CHIBAABA CHAKUDIZA 4
Chitwanakenaña Chanukishu
“Mwileña mwenimu hakuñanakana.”—LUKA 22:19.
KAMINA 20 Wahana Mwaneyi Walema Chikupu
NSAÑU YIDI MUCHIBAABA *
1-2. (a) Ifukwinyi ditwanukaña ntaña yetu wafwa dehi? (b) Chumanyi chaloñesheliyi Yesu hawufuku wakwila kanda yafwi?
HELA chakwila hanashimbuli kufuma hafwililiwu antaña jetu itwakeña, tuchidi kuyanuka. Sweje-e twayanukaña nankashi hefuku dafwiliwu.
2 Chaaka nichaaka, twekalaña hakachi kamamiliyoni awantu mukaayi kejima apompaña hamu hefuku dafwili muntu itwakeña nankashi, Yesu Kristu. (1 Pet. 1:8) Twapompaña hamu nakwanuka muntu waheni wumi windi kwikala ifutu dakutwamwina kunshidi nikukufwa. (Mat. 20:28) Kafwampi, Yesu wayilejeli akwakumulondela kwanuka kufwa kwindi. Hawufuku wakwila kanda yafwi, waloñesheli kuda kwamelela nawa wayilejeli nindi: “Mwileña mwenimu hakuñanakana.”—Luka 22:19.
3. Yumanyi yitukuhanjeka muchinu chibaaba?
3 Antu antesha ayaña kuChanukishu chakufwa kwaKristu akweti kuchiñeja kwakuya mwiwulu. Ilaña antu amavulu akweti kuchiñeja kwakushakama hamaseki niwena anakanaña. Muchinu chibaaba, tukudiza hanyiloña yaleteshaña awa mazanvu ayedi kwinza kuChanukishu chaaka nichaaka. Tukudiza cheñi yuma yayiwahi yafumañamu neyi tunakupompa. Tuhanjekenu ntahi yuma yaleteshaña awayishewa kwinza kuChanukishu.
CHUMA CHALETESHAÑA AWAYISHEWA KWIKALAKU HACHANUKISHU
4. Muloñadi awayishewa chadilañawu kudinkendi nikunwa vinyu haChanukishu?
4 Chaaka nichaaka awayishewa enzaña kuchanukishu, adaña dinkendi nikunwa vinyu. Muloñadi chadilañawu dinkendi nikunwa vinyu? Hakwila twakuli ilu lwihu, talenu chuma chamwekeni hawufuku wakukumisha muchihandilu chaYesu hamaseki. Hanyima yaChipandakenu, Yesu watachikili chawija chitunakutena netu Kuda kwaMwanta kwaMelela. Wayinkeli apostolu indi ashinshika 11 dinkendi nivinyu nindi adi nikunwa. Yesu wayilejeli yitiyañenu yiyedi, chitiyañenu chachiha nichitiyañenu chaWanta. * (Luka 22:19, 20, 28-30) Iyi yitiyañenu yayenzunwina awa apostolu niantu amakwawu antesha kwikala anyanta niatupristu mwiwulu. (Chim. 5:10; 14:1) Chiña hohu awayishewa ashalahu, * ekala muniyi yitiyañenu yiyedi diwu atela kuda kudinkendi nikunwa vinyu haChanukishu.
5. Chumanyi chelukawu awayishewa hakuchiñeja kwayinkawu?
5 Ichi dichuma chikwawu chaleteshaña awayishewa kwinza kuChanukishu: Kwinza kuChanukishu kwayikwashaña kutoñojoka hakuchiñeja kwawu. Yehova wayinka kuchiñeja kwakuwahi kwakwikala nawumi wabulaña kufwa nimujimba wabulaña kufwa mwiwulu. Akazatila hamu naYesu Kristu alemeshawu nia 144,000, nawa chuma chasweja kulema, akamumonaña Yehova Nzambi. (1 Kor. 15:51-53; 1 Yow. 3:2) Awa awayishewa eluka nawu ayitonda kulonda akayi mwiwulu. Ilaña hakwila akayiteji kuya mwiwulu atela kutwalekahu kwikala ashinshika sampu nikukufwa. (2 Tim. 4:7, 8) Chayizañaleshaña awayishewa kutoñojoka hakuchiñeja kwawu kwakuya mwiwulu. (Tit. 2:13) Indochu “anyikoku amakwawu”? (Yow. 10:16) Yumanyi yayileteshaña kwinza kuChanukishu?
CHUMA CHALETESHAÑA ANYIKOKU AMAKWAWU KWINZA KUCHANUKISHU
6. Muloñadi anyikoku amakwawu chenjilañawu kuChanukishu chaaka nichaaka?
6 Anyikoku amakwawu enzaña kuChanukishu, ilaña adaña wanyi dinkendi hela kunwa vinyu. Mu 1938, ana adiña nakuchiñeja kwakushakama hamaseki, ayitejeli kuya kuChanukishu katachi. Kaposhi Kakutalila kaMarch 1, 1938, kahosheli nawu: “Chidi hohu chiwahi nawa chinateleli anyikoku amakwawu kwikalaku haniku kupompa nakumona yuma yinakumwekana. . . Nawa himpinji yatela kuzañalalawu niwena.” Neyi chazañalalaña antu anatambikiwu kuchawija chawulu, anyikoku amakwawu niwena atiyaña kuwaha kwikalaku haChanukishu.
7. Muloñadi anyikoku amakwawu chakeñelañawu kutiyilila kumpanji yaChanukishu?
7 Anyikoku amakwawu niwena atoñojokaña hakuchiñeja kwawu. Akeñaña kutiyilila kumpanji yaChanukishu muloña yahoshaña nankashi hayuma yakayililawu kudi Yesu Kristu nia 144,000 muChiyuulu chaYaaka Ikombakaji. Hampinji yakayuulañayi Yesu Kristu, awa anyuli akayulilaña mwiwulu akakwasha antu kulonda iseki dikekali paradisa nikukwasha antu adizoza kulonda akekali awanina. Mamiliyoni awantu enzaña kuChanukishu atiyaña kuwaha kufwikija chakashikijawu wuprofwetu wamuBayibolu, iwu wekala haIsaya 35:5, 6; 65:21-23; niChimwekeshu 21:3, 4. Adifwikijaña wena niantaña jawu akeñawu adi mwituña dadiha. Achiñejaña yuma yidi kumbidi nawa afwilaña kutwalekahu kumukalakela Yehova bayi kufunta hanyimaku.—Mat. 24:13; Ñal. 6:9.
8. Chumanyi chikwawu chaleteshaña anyikoku amakwawu kuya kuChanukishu?
8 Talenu chuma chikwawu chaleteshaña anyikoku amakwawu kwanakana Chanukishu. Afwilaña kumwekesha kukeña nikukwasha awayishewa. Izu daNzambi dashimwineñahu dehi nawu awayishewa niantu akweti kuchiñeja kwakushakama hamaseki akazatilaña hamu. Munjilanyi? Tuhanjekenu hayakutalilahu yantesha.
9. Wuprofwetu wekala haZekariya 8:23 wamwekeshaña ñahi wubwambu wekala hadi awayishewa nawanyikoku amakwawu?
9 Tañenu Zekariya 8:23. Iwu wuprofwetu wunalumbululi chiwahi anyikoku amakwawu chatiyañawu nawamanakwawu niahela awayishewa. Mazu akwila nawu “kaYudeya” niizu dakwila nawu “mwekala nindi” anakutalisha kudi izanvu dimu, dawawayishewa ashalahu. (Rom. 2:28, 29) “Ikumi dawamayala akunyuza yamadimi ejima” dinakwimenaku anyikoku amakwawu. “Akwata kwihina,” dikwila nawu adinuña hamu nawawayishewa nawa ekala hamu nawu mukudifukula kwalala. HaChanukishu, anyikoku amakwawu amwekeshaña chadinuñawu nawawayishewa kuhitila mukwikala hamu nawena.
10. Chumanyi chelayi Yehova hakushikija wuprofwetu wekala haEzekeli 37:15-19, 24, 25?
10 Tañenu Ezekeli 37:15-19, 24, 25. Hakushikija iwu wuprofwetu, Yehova naleti awayishewa nianyikoku amakwawu kulonda azatileña hamu mukunuñañana. Iwu wuprofwetu washimuna tunyitondu tuyedi. Awa akweti kuchiñeja kwakuya mwiwulu adi neyi kamutondu “kaYuda,” (mumuchidi mwafumineña anyanta awaIsarela), nawa antu akweti kuchiñeja kwakushakama hamaseki adi neyi kamutondu “kaEfweremi.” * Yehova wadi kubomba awa mazanvu ayedi kulonda ekali “kamutondu kamu.” Chumichi chinayi mukwila nawu azatilaña hamu mukunuñañana nawa ekala naMwanta wawu wumu, Kristu Yesu. Chaaka nichaaka, awayishewa nianyikoku amakwawu apompaña haChanukishu bayi mazanvu ayedi ambukaku, ilaña neyi “mukanka wumu” wukweti “kabiña wumu.”—Yow. 10:16.
11. “Anyikoku” ashimunawu haMatewu 25:31-36, 40 amwekeshaña ñahi nawu akwashaña amanakwaKristu?
11 Tañenu Matewu 25:31-36, 40. “Anyikoku” ashimunayi Yesu munichi chishimu anakwimenaku antu aloña adiku mumpinji yakukuminina, akweti kuchiñeja kwakushakama hamaseki. Anyikoku amakwawu akwashaña amanakwaKristu awayishewa ashalahu kuhitila mukuyikwasha kuzata mudimu walema wakushimwina nikwilisha atumbanji mukayi kejima.—Mat. 24:14; 28:19, 20.
12-13. Munjilanyi yikwawu anyikoku amakwawu mwayikwashilañawu amanakwaKristu?
12 Chaaka nichaaka munyilungu yakutwala kuChanukishu, anyikoku amakwawu amwekeshaña nawu ayikwashaña amanakwaKristu kuhitila mukuzataku chikupu mumudimu wakukwasha antu akweti mpwila mukaayi kejima kulonda akenzi kuChanukishu. (Talenu chikasha chinakwila nawu “ Munakudiloñesha Chimwakazata muMpinji yaChanukishu?”) Aloñeshaña cheñi yuma yakeñekaña kulonda Chanukishu chikaliku muyipompelu yejima mukaayi kejima hela chakwila muyipompelu yawu mwekala wanyi muntu wawayishewa. Anyikoku amakwawu atiyaña kuwaha kukwasha amanakwaKristu muniyi njila. Awa anyikoku eluka nawu Yesu wamonaña nyidimu yejima yayililañawu awa awayishewa nindi anakumuzatila yena.—Mat. 25:37-40.
13 Yumanyi yikwawu yaleteshaña wejima wetu chili tudi awayishewa hela anyikoku amakwawu kwinza kuChanukishu?
MULOÑA WALETESHAÑA WEJIMA WETU KWINZA KUCHANUKISHU
14. Yehova niYesu atumwekeshela ñahi kukeña kwabadika?
14 Twasakililaña hakukeña kwatumwekeshelayi Yehova niYesu. Yehova watumwekeshela kukeña kwindi munjila jajivulu, ilaña kukeña kumu kwabadika kwejima. Nzambi yetu watumwekeshela kukeña kwabadika kuhitila mukutemesha Mwanindi alemeshayi kwinza nakutukabakena nikutufwila. (Yow. 3:16) Tweluka netu, Yesu niyena watumwekesheleli kukeña kwabadika kuhitila mukuhana wumi windi kukola etu. (Yow. 15:13) Hitukutwesha kumufweta Yehova niYesu hakukeña kwatumwekeshelawuku. Ilaña tunateli kumwekesha kusakilila kwesekeja nanochu chitwahandaña ifuku niifuku. (Kol. 3:15) Cheñi, twayaña kuChanukishu kulonda twanukeña kukeña kwatumwekesheleliwu nikumwekesha ochitwayikeña.
15. Muloñadi awayishewa nianyikoku amakwawu chalemeshelawu nankashi ifutu danyiloña?
15 Twalemesha nankashi chawaana chefutu danyiloña. (Mat. 20:28) Awayishewa alemesha nankashi ifutu danyiloña, muloña dayikwasha kwikala nakuchiñeja kwamwiwulu. Yehova wayitena kuloña nawa wayiteja kwikala anyanindi muloña akuhwelela mumulambu waKristu. (Rom. 5:1; 8:15-17, 23) Anyikoku amakwawu niwena alemesha ifutu danyiloña. Chineli akuhwelela mumashi aKristu apwekesheliyi, akweti ñimenu yayiwahi kudi Yehova, chakwila amukalakelaña mudimu wajila nawa akweti kuchiñeja “kwakufuma mulukadi lwasweja.” (Chim. 7:13-15) Njila yimu mwamwekeshelañawu awayishewa nianyikoku amakwawu kusakilila hefutu danyiloña hikwikalaku haChanukishu chaaka nichaaka.
16. Chumanyi chikwawu chaleteshaña twanakaneña Chanukishu?
16 Chuma chikwawu chaleteshaña twikaleñaku haChanukishu, himuloña wakwila twakeñaña kumwovwahila Yesu. Hela chakwila tukweti kuchiñeja kwakuya mwiwulu hela kushakama hamaseki muparadisa, wejima wetu hamuntu-hamuntu twovwahilaña lushimbi lwahaniniyi Yesu hefuku datachikiliyi Chanukishu nindi: “Mwileña mwenimu hakuñanakana.”—1 Kor. 11:23, 24.
YUMA YAYIWAHI YAFUMAÑAMU NEYI TWIKALAKU HACHANUKISHU
17. Chanukishu chatukwashaña ñahi kuswina kwakwihi naYehova?
17 Twaswinaña kwakwihi naYehova. (Yak. 4:8) Neyi chitunadizi, Chanukishu chatukwashaña kutoñojoka hakuchiñeja kwatwinkayi Yehova nikutoñojoka hakukeña kwabadika kwatumwekeshelayi. (Yer. 29:11; 1 Yow. 4:8-10) Neyi tutoñojokaña hakuchiñeja kwetu kutukweti nihakukeña kwatumwekeshelayi Nzambi kwabulaña kumana tukumukeña Yehova nankashi niwubwambu wetu nayena wukukola hama.—Rom. 8:38, 39.
18. Kutoñojoka hachakutalilahu chaYesu kwatukwashaña kwiladi?
18 Chatuleteshaña kumwimbujola Yesu. (1 Pet. 2:21) Mumafuku akutwala kuChanukishu, twatañaña muBayibolu nsañu yaYesu yahosha hamulungu wakukumishaku hanu hamaseki, hakufwa kwindi nihakusañuka kwindi. Nkumininaku namelela haChanukishu, mpanji yaChanukishu yatwanukishaña kukeña kwatukeñayi Yesu. (Efw. 5:2; 1 Yow. 3:16) Neyi tunakutaña nsañu yahosha hakudihana kwaYesu nikutoñojokahu twafwilaña “kutwalekahu kuhanda neyi chahandileñayi.”—1 Yow. 2:6.
19. Tunateli kushakama ñahi mukukeña kwaNzambi?
19 Twafwilaña kutwalekahu kushakama mukukeña kwaNzambi. (Yuda 20, 21) Twashakamaña mukukeña kwaNzambi kuhitila mukuzata hanakumini ñovu jetu nakumwovwahila, kujilika ijina dindi nikumutiyisha kuwaha. (Yish. 27:11; Mat. 6:9; 1 Yow. 5:3) Kwanakana Chanukishu kwatuleñelaña kushakama mukukeña kwaNzambi ifuku niifuku neyi kwiji tunakumuleja Yehova netu, ‘inakukeña kutwalekahu kushakama mukukeña kweyi haya nyaaka!’
20. Yumanyi yatuleteshaña kwikalaku haChanukishu?
20 Hela tukweti kuchiñeja kwakushakama haya nyaaka mwiwulu hela hamaseki, tukweti wunsahu wukuletesha twinzeña kuChanukishu. Chaaka nichaaka neyi tunapompi hamu hanidi ifuku, twanukaña kufwa kwamuntu itwakeña, Yesu Kristu. Chuma chabadika, twanukaña kukeña kwasweja kwatumwekesheleliyi Yehova hakutwinka Mwanindi kwikala ifutu danyiloña. Muchinu chaaka Chanukishu chakekalaku Hachitanu namelela April 15, 2022. Twamukeña Yehova niMwanindi, dichi hefuku dakwanuka kufwa kwaYesu, kwosi chuma chalema chinateli kutukañesha kwinza kuChanukishuku.
KAMINA 16 Mushimekenu Ya Hakutwinka Mwanindi niAwayishewa
^ para. 5 Chili twachiñejaña kushakama mwiwulu hela muparadisa hamaseki, twafwilaña chikupu kwanakana Chanukishu chaaka nichaaka. Achinu chibaaba, chikushimuna yuma yinashindameni haNsona yaleteshaña twanakaneña niyuma yayiwahi yafumañamu neyi twanakanaña Chanukishu.
^ para. 4 Neyi munakukeña nsañu yikwawu kutalisha hachitiyañenu chachiha nichitiyañenu chaWanta, talenu chibaaba chinakwila nawu “Mwakekala ‘Wanta Wawatupristu’” muKaposhi Kakutalila, kaOctober 15, 2014 mafu 13-15.
^ para. 4 MWATALISHA IDI IZU: Izu dakwila nawu awayishewa ashalahu dinatalishi kudi akwaKristu awayishewa amomi achidi hamaseki.
^ para. 10 Neyi munakukeña kwilukilaku nsañu yikwawu haniwu wuprofwetu watunyitondu tuyedi wekala haEzekeli kapetulu 37, talenu malwihu kufuma kudi antañi muKaposhi Kakutalila kaJuly 2016 paragilafu 11.