1-3. Kukalanyi kunateli kuyiletesha antu jaYehova kudila?

 MPINJINYI yakukumishaku yimwadililihu? Mpinji yikwawu, twawulumunaña madilu amuzañalu. Ilaña, kakavulu twadilaña muloña wachineñi. Chakutalilahu, twadilaña neyi tunafwishi muntu itwakeña. Lorilei muhela washakamaña kuUnited States, wasonekeli nindi: “Mpinji yikwawu, naneñeleña nankashi hamuloña wakufwisha mwanami wamumbanda nawa kwosi chuma chankundejeleñaku. Muniyi mpinji natoñojokeleña wanyi nami nikutwesha kuumika.” *

² Tunateli kudila muloña wayuma yikwawu. Hiromi, muhela payiniya wakuJapan, wahosheli nindi: “Mpinji yikwawu naneñaña muloña antu inashimwinaña akeñaña wanyi kutiyilila kunsañu yamuBayibolu. Mpinji yikwawu namulombaña Yehova iku inakudila nami yankwashi kuwana muntu wunakukeña kudiza chalala.”

³ Komana ninenu dichimwatiyaña? Etu amavulu dichitwatiyaña. (1 Pet. 5:9) Tunakukeña “kumukalakela Yehova nakuzañalala,” ilaña mpinji yikwawu twadilaña muloña wakwila muntu itwakeña nafwi, muloña wakwila tunazeyi, hela muloña wakwila tunakumona kukala kunakutuletesha chitukalileña kwikala ashinshika kudi Nzambi. (Mas. 6:6; 100:2) Tunateli kuumika ñahi neyi chakwila tunakumona kukala kwamuchidiwu?

4. Yuma yitukuhanjeka muchinu chibaaba?

⁴ Tunateli kudizila kudi Yesu. Mpinji yimu niyena wamweni kukala kwamuletesheli ‘yadili.’ (Yow. 11:35; Luka 19:41; 22:44; Heb. 5:7) Tuhanjekenu hayuma yamwekeni.  Chitukuhanjekaña tukumona yuma yitukudizilaku. Tukumona cheñi yuma yitunateli kwikala neyi tunakumona kukala kunakuletesha tudileña.

5. Chumanyi chitwadizilaña kudi Yesu hansañu yasonekawu haYowanu 11:32-36?

⁵ Mu 32 C.E., mumpinji yachishika Ibwambu daYesu Lazaru wakatili nawa wafwili. (Yow. 11:3, 14) Iwu iyala wadiña nawahela indi ayedi, Mariya naMata nawa Yesu wachikeñeli nankashi ichi chisaka. Awa ambanda aneñeli nankashi muloña manakwawu wafwili. Chelili Lazaru nafwi dehi, Yesu wayili kumukala waBetani, kwadiña nakushakama Mariya niMata. Mata chatiyiliyi nindi Yesu nakwinza, wayili swayi-swayi nakumukinkilila. Fwikijenu chineñi chatiyiliyi chelili yahoshi nindi: “Mwanta, neyi wadiña kunu, mutenowu manakwami hadi kufwaku.” (Yow. 11:21) Chimwahitili kapinji Yesu chelili yamumoni Mariya niantu amakwawu anakudila, “wadilili.”—Tañenu Yowanu 11:32-36.

6. Muloñadi Yesu chadililiyi?

⁶ Muloñadi Yesu chadililiyi haniyi mpinji? Insight on the Scriptures yakula nawu: “Kufwa kwebwambu dindi Lazaru nichineñi chatiyiliwu ahela jaLazaru dichuma chamuletesheli Yesu ‘kudishishimona nikudila.’” * Yesu hadaha watoñojokeleña hakukata kwatiyileñayi ibwambu dindi Lazaru hampinji yakatiliyi nikufwikija chatiyileñayi Lazaru chelukiliyi nindi hakufwa. Yesu wadilili cheñi hakumona Mariya niMata ananeñi nakufwa kwamanakwawu. Neyi mwafwishahu dehi ibwambu denu hela ntaña yenu, chakadi nikujina ninenu mwatiyahu dehi chamuchidiwu. Talenu yuma yisatu yimunateli kudizila kuniyi yuma yamwekeni.

7. Chumanyi chitunakudizila kudi Yehova kumadilu awulumwiniyi Yesu hamuloña webwambu dindi?

 ⁷ Yehova weluka chimwatiyaña. Yesu “diyi wamufwana chikupu” Tata yindi. (Heb. 1:3) Yesu chadililiyi wamwekesheli chatiyañayi Tata yindi neyi tunafwishi ntaña yetu. (Yow. 14:9) Neyi mwafwisha ntaña yenu ilukenu nenu Yehova weluka chineñi chimwatiyaña nawa wayakamenaña. Nakukeña kuyuuka.—Mas. 34:18; 147:3.

8. Chumanyi chikuletesha tukuhweleli chikupu netu Yesu wakasañula antaña jetu afwa dehi?

⁸ Yesu nakukeñesha kusañula antu imwakeña. Henohu kanda yadili, Yesu wamukolesheli Mata nindi: “Manakweyi wukusañuka.” Mata wamukuhweleleli Yesu. (Yow. 11:23-27) Chineli Mata wadifukwileña kudi Yehova welukili nindi awa atuprofwetu Elija niElisha asañwili antu kunyima. (1 Any. 17:17-24; 2 Any. 4:32-37) Nawa hadaha watela watiyili cheñi nindi Yesu wasañwilihu antu. (Luka 7:11-15; 8:41, 42, 49-56) Ninenu mwatela kukuhwelela chikupu nenu mwakayimona cheñi antu imwakeña afwa dehi. Madilu awulumwiniyi Yesu kulonda yakundeji amabwambu jindi aneñeli, hichinjikijilu chamwekeshaña nawu wafwilaña chikupu kusañula antu!

9. Kufwana Yesu, munateli kukwasha ñahi antu anakuneña? Shimunenu chakutalilahu.

⁹ Munateli kukwasha antu ananeñi. Yesu hakuminini hohu dakudilila hamu naMata niMariyaku, ilaña wayitiyilili nikuyikolesha. Tunateli kwila chuma chochimu kudi antu ananeñi. Dan, mukulumpi washakamaña Australia, wahosheli: “Chafwili ñodami, nakeñeleña muntu wakunkwasha. Amanakwetu amavulu niañodijawu enjileña mpinji yejima nakuntiyilila. Awundili nakutiyilila chinalumbulwileña nawa hiyatiyili nsonyi nanochu chinadilileñaku. Ankwashili cheñi muyuma yidi neyi kukosa motoka yami, kunlandilaku yuma nikuntelekelaku yakuda neyi chakwila nakañanyi kuzata iyi nyidimu. Kakavulu alombeleña hamu nanami. Amwekesheli nawu hiyamabwambu alala ‘amanakwamuntu avwalikila mumpinji yakala.’”—Yish. 17:17.

10. Yumanyi yashimunawu haLuka 19:36-40?

¹⁰ Yesu washikili kuYerusalema haNisani 9, 33 C.E. chashikiliyi kwakwihi namusumba, antu apompeli nakutachika kumwalila yakuvwala yawu yahewulu mumukwakwa kulonda amwiteji neyi Mwanta wawu. Chalala iyi yadiña mpinji yamuzañalu. (Tañenu Luka 19:36-40.) Dichi atumbanji twindi, hiyakuhweleleli kumona chuma chahiñilihuku. “Chashikiliyi [Yesu] kwakwihi, wamweni musumba nawa wawudililili.” Iku wudi namadilu mumesu, Yesu wahosheli yuma yakala yenjileña nakuyimwekena antu ashakamineña muYerusalema.—Luka 19:41-44.

11. Muloñadi Yesu chayidililiyi antu ashakamineña muYerusalema?

¹¹ Chamukatili Yesu kumuchima muloña welukili nindi hela chakwila amutambwilili namuzañalu, aYudeya amavulu akutambwila nsañu yaWanta wanyi. Chikufumamu, Yerusalema akumujilumuna nawa kaYudeya wejima wukupuluka hampinji yakujilumuna musumba akumutwala muwunkoli. (Luka 21:20-24) Chawushona, neyi chahosheliyi Yesu, antu amavulu amukaanini. Indi antu kwiluña kumwashakamaña elaña ñahi nansañu yaWanta? Neyi antu antesha  diwu etejaña kuyishimwina chalala, chumanyi chimunateli kudizilaku chadililiyi Yesu? Talenu yuma yisatu yikwawu yitukudizilaku.

12. China chayidililiyi Yesu antuñinindi chatudizishañadi kutalisha hadi Yehova?

¹² Yehova wayakamenaña antu. Chadililiyi Yesu chatwanukishaña ochu Yehova chakamenañayi antu. “Hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Makonu, twamwekeshaña netu twayikeña antu kuhitila mukutwalekahu kuyishimwina kulonda tuyikwashi adizi nsañu yayiwahi yaWanta.—Mat. 22:39. *

13-14. Yesu wayitiyilileña ñahi antu wushona, nawa tunateli kumwimbujola ñahi?

¹³ Yesu wadikitileña nankashi mumudimu wakushimwina. Wamwekesheli nindi wayikeña antu kuhitila mukushimwina hejima hanateleli. (Luka 19:47, 48) Chumanyi chamusañumwineña kuyishimwina? Yesu wayitiyilileña wushona. Mpinji yikwawu antu amavulu akeñeleña kutiyilila kudi Yesu chakwila yena niatumbanji “akañenyi nikuda yakuda.” (Maku 3:20) Chelili iyala wumu yakeñi kuhanjika nindi mpinji yawufuku, Yesu wetejeli kuhanjeka nindi. (Yow. 3:1, 2) Antu amavulu asambilili kutiyilila kunsañu yaYesu, hiyekalili atumbanji twindiku. Ilaña antu ejima amutiyilili etejeli. Makonu tunakukeña kulejaku antu ejima nsañu yayiwahi. (Yilw. 10:42) Hakwila tuyishimwini, twatela kuhimpa njila yitwashimwinañamu.

¹⁴ Himpenuña neyi chinatwesheki. Neyi tushimwinaña mpinji yoyimu hitunateli kuwana antu anakukeña kutiyilila kunsañu yayiwahiku. Muhela payiniya wejina daMatilda wahosheli nindi: “Ami ninfumwami twayendelaña antu mpinji jamboka-mboka. Nampinji yantetemena, twashimwinaña mumaluña mwakulandishila. Hachayili neyi antu amavulu anakwenda munjila, twashimwinaña hangolofwana. Kuhiñahu nampinji yamelela, twayendelaña antu hamatala awu nakuyishimwina.” Bayi tushimwinaña  hohu mpinji yitunakeñiku, ilaña twatela kuhimpaña ndandanda yetu kulonda tuyishimwineña antu hampinji yitwatela kuyiwana. Chitwela mwenimu, Yehova wukutiya kuwaha.

15. Chumanyi chamwekeni hawufuku wakukumishaku muchihandilu chaYesu neyi chinasonekiwu haLuka 22:39-44?

¹⁵ Namelela haNisani 14, 33 C.E., Yesu wayili mwitempa daÑesemani. Kweniku, walombeli kudi Yehova. (Tañenu Luka 22:39-44.) Iyi mpinji yadiña yakala chikupu chakwila Yesu “walombeleña kulomba kwakulembelela . . . iku nakudila chikupu nimadilu.” (Heb. 5:7) Yesu walombeli chumanyi haniyi mpinji yakukumishaku henohu kanda yafwi? Walombeli nindi atwalekihu kwikala washinshika kudi Yehova nikwila nkeñelu yindi. Yehova watiyili iku kulomba kwaMwanindi kwakukufuma hamuchima nawa watemesheli kañelu kulonda kamukoleshi.

16. Muloñadi Yesu chadiña chakameneniyi hampinji yalombeleñayi mwitempa daÑesimani?

¹⁶ Chakadi nikujina, Yesu wadilili iku nakulomba mwitempa daÑesimani muloña antu amumweneña nawu walemesheleña wanyi ijina daNzambi. Cheñi welukili chichalemena kudi yena kwikala washinshika nikujilika ijina daTata yindi. Neyi munakuhita mukweseka kunakweseka kashinshi kenu kakwikala washinshika kudi Yehova, chumanyi chimunateli kudizilaku kudi Yesu nanochu chadililiyi? Talenu yikuma yisatu yikwawu yitukudizilaku.

17. Chumanyi chitunakudizila kudi Yehova chakwiliyi kulomba kwaYesu?

¹⁷ Yehova watiyaña kulomba kwenu kwakulemba. Yehova watiyili kulomba kwaYesu kwakufuma hamuchima. Muloñadi? Muloña chuma cheneni chakamineñayi Yesu hikwikala washinshika kudi Tata yindi nikujilika ijina Dindi. Neyi chuma chacheni chatwakamishaña hikutwalekahu kwikala ashinshika kudi Yehova nikujilika ijina dindi, wukwakula kulomba kwetu.—Mas. 145:18, 19.

18. Munjilanyi munekalili Yesu ibwambu wukweti luwi?

 ¹⁸ Yesu weluka chimwatiyaña. Neyi tunakwakama twatela kuzañalala hakwiluka netu tukweti ibwambu detu weluka chitwatiyaña. Ibwambu yeniwu hiYesu. Weluka chichatiyakanaña neyi muntu nazeyi nawa nakukeña kumukwasha. Weluka kuzeyazeya kwetu nawa wukutukwasha “hampinji yatelela.” (Heb. 4:15, 16) Neyi chetejeliyi Yesu kumukwasha kudi kañelu mwitempa daÑesimani, ninetu twatela kwiteja wukwashu wunakufuma kudi Yehova kuhitila munyikanda, vidiyo, mumpanji, hela anenzi nakutukolesha kudi akulumpi hela ibwambu detu wapama.

19. Munateli kwikala ñahi cheñi nañovu neyi munakumona kukala kunakweseka kashinshi kenu mudi Nzambi? Hanenu chakutalilahu.

¹⁹ Yehova wukuyinka “kuwunda kwaNzambi.” Yehova wukutukolesha ñahi? Neyi tulomba, tukwikala “[na]kuwunda kwaNzambi kwabadika kwiluka kwejima.” (Fwili. 4:6, 7) Kuwunda kwahanañayi Yehova kwawundishaña muchima wetu nawa kwatukwashaña kwikala nayitoñojoka yayiwahi. Talenu chuma chamumwekeneni muhela Luz. Wahosheli nindi: “Kakavulu natiyaña wuudi. Nawa natoñojokaña nami Yehova wankeña wanyi. Ilaña neyi natachiki kutiya wuudi namulejañamu Yehova chinakutiya. Kulomba kwankwashaña chikupu.” Chuma chamumwekeneni chinakumwekesha nawu tunateli kwikala nakuwunda neyi tulombaña.

20. Yumanyi yitunadizili kumadilu aYesu?

²⁰ Yesu chadililiyi chinakutundeja nikutudizisha yuma yayivulu yikutukwasha! Anatwanukishi nawu twatela kuyikwasha amabwambu jetu anakuneña nikukuhwelela netu Yehova niYesu akutukwasha neyi tufwisha ntaña yetu itwakeña. Anatusañumuni kushimwina nikutañisha nawushona muloña Yehova Nzambi niYesu Kristu akweti wushona. Nawa chatukundejaña hakwiluka netu Yehova niMwanindi akeñayi eluka chitwatiyaña, eluka kuzeyazeya kwetu nawa akutukwasha kuumika. Tutwalekihu kuzatisha yuma yitunadizi kushika niifuku dakashikijayi Yehova chikaninu chindi chinakuhosha nawu “wakakombola madilu ejima kumesu [etu].”—Chim. 21:4.