1-2. (a) Muloñadi chitwabulilaña kuhayama hakukala kutwahitañamu? (b) Yumanyi yitukuhanjekahu muchinu chibaaba?

 ETU antu jaYehova chatuhayamishaña wanyi neyi tunakuhita mukukala. Tweluka netu Bayibolu yahoshaña nawu, “hakwila twakeñili muWanta waNzambi twatela kuhita muyihuñu yayivulu.” (Yilw. 14:22) Tweluka cheñi netu kukala kukwawu kutunakuhitamu kwakamana hohu neyi tunatachiki kushakama mwituña daNzambi dadiha, mwakabula ‘kufwa, kudishona hela kuneña.’—Chim. 21:4.

² Yehova hakañeshaña kukala kubuli kutumwekenaku. Ilaña watukwashaña kuumika. Talenu kapostolu Pawulu chalejeliyi akaKristu ashakamineña muRoma. Wasambilili kuchinda kukala kwamweneñayi yena niamanakwindi. Kuhiñahu wasonekeli nindi: “Tunakwimika mushindu chikupu kuhitila mudi yena watukeñeli.” (Rom. 8:35-37) Chumichi chinatalishi mukwila nawu Yehova nateli kuyikwasha kuumika hela chakwila muchidi muniku kukala. Tutalenu Yehova chamukwashiliyi Yosefu nichinateli kuyikwashayi ninenu.

3. Chihandilu chaYosefu chashikeneni kuhimpa ñahi?

³ Nkakulula Yakoba wamwekesheli hatooka nindi wamukeñeli mwanindi Yosefu nankashi. (Kutach. 37:3, 4) Chafuminimu, anyana kaYakoba awakulumpi atachikili kumutiyila manakwawu ichima. Chekaliliwu nampinji yakumwila  chuma chatama, amulandishili Yosefu kudi mukanka wawakakulanda nakulandulula wawaMidiyani. Ana akakulanda nakulandulula amusendeli Yosefu nakumutwala kuEjipitu kwakulehi, kwamulandishiliwu cheñi. Haniyi mpinji amulandishili kudi Potifwari, mukulumpi wawatulama twaFwaru. Chihandilu chaYosefu chashikeneni kuhimpa, mwana adiña akeñawu nankashi kudi tata yindi ichi wadiña nduñu wakehelamu nankashi wamwini Ejipitu.—Kutach. 39:1.

4. Yumanyi yinateli kutumwekena yadifwanaku nakukala kwamweniyi Yosefu?

⁴ Bayibolu yahosha nawu “yuma yatama yayimwekenaña antu ejima.” (Mukwa. 9:11, Holy Bible—Easy-to-Read Version) Mpinji yikwawu twamonaña kukala ‘kwamonañawu antu ejima,’ dikwila nawu, kweseka kwahitañamu antu ejima. (1 Kor. 10:13) Hadaha tunateli kukabakana muloña wakwila tudi atumbanji twaYesu. Chakutalilahu, hadaha anateli kutuseha, kutudimbulula indi kwiji kutukabisha muloña wayuma yitwakuhwelela. (2 Tim. 3:12) Yehova nateli kuyikwasha kuumika kukala kwejima kumunateli kumona. Wamukwashili ñahi Yosefu?

5. Potifwari wakunkulwili nindi hinyi wamukwashileña Yosefu? (Kutachika 39:2-6)

⁵ Tañenu Kutachika 39:2-6. Potifwari wenjili nakwiluka nindi Yosefu wadiña mukwenzi wamaana chikupu nawa wadikita. Welukili cheñi chaletesheli. Potifwari wamweni nindi “Yehova wamukwashileña [Yosefu] muyuma yejima yelileñayi.” b Nkumininaku, iwu mwini Ejipitu wamwilishili Yosefu kwikala nhembi yindi. Wamwilishili cheñi Yosefu kwikala mukakutala yuma yamwitala dindi dejima. Yumanyi yafuminimu? Yuma yamuwahilili Potifwari.

6. Yosefu watela wakeñeleñadi kutalisha hakukala kwadiñayi naku?

⁶ Fwikijenu chatiyiliyi Yosefu. Chumanyi chakeñeleñayi nankashi? Komana wakeñeleña nindi amumoni nikumufweta kudi Potifwari? Hadaha Yosefu wakeñeleña nindi amuumbiku kulonda afunti kudi tata yindi. Hela chakwila Yosefu amwinkeli nyidimu yayivulu mwitala daPotifwari, wachidiña nduñu yamuntu wabulileña kudifukula kudi Nzambi.  Yehova hamuletesheli Potifwari kumuumbaku Yosefuku. Nawa kukala kwamweneñayi Yosefu kwadiña kwakwihi nakuswejelaku.

7. Kukala kwamweneñayi Yosefu kwaswejeleleñaku ñahi? (Kutachika 39:14, 15)

⁷ Neyi chashimunawu muKutachika kapetulu 39, ñoda Potifwari watachikili kumufwila Yosefu nawa watwalekelihu kumudimbeka nindi akaami nindi. Mpinji yejima, Yosefu wadiña nakumukaanina. Nkumininaku, wamuhililili nankashi Yosefu chakwila wamutwambilili nindi wakeñeleña kukaama nindi chakumukanjikija. (Tañenu Kutachika 39:14, 15.) Potifwari chachitiyiliyi, wamuumbilili Yosefu mukaleya, omu mwashakaminiyi hadi yaaka. (Kutach. 39:19, 20) Indi aka kaleya kadiña ñahi? Izu dachiHeberu dazatishiliyi Yosefu hakutena “kaleya” dinateli kutalisha cheñi ‘kwishima’ hela “ibuku,” chinakumwekesha nawu mwiluña mwashakamineñayi mwadiña mwidima nawa wamweni nindi jinamukumi. (Kutach. 40:15; tth.) Bayibolu yashimuna cheñi nawu, haniyi mpinji nyendu yaYosefu ayihatili mumpompa nawa nshiñu yindi ayishili muyikuñu. (Mas. 105:17, 18) Kukala kwamweneñayi Yosefu kwaswejeleleñaku. Hakusambila wadiña nduñu akuhwelelawu, ilaña ichi wekalili kayili adiwulawu.

8. Hela chakwila kukala kutukweti kunakuswejelaku, chumanyi chitwatela kwiluka?

⁸ Mwamonahu dehi kukala kwayineñesheleña nawa kwaswejeleleñaku hela chakwila mwalombeleña chikupu? Chumichi chinateli kumwekana. Yehova hakañeshaña kukala kudi mukanu kaayi kayuulañawu kudi Satana kubuli kutumwekenaku. (1 Yow. 5:19) Hela chochu, mwatela kwiluka chumichi nenu: Yehova neluki chikupu kukala kumunakumona nawa wayakamenaña. (Mat. 10:29-31; 1 Pet. 5:6, 7) Kubombelahu, wakana nindi: “Hinamba kakushiyaku, nawa hinamba kakufutalelaku.” (Heb. 13:5) Yehova nateli kuyikwasha kuumika hela chakwila kukala kwenu kunakumwekana neyi kukumana wanyi. Tutalenu chumichi chichamwekeni nikudi Yosefu.

9. Chumanyi chinamwekeshi nawu Yehova wadiña naYosefu hampinji yadiñayi mukaleya? (Kutachika 39:21-23)

⁹ Tañenu Kutachika 39:21-23. Nihaniyi mpinji yakala yadiñayi Yosefu mukaleya, Yehova wamukwashileña. Munjilanyi? Mukuhita kwampinji, Yosefu amukuhweleleli nikumulemesha kudi mukulumpi wawanhembi, neyi chamulemesheliwu kudi Potifwari. Hashimbwili wanyi, mukulumpi wawanhembi wamwinkeli Yosefu mudimu wakutala akwawu atuyili. Kafwampi, Bayibolu yahosha nawu “mukulumpi wawanhembi amukaleya haakamineña chuma hela chimu hayuma yadiña mumakasa aYosefuku.” Ichi dinu Yosefu wadiña namudimu wawuwahi wakuzata. Chumichi chadiña chakuhayamisha chikupu! Chikutwesheka ñahi kayili anafwikijiwu nawu wakeñaña kukaama nañoda chilolu wamuchota chakumukanjikija amwinki mudimu walema ñana? Kudi hohu chuma chimu chaletesheli. Neyi chahosha Kutachika 39:23 nawu, “Yehova wadiña naYosefu nawa Yehova wamukwashileña muyuma yejima yelileñayi.”

10. Lumbululenu chuma chadi kuletesha Yosefu kumona nindi Yehova hamukwashileña muyuma yejimaku.

¹⁰ Toñojokenu cheñi chatiyiliyi Yosefu. Hanyima yakumutwambila nikumusha mukaleya, munakutoñojoka nenu wamweneña nindi Yehova nakumukwasha muyuma yejima? Chumanyi chakeñesheleñayi Yosefu? Komana wakeñeleña nindi amutiyeña kuwaha kudi mukulumpi wawanhembi amukaleya?  Hadaha, Yosefu wakeñeleña nindi amuumbiku. Walejeli nimukwawu kayili adiña kwakwihi nakufumishawu mukaleya nindi amuhosheliku kudi Fwaru kulonda amufumisha mukana kaleya kamuzeyesheleña. (Kutach. 40:14) Ilaña iwu iyala wakañenyi kuhosha naFwaru hayina mpinji. Chafuminimu, Yosefu watwalekelihu mukana kaleya hadi yaaka. (Kutach. 40:23; 41:1, 14) Hela chochu, Yehova watwalekelihu kumukwasha muyuma yelileñayi. Munjilanyi?

11. Yehova wamwinkeli Yosefu ñovu yakwiladi, nawa chumichi chakwashili ñahi kushikija nkeñelu yaYehova?

¹¹ Hampinji yadiñayi Yosefu mukaleya, Yehova wamukojejeli mwanta waEjipitu kulota yilota yiyedi yamwakamishili. Fwaru wakañesheleña kwiluka mwatalishili iyi yilota. Mwanta chelukiliyi nindi Yosefu wukweti ñovu yakulumbulula yilota, watemesheli muntu wakuya nakumutambika. Yehova wamukwashili Yosefu kulumbulula yilota nawa Fwaru watiyili kuwaha mwamulejeliwu. Fwaru chamweniyi nindi Yehova wudi naniwu mukwenzi, wamutondeli Yosefu kwikala mukulumpi wakutala yakuda muEjipitu yejima. (Kutach. 41:38, 41-44) Mukuhita kwampinji, muEjipitu mwaholokeli nzala yeneni kushilahu nimuKenani, ituña mwashakamineña chisaka chaYosefu. Haniyi mpinji Yosefu wadiña nawuswa wakwamwina chisaka chindi nikuhemba ndonda yachisaka mwakavwalikila Mesiya.

12. Yehova wamukwashili ñahi Yosefu?

¹² Toñojokenu hayuma yakuhayamisha yamwekeni muchihandilu chaYosefu. Hinyi wamukojejeli Potifwari kumulemesha Yosefu, nduñu wamukunkulwayi? Hinyi wamukojejeli mukulumpi wawanhembi amukaleya kumutiya Yosefu kuwaha, kayili wakehelamu? Hinyi wamukojejeli Fwaru kulota yilota yamwakamishili, nawa hinyi wamwinkeli Yosefu ñovu yakulumbulula yilota? Hinyi wamuletesheli Fwaru amutondi Yosefu kwikala mukulumpi wakutala yakuda muEjipitu? (Kutach. 45:5) Chakadi nikujina, Yehova diyi wamukwashileña Yosefu muyuma yejima yelileñayi. Kunsa yachu, Yehova wabalumwini kafuta katama kawamana kwaYosefu kushikijilamu nkeñelu yindi.

13. Komana Yehova wafumishañahu kukala kwejima kutwamonaña? Lumbululenu.

¹³ Yumanyi yitunadizili kunsañu yaYosefu? Komana Yehova wafumishañahu kukala kwejima kutwamonaña? Komana Yehova diyi wakojejaña yuma yejima yamwekanaña muchihandilu chetu kulonda tuhosheña netu yuma yejima yatama yamwekanaña kudi chaleteshaña yimwekaneña? Inehi, dichahoshaña Bayibolu wanyi. (Mukwa. 8:9; 9:11) Ilaña tweluka chumichi: Neyi tudi mukukala, Yehova wakwilukaña nawa watiyaña chitunakumulomba netu atukwashi. (Mas. 34:15; 55:22; Isa. 59:1) Kubombelahu, Yehova nateli kutukwasha kuumika kukala kwejima kutunakumona. Munjilanyi?

14. Yehova watukwashaña ñahi neyi tudi mukukala?

¹⁴ Njila yimu mwatukwashilañayi Yehova hikutukundeja nikutukolesha, sweje-e hampinji yitudi mukukala. (2 Kor. 1:3, 4) Dichuma chamwekeni nikudi manakwetu Eziz wakuTurkmenistan akasiliwu mukaleya hadi yaaka yiyedi muloña wayuma yakuhwelelayi. Wahosheli nindi: “Hefuku dansompesheleñawu nantetemena, manakwetu wumu wanlejeli nsona yaIsaya 30:15, yahosha nawu: ‘Mwakekala nañovu neyi mudiwunjika nikunkuhwelela.’ Iyi vasi yankwashileña mpinji yejima kudiwunjika nikumushindamena Yehova muyuma yejima. Kutoñojoka haniyi vasi kwankwashileña mpinji yejima yinadiña mukaleya.” Munateli kwanukahu mpinji yayikwashiliyi Yehova muchihandilu chenu kuhitila mukuyikundeja nikuyikolesha hampinji yimwakeñeleña chikupu wukwashu?

15-16. Yumanyi yimunadizili kuchuma chamumwekeneni muhela Tori?

¹⁵ Kakavulu, chiña neyi twanuka kukala kutwahitilimu dihitwelukaña chatukwashiliyi  Yehova kuumika. Muhela Tori niyena dichenjiliyi nakwiluka. Mwanindi weyala, Mason, wakabakeni nakansa hadi yaaka 6 kushika nichafwiliyi. Chakadi nikujina, muhela Tori waneñeli chikupu. Wahosheli nindi, “Neluki wanyi neyi kudihu kukala kukwawu kwabadika iku kunahitilimu hamu neyi mama yawantu.” Wabombelelihu cheñi nindi, “Namoni akwetu anvwali anateli kwiteja nawu chakataña nankashi kumona mwaneyi nakukabakana kubadika neyi eyi aweni iyeyi wunakukabakana.”

¹⁶ Hela chakwila muhela Tori wahitili mukukala kwamuchidiwu, ilaña wenjili nakwanuka Yehova chamukwashiliyi kuumika. Wahosheli nindi: “Neyi nanuka yuma yamwekeni, namonaña Yehova chankwashiliyi mpinji yejima yakatiliyi mwanami. Chakutalilahu, nihampinji yakatiliyi nankashi Mason chakwila kwila adimona ninawantu anenzi nakumuhempula nehi, amanakwetu niahela endeleña namotoka hadi maora ayedi kuya kuchipateli. Mpinji yejima mukapeka kakuhembelela muchipateli, himwabulileña muntu wakutukwashaku. Cheñi, amanakwetu niahela atwinkeleña yuma yakudikwashamu kumujimba. Nihampinji yaswejeleña kukala yuma, hitwakaankilileñahu chuma hela chimuku.” Yehova wamukwashili muhela Tori kuumika niMason.—Talenu chikasha chinakwila nawu “ Yehova Watukwashili.”

17-18. Yumanyi yikutukwasha kwanuka nikumusakilila Yehova chatukwashañayi hampinji yitudi mukukala? (Isamu 40:5)

¹⁷ Tañenu Isamu 40:5. Chuma chafwilañayi mukakukandama kumpidi hikushika hewulu. Hela chochu, neyi nakukandama kudi hamaluña hemanañayi nakubanjila yuma yayiwahi. Munjila yoyimu, mpinji yejima toñojokenuña chinakuyikwashayi Yehova nihampinji yimunakumona kukala. Hakumana kwefuku niifuku, dihulenuña nenu: ‘Chumanyi chinankoñeliyi Yehova dalelu? Hela chakwila nichidi kumona kukala, Yehova nakunkwasha ñahi kuumika?’ Talenu neyi mukutwesha kwanukahu chuma hela chimu chinayililiyi Yehova hakuyikwasha.

¹⁸ Hadaha munakulomba nenu kukala kwenu kumani. Chidi hohu chiwahi kwila mwenimu. (Fwili. 4:6) Ilaña twatela kwanukaña cheñi yuma yayiwahi yinakutwililawu chayinu mpinji. Neyi chimuneluki, Yehova watukana nindi wukutukoleshaña nikutukwasha kuumika. Dichi mpinji yejima, sakililenuña hakwiluka nenu Yehova nakuyikwasha. Kufumahu mukumona Yehova chinakuyikwashayi kuumika neyi chamukwashiliyi Yosefu nihampinji yadiñayi mukukala.—Kutach. 41:51, 52.