CHIBAABA CHAKUDIZA 2
Dizilenu Kudi Mwanyika aYesu
“Ami Yakoba, nduñu yaNzambi niyaMwanta Yesu Kristu.”—YAK. 1:1.
KAMINA 88 Nleji Njila Jeyi
NSAÑU YIDI MUCHIBAABA *
1. Mukulumbulula ñahi muchisaka mwavwalikilili Yakoba?
YAKOBA manakwaYesu wakulilili muchisaka chawantu adiña ashinshika kudi Yehova. * Anvwali jindi aYosefu naMariya adiña amukeña Yehova nankashi nawa azatileña hakumina ñovu jawu kulonda amukalakeli Nzambi. Yakoba wadiña nakukooleka kukwawu, yayindi wekalili Mesiya akaniniwu. Kwadiña hikukooleka chikupu Yakoba kwikala munichi chisaka!
Yakoba wamwilukili chiwahi yayindi Yesu, hadi yaaka yejima yashakaminiyi nindi (Talenu paragilafu 2)
2. Yumanyi yadi kumuletesha Yakoba kudizila kudi yayindi?
2 Kudi yuma yayivulu yadi kumuletesha Yakoba kudizila kudi yayindi. (Mat. 13:55) Chakutalilahu, Yesu hadiñayi nayaaka 12 welukili Nsona chikupu, chakwila wayihayamishili akulumpi adiña muYerusalema. (Luka 2:46, 47) Hadaha Yakoba wazatileña mudimu wakusoñasoña naYesu. Neyi wazatili nindi dikwila nawu wamwilukili chikupu yayindi. Kakavulu Nathan H. Knorr wahosheleña nindi, “Muntu wunateli kumwiluka chikupu neyi wuzata nindi.” * Yakoba wamweni Yesu “[chatwalekeliyi] kukula namaana nimuchiminu nawa amutiyileña kuwaha kudi Nzambi niantu.” (Luka 2:52) Muloña wachumichi hadaha tunateli kutachika kutoñojoka netu Yakoba wadiña hakachi kanana atumbanji twaYesu atachi. Ilaña dichi chichadiña wanyi.
3. Yakoba welili ñahi hampinji yatachikiliyi Yesu mudimu windi?
3 Hampinji yazatileñayi Yesu mudimu windi wahanu hamaseki, Yakoba hekalili kambanji kindiku. (Yow. 7:3-5) Dichi, hadaha Yakoba wadiña hakachi kawantaña jindi ahosheleña nawu Yesu “nazaluki.” (Maku 3:21) Nawa kwosi wunsahu wamwekeshaña nawu Yakoba wadiña namama yindi, Mariya, hampinji yamujahileñawu Yesu hamutondu wakuyandishila.—Yow. 19:25-27.
4. Yumanyi yitukuhanjekahu?
4 Chimwahitili mpinji, Yakoba wamukuhweleleli Yesu nawa wekalili mukulumpi alemesheliwu muchipompelu chawakwaKristu. Muchinu chibaaba, tukudiza yuma yiyedi yitunateli kudizila kudi Yakoba: (1) muloña waweni wutunateli kwikalila adizoza (2) nichitunateli kwikala antañishi amawahi.
IKALENUÑA ADIZOZA NEYI YAKOBA
Yesu chamwekeniyi kudi Yakoba, Yakoba wamukuhweleli Yesu nindi diyi Mesiya, hanyima yachu Yakoba wekalili kambanji kaKristu washinshika (Talenu maparagilafu 5-7)
5. Chumanyi cheliliyi Yakoba chelili Yesu yamwekani kudi yena hanyima yakusañuka?
5 Mpinjinyi Yakoba yekalili kambanji kaYesu? Chelili Yesu anamusañuli dehi, “wamwekeni kudi Yakoba, nikudi apostolu ejima.” (1 Kor. 15:7) Hanyima yakuna kubulakana Yakoba wekalili kambanji kaYesu. Wadiña hamu nawapostolu hampinji yahembeleleñawu spiritu yajila yayikaniniwu mukapeka kahewulu muYerusalema. (Yilw. 1:13, 14) Chimwahitili mpinji, Yakoba wekalili membala wamwizanvu dalombolaña dawakwaKristu akusambila. (Yilw. 15:6, 13-22; Ñal. 2:9) Nawa chimwahitili mpinji henohu chaaka cha 62 C.E., kanda chishiki, amoneneni kusonekela akwaKristu awayishewa mukanda. Iwu mukanda watukwashaña ninetu makonu, hela chakwila tukweti kuchiñeja kwakuya mwiwulu hela kwakushakama hamaseki. (Yak. 1:1) Kwesekeja namukwakushimuna nsañu wakunyaka wamumafuku awapostolu Josephus, washimwini nindi, Kapristu Muneni Ananiya Wakansi wahanini lushimbi nindi amujahi Yakoba. Yakoba wadiña washinshika kudi Yehova sampu nichafwiliyi.
6. Yakoba wambukiliku ñahi nawanlomboli amunsakililu adiñaku hayina mpinji?
6 Yakoba wadiña wadizoza. Tunahoshelidi netu wadiña wadizoza? Talenu chaambu chidi hachuma cheliliyi Yakoba nachuma cheliliwu anlomboli amunsakililu amavulu. Yakoba chamweniyi wunsahu wamwekesheleña nawu Yesu hiMwana kaNzambi, wetejeli. Ilaña akulumpi jawatupristu muYerusalema dicheliliwu wanyi. Chakutalilahu, elukili chikupu nawu Yesu wamusañwili Lazaru. Chatela eteji nawu Yesu amutemesheli kudi Yehova ilaña wena akeñeleña kumujaha yena niLazaru. (Yow. 11:53; 12:9-11) Chimwahitili mpinji chelili Yesu anamusañuli dehi, esekeli kuyisweka antu wunsahu. (Mat. 28:11-15) Chineli awa anlomboli ansakililu adiña adivwimba amukaanini Mesiya.
7. Muloñadi chitwatela kutondolwela kudivwimba?
7 Chuma chitunakudizilaku: Ikalenu adizoza kulonda ayidizisheña kudi Yehova. Chikatu chinateli kuletesha muchima wamuntu kubula kuzata chiwahi, kubula kudizoza nikwena kunateli kuletesha muntu kudikaña nawunlomboli waYehova. Afwarisi adiña adivwimba chakwila akaanini kwiteja wunsahu wamwekesheleña nawu Yesu wadiña naspiritu yaNzambi nawa wadiña Mwana kaNzambi. (Yow. 12:37-40) Kudivwimba kwawu kwatamini muloña kwayikañesheli kutambwila wumi wahaya nyaaka. (Mat. 23:13, 33) Dichi, chalema nankashi kutwalekahu kwiteja Izu daNzambi nispiritu yindi yiwumbi yilwilu yetu, yitoñojoka yetu nikutukwasha muyuma yitwafuukulaña! (Yak. 3:17) Chineli Yakoba wadiña wadizoza, wamwitejeli Yehova kulonda yamudizishi. Neyi chitukudiza, kudizoza dikwamukwashili kwikala ntañishi wamuwahi.
IKALENU ANTAÑISHI AMAWAHI NEYI CHADIÑAYI YAKOBA
8. Chumanyi chinateli kutukwasha kwikala antañishi amawahi?
8 Yakoba hatañili chikupu shikola yakumujimbaku. Chakadi nikujina, akulumpi ansakililu amumafuku indi amumweneña neyi chamweneñawu kapostolu Petulu niYowanu nawu, “adiña hohu neyi akwawu antu abulili kutaña.” (Yilw. 4:13) Ilaña Yakoba wekalili ntañishi wamuwahi, neyi chinamwekeshiwu neyi tutaña mukanda windi. Kufwana Yakoba, hadaha ninetu twataña nankashi wanyi. Hela chochu, nawukwashu waspiritu yaYehova niyuma yatudizishañawu mukuloñesha kwindi, ninetu tunateli kwikala antañishi amawahi. Ichi tuhanjekenu hachakutalilahu chatushililiyi Yakoba chakwikala ntañishi nawa tumonenu yuma yitunateli kudizilaku.
9. Munateli kulumbulula ñahi chatañishileñayi Yakoba?
9 Yakoba hazatishileña mazu akala hela kulumbulula munjila yakala kutiyishishaku. Nawa chafuminimu, antiyilili jindi elukili yuma yatela kwilawu nichakuyila. Chakutalilahu, toñojokenu Yakoba chadizishiliyi akwaKristu munjila yapela nindi atela kukabakana chakadi kuneña neyi anakuyila chatama. Wasonekeli nindi: “Antu anomiki twayimonaña netu akweti muzañalu. Enu munatiyi chomikiliyi Yoba nawa muneluki nkisu oju Yehova jamukiswililiyi, muneluki nenu Yehova wukweti wushona chikupu niluwi.” (Yak. 5:11) Neyi chitunamoni yuma yatañishileñayi Yakoba amanakwindi yashindameneneña haNsona. Wazatishili Izu daNzambi kulonda yakwashi antiyilili jindi kwiluka nawu Yehova wakiswilaña antu adi neyi Yoba, ashinshika kudi Nzambi. Yakoba wayidizishili ichi chikuma kuzatisha mazu apela nikulumbulula munjila yatiyakana. Dichi cheliliyi muniyi njila haditumbakesheleña yomweniku ilaña waleteli kalemesha hadi Yehova.
10. Njilanyi yimu mutunateli kumwimbujolila Yakoba neyi tunakudizisha?
10 Chuma chitunakudizilaku: Tañishenuña munjila yapela nawa yuma yimunakutañisha yifumishenuña Mwizu daNzambi. Neyi tunakudizisha antu hitwatela kudimwekeshaña netu tweluka yuma yayivuluku, ilaña twatela kuyidizishaña kulonda amwiluki Yehova nawu wayakamenaña. (Rom. 11:33) Hakwila twili mwenimu chiña yuma yejima yitunakuhosha yishindamenaña haNsona. Chakutalilahu, chatela tuyilejeña atudizi etu chuma chitwadi kwila neyi iyetu twadiña wena, ilaña twatela kuyikwasha kulonda atoñojokeña hadi antu ashimunawu muBayibolu nikwiluka Yehova chatoñojokañayi nawa nichatiyañayi. Chumichi chikuyikwasha kuzatisha yuma yinakudizawu kulonda amuzañalesheña Yehova, bayi etuku.
11. AkwaKristu amakwawu amumafuku aYakoba adiña nakukalanyi, nawa Yakoba wayifumbili nindidi? (Yakoba 5:13-15)
11 Yakoba welukili kukala kwamwekeneña. Mumukanda windi wasonekeliyi, Yakoba wamwekesheli nindi welukili kukala kwamweneñawu akwawu akakwitiya, nawa wayilejeli chatela kushindawu iku kukala. Chakutalilahu, akwaKristu amakwawu azatishileña swayi wanyi kufumba. (Yak. 1:22) Amakwawu alemesheleñaku antu aheta. (Yak. 2:1-3) Amakwawu niwena chayikalilileña kuyuula madimi awu. (Yak. 3:8-10) Awa akwaKristu adiña nakukala kweneni, ilaña Yakoba hazeyeli nakuyikwashaku. Wayifumbili munjila yayiwahi ilaña chakadi kuyihita mumbadi nawa wayikwashili awa antu kulomba wukwashu kudi akulumpi kulonda ahimpi yilwilu yawu.—Tañenu Yakoba 5:13-15.
12. Chumanyi chikuletesha tukuhweleli netu atudizi etu anateli kuhimpa neyi tuyikwasha?
12 Chuma chitunakudizilaku: Ilukenu nenu antu akweti kukala nawa ilukenu nenu anateli kuhimpa. Amavulu itwadizaña nawu Bayibolu chinateli kuyikalila kuzatisha kufumba kwekalamu. (Yak. 4:1-4) Hanateli kushimbula hakwila aleki yilwilu yawu yatama kulonda ekali nayilwilu yayiwahi yawakwaKristu. Kufwana Yakoba, ninetu twatela kwikala ahamuka kulonda tuleji atudizi etu hiyatela kuhimpawu. Twatela kukuhwelela cheñi netu Yehova wukukoka antu adizoza nawa wukuyinka ñovu yakuhimpa yilwilu yawu muchihandilu chawu.—Yak. 4:10.
13. Chumanyi chelukiliyi Yakoba, kwesekeja naYakoba 3:2 nitumazu twaheshina?
13 Yakoba hatoñojokeli nindi wabadika akwawuku. Yakoba hatoñojokeli nindi wadiña walema kubadika akwawu akwaKristuku, muloña wakwila wadiña manakwaYesu hela muloña wakwila wadiña nanyidimu yalema. Wayiteneni akwawu akwaKristu nindi, “enu amanakwami inakeña.” (Yak. 1:16, 19; 2:5) Hadimweneña kuloñaku. Ilaña wadibombelelimu mumazu ahosheliyi nindi: “Wejima wetu twaluwañeshaña kakavulu.”—Tañenu Yakoba 3:2 nitumazu twaheshina.
14. Muloñadi chitwatela kwitejela netu ninetu twaluwañeshaña?
14 Chuma chitunakudizilaku: Anukenu nenu wejima wetu tudi akwanshidi. Hitwatela kutoñojokaña netu hadaha twabadika antu itwadizishañaku. Muloñadi? Neyi tumuletesha kadizi wetu kutoñojoka nindi etu twawanina, wukuzeya, muloña wukutoñojokaña nindi hakutwesha kumwovwahila Nzambi chikupuku. Ilaña neyi twitejaña netu ninetu mpinji yejima chatukalilaña kwovwahila yishina yamuBayibolu nawa tumulumbulwila chinatukwashiyi Yehova kuumika kukala tukumukwasha kadizi wetu kwiluka nindi niyena nateli kumukalakela Yehova.
Yakutalilahu yaYakoba yadiña yapela, yaswayi kutiya nawa yashikileña antu hanyichima (Talenu maparagilafu 15-16) *
15. Munateli kulumbulula ñahi yakutalilahu yazatishileñayi Yakoba? (Yakoba 3:2-6, 10-12)
15 Yakoba wazatishileña yakutalilahu yashikileña hanyichima. Chakadi nikujina, spiritu yajila diyamukwashili, ilaña wadizili cheñi chakudizisha kuhitila mukudiza yakutalilahu yazatishileñayi yayindi Yesu. Yakutalilahu yazatishiliyi Yakoba mumukanda windi yapela, nawa yaswayi kutiya.—Tañenu Yakoba 3:2-6, 10-12.
16. Muloñadi chitwatela kuzatisha yakutalilahu yinateli kushika antu hanyichima?
16 Chuma chitunakudizilaku: Zatishenuña yakutalilahu yinateli kushika antu hanyichima. Neyi muzatishaña yakutalilahu yapela, antu akutiya chikuma nikufwikija yuma yimunakuyidizisha. Yuma yikufwikijawu yikuyikwasha antiyilili jenu kwanuka chikuma chalema chamuBayibolu. Yesu wadiña nkuluñaña chikupu mukuzatisha yakutalilahu yashikileña antu hanyichima nawa manakwindi Yakoba niyena wamwimbujoleli. Ichi tutalenu hayakutalilahu yazatishileña Yakoba nawa tutalenu chaletesheleña yishikeña antu hanyichima.
17. Muloñadi chakutalilahu chasonekawu haYakoba 1:22-25 chichinawahili?
17 Tañenu Yakoba 1:22-25. Chakutalilahu chazatishiliyi Yakoba chachibanjilu chachiwahi munjila jajivulu. Watañishileña chikuma chalema chakwila nawu neyi tunakukeña netu Izu daNzambi ditukwashi, chiña tuzatishaña yuma yitunakutaña bayi tukuminaña hohu dakutañaku. Yakoba watondeli chakutalilahu chaswayi kutiya antiyilili jindi chamuntu wunakuditala muchibanjilu. Chikumanyi chadizishileñayi? Chikwikala hiwusupi neyi muntu yaditala muchibanjilu nawa yamona nindi kudi hatela kuwahishayi ilaña kuwahishahu nehi. Munjila yoyimu, hiwusupi neyi tutaña Izu daNzambi nawa tumona netu hadi hitwatela kuzatila hakwila tuhimpi yilwilu yetu ilaña kuhimpa nehi.
18. Yumanyi yisatu yitwatela kwila neyi tunakuzatisha chakutalilahu?
18 Neyi munakuzatisha chakutalilahu, mwimbujolenu Yakoba kuhitila mukwila iyi yuma yisatu: (1) Chakutalilahu chimunakuzatisha chatela kwesekana nansañu yimunakuhanjekahu. (2) Zatishenu chakutalilahu chikutiyawu swayi. (3) Yikwashenu antu eluki chatela kuzatishawu ochu chakutalilahu. Neyi chayikalilaña kutoñojoka hayakutalilahu yimwatela kuzatisha, sandujolenu muWatch Tower Publications Index. Yenu hakamutu kanakuhosha nawu “Illustrations.” Hela chochu, ilukenu nenu yakutalilahu yidi neyi yihoshelu yinateli kutiyakesha chikuma chimunakuhoshahu. Zatishenu hohu chakutalilahu hayikuma yimunakukeña nenu antu adiziliku. Chuma chalema chitunakukeña hikuwahishaku ntañishilu yetu bayi kuditumbakeshaku, ilaña hikukwasha antu amavulu enzi muchisaka chaYehova chamuzañalu.
19. Twamwekeshaña ñahi netu twayikeña amanakwetu niahela?
19 Yakoba wadiña nayayindi wawanina ilaña etu tudana, hela chochu tukweti kukooleka kwakumukalakela Yehova nachikasa cheneni mudi amanakwetu akwaKristu. Twayimwekeshelaña kukeña chitwadikundaña nawu, chitwadizilaña kudi wena, kuzatila nawu hamu mumudimu wakushimwina nikutañisha. Dichi neyi tuzata nañovu kulonda tumwimbujoli Yakoba muyilwilu yetu, muyuma yitwelaña nichitwatañishaña tukuleta kalemesha hadi Yehova nawa tukukwasha antu amavulu adi nanyichima yashinshika kuswina kwakwihi naTata yetu wamwiwulu wukweti kukeña.
KAMINA 114 “Diwunjikenuña”
^ para. 5 Yakoba wakulilili muchisaka chimu naYesu. Yakoba wamwilukili chiwahi Mwana kaNzambi wawanina kubadika chamwilukiliwu antu adiñaku hayina mpinji. Muchinu chibaaba, tukuhanjeka yuma yitunateli kudizilaku kuchihandilu nintañishilu yamwanyika aYesu wadiña chishimi muchipompelu chawakwaKristu akusambila.
^ para. 1 Muchinu chibaaba, tukumutena Yakoba netu manakwaYesu. Wadiña manakwaYesu wakuwanamu nawa diyi wasonekeli mukanda waYakoba.
^ para. 2 Manakwetu Nathan H. Knorr wadiña membala waMwizanvu Dalombolaña. Wafwili mu 1977.
^ para. 61 KULUMBULULA MWEVULU: Yakoba wazatishili chakutalilahu chakesi chadiña chaswayi antu kutiya kulonda yalumbululi wubanji wekala mukuzatisha idimi chatama.