Chibaba Chakudiza 5
“Zatishenuña Chiwahi Mpinji Yenu”
“Ilukenu chimwendaña, bayi mwendeña neyi antu abula maanaku, ilaña neyi akwamaana, zatishenuña chiwahi mpinji yenu.”—EFWE. 5:15, 16.
KAMINA 8 Yehova hiChiswamu Chetu
NSAÑU YIDI MUCHIBABA *
1. Tunateli kwikala ñahi nampinji yakuhanjeka naYehova?
TWATIYAÑA kuwaha kuhanjeka nawantu itwakeña. Adisumbula atiyaña kuwaha kwikala nampinji yakuhanjeka kwiluña damwena. Atwansi atiyaña kuwaha kuhema nawamabwambu jawu. Wejima wetu twatiyaña kuwaha kuhanjeka nawakwetu akwakwitiya. Chuma chasweja kubadika twatiyaña kuwaha kwikala nampinji yakuhanjeka naNzambi yetu. Tunateli kuhanjika nindi kuhitila mukwikala nampinji yakulomba, kutaña Izu dindi nikutoñojoka hayuma yakeñañayi niyilwilu yindi. Mpinji yitwahanjekaña naYehova yalema nankashi.—Mas. 139:17.
2. Kukalanyi kutwamonaña?
2 Hela chakwila twatiyaña kuwaha kulomba nikudiza Bayibolu, chapela wanyi. Twakasikaña nankashi nanyidimu chakwila chatukalilaña kwikala nampinji yakudifukula kudi Yehova. Mudimu wakumujimba, kwakamena chisaka niyuma yikwawu yinateli kutudiila mpinji chakwila tunateli kutoñojoka netu tukutwesha wanyi kwikala nampinji yakulomba, kudiza nikutoñojokahu chikupu.
3. Chumanyi chikwawu chinateli kutukisila mpinji?
3 Kudi cheñi yuma yikwawu yinateli kutudiila mpinji. Neyi kubabala nehi, tunateli kwilaña yuma yinakumwekana neyi yatama wanyi yikutudiila mpinji yitwatela kuzatisha kukoleshelamu wubwambu wetu naYehova. Chakutalilahu, chalema nankashi kwikala nampinji yakunooka hela kwila yuma yakumanishilamu wuudi. Ilaña neyi tuzatishaña mpinji yeneni kuniyi yuma, hitukwikalaña nampinji yakudifukwilamu kudi Yehovaku. Twatela kwiluka mpinji yakwililamu yuma yakumanishilamu wuudi.—Yish. 25:27; 1 Tim. 4:8.
4. Yumanyi yitukutachika kuhanjekahu?
4 Muchinu chibaaba, tukuhanjeka muloña waweni wutwatela kufukwila yuma yalema muchihandilu chetu. Tukuhanjeka cheñi chitwatela kuzatishaña chiwahi mpinji yetu kudifukwilamu kudi Yehova niyuma yayiwahi yikufumamu neyi tuzatishaña chiwahi mpinji.
FUUKULENUÑA CHIWAHI; ILENUÑA YUMA YALEMA
5. Indi kutoñojoka hakufumba kwekala haAEfwesesa 5:15-17 kunateli kumukwasha ñahi kansi kutonda yuma yayiwahi yatela kwilayi muchihandilu chindi?
5 Fuukulenuña yuma yalema muchihandilu chenu. Kakavulu atwansi akamenaña yuma yakelawu muchihandilu chawu. Mpinji yikwawu antañishi niantaña abula kwikala aYinsahu jaYehova ayilejaña kuya kumashikola amaneni kulonda akeñili mudimu wamali. Kuya kuniyi shikola kunateli kuda mpinji yeneni. Kwambukaku, anvwali niamabwambu jawu muchipompelu ayilejaña atwansi kumukalakela Yehova muchihandilu chawu. Chumanyi chinateli kumukwasha kansi wamukeña Yehova kufuukula chiwahi? Chuma chikumukwasha hikutaña nikutoñojoka AEfwesesa 5:15-17. (Tañenu.) Neyi natañi dehi awa mavasi, nateli kudihula nindi: “Chumanyi ‘chinakukeñayi Yehova’? Nukumutiyisha ñahi kuwaha? Nukwila ñahi hakwila nizatishi chiwahi mpinji yami?” Ilukenu nenu “anu mafuku anatami” nawa kaayi kanakuyuulawu kudi Satana keña kakumi. Chikuwaha neyi tukuzatishaña mpinji yetu kwililamu yuma yamuzañaleshaña Yehova.
6. Chumanyi chatondeliyi Mariya, nawa chawahililidi?
6 Ilenuña yuma yalema. Mpinji yikwawu, mukuzatisha chiwahi mpinji yetu mwabombela kufuukulahu kwila chuma chimu hayuma yiyedi yayiwahi. Nsañu yitweluka yayendeleliyi Yesu aMariya naMata yinalumbululi ichi chikuma. Chakadi nikujina, Mata watiyili kuwaha chayihempwiluwu kudi Yesu nawa waloñesheli yakuda yayivulu. Ilaña hampinji yaloñesheleñayi, muhelindi Mariya washakamini kwakwihi naYesu nakutiyilila chatañishileñayi. Chuma chelili Mata chatama wanyi, ilaña Yesu wahosheli nindi Mariya “natondihu chuma chachiwahi.” (Luka 10:38-42) Mukuhita kwampinji, hadaha Mariya wavulamenenumu yakuda yaloñesheliwu, Ilaña nsañu yadiziliyi kudi Yesu wayivulameneni wanyi. Neyi chochalemesheliyi Mariya mpinji yadiñayi naYesu, ninetu twalemesha mpinji yitwahanjekaña naYehova. Tunateli kuzatisha ñahi mpinji yetu chiwahi?
ZATISHENUÑA MPINJI YENU CHIWAHI KUDIFUKWILAMU KUDI YEHOVA
7. Chalemenadi kulomba, kudiza nikutoñojokahu chikupu?
7 Ilukenu nenu mukudifukula kwetu mwabombela kulomba, kudiza nikutoñojokahu chikupu. Neyi tunakulomba dikwila nawu tunakuhanjeka naTata yetu wekala mwiwulu watukeña nankashi. (Mas. 5:7) Neyi tunakudiza Bayibolu ‘twamwilukaña Nzambi’ Nsulu yamaana ejima. (Yish. 2:1-5) Neyi tunakutoñojoka chikupu hayuma yitunakudiza hadi Yehova dikwila nawu tunakutoñojoka hayilwilu yindi nikwanuka yuma yayiwahi yinakukeñayi kuyililayi antu, iyi diyi njila yakuzatishilamu mpinji yetu chiwahi. Hanu dinu chumanyi chinateli kutukwasha kuzatisha mpinji yetu chiwahi?
Kwila mukeñaku kwiluña kwamwena kulonda mudizileñaku nkawenu nehi? (Talenu maparagilafu 8-9)
8. Chumanyi chitunateli kudizila kudi Yesu chazatishiliyi mpinji chiwahi hadiñayi muchinkalampata?
8 Neyi chinatwesheki keñenu iluña dawunda. Talenu chakutalilahu chaYesu. Henohu kanda yatachiki mudimu windi wahamaseki, washakamini mafuku 40 muchinkalampata. (Luka 4:1, 2) Kunidi iluña dawunda, Yesu walombeleña kudi Yehova nikutoñojoka hachuma chakeñeleñayi nindi yeli. Chumichi chamukwashili Yesu kudiloñesha nakweseka kwadi kumonayi kumbidi. Munateli kumwimbujola ñahi Yesu? Neyi mwekala muchisaka mudi antu amavulu, hadaha chinateli kuyikalila kuwana iluña damwena hetala. Neyi dikukala kumukweti, munateli kuya kwiluña dacheñi. Dichuma chelañayi Julie neyi nakukeña kulomba kudi Yehova. Yena ninfumwindi ashakamaña mukaditala kanyanya kuFrance, chakwila wakañanyaña kuwana mpinji yakwikala nkawindi yakwililamu yuma yakuspiritu. Julie wahosheli nindi: “Ifuku nifuku nayaña kwiluña damwena kunekalaña nkawami, kweniku kwosi chuma chanluwañeshaña nawa nahanjekaña naYehova mukulomba.
9. Yesu wamwekesheli ñahi nindi walemesheli wubwambu windi naYehova hela chakwila wadiña nanyidimu yayivulu?
9 Yesu wadiña nanyidimu yayivulu muchihandilu chindi. Hampinji yazatileñayi mudimu windi wahamaseki, amulondeleleña kudi mazaza awantu kwejima kwayileñayi. Nawa ejima wawu akeñeleña nawu yayikwashi. Mpinji yimu, “antu ejima amumusumba apompeli hachiisu” nawu amumoni. Hela chochu, Yesu wadiña nampinji yakukoleshelamu wubwambu windi naYehova. Hankunku yakucha, wayili kwakankawindi nakuhanjeka naTata yindi.—Maku 1:32-35.
10-11. Kwesekeja naMatewu 26:40, 41, Yesu wayifumbili ñahi apostolu indi mwitempa daÑesemani, nawa chumanyi chamwekeni?
10 Hefuku dakukumishaku muchihandilu chindi chahamaseki, chamanineña mudimu windi, Yesu wayili cheñi nakukeña iluña damwena nakulomba nikutoñojoka chikupu. Nawa iluña denidi wadiwanini mwitempa daÑesemani. (Mat. 26:36) Haniyi mpinji, Yesu wayilejeli atumbanji twindi chuma chalema kutalisha hakulomba.
11 Talenu chuma chamwekeni. Mpinji yashikiliwu mwitempa daÑesemani, kwadiña kweyila dehi, hadaha mukachi kawufuku. Yesu wayilejeli apostolu indi nindi “tonenuña” nawa wayili nakulomba. (Mat. 26:37-39) Ilaña hampinji yalombeleñayi, wena akupukilili mutulu. Chayiwaniniyi anakaami, Yesu wayilejeli nindi “tonenuña nawa lombenuña.” (Tañenu Matewu 26:40, 41.) Welukili nindi anazeyi. Muloña wakuyitiyila wushona, Yesu welukili nindi “mujimba wunazeyi.” Hela chochu, Yesu wayili cheñi mapampa kayedi nakulomba ilaña chafuntiliyi wayiwanini atumbanji twindi anakaami cheñi chatela alombeña.—Mat. 26:42-45.
Ikalenuñaku nampinji yakulomba henohu muchidi nañovu? (Talenu paragilafu 12)
12. Tunateli kwila ñahi neyi twazeyaña chakwila twakañanyaña nikulomba?
12 Tondenu mpinji yatelela. Mpinji yikwawu tunateli kuzeya chakwila tukañanya nikulomba. Neyi chayimwekenahu dehi himudi nkawenuku. Munateli kwila ñahi? Antu amakwawu alombeleña kudi Yehova hakumana kwefuku awana nawu chayikwashañaku kwikala nampinji yakulomba nampinji yamelela mpinji yabulañawu kuzeya nankashi. Antu amakwawu anawani nawu neyi afukama hela ashakama alombaña chiwahi kudi Yehova. Hanu dinu, chumanyi chimunateli kwila neyi mwakamenaña hela kujinooka hakulomba? Mulejenumu Yehova chimunakutiya. Ilukenu chikupu nenu, Tata yetu wukweti luwi wukuyitiya.
Kwila muleka kwakula mameseji nimaemelu anakuyitemeshelawu hampinji yakupompa nehi? (Talenu maparagilafu 13-14)
13. Yozelu yinateli kutuluwañesha ñahi neyi tunakulomba, kudiza hela neyi tunakupompa?
13 Tondolwelenu yuma yinateli kuyiluwañesha neyi munakudiza. Kulomba hidiyi njila yimu hohu mutunateli kukoleshela wubwambu wetu naYehovaku. Kudiza Izu daNzambi nikuya nakupompa nikwena kunateli kutukwasha kuswina kwakwihi naNzambi. Munateli kuzatisha ñahi mpinji chiwahi hampinji yimunakudiza nihimunakupompa? Dihulenu nenu, ‘Chumanyi chanluwañeshaña neyi inakupompa hela neyi inakudiza?’ Himafoni tahindi, maemelu, mameseji tahindi yozelu yikwawu? Makonu antu amavulu akweti iyi yozelu. Akwakusandujola ahoshaña nawu neyi tunakukeña kusha maana hachuma chimu ilaña twikala nafoni kukamwihi, yinateli kutuluwañesha. Nkuluñaña wumu wahosheli nindi, “Wukusha maana wanyi kuyuma yiwunakwila, yitoñojoka yeyi yikwikala kwacheñi.” Henohu kupompa kwanyanya nikwamaneni kanda kutachiki, kakavulu atulejaña kuchuna yozelu yetu kulonda yibuleña kuluwañesha akwetu. Twatela kwila chuma chochimu neyi tudi kwankawetu kulonda yozelu yetu yibuleña kutuluwañesha neyi tunakuhanjeka naYehova.
14. Kwesekeja naAFwilipi 4:6, 7, Yehova nateli kutukwasha ñahi kushaku muchima?
14 Mulombenu Yehova yayikwashi kushaku muchima. Neyi mumona nenu munatachiki kutoñojoka hayuma yacheñi hampinji yimunakudiza hela kupompa, mulombenu Yehova kulonda yayikwashi. Chekalaña chakala kuleka kutoñojoka hachuma chinakuyakamisha nakusha muchima hakudiza, ilaña chalema kushaku muchima. Lombenu ayinki kuwunda kukuhemba muchima wenu “niyitoñojoka yenu.”—Tañenu AFwilipi 4:6, 7.
MUKUHANJEKA NAYEHOVA MWAFUMAÑA YUMA YAYIWAHI
15. Yumanyi yayiwahi yafumaña mukuhanjeka naYehova?
15 Neyi mwikala nampinji yakuhosha naYehova, kumutiyilila nikutoñojoka hadi yena, mukufuma yuma yayiwahi. Chumanyi chikufumamu? Chatachi, mukufukulaña chiwahi. Bayibolu yatulejaña nawu ‘muntu wendaña nawakwamana niyena wakekala mukwamaana.’ (Yish. 13:20) Neyi muhanjekaña naNsulu yamaana, Yehova, mukwikala namaana. Mukwiluka chakumutiyisha kuwaha nichakutondolwela yuma yamuneñeshaña.
16. Kwikala nampinji yakuhanjeka naYehova kwatukwashaña ñahi kwikala antañishi amawahi?
16 Chamuchiyedi, mukwikala ntañishi wamuwahi. Neyi tunakudiza Bayibolu namuntu, chuma chalema chitwafwilaña hikumukwasha yaswini kwakwihi naYehova. Neyi twikala nampinji yakuhanjeka naTata yetu wamwiwulu kukeña kutwamukeña kukuswejelaku nawa tukuyikwasha atudizi etu kulonda amukeñi. Toñojokenu hachuma cheliliyi Yesu. Wamuhamekeli Yehova munjila yakukeña nawa ichi chuma chayiletesheli atumbanji twindi kumukeña Yehova.—Yow. 17:25, 26.
17. Kulomba nikudiza Bayibolu kwatukwashaña ñahi kukolesha chikuhwelelu chetu?
17 Chamuchisatu, chikuhwelelu chenu chikukola. Talenu chuma chamwekanaña neyi mumulomba Yehova nenu yayilomboleña, kuyikundeja nawa nenu yayikwashi. Mpinji yejima yakulañayi Yehova kulomba kwenu, chikuhwelelu mudi yena chakolaña. (1 Yow. 5:15) Chumanyi chikwawu chikuyikwasha kukolesha chikuhwelelu chenu? Kudiza nkawenu. Anukenu nenu, ‘muntu wekalaña nachikuhwelelu neyi natiyi mazu.’ (Rom. 10:17) Hela chochu, kubombela hakudiza, kudi chuma chikwawu chitwatela kwila hakwila twikali nachikuhwelelu chakola. Chumanyi chenichi?
18. Muloñadi chitwatela kutoñojokelaña chikupu? Lumbululenu.
18 Twatela kutoñojokaña chikupu hayuma yitunakudiza. Talenu chuma chamumwekeneni nsoneki yaMasamu 77. Waneñeli muloña watoñojokeleña nindi yena niakwawu aIsarela ajimbesheli wubwambu wawu naYehova. Muloña waniyi yitoñojoka, hakamineñaku. (Mavasi 2-8) Chumanyi cheliliyi? Wamulejeli Yehova nindi: “Nukutoñojoka chachiwahi nimwaya mudimu weyi wejima nukushinshika mumuchima wami, muwelaña eyi.” (Vasi 12) Hela chochu, welukili yuma yayililiyi Yehova antu jindi kunyima ilaña wadiña nakwakama, nindi: “Nzambi navulameni dehi kwanakena, tahindi? Chanazuwiyi najiki dehi wushona windi, tahindi?” (Vasi 9) Ñimbi yamasamu watoñojokeli hanyidimu yaYehova nawa nindi Nzambi wayitiyilili luwi niwushona kunyima. (Vasi 11) Chumanyi chafuminimu? Ñimbi yamasamu wakuhweleleli chikupu nindi Yehova hakushiya antu jindiku. (Vasi 15) Munjila yoyimu, ninenu chikuhwelelu chenu chikukolelaku neyi mutoñojoka chikupu hayuma yayililayi Yehova antu jindi niyinayililiyi enu halwenu.
19. Chumanyi chikwawu chikufumamu neyi twikala nampinji yakuhanjeka naYehova?
19 Chamuchiwana, chuma chasweja kulema, mukusweja kumukeña Yehova chikupu. Kukeña hichilwilu chabadika yilwilu yikwawu, kukuyikwasha kumwovwahila Yehova, kudihana kulonda mumutiyisheña kuwaha nikuumika kweseka kudi kwejima. (Mat. 22:37-39; 1 Kor. 13:4, 7; 1 Yow. 5:3) Kwosi chuma chalema kubadika kwikala nawubwambu wakola naYehova!—Mas. 63:1-8.
20. Munateli kwikala ñahi nampinji yakulomba, kupompa, kudiza nikutoñojokahu chikupu?
20 Ilukenu nenu kulomba, kudiza nikutoñojokahu chikupu hikudifukula kudi Yehova. Kufwana Yesu, keñenuña iluña kwamwena kulonda muhanjekeleñaku naYehova. Tondolwelenuña yuma yinateli kuyiluwañesha. Mulombenuña Yehova yayikwashi kushaku muchima neyi munakwila yuma yakukoleshelamu wubwambu wenu nayena. Neyi muzatishaña mpinji yenu chiwahi chayinu mpinji, Yehova wukuyikiswila wumi wahaya nyaaka mwituña daNzambi dadiha.—Maku 4:24.
KAMINA 28 Kwikala Ibwambu daYehova
^ para. 5 Yehova hibwambu detu wamuwahi. Twalemesha wubwambu wutukweti nayena nawa tunakukeña kumwiluka chikupu. Hahitaña mpinji hakwila nawu tumwiluki chiwahi muntu, munjila yoyimu chakeñekaña mpinji hakwila nawu twikali nawubwambu wawuwahi naYehova. Chineli twakasika nayuma yayivulu yakwila muchihandilu chetu, hanu dinu tunateli kuwana kudihi mpinji yakuswina kwakwihi naTata yetu wamwiwulu nawa chawahiladi kuswina kwakwihi naYehova?