CHIBAABA CHAKUDIZA 4
KAMINA 30 Tata, Nzambi Yami, Ibwambu Dami
Yehova Wayikeña Enu
“[Yehova] yomwenindi wayikeña enu.”—YOW. 16:27a.
TUKUDIZA
Kukeña kukwetiyi Yehova chikunateli kutuswija kwakwihi nayena nichikunateli kutukwasha tumoneña netu twakiñewa, atwakamenaña chiwahi nikutuwundisha.
1. Yumanyi yenzaña muyitoñojoka yenu neyi mufwikija chekalayi Yehova?
MWESEKAHU dehi kufwikija chekalayi Yehova? Neyi munakulomba kudi yena, yumanyi yenzaña muyitoñojoka yenu? Hela chakwila Yehova twamumonaña wanyi, Bayibolu yamulumbulula munjila jashiyashana. Yehova amutenaña nawu “hiitena nawa hinkebu,”cheñi nawu “hikesi kajilumunaña.” (Mas. 84:11; Heb. 12:29) Amulumbulula nawu wamwekanaña neyi ilola dasafira, chikuñu chakekema, nawa neyi kansuluñunda katoñeka. (Ezek. 1:26-28) Iji njila jimu mwamulumbulwilawu Yehova jinateli kutuhayamisha nikututiyisha woma.
2. Chumanyi chinateli kukañesha antu amakwawu kuswina kwakwihi naYehova?
2 Chineli twamumonaña Yehova wanyi, mpinji jikwawu chinateli kutukalila kukuhwelela netu watukeña. Antu amakwawu atoñojokaña nawu Yehova kwila ayikeña nehi muloña wayuma yatama yayimwekeneni kunyima. Hadaha tata yawu wayimwekesheleleña kukeña wanyi. Yehova weluka chitwatiyaña nawa weluka chatukañeshaña yumiyi kuswina kwakwihi nayena. Hakwila atukwashi, washimuna yilwilu yindi yayiwahi Mwizu dindi.
3. Muloñadi wutukuhanjekela nankashi hakukeña kwaYehova?
3 Izu dimu hohu dalumbulula chiwahi chekalayi Yehova hikukeña. (1 Yow. 4:8) Kukeña dikwamulumbulula chiwahi chekalayi. Yuma yejima yelañayi yashindamena hakukeña. Kukeña kukwetiyi Nzambi kwabadika nawa kukweti ñovu chikupu chakwila wakumwekeshaña nikudi antu abula kumukeña. (Mat. 5:44, 45) Muchinu chibaaba, tukuhanjeka nankashi hadi Yehova nikukeña kwindi. Chitwasweja kudiza hadi Nzambi yetu, tukuswejelañaku kumukeña.
YEHOVA WATUKEÑA NANKASHI
4. Kukeña kukwetiyi Yehova kwayileteshaña kutiya ñahi? (Talenu cheñi mwevulu.)
4 “[Yehova] yomwenindi wayikeña enu.” (Yow. 16:27a) MuBayibolu, wadesekeja namama yawantu wakamenaña mwanindi chiwahi. (Isa. 66:12, 13) Fwikijenu mama yawantu nakumwekeshela mwanindi wanyanya kukeña. Nakumutombwesha hanyendu yindi iku nakumuhoshela nezu dawunda nawa dadovu. Neyi nakudila indi kwiji nakutiya kukata, mama yindi wamwakamenaña chachiwahi. Neyi tunakumona kukala, twakuhwelelaña netu Yehova wukutumwekeshela kukeña. Ñimbi yaMasamu wasonekeli nindi: “Yuma yinakamineña chiyanswejeleli, eyi wankundejeleña nikunwundisha.”—Mas. 94:19.
“Neyi chakundejañayi mama yawantu mwanindi, dichi nukutwalekahu kuyikundeja” (Talenu paragilafu 4)
5. Kukeña kwaYehova kwakashinshi kwalemenadi kudi enu?
5 Yehova washinshika. (Mas. 103:8) Neyi tunakoñi chuma chatama, walekaña wanyi kutukeña. Muza waIsarela watwalekelihu kukoña yuma yatama yamuneñesheleña Yehova; hela chochu, yena watwalekelihu kumwekeshela antu jindi abalumukileña munyichima kukeña kwabulaña kumana nanawa mazu akwila nawu: “Wekalili walema kumesu ami, nakulemesheli nawa nakukeñi.” (Isa. 43:4, 5) Kukeña kwaNzambi hikwahimpikaku. Twatela kukushindamena mpinji yejima. Hela chakwila tunakoñi nshidi yahamesu bwi-i, Yehova hatushiyaña chisayikilaku. Neyi tubalumuka mumuchima nakufunta kudi Yehova, wukutwalekahu kutumwekeshela kukeña. Watushiika nindi “yena [wukutwanakena] nankashi.” (Isa. 55:7) Bayibolu yashimuna nawu kutwanakena muniyi njila kukuletesha “Yehova yomweni [atunookeshi].”—Yilw. 3:19.
6. Zekariya 2:8 yatukwashaña kwiluka chumanyi hadi Yehova?
6 Tañenu Zekariya 2:8. Chineli watukeña, Yehova wanyakalaña kwiluka chitunakutiya nawa wafwilaña chikupu kutukiña. Chamukataña kumuchima neyi amona tunakuhita mukukala. Dichikuletesha tulombi kudi yena netu: “Nkiñi neyi kantu kadisu deyi.” (Mas. 17:8) Disu hichiidi chamujimba chitwakiñaña nankashi nawa chalema. Dichi neyi Yehova atwesekeja nakantu kahadisu dindi, chidi hohu neyi nakuhosha nindi, ‘Wejima wukukatisha enu antu jami, nakukatisha chuma chalema kudi ami.’
7. Muloñadi wutwatela kukuhwelela chikupu netu Yehova watukeña?
7 Yehova wakeñaña nindi tukuhweleli netu watukeña hamuntu-hamuntu. Ilaña weluka nindi muloña wayuma yatumwekeneni kunyima, tunateli kujinoka neyi chakwila watukeña hela nehi. Indi kwiji tunakuhita mukukala chayinu mpinji kunakuletesha tujinokeña neyi chakwila Yehova watukeña hela nehi. Yumanyi yikutukwasha kubula kujinoka? Neyi twiluka Yehova chamumwekeshelañayi Yesu kukeña, awayishewa niejima wetu.
YEHOVA CHAMWEKESHAÑAYI KUKEÑA
8. Muloñadi Yesu chahosheleleñayi chakufuma hamuchima nindi Tata yindi wamukeña?
8 Hadi yaaka yayivulu nankashi, Yehova naMwanindi akeñayi adikunda nawa adimwekeshelaña kukeña chikupu. Wubwambu wawu diwubwambu wunashimbuli nankashi kubadika wubwambu wejima. Yehova wamwekesheli hatooka chamukeñayi Yesu, neyi chitwatañaña haMatewu 17:5. Yehova wadi kuhosha hohu nindi, ‘Iwu diyi inatiyaña kuwaha.’ Ilaña wakeñeleña twiluki chamukeñayi nankashi Yesu, dichi wamuteneni nindi “Mwanami, inakeña.” Yehova wamutiyileña Yesu kuwaha, kushilahu nichuma chadiñayi kwakwihi nakwila. (Efwe. 1:7) Nawa Yesu wajinokeleña wanyi nindi Tata yindi wamukeña. Yesu welukili chikupu nindi Tata yindi wamukeña. Wahosheleña kakavulu chakufuma hamuchima nindi Tata yindi wamukeña.—Yow. 3:35; 10:17; 17:24.
9. Izwinyi dinakulumbulula Yehova chayikeñayi awayishewa? Lumbululenu. (ARoma 5:5)
9 Yehova wamwekeshaña cheñi nindi wayikeña awayishewa. (Tañenu ARoma 5:5.) Talenu izu dakwila nawu “anakuhuñunwini.” Mukanda wumu wahosha hansañu yamuBayibolu walumbulula idi izu nawu “kutuhuñunukila neyi kaloña.” Iwu mwevulu wunakumwekesha Yehova chayikeñayi chikupu awayishewa! Awayishewa eluka nawu “[ayikeña] kudi Nzambi.” (Yuda 1) Kapostolu Yowanu washimwini chatiyañawu nanochu chasonekeliyi nindi: “Talenu kukeña kwasweja kwatumwekeshelayi Tata, hakututena nindi anyana kaNzambi!” (1 Yow. 3:1) Komana Yehova wamwekeshelaña hohu kukeña awayishewa? Inehi, Yehova wamwekeshaña nindi watukeña wejima wetu.
10. Wunsahwinyi wabadika wamwekeshaña nawu Yehova wayikeña?
10 Wunsahwinyi wabadika wamwekeshaña nawu Yehova watukeña? Hiifutu danyiloña. Kuhitila muchumichi, Yehova wamwekesha kukeña kwabadika kukeña kwamwekeshahu dehi muntu wudi wejima! (Yow. 3:16; Rom. 5:8) Yehova wahanini Mwanindi walema chikupu, wamwitejeli kufwila antu ejima kulonda atwanakeni nshidi jetu nawa twiikali amabwambu Jindi. (1 Yow. 4:10) Neyi tutoñojokaña chikupu hawuseya wahaniniyi Yehova niYesu, tukwiluka netu atukeña nankashi hamuntu-hamuntu. (Ñal. 2:20) Ifutu danyiloña hiyadihanini hohu kulonda Yehova ololi yumaku. Hichawaana chahaniniyi muloña wakutukeña. Yehova wamwekesha nindi watukeña kuhitila mukulambula chuma chalemesheliyi chikupu, Yesu. Yehova wetejeli Mwanindi kukabakana nikufwa kukoola etu.
11. Yeremiya 31:3 yinakutudizisha chumanyi?
11 Neyi chitunamoni, Yehova hatoñojokaña hohu nindi watukeñaku, ilaña watulejaña cheñi nindi watukeña. (Tañenu Yeremiya 31:3.) Yehova watukokelaña kudiyi muloña watukeña. (Esekejenu Kuhituluka 7:7, 8.) Kwosi chuma hela muntu niwumu wunateli kutwambula kuniku kukeñaku. (Rom. 8:38, 39) Iku kukeña kwayileteshaña kutiya ñahi? Tañenu Isamu 23, kulonda mumoni Davidi chatiyiliyi muloña wakukeña kwamumwekesheleliwu kudi Yehova nichitunateli kutiya wejima wetu muloña waniku kukeña.
KUKEÑA KWAYEHOVA KWAYILETESHAÑA KUTIYA ÑAHI?
12. Munateli kulumbulula ñahi muwihi Isamu 23?
12 Tañenu Isamu 23:1-6. Mwisamu 23 Davidi wamwekesheli nindi Yehova wamukeñeli nawa wamwakameneneña. Walumbulwilimu wubwambu wadiña hakachi kayena naYehova, hamuteneniyi nindi kabiña kindi. Davidi watiyili nindi wakiñewa chamwitejeliyi Yehova amulomboleña, nawa wamushindameneni chikupu. Davidi welukili nindi Yehova wukumumwekeshelaña kukeña mumafuku akuhanda kwindi kwejima. Yumanyi yamuletesheli akuhweleli muniyi njila?
13. Muloñadi Davidi chakuhweleleliyi nindi Yehova wukumwakamenaña?
13 “Hinukukaankila chumaku.” Davidi wamweni nindi amwakameneneña chiwahi muloña Yehova wamwinkeleña yuma yejima yakeñeleñayi. Davidi cheñi wadiña nawubwambu wawuwahi naYehova nawa amutiyileña kuwaha. Dichaletesheli akuhweleli chikupu nindi hela chakwila yuma yikakala ñahi kumbidi, Yehova wakatwalekahu kumwinka yuma yejima yakakeñañayi. Muloña wakumukuhwelela Yehova, kumumwekeshela kukeña chikupu nikumwakamena, kwamukwashili chikupu Davidi kubula kwakama ilaña kwamuletesheli kwikala namuzañalu nikumona nindi yuma yadiñayi nayu yinashikili.—Mas. 16:11.
14. Yehova nateli kutwakamena ñahi chiwahi?
14 Yehova watwakamenaña chiwahi, sweje-e neyi kudi yuma yatama yinatumwekeni muchihandilu chetu. Muhela Claire, a wunakalakeli haBeteli kubadika yaaka 20, welukili wanyi chateleleliyi kukwasha chisaka chindi hampinji yamweneñawu kukala kwamaneni kwamboka-mboka. Atata yindi akatili kalepa, muhelindi wumu amuhañili mukuloñesha, chisaka chindi chalekeli kwila kabizinisi kelileñawu nawa ayitambwili itala. Yehova wayakameneni ñahi chiwahi? Muhela Claire wahosheli nindi: “Yehova wenkeleña chisaka chami yuma yejima yakeñekeleña hefuku-hefuku. Mpinji yejima, Yehova watwinkeleña yuma yayivulu nankashi! Kakavulu nanukaña mpinji yatumwekesheleliyi Yehova kukeña chikupu, nawa hinamba kayivulamenaku. Kwanuka yina yuma yamwekeni kwankwashaña kutwalekahu kuumika hampinji yinnakumona kukala.”
15. Chumanyi chaletesheli Davidi awundi? (Talenu cheñi mwevulu.)
15 “Wanwundishaña.” Mpinji jikwawu, Davidi wazeyeleña muloña wakukala nikweseka kwakuvulu kwamweneñayi. (Mas. 18:4-6) Ilaña, Yehova wamuwundishili muloña wakumumwekeshela kukeña chikupu nikumwakamena. Yehova wamulombweleña ibwambu dindi wazeyeli “kumunyenvu [nikumaluña] akunookela akutukumwina chiwahi.” Chafuminimu, Davidi wekalili cheñi nañovu nawa watwalekelihu kumukalakela namuzañalu.—Mas. 18:28-32.
Nihampinji yadiñayi Davidi itunduka, Yehova wamuwundishili muloña wakumumwekeshela kukeña chikupu nikumwakamena (Talenu paragilafu 15)
16. Kukeña kwaYehova kwayiwundishaña ñahi?
16 Nimakonu, “muloña wakukeña kwaYehova kwakashinshi, dichinaleteshi tubuli kunoña” hampinji yitunakumona kukala niyuma yitunakulwisha nayu muchihandilu. (Mukeña 3:22; Kol. 1:11) Talenu chuma chamumwekeneni muhela Rachel. Waneñeli nankashi chelili nfumwindi amushiyi nawa aleki kumukalakela Yehova mumpinji yachipupu chaCOVID-19. Yehova wamukwashili ñahi? Wahosheli nindi: “Yehova wankwashili kumona nami wañakamenaña. Wanyinkeli amabwambu ekalileña nanami mpinji yejima, anleteleleña yakuda, antemesheleleña mameseji ninsona jankolesheleña, antumbilileña chimwemweta nawa añanukishileña nawu Yehova wañakameneneña. Namusakililaña Yehova mpinji yejima hakunyinka chisaka cheneni chachiwahi.”
17. Muloñadi Davidi chabulilileñayi ‘kuchiina nindi akumukatisha’?
17 “[Hinachiinaña] nami akunkatishaku, muloña eyi wudi nanami.” Wumi waDavidi kakavulu wadiña muwubanji, nawa wadiña nawayilumbu amavulu añovu. Hela chochu, muloña wakumukeña kudi Yehova, watiyileña nindi wakiñewa. Davidi watiyileña nindi Yehova wamukwashileña mukukala kwejima, nawa chumichi chamukolesheleña. Dihafumini embi nindi: “[Yehova] wampulwishili kuyuma yejima yantiyishileña woma.” (Mas. 34:4) Hela chakwila mpinji jikwawu Davidi watiyileña woma nankashi, ilaña watwesheleña kwimika mushindu woma muloña welukili nindi Yehova wamukeñeli.
18. Kwiluka nenu Yehova wayikeña kunateli kuyikolesha ñahi hampinji yimunakumona kukala kunakuyitiyisha woma?
18 Kwiluka netu Yehova watukeña kwatukoleshaña ñahi neyi tunakuhita mukukala kunakututiyisha woma? Muhela payiniya wejina daSusi walumbulwili yena ninfumwindi chatiyiliwu helili mwanawu weyala adijahi, wahosheli nindi: “Neyi kukala kweneni kumwekana mukukasumwisha muchihandilu cheyi, kunateli kukuzeyesha nankashi muyitoñojoka. Ilaña muloña wakutukeña chikupu kudi Yehova twatiyaña netu twakiñewa.” Muhela Rachel, ashimunawu hakusambila, wahosheli nindi: “Ifuku dimu nawufuku muchima wami wakatili nankashi nawa nakameneni nikutiya woma chikupu, namwaabilili Yehova nezu datiyakana. Hayoyina mpinji natiyili nami nawundishi muchima wami, neyi mama yawantu chelañayi namwanindi wanyanya, nawa naholokeleli mutulu. Hinamba kajimbala yina mpinjiku.” Mukulumpi wejina daTasos amukasili mukaleya yaaka yiwana muloña wakukaana kwiñila wushidika. Wamweni ñahi nindi Yehova wamukeñeli nawa wamwakameneneña? Wahosheli nindi: “Yehova wanyinkeleña yuma yejima yinakeñeleña kushilahu niyuma yikwawu. Chumichi chankwashili kwiluka nami natela kumukuhwelela chikupu. Cheñi, Yehova wankwashili naspiritu yindi yajila kwikala namuzañalu hela chakwila nadiña mwiluña datama. Chumichi chankwashili kumona nami neyi nimukuhwelelaña nankashi Yehova, chikunleteshaña kutiya nami wankeña chikupu. Dichi natachikili kumukalakela hamu neyi payiniya wampinji yejima hinadiña mukaleya.”
SWINENU KWAKWIHI NANZAMBI YENU WAYIKEÑA CHIKUPU
19. (a) Kwiluka netu Nzambi watukeña kunateli kutukwasha ñahi kwiluka yuma yitwatela kuhosha mukulomba kwetu? (b) Mazwinyi anakumwekesha nawu Yehova watukeña anayishiki enu hamuchima? (Talenu chikasha chinakwila nawu “ Mazu Atukwashaña Kwiluka Netu Yehova Watukeña Chikupu.”)
19 Iyi yuma yejima yitunahanjekihu yinakumwekesha nawu Yehova, “Nzambi wakukeña,” wudi nanetu! (2 Kor. 13:11) Watwakamenaña hamuntu-hamuntu. Tuneluki chikupu netu “[atunyeñumuka] nakukeña Kwindi kwakashinshi.” (Mas. 32:10) Neyi tutoñojokaña chikupu hakukeña kwatumwekeshelañayi, twamwilukaña chiwahi chekalayi nawa twaswinaña kwakwihi nayena. Tunateli kulomba kudi yena mukukasunuka nakumuleja netu tunakukeña atumwekesheli kukeña. Tunateli kumuleja yuma yejima yinakutwakamisha, nakukuhwelela netu neluki kukala kutunakuhitamu nawa nakufwila chikupu kutukwasha.—Mas. 145:18, 19.
20. Kukeña kwatumwekeshelañayi Yehova kwatukwashaña ñahi kuswina kwakwihi nayena?
20 Neyi chatukwashaña kesi kutiya iyena neyi kunatuuti, kukeña kwaYehova nikwena kunateli kutukundeja hampinji yitunakumona kweseka nikukala. Kukeña kwaYehova kukweti ñovu chikupu nawa kwovwaha. Dichi itejenu kukeña kwaYehova kunateli kuyikundeja nikuyikwasha kwikala nakuwunda. Nawa wejima wetu tumwekesheña netu twamukeña kuhitila mukuhosha netu: “Namukeña Yehova”!—Mas. 116:1.
MUKWAKULA NENUDI?
-
Munateli kulumbulula ñahi chekala kukeña kwaYehova?
-
Yumanyi yikuletesha mukuhweleli nenu Yehova wayikeña nankashi?
-
Kukeña kwaYehova kwayileteshaña kutiya ñahi?
KAMINA 108 Kukeña kwaNzambi
a Majina amakwawu anayihimpi.