1. Davidi wadiña mukukalanyi?

 DAVIDI watemukileña muloña akeñeleña kumujaha. Sawulu, mwanta wañovu wawaIsarela, wakeñeleña kumujaha. Davidi hakeñeleñayi yakuda wemeni mumusumba waNobi, nakulomba mankedi atanu. (1 Sam. 21:1, 3) Chimwahitili mpinji, Davidi niantu jindi ayili nakubatama mwiyeñu. (1 Sam. 22:1) Davidi wadiwanini ñahi muniku kukala?

2. Yumanyi yatama yakoñeliyi Sawulu? (1 Samweli 23:16, 17)

² Sawulu wamutiyilili chikupu Davidi ichima, muloña Davidi amukeñeli nankashi kudi antu amavulu nawa amuhamekeleña muloña washindili njita jajivulu. Sawulu welukili cheñi nindi Yehova wamukaanini muloña wakwila wadikañili nindi nawa wamukaanini kwikala mwanta wawaIsarela. Dichi wamutondeli Davidi kulonda yakaswani hetanda dindi. (Tañenu 1 Samweli 23:16, 17.) Hela chochu, chineli Sawulu wachidiña mwanta wawaIsarela, wadiña nawamashidika amavulu niantu amavulu amuhakwilileñaku, dichi Davidi watemukili kuchina kumujaha. Komana mwamweni Sawulu wadi kumukañesha Nzambi kumusha Davidi hetanda daWanta? (Isa. 55:11) Bayibolu hiyashimunaku, ilaña chuma chitwatela kwiluka dichi ichi: Sawulu wadishileña yomweni mukukala. Mpinji yejima antu adikañaña naNzambi ashindaña wanyi!

3. Davidi watiyili ñahi hela chakwila wamweni kukala?

³ Davidi wadiña wadikehesha. Haditondeli yomweni kwikala mwanta wawaIsarelaku. Yehova diyi wamutondeli. (1 Sam. 16:1, 12, 13) Sawulu watachikili kumumona Davidi nindi hichilumbu.  Davidi hamwinkelimu Yehova muloña hamuloña wakukala kwamweniyiku nawa hatoobelihu hamuloña wakubula yakuda nihakuswama mwiyeñuku. Ilaña, hadaha hampinji yaswaminiyi mwiyeñu dihu hasonekeliyi aka kamina kakawahi kakushimeka munabombeli awa mazu adi munsona yetu nawu: “Amukeñakeñaña Yehova hiyakabula chuma chachiwahi nichimuku.”—Ms. 34:10.

4. Malwihwinyi itukuhanjekahu, nawa analemenidi?

⁴ Makonu ambuña aYehova mpinji yikwawu ekalaña nayakuda yantesha niyuma yantesha yakuhanda nachu. * Dichuma chinayimwekeni ambuña aYehova amavulu mumpinji yachipupu. Nawa chitunakuswina kwakwihi “lukadi lwasweja,” yuma yikuswejelaku kukala. (Mat. 24:21) Chineli tunahanjeki dehi haniyi yuma, twakulenu awa malwihu awana: Munjilanyi Davidi “[mwabulililiyi] chuma chachiwahi nichimu”? Muloñadi chitwatela kuzañalalaña nayuma yitukweti? Muloñadi chitwatela kukuhwelela netu Yehova wukutwakamenaña? Nawa tunateli kwikala ñahi adiloñesha chayinu mpinji nayuma yinakwinza kumbidi?

5-6. Masamu 23:1-6 yatukwashaña ñahi kwiluka mwatalishiliyi Davidi, chahosheliyi nindi ambuña aNzambi ‘hiyabulaña chuma chachiwahi nichimuku’?

⁵ Davidi watalishili mudihi chahosheliyi nindi ambuña aYehova “[hiyakabula] chuma chachiwahi nichimuku”? Davidi chasonekeliyi Isamu 23 wazatishili mazu adifwana, dichi idi Isamu dinateli kutukwasha kwiluka mwatalishiliyi. (Tañenu Masamu 23:1-6.) Davidi watachikili idi Isamu namazu akwila nawu: “Yehova diyi Kabiña kami; hinukubula chumaku.” Isamu dejima dinashaliku, Davidi nateni yuma yalema chikupu chidi neyi yuma yayiwahi yamwililiwu kudi Yehova muloña wakwila wamwitejeli kwikala kabiña kindi. Yehova wamulombweli Davidi “munjila jakuloña,” nawa wamukwashili Davidi mumpinji yayiwahi nimumpinji yatama. Davidi  welukili nindi hela chakwila wadiña ‘mumunyenvu waYehova wututa’ wakamonaña kukala. Mpinji jikwawu waneñeleña neyi kwiji nakwenda “muchinekineki chamwidima wakufwa,” nawa wadiña nawayilumbu jindi. Ilaña hamuloña wakwila Davidi welukili nindi Yehova wadiña kabiña kindi, ‘hatiyili woma chuma chatamaku.’

⁶ Iyi diyi ñakwilu yanilu lwihu lunakwila nawu: Munjilanyi Davidi ‘mwabuliliyi chuma chachiwahi nichimu’? Wadiña nayuma yejima yakeñeleñayi hakwila yatwalekihu kuswina kwakwihi naYehova. Muzañalu windi hiwashindameneni hayuma yakumujimbaku. Davidi watiyileña kuwaha nayuma yejima yamwinkeleñawu kudi Yehova. Yuma yalemesheliyi yena hinkisu yafumineña kudi Yehova nichamukiñileñayi.

7. Kwesekeja naLuka 21:20-24, kukalanyi kwamweniwu akwaKristu ashakamineña muYudeya?

⁷ Kumazu aDavidi tunakudizilaku netu bayi tusweja kulemesha maheta muchihandilu chetuku. Tunateli kudiluñisha namaheta itukweti ilaña bayi tuyilemesha nankashi muchihandilu chetuku. Ichi dichalala chalema chateleli kwiluka akwaKristu alala amakwawu ashakamineña muYudeya. (Tañenu Luka 21:20-24.) Yesu wayisoñamishili nindi mpinji yakenza ‘hakamuchikawu musumba waYerusalema kudi amashidika.’ Neyi chumichi chimwekana, ateleli kutachika “kutemukila kumapidi.” Neyi ashiya musumba adi kupuluka, ilaña ateleli kushiya yuma yayivulu. Yaaka yinahitihu, Kaposhi Kakutalila kahosheli nawu: “Ashili maha awu nimatala awu, hiyasendelihu niyuma mumatala awuku. Amukuhweleleli Yehova nawu wukuyikiña nawa wukuyikwasha nawa alemesheli wubwambu wawu naYehova kubadika chuma chidi chejima.”

8. Chumanyi chalema chitunakudizila kuchuma chayimwekeneni akwaKristu akusambila ashakamineña muYudeya?

⁸ Chumanyi chalema chitunakudizila kuchuma chayimwekeneni akwaKristu akusambila ashakamineña muYudeya? Kaposhi Kakutalila kitunashimunihu kahosheli nawu: “Kumbidi tukamona kweseka kukamwekesha neyi maheta alema kudi etu; maheta dichuma chalema kudetu ntahindi, ntahindi chuma chalema kudetu hikupuluka hamuloña wakwikala ashinshika kudi Nzambi? Neyi kukuma kunenzi chikakeñekaña kuumika nikushiya yuma yejima. Twatela kwikala adiloñesha kushiya yuma yejima neyi cheliliwu akwaKristu akusambila atemukili muYudeya.” *

9. Chumanyi chimunadizili kumazu ayifumbiliyi kapostolu Pawulu aHeberu?

⁹ Chatela chayikalili awa akwaKristu kushiya yuma yejima yadiñawu nayu nakutachika chihandilu chachiha. Ateleleli kumukuhwelela Yehova nawu wukuyinka yuma yejima yinakukeñawu. Ilaña kwadiña chuma chadi kuyikwasha. Chimwahitili yaaka 5 henohu Aroma kanda akuchiki musumba waYerusalema, kapostolu Pawulu wayifumbili aHeberu nindi: “Chihandilu chenu chiikali chakadi kusweja kukeña mali, iku munakuzañalala nayuma yimudi nayu. Muloña yena wahosha nindi: “Hinamba kakushiya hela kukufutalelaku.” Kulonda twiikali nawulobu wakuhosha netu: “Yehova diyi nkwashi yami; hinukutiya womaku. Chumanyi chikuñilayi muntu?’” (Heb. 13:5, 6) Chakadi nikujina, ana atiyilili kufumba kwaPawulu henohu aRoma kanda ayilukuki chayipeleleli kwinjilila kushakama chihandilu chapela kwayiliwu. Elukili chikupu nawu Yehova wukuyinkaña yuma  yinakukeñawu. Mazu ahosheliyi Pawulu anakutukwasha kwiluka netu ninetu twatela kumukuhwelela Yehova netu wukutwinkaña yuma yitunakukeña.

10. “Kajindilwinyi” katulejeliyi Pawulu?

¹⁰ Pawulu wamulejeli Timotewu kufumba kwokumu nawa ninetu. Wasonekeli nindi: “Dichi, chineli tukweti yakuda niyakuvwala, tukuzañalalaña nayumiyi.” (1 Tim. 6:8) Komana chumichi chinayi mukwila nawu, twatela kudiluñisha wanyi nayakuda yayiwahi, kwikala netala dadiwahi hela kulanda yakuvwala yayiha mumpinji-mumpinji? Dichinakuhoshayi Pawulu wanyi. Pawulu nakuhosha nindi twatela kuzañalalaña nayuma yitukweti. (Fwili. 4:12) Dikadiña “kajindilu” kaPawulu. Wubwambu wetu naNzambi diwu maheta etu abadika, bayi yuma yakumujimba yitukwetiku.—Hab. 3:17, 18.

11. Chumanyi chitunakudizilaku kunawa mazu ayilejeliwu aIsarela kudi Mosi kutalisha hakuzañalala nayuma yitukweti?

¹¹ Yuma yitwatoñojokaña netu twatela kwikala nayu yinambukiku nachelukayi Yehova yuma yitwakeñaña. Talenu Mosi chayilejeliyi aIsarela hanyima yakushakama yaaka 40 muchinkalampata, wayilejeli nindi: “Yehova Nzambi yeyi nakukoolekeshi dehi kunyidimu yakumakaseyi yejima; yena neluki kwenda kweyi kuwunendi mwisañidi dasweja  kutoha; nyaka makumi awana iyi Yehova Nzambi yeyi wadiñi naneyi, hiwunabuli chumaku.” (Kuhit. 2:7) Haniyi yaaka 40 yadiñawu muchinkalampata, Yehova wayinkeleña aIsarela manina kwikala yakuda yawu. Yakuvwala yawu yoyafuminiwu nachu muEjipitu hiyatabukilihuku. (Kuhit. 8:3, 4) Hela chakwila amakwawu atoñojokeleña nawu yumiyi hiyashikililimuku, Mosi wayanukishili aIsarela nindi adiña nayuma yejima yakeñeleñawu. Yehova wukutiyaña kuwaha neyi tuzañalalaña nayuma yitukweti, nakukeña tusakilileña hayuma yatwinkañayi nawa tuyimoneña netu hiyuma yatwinkañayi Yena.

12. Chumanyi chamwekeshaña nawu Davidi wakuhweleli mudi Yehova bayi mudi yomweniku?

¹² Davidi welukili chikupu nindi Yehova washinshika nawa wayakamenaña antu amukeña. Hela chakwila wadiña mukukala hampinji yasonekeliyi Isamu 34, Davidi wamukuhweleli chikupu Yehova nawa welukili nindi “kañelu kaYehova” kamunyeñumukili “kwi ndo-o.” (Mas. 34:7) Hadaha Davidi wesekejeli kañelu kaYehova namushidika wunakulonda mpinji yejima, kuchina ayilumbu. Hela chakwila Davidi wadiña mushidika wahamuka, Yehova wamukanini nindi wakekala Mwanta. Davidi hashindameneni muwuswa windi wakwasa namwonji hela kuzatisha mpoku yakabali kulonda yashindi ayilumbu jindiku. (1 Sam. 16:13; 24:12) Wamukuhweleli Nzambi nawa welukili nindi kañelu kaYehova ‘kapulwishaña ana amwakama Nzambi.’ Hela chochu, makonu hitwakuhwelelaña kutukiña muchihayamishaku. Nawa twakuhwelela netu antu ejima amukuhwelela Yehova akekala nawumi wahaya nyaaka hela chakwila akufwa chayinu mpinji.

13. Neyi Gogi waMagogi natulukuki, muloñadi chitukamwekana neyi tudana wakutukiña, nawa muloñadi chitwatela kubula kutiyila woma? (Talenu mwevulu wudi hakava.)

¹³ Katataka, chikuhwelelu chetu chakwila nawu Yehova wukweti wuswa wakutukiña, chikwikala mukweseka. Gogi waMagogi, hela netu kudibomba kwanyuza, hampinji yakayilukukawu antu jaNzambi mawumi etu akamwekana neyi adi mukukala. Haniyi mpinji twatela kukuhwelela netu Yehova wukutwamwina. Kudi iyi nyuza, tukamwekana neyi nyikoku yinabuli wakuyikiña. (Ezek. 38:10-12) Twakekala nayitwa wanyi, nawa hitwakekala antu adizishawu chakuzuñaku. Nyuza yikatoñojoka nawu chaswayi kutushinda, eluka wanyi nawu añelu jaYehova adiloñesha kutukiña. Ilaña etu tweluka chumichi muloña wachikuhwelelu. Nyuza hiyakuhwelela mudi Nzambiku. Akahayama chikupu chiyakatuzuñilaku kudi amashidika amwiwulu!—Chim. 19:11, 14, 15.

14. Yumanyi yitwatela kwila chayinu mpinji hakwila nawu tudiloñeshi nayuma yinakwinza hambidi?

¹⁴ Chumanyi chitwatela kwila chayinu mpinji hakwila nawu tudiloñeshi nayuma yikamwekana kumbidi? Chatachi, hitwatela kusha muchima hakufwila mahetaku, muloña ifuku dimu twakajishiya jejima. Twatela cheñi kuzañalalaña nayuma yitukweti nawa twatela cheñi kuzañalalaña hawubwambu wutukweti naYehova. Neyi tumwiluka Nzambi yetu chikupu, chikatukwasha kumukuhwelela netu wukatukiña hampinji yikatulukukawu kudi Gogi waMagogi.

15. Yumanyi yamweniyi Davidi hadiñayi kansi yamukwashili kwiluka nindi Yehova wukumukwashaña mpinji yejima?

¹⁵ Talenu chuma chikwawu chamukwashili  Davidi nawa chinateli kutukwasha ninetu kwikala adiloñesha nakweseka. Davidi wahosheli nindi: “Tompenu mutiyi chawahayi Yehova; muntu wabatamaña mudi yena nakooleki.” (Mas. 34:8) Awa mazu analumbululi muloña waweni Davidi chelukiliyi nindi watela kumukuhwelela Yehova nindi wukumukwasha. Kakavulu Davidi wamushindameneni Yehova, nawa Nzambi yindi hamumbiliku. Davidi hadiñayi kansi wayili nakuzuña nachikelamu cheyala, Goliyati kaFwilistinu nawa wamulejeli iwu mushidika wañovu nindi: “Yehova wukukwinka muchikasa chami lelu.” (1 Sam. 17:46) Chimwahitili mpinji, Davidi wamukalakeleleña mwanta Sawulu nawa kapampa kakavulu Sawulu wakeñeleña kumujaha. Ilaña “Yehova wadiña” naDavidi. (1 Sam. 18:12) Chineli Davidi welukili nindi Yehova wamukwashili kunyima welukili cheñi nindi wukumukwasha cheñi nakukala kwamweniyi hayina mpinji.

16. Munjilanyi mutunateli ‘kutompela kuwaha’ kwaYehova?

¹⁶ Dichi, neyi tumushindamenaña Yehova netu yatulomboleña chayinu mpinji, chikatukwasha kumukuhwelela kumbidi netu wukutwamwina. Twatela kumukuhwelela Yehova nikudihana hakwila nawu tutweshi kulomba kudi mukulumpi wetu wamudimu netu yatwinki mpinji yakuya nakupompa hela kutukeheshelaku mafuku akuzata kulonda tupompeña mpinji yejima nikwikalaku nampinji yakuzataku mudimu wakushimwina. Twili netu mukulumpi wetu wamudimu natukaanini nawa mudimu wunatumani. Komana tukumukuhwelela Yehova netu hamba katushiyaku hela kutumbaku nawa wukutwinkaña yuma yejima yitunakukeña? (Heb. 13:5) Antu amavulu adi mumudimu wampinji yejima anateli kushimuna Yehova chayikwashiliyi sweje-e hampinji yakeñeleñawu nawu yayikwashi. Yehova washinshika.

17. Nsona yachaaka cha 2022, yinakuhosha nawudi, nawa muloñadi chiyinawahili?

¹⁷ Chineli tudi naYehova hitwatela kuchina yuma yikatumwekena kumbidiku. Nzambi yetu hamba katushiyaku, chakala hohu tutwamijaku Wanta muchihandilu chetu. Hakwila atwanukishi namafuku akala anakwinza hambidi nikukuhwelela netu Yehova hamba katushiyaku, Izanvu Dalombolaña dinatondi Masamu 34:10, kwikala nsona yetu yachaaka cha 2022 yinakuhosha nawu: “Amukeñakeñaña Yehova hiyakabula chuma chachiwahi nichimuku.”