi Nzambi dikwafumaña kukeña. Yehova watukeña. Kukeña kwindi kwatukwashaña kwikala akiñewa, kwikala namuzañalu..

2. Kwesekeja naMatewu 22:37-40, nshimbinyi jiyedi jabadika, nawa muloñadi chichinateli kutukalila kwovwahila lushimbi lwamuchiyedi?

² AkwaKristu hiyatela kutondahu kumwekesha kukeña hela kubula kukumwekeshaku. Ilu hilushimbi. (Tañenu Matewu 22:37-40.) Neyi tumwiluka Yehova chikupu chinateli kwikala chaswayi kwovwahila lushimbi lwindi lwatachi. Muloña Yehova waloña, watwakamenaña nawa watutiyilaña wushona. Ilaña chinateli kutukalila kwovwahila lushimbi lwamuchiyedi. Muloñadi? Muloña amanakwetu niahela, dikwila nawu antu adi hakachi kawakwetu itwadikundaña nawu chikupu,hiyawaninaku. Mpinji yikwawu anateli kuhosha nikwila yuma yinateli kutuneñesha. Yehova welukili nindi chinateli kutukalila kwovwahila ilu lushimbi. Dichi, wazatishili ansoneki amakwawu aBayibolu kutudizisha chitwatela kumwekesha kukeña kudi wumu namukwawu nichakukumwekesha. Muntu wumu hakachi kanawa ansoneki hiYowanu.—1 Yow. 3:11, 12.

3. Yowanu wahosheli nindidi kutalisha hakukeña?

³ Munyikanda yindi yasonekeliyi, Yowanu wakonkomweneni nindi akwaKristu atela kudikeña. Dichi munsañu yasonekeliyi  hachihandilu chaYesu, Yowanu wazatishili nankashi izu dakwila nawu “kukeña” nidakwila nawu “wakeñeli” kubadika akwawu asatu mwasonekeleliwu nyikanda yaNsañu Yayiwahi. Yowanu wadiña kwakwihi nayaaka 100, hasonekeliyi mukanda windi waNsañu Yayiwahi ninyikanda yindi yisatu. Iyi nyikanda yejima yatudizishaña nawu yuma yejima yitwelaña etu akwaKristu twatela kuyilaña nakukeña. (1 Yow. 4:10, 11) Hela chochu, hahitili mpinji hakwila Yowanu yeluki chumichi.

4. Komana Yowanu wamwekesheleleña antu kukeña mpinji yejima?

⁴ Yowanu hadiñayi mukwenzi, hamwekesheleña kukeña mpinji yejimaku. Chakutalilahu, mpinji yimu Yesu niatumbanji twindi ayileña kuYerusalema nakuhita muSamariya. Antu amu mumukala wumu muSamariya akaanini kuyitambwila . Indi Yowanu welili ñahi? Wamwilili Yesu nindi yatambiki kesi kufuma mwiwulu kulonda kajilumuni musumba wejima. (Luka 9:52-56) Mpinji yikwawu, Yowanu wakañenyi kuyimwekeshela akwawu apostolu kukeña. Chinamwekani neyi yena nimanakwindi Yakoba diwu amulejeli mama yawu nawu yamwili Yesu kulonda yakayinki maluña alema muWanta. Apostolu amakwawu chatiyiliwu chuma chelili aYakoba naYowanu, ahilili. (Mat. 20:20, 21, 24) Hela chakwila Yowanu waluwañesheli mwejimimu, Yesu watwalekelihu kumukeña.—Yow. 21:7.

5. Yumanyi yitukuhanjekahu muchinu chibaaba?

⁵ Muchinu chibaaba, tukuhanjeka hadi Yowanu niyuma yasonekeliyi kutalisha hakukeña. Chitukuhanjekaña hayumiyi tukwiluka chitunateli kumwekesha kukeña kudi amanakwetu niahela. Tukwiluka cheñi njila yalema munateli kumwekeshelayi mutu wachisaka nindi wakeña chisaka chindi.

6. Yehova wamwekesha ñahi nindi watukeña?

⁶ Kakavulu twatoñojokaña netu hakwila tukeñi antu twatela kuyitiya kuwaha hela kuhosha yuma yayiwahi hadi wena. Hakwila tuyikeñi nankashi awa antu, twatela kumwekeshaña nimuyilwilu netu twayikeña. (Esekejenu Yakoba 2:17, 26.) Chakutalilahu, Yehova watukeña. (1 Yow. 4:19) Nawa wamwekeshaña kukeña kwindi mumazu asonekayi muBayibolu. (Mas. 25:10; Rom. 8:38, 39) Tweluka netu Nzambi watukeña kuhitila muyuma yahoshañayi niyuma yelañayi. Yowanu wasonekeli nindi: “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena.” (1 Yow. 4:9) Yehova wetejeli iwu Mwanindi  akeñayi kukabakana nikutufwila. (Yow. 3:16) Tweluka chikupu netu Yehova watukeña.

7. Chumanyi cheliliyi Yesu hakwila yamwekeshi nindi watukeña?

⁷ Yesu wayilejeli atumbanji twindi nindi wayikeña. (Yow. 13:1; 15:15) Wamwekesheli chayikeñeliyi nichatukeñayi muyuma yahosheleñayi niyelileñayi. Yesu wahosheli nindi: “Kwosi muntu wukweti kukeña kunabadiki iku kwakwila muntu yahani wumi windi kukoola amabwambu jindiku.” (Yow. 15:13) Neyi tutoñojokaña hayuma yatwililayi Yehova niYesu, chumanyi chitukufwilaña kwila?

8. 1 Yowanu 3:18, yahosha nawu twatela kwiladi?

⁸ Twamwekeshaña netu twamukeña Yehova niYesu kuhitila mukuyovwahila. (Yow. 14:15; 1 Yow. 5:3) Nawa Yesu watulejeli nindi tudikeñeña wumu namukwawu. (Yow. 13:34, 35) Hitwatela kumwekeshaña netu twayikeña amanakwetu niahela mumazu hohuku, ilaña nimuyuma yitwelaña. (Tañenu 1 Yowanu 3:18.) Yumanyi yitwatela kwila hakwila tumwekeshi netu twayikeña?

9. Kukeña kwamuletesheli Yowanu kwiladi?

⁹ Yowanu neyi wakeñeleña wadi kushakama natata yindi nakukwata inshi kulonda yekali namali. Ilaña, wadihanini kukwasha antu kulonda amwiluki Yehova niYesu muwumi windi. Chihandilu chatondeliyi Yowanu chadiña chakala. Amukabishili , nawa kwakwihi namakumishilu amafuku awapostolu helili nashinakaji dehi, amutwalili muwunkoli. (Yilw. 3:1; 4:1-3; 5:18; Chim. 1:9) Nihampinji yamukasiliwu hamuloña wakushimwina hadi Yesu, Yowanu wamwekesheli nindi wadiña wayikeña antu. Chakutalilahu, hadiñayi hachituutu chaPatamosa wasonekeli mukanda waChimwekeshu nawa wawutemesheli kuyipompelu kulonda antu eluki “yuma yikukeña kumwekana katataka.” (Chim. 1:1) Kuhiñahu chelili amumbiku kuPatamosa, Yowanu wasonekeli Nsañu Yayiwahi yahosha hachihandilu nimudimu waYesu. Wasonekeli cheñi nyikanda yisatu kulonda yakoleshi amanakwindi niahela. Tunateli kwimbujola ñahi chihandilu chaYowanu chakudihana?

10. Munateli kumwekesha ñahi nenu mwakeña antu?

¹⁰ Munateli kumwekesha nenu mwakeña antu kuhitila muyuma yimwatondaña kwila muchihandilu chenu. Kaayi kaSatana kakeñaña nawu muzatisheña ñovu nimpinji yenu kulonda mufwileña mali amavulu hela kutumbakana. Ilaña akwakushimwina aWanta mukaayi kejima azatishaña mpinji yawu kushimwina nsañu yayiwahi nikukwasha antu kulonda aswini kwakwihi naYehova. Amakwawu ashimwinaña nikudizisha mpinji yejima.

11. Akwakushimwina ashinshika amwekeshaña ñahi nawu amukeña Yehova, amanakwawu niahela?

¹¹ AkwaKristu amavulu azatishaña mpinji yeneni kumudimu wakumujimba kulonda adikwashileñamu niyisaka yawu. Hela chochu, awa akwakushimwina ashinshika akwashaña kuloñesha kwaNzambi kwesekeja nahanakumini wuswa wawu. Chakutalilahu, amakwawu akwashaña kunamwekani wubanji wadimwekenaña, amakwawu azatañaku mudimu wakutuña nawa ejima ahanaña yawaana yakukwasha mudimu wamukaayi kejima. Elaña yumiyi muloña amukeña Nzambi niakwawu antu. Mulungu nimulungu, twamwekeshaña netu twayikeña amanakwetu niahela kuhitila mukupompaña mpinji yejima nikwakulahu. Hela tunazeyi, twayaña nakupompa. Twakulañahu hela tunakutiya woma. Hela chakwila wejima wetu twekalaña nakukala kwamboka-mboka, twadikoleshaña wumu namukwawu henohu kanda tutachiki kupompa nihanyima yakupompa.  (Heb. 10:24, 25) Twasakililaña hamudimu wazataña akwetu akwakushimwina.

12. Munjilanyi yikwawu mwamwekesheleliyi Yowanu nindi wayikeña amanakwindi niahela?

¹² Yowanu wamwekesheli nindi wayikeña amanakwindi niahela kuhitila mukuyihameka nikuyifumba. Chakutalilahu, munyikanda yindi, Yowanu wayihamekeli amanakwindi niahela hachikuhwelelu chawu nihanyidimu yayiwahi, cheñi wayifumbili kutalisha hanshidi. (1 Yow. 1:8–2:1, 13, 14) Munjila yoyimu, twatela kuyihamekaña amanakwetu niahela hayuma yayiwahi yelañawu. Ilaña neyi tumona mukwetu natachiki kwikala nayilwilu yatama, indi kwiji nakwila yuma yinateli kuluwañesha wubwambu windi naYehova, twatela kumukwasha. Chakeñekaña kwikala wahamuka hakwila nawu wufumbi ibwambu deyi, ilaña Bayibolu yahoshaña nawu amabwambu alala adikoleshaña hela kudolola wumu namukwawu.—Yish. 27:17.

13. Chumanyi chitwatela kubula kwila?

¹³ Mpinji yikwawu twamwekeshaña netu twayikeña amanakwetu niahela kuhitila mukubula kwila yuma yimu. Chakutalilahu, hitwashikenaña kuneña nayuma yahoshañawuku. Talenu chuma chamwekeni kwakwihi nakufwa kwaYesu hamaseki. Wayilejeli atumbanji twindi nindi hakwila nawu akatambuli wumi wahaya nyaaka ateleli kuda mujimba windi nikunwa mashi indi. (Yow. 6:53-57) Awa mazu aneñesheli atumbanji twindi nawa amushiyili, kushiyahu hohu amabwambu jindi alala kushilahu niYowanu. Atiyishishili wanyi mwatalishiliyi Yesu nawa ahayamini nachumichi. Hela chochu, atumbanji twaYesu ashinshika, hiyatoñojokeli nawu mazu ahosheliyi Yesu adiña atamaku nawa hiyahukeniku. Wena amukuhweleleli muloña elukili nawu wahosheli chalala. (Yow. 6:60, 66-69) Dichi, bayi tushikenaña dakuhukana namazu anahoshiwu akwetuku. Ilaña, twatela kuyileka kulonda alumbululi munatalishiwu.—Yish. 18:13; Mukwa. 7:9.

14. Muloñadi chitwatela kubulila kuhelela amanakwetu niahela?

¹⁴ Yowanu watulejeli nindi bayi tuhelaña amanakwetu niahelaku. Dichi neyi tubulaña kulondela iku kufumba, tukumushila Satana iluña hakwiñilila. (1 Yow. 2:11; 3:15) Chumichi dichayimwekeneni antu amakwawu mumafuku akukumishaku awapostolu. Satana wazatileña nañovu yejima kulonda yaleti kuhelañana nikwambula antu jaNzambi.  Hampinji yasonekeleñayi Yowanu nyikanda yindi, amayala adiña nayilwilu neyi yaSatana eñilili muchipompelu. Chakutalilahu, Diyotefwesi waleteleña chaambu muchipompelu chimu. (3 Yow. 9, 10) Walemesheleña wanyi añimeni ezanvu dalombolaña. Wahañileña muchipompelu antu amwekesheleleña chisambu antu aheleliyi. Wadiña wadivwimba. Makonu Satana nakuzata nañovu kulonda yaambuli antu jaNzambi nikuyishinda. Dichi, bayi twiteja kuhelañana kutwambuli nawamanakwetuku.

15. Chumanyi chatela kwanukaña mutu wachisaka?

¹⁵ Njila yimu yalema mwamwekeshelañayi mutu wachisaka nindi wakeña chisaka chindi hikuyikeñela yuma yakumujimba. (1 Tim. 5:8) Hela chochu, watela kwanukaña nindi yuma yakumujimba hiyinateli kukwasha chisaka chindi kwikala nawubwambu wawuwahi naNzambiku. (Mat. 5:3) Talenu chuma cheliliyi Yesu chatela kwimbujola nyitu yayisaka. Mukanda waYowanu washimunaña nawu hampinji yadiñayi Yesu hamutondu wakuyandishila watoñojokeleña nihachisaka chindi. Yowanu niMariya mama yaYesu, adiña emana hamu kwiluña kwamupopeleliwu Yesu. Hela chakwila Yesu chadiña nakumuyeña, wamulejeli Yowanu kumwakamena Mariya. (Yow. 19:26, 27) Yesu wadiña nawamanakwindi ateleleli kumwakamena Mariya muyuma yakumujimba, ilaña chinamwekani neyi wejima wawu adiña kanda ekali atumbanji twindi. Dichi Yesu wakeñeleña nindi Mariya amwakameneña kumujimba nikuspiritu.

16. Nyidimwinyi yadiña naYowanu?

¹⁶ Yowanu wadiña namudimu weneni nankashi. Chineli wadiña kapostolu, wazatili nankashi mudimu wakushimwina. Watela wadiña wasumbula, dichi watela wadiña namudimu weneni wakwakamena chisaka chindi kumujimba nikuspiritu. (1 Kor. 9:5) Yumanyi yatela kudizilaku nyitu yayisaka makonu?

17. Nyidimwinyi yalema yikweti mutu wachisaka nawa chisaka chindi chinateli kutiya ñahi?

¹⁷ Manakwetu wudi nachisaka, nateli kwikala nanyidimu yayivulu. Chakutalilahu, watela kwikala wadikita hamudimu windi kulonda yaleteña kalemesha nimpuhu hadi Yehova nayilwilu yindi. (Efwe. 6:5, 6; Tit. 2:9, 10) Nawa  nateli kwikala cheñi nanyidimu yikwawu muchipompelu, chidi neyi mudimu wakubiña nikuzata mudimu wakushimwina. Hampinji yoyimu watela kudizaña Bayibolu mpinji yejima nachisaka chindi. Chisaka chindi chikutiya kuwaha hakumona chinakuyakamenayi kumujimba nikuspiritu.—Efwe. 5:28, 29; 6:4.

18. Yowanu welukili nindidi?

¹⁸ Yowanu washakamini yaaka yayivulu nawa wamweni yuma yayivulu. Wamweni kukala kwakuvulu kwadi kuzeyesha chikuhwelelu chindi. Ilaña wazatili hakumina ñovu yindi kwovwahila nshimbi jaYesu kushilahu nilushimbi lwakukeña amanakwindi niahela. Chafuminimu, Yowanu welukili chikupu nindi Yehova niYesu amukeñeli nawa nindi akumwinka ñovu yakuumika kukala kudi kwejima. (Yow. 14:15-17; 15:10; 1 Yow. 4:16) Kwosi chuma chelili Satana nikaayi kindi kulonda amukañeshi Yowanu kumwekesha kukeñaku.

19. Indi 1 Yowanu 4:7 yatukoleshaña kwiladi, nawa muloñadi?

¹⁹ Kufwana Yowanu, tunakushakama mukanu kaayi katama, kanakuyuulawu kudi Satana, nzambi wabulaña kumwekesha kukeña. (1 Yow. 3:1, 10) Hela chakwila nakukeña nindi tuleki kuyikeña amanakwetu niahela wukutwesha wanyi chiña neyi tumwiteja. Dichi tutwalekenuhu kuyikeña amanakwetu niahela nawa kukeña kwetu kumwekeneña muyuma yitwahoshaña niyitwelaña. Nkumininaku tukwikala namuzañalu muloña wakwikala muchisaka chaYehova nawa chihandilu chetu chikwikala chamuzañalu.—Tañenu 1 Yowanu 4:7.