1-2. Kukalanyi kunateli kumonawu ambuña aYehova ashinshika?

 YUMA yatama yatumwekenaña yinateli kuhimpa chihandilu chetu mwifuku dimu hohu. Chakutalilahu, manakwetu washinshika wejina daLuis a wakatili chikatu chakansa. Ndotolu wamulejeli nindi nashali natukweji twantesha hohu nakufwa. Muhela Monika nanfumwindi adiña nakudikita nankashi munyidimu yakuspiritu. Ifuku dimu, muhela Monika wenjili nakwiluka nindi nfumwindi, mukulumpi muchipompelu, wadiña nakukoña nshidi mukuswamujoka hadi yaaka yayivulu. Muhela mujiki wejina daOlivia, washiyili itala dindi muloña kwenjileña nvula yampepela. Chafuntiliyi, wawanini itala dindi anadikisi kudi iyi nvula yampepela. Mukampinji kantesha hohu, yihandilu yanawa antu yahimpikili chikupu. Komana ninenu munakumona kukala neyi kwamweniwu? Munamonihu kukala kunashikeni kuhimpa chihandilu chenu mukampinji kantesha?

² Hela chakwila tudi ambuña aYehova ashinshika, twamonaña kukala kwakuvulu nawa twakataña neyi chichekala kudi antu ejima. Tunateli cheñi kumona ikañesha hela ikabisha dinateli kufumina kudi antu ahela antu jaNzambi. Hela chakwila Yehova hakañeshaña kukala kwamuchidiwu kulonda kubuli kutumwekenaku, watushiika nindi wukutukwashaña. (Isa. 41:10) Nawukwashu windi, tunateli kutwalekahu kwikala namuzañalu, kufuukula chiwahi nikutwalekahu kwikala ashinshika kudi yena hela chakwila tukumona kukala kwamuchidinyi. Muchinu chibaaba, tukuhanjeka hanjila jiwana mwatukwashilañayi Yehova hampinji yitunakumona kukala muchihandilu chetu. Tukuhanjeka cheñi hayuma yitwatela kwila hakwila yuma yatwinkañayi yitukwashi.

 YEHOVA WUKUYIHEMBAÑA

3. Neyi tunakumona kukala kweneni, chinateli kutukalila kwiladi?

³ Kukala kwekalañaku. Neyi tunakumona kukala kweneni, chinateli kutukalila kutoñojoka chiwahi nikufuukula chiwahi. Muloñadi? Hadaha chinakutukata nankashi kumuchima. Tunateli kuzeya muyitoñojoka muloña wakusweja kwakama. Tukumona neyi tunajimbelimu nawa tuneluki wanyi kwakuya. Talenu ahela ayedi ashimunawu hakusambila chatiyiliwu hampinji yamweneñawu kukala. Muhela Olivia wahosheli nindi: “Chelili nvula yampepela yikisañani itala dami, maana emeni nawa ñovu yamanini.” Muhela Monika wahosheli hadi nfumwindi wamwekesheli kubula kushinshika nindi: “Wanneñesheli chikupu. Chankatili nankashi kumuchima. Yitoñojoka yaluwankeni. Hinatoñojokelihu nami chuma chamuchidiwu chinateli kummwekenaku.” Yehova watushiika nindi wukutukwashaña ñahi neyi tunakumona kukala kweneni?

4. Kwesekeja naAFwilipi 4:6, 7, Yehova watushiika nindidi?

⁴ Chuma chatushiikayi Yehova. Watushiika kutwinka chuma chashimuna Bayibolu nawu “kuwunda kwaNzambi.” (Tañenu AFwilipi 4:6, 7.) Iku kuwunda kwatalisha mukuwunda kwamuyitoñojoka nimumuchima kutwatiyaña muloña wakwikala nawubwambu wawuwahi nayena. Iku kuwunda “kwabadika kwiluka kwejima”; kwatukwashaña nankashi. Mwalombahu dehi chikupu kudi Yehova chakwila hanyima yakulomba muchima wushikena dakuwunda? Oku kuwunda kumwatiyili “[hikuwunda] kwaNzambi.”

5. Kuwunda kwaNzambi kwahembaña ñahi yitoñojoka yetu ninyichima yetu?

⁵ Iyi nsona yoyimu yahosha nawu kuwunda kwaNzambi “kwakahemba,” hela kukiña, “nyichima yenu niyitoñojoka yenu.” Izu dadeni kwafumishiliwu izu dakwila nawu “kuhemba,” adizatishileña hakutena amashidika ahembeleña musumba nakuwukiña kulonda abuli kuwulukuka. Antu adiña muniwu musumba wahembeleñawu akaamineña mukuwunda, muloña elukili nawu kwadiña amashidika ahembeleña kuyenzelu. Munjila yoyimu, neyi kuwunda kwaNzambi kuhemba nyichima yetu niyitoñojoka yetu, twekalaña awunda nanochu chituneluki netu twakiñewa. (Mas. 4:8) Neyi chamwekeni kudi Hana, hela chakwila kukala kutunakumona hikunateli kushikena kumana hohenohuku, tunateli kwikala nakuwunda. (1 Sam. 1:16-18) Nawa neyi twikala nakuwunda, kakavulu chatupelelaña kutoñojoka chiwahi nikufuukula mwamuwahi.

6. Chumanyi chitwatela kwila hakwila twiikali nakuwunda kwaNzambi? (Talenu cheñi mwevulu.)

⁶ Chuma chitwatela kwila. Neyi munakuhita mukukala, mutambikenu Yehova ayihembi, neyi chamutambikileñawu nhembi kunyima. Munateli kwila ñahi mwenimu? Lombenuña sampu munatiyi nenu mudi nakuwunda kwaNzambi.  (Luka 11:9; 1 Tes. 5:17) Manakwetu Luis, ashimunawu hakusambila, walumbulwili yena niñodindi Ana, chomikiliwu chelukiliwu nawu nashali hohu natukweji twantesha nakufwa. Wahosheli nindi: “Hampinji yakala neyi iyi, chakalaña nankashi kufuukula chiwahi kutalisha hanjila yakuukewelamu niyuma yikwawu. Ilaña kulomba kunatukwashi nankashi kwikala mukuwunda muniyi mpinji yakala.” Manakwetu Luis nañodindi ahosheli nawu alombeleña chikupu nikufuntisha-funtishahu, nakumulomba Yehova nawu ayinki kuwunda kwamuyitoñojoka, muchima wawunda nimaana akuyikwasha kufuukula chiwahi. Nawa amweni chayikwashiliyi. Neyi munakumona kukala kudi kwejima, lombenuña chakadi kuzeya, nawa mukumona kuwunda kwaYehova chikukuhembaña muchima wenu niyitoñojoka yenu.—Rom. 12:12.

YEHOVA WUKUYIKWASHAÑA KWIKALA AKIÑEWA

7. Tunateli kutiya ñahi neyi tunakuhita mukukala kweneni?

⁷ Kukala kwekalañaku. Neyi tunakuhita mukukala kweneni, hitunateli kutiya, kutoñojoka nikwila yuma neyi chitwelaña mpinji yejimaku. Tunateli kutiya neyi anakutulelujola kufuma kuniku kukala kweneni nakututwala kukukala kukwawu. Muhela Ana, ashimunawu hakusambila, wahosheli nindi wakabakeni muyitoñojoka hanyima yakufwa kwanfumwindi Luis. Wahosheli nindi: “Mpinji jikwawu naneñeleña nikuditiyila ami aweni luwi. Cheñi nahilileña nami nanshiyi.” Kubombelahu, muhela Ana watiyileña wuudi nichikela chelili atachiki kuzatila hayuma yadiña nakuzatilahu chiwahi nfumwindi Luis. Mpinji jikwawu, watiyileña neyi wudi hakaluñalwiji hampinji yinakunoka nvula yampepela. Yehova watukwashaña ñahi neyi tutachika kukabakana nayitoñojoka yamuchidiwu?

8. Neyi chashimunawu haIsaya 33:6, Yehova watushiika nindidi?

⁸ Chuma chatushiikayi Yehova. Watushiika nindi wukutukwashaña kwikala akiñewa. (Tañenu Isaya 33:6.) Neyi hakaluñalwiji hadi nvula yampepela, mbopolu yinateli kutachika kubenkañila. Hakwila akañesheña iku kubenkañila, mbopolu jajivulu ajituña natuyuma twakwashanaña twekala mumbanvu jejima jiyedi jambopolu nawa twajiyamaña mumenji. Itu tuyuma twaleteshaña mbopolu kubula kusweja kubenkañila, chumichi chaleteshaña antu adi muwatu kwikala akiñewa nikubula kwakama. Hela chochu, itu tuyuma twakwashaña mbopolu kubula kubenkañila, twazataña chiwahi neyi mbopolu yinakwenda. Munjila yoyimu, Yehova wukutukwashaña kwikala akiñewa neyi tutwalekañahu kumukalakela nakashinshi hampinji yitunakumona kukala kweneni.

9. Yitwa yetu yakusandujola nachu yinateli kutukwasha ñahi kutwalekahu kuyuula yitoñojoka yetu? (Talenu cheñi mwevulu.)

⁹ Chuma chitwatela kwila. Neyi munakukabakana  muyitoñojoka nakukala kweneni kumunakuhitamu, zatenu hakumina ñovu jenu kutwalekahu kulomba, kuya nakupompa nikushimwina. Hela chochu, hadaha himunateli kuzata neyi chimwazatileña hakusambilaku, ilaña anukenuña nenu Yehova watoñojokelañaku. (Esekejenu Luka 21:1-4.) Cheñi ikalenuña nampinji yakudiza nkawenu nikutoñojokahu chikupu hansañu yimunadizi. Muloñadi? Kuzatisha kuloñesha kwindi, Yehova natwinki yibaaba nimavidiyo amawahi atukwashaña kuyuula yitoñojoka yetu hampinji yitunakuhita mukukala. Hakwila muwani nsañu yikuyikwasha, zatishenu yitwa yakusandujola nachu yidi mwidimi denu, chidi neyi JW Library^® app, niChitwa chaKukwasha aYinsahu jaYehova haKusandujola Nsañu. Muhela Monika, ashimunawu hakusambila, wahosheli nindi wazatishili yitwa yetu yakusandujola nachu kulonda yimukwashi hampinji yatachikiliyi kukabakana muyitoñojoka muloña wakukala kweneni kwahitileñamu. Chakutalilahu, wasandujoleli hezu dakwila nawu “kuhila.” Mpinji jikwawu, wasandujoleli hamazu akwila nawu, “kukwatila mwinikweyi makasu” niakwila nawu “kwikala washinshika.” Kuhiñahu watañileña iyi nsañu sampu natiyiku chiwahi. Wahosheli nindi: “Chinatachikili kusandujola nakameneni nankashi, natiyileña neyi Yehova nakunkumbata. Chinatwalekelihu kutaña, nenjili nakwiluka nami Yehova welukili chikupu chinatiyileña, nawa wankwashileña.” Iwu wukwashu wafumaña kudi Yehova wunateli kuyikwasha ninenu kutwalekahu kuyuula yitoñojoka yenu sampu munekali nakuwunda kwamuyitoñojoka.—Mas. 119:143, 144.

YEHOVAH WUKUYIKWASHAÑA

10. Neyi kudi kukala kweneni kunatumwekeni, tunateli kutiya ñahi?

¹⁰ Kukala kwekalañaku. Neyi kudi kukala kweneni kunatumwekeni, kunateli kwikala mafuku itukutiyaña kuzeya kumujimba nimuyitoñojoka. Tunateli kutiya neyi mukakutemuka lufuchi lwakudibecha wadikatishili watemukileña nankashi, ilaña ichi nakubalakata hohu. Chinateli kutachika kutukalila kuzata chiwahi nyidimu yitwazatileña kunyima, indi kwiji iyena ditwadiña nadu hakusambila hakuzata nyidimu yimu dinateli kutachika kukeha. Kufwana Elija, tunateli kutiya neyi hitukutwesha kuhindukaku. Tunakukeña hohu kwatwalekahu kukaama. (1 Anya. 19:5-7) Yehova watushiika nindi wukutwililadi neyi tutiya kuzeya?

11. Njilanyi yikwawu mwatukwashilañayi Yehova? (Isamu 94:18)

¹¹ Chuma chatushiikayi Yehova. Watushiika nindi wukutukwashaña. (Tañenu Isamu 94:18.) Neyi chochinateli kukeñayi wukwashu mukakutemuka lufuchi wadikatishili hakwila atweshi  kwenda, ninetu twakeñekaña wukwashu hakwila tutwalekihu kudikita mumudimu waYehova. Mumpinji yamuchidiwu, Yehova watukoleshaña nindi: “Ami, Yehova Nzambi yeyi, nakukwati kuchikasa cheyi chachidiilu, Yami inakukuleja nami, ‘Bayi wutiya womaku. Nakakukwasha.’” (Isa. 41:13) Dichamukwashiliwu niMwanta Davidi. Hampinji yamweniyi kukala nihamulukukiliwu kudi ayilumbu, wamulejeli Yehova nindi: “Chikasa cheyi chachidiilu chankwashaña.” (Mas. 18:35) Hanu dinu Yehova watukwashaña ñahi?

12. Anyi anateli kuzatishayi Yehova kutukwasha hampinji yitunazeyi?

¹² Kakavulu Yehova watukwashaña kuhitila mukusañumuna akwetu kulonda atukwashi. Chakutalilahu, mpinji yimu hazeyeliyi Davidi, ibwambu dindi Yonatani wenjili nakumukolesha nikumukundeja. (1 Sam. 23:16, 17) Munjila yoyimu, Yehova watondeli Elisha kulonda amukwasheñaku Elija. (1 Anya. 19:16, 21; 2 Anya. 2:2) Makonu, Yehova nateli kuzatisha antu amuchisaka chetu, amabwambu jetu, hela akulumpi kulonda atukwashi. Hela chochu, neyi kudi yuma yinakutuneñesha, hadaha tukutondahu kubula kudikunda nawakwetu. Tukukeñaña hohu kwikala nkawetu. Ichi dichuma chavula kumwekana. Chumanyi chitwatela kwila hakwila Yehova atukwashi?

13. Chumanyi chitwatela kwila hakwila Yehova atukwashi? (Talenu cheñi mwevulu.)

¹³ Chuma chitwatela kwila. Kañeshenu yitoñojoka yakufwila kudaambula nawakwenu. Neyi tudaambulaña nawakwetu, tukutachika kutoñojoka hohu hadi etu aweni nihakukala kutunakuhitamu. Yitoñojoka yamuchidiwu yinateli kutuletesha kufuukula mwaluwa. (Yish. 18:1) Hela chochu, wejima wetu twakeñekaña kwikala nkawetu, sweje-e neyi kudi kukala kweneni kunatumwekeni. Ilaña neyi tudaambula nawakwetu hadi mpinji yayilehi, tunateli kukañesha njila yazatishañayi Yehova hakutukwasha. Dichi hela chakwila chinateli kuyikalila kudikunda nawakwenu hampinji yimunakumona kukala, itejenu wukwashu wunakufuma kudi amuchisaka chenu, amabwambu niakulumpi. Yimonenuña nenu hinjila yimu yinakuzatishayi Yehova hakwila ayikwashi.—Yish. 17:17; Isa. 32:1, 2.

YEHOVA WUKUYIKUNDEJAÑA

14. Kukalanyi kwakutiyisha woma kutunateli kuhitamu?

¹⁴ Kukala kwekalañaku. Tunateli kuhita mukukala kunateli kututiyisha woma. MuBayibolu, ambuña aNzambi ashinshika ashimuna mpinji yamweneñawu kukala nikuzaala muloña wawayilumbu jawu, indi kwiji ikañesha dikwawu. (Mas. 18:4; 55:1, 5) Munjila yoyimu, hadaha anakutukabisha kushikola, kumudimu, muchisaka, hela  kudi nfulumendi. Indi kwiji tunakutiya woma netu keña tufwi muloña wachikatu chitukweti. Neyi tunakumona kukala kwamuchidiwu, tunateli kutiya neyi mwana wanyanya wunakumona neyi kwosi akumukwasha. Yehova watukwashaña ñahi hampinji yitunakumona kukala kwamuchidiwu?

15. Isamu 94:19 yatukwashaña kukuhwelela chumanyi?

¹⁵ Chuma chelañayi Yehova. Watukundejaña nikutuwundisha. (Tañenu Isamu 94:19.) Idi isamu dinateli kutuletesha kufwikija kansi wamumbanda wunatiyi woma nawa wunakañanyi kukaama muloña wakudidima kwasweja. Kuhiñahu tata yindi nenzi, namukumbati sampu naholokeli mutulu. Hela chakwila iku kudidima kunatwalekihu, iwu mwana nakutiya nindi wakiñewa muloña anamukumbati nikumukundeja kudi tata yindi. Neyi tunakuhita mukukala kunakututiyisha woma, tunateli kukeña netu Tata yetu wamwiwulu atukumbati muchifwikija sampu muchima wunawundi. Yumanyi yitwatela kwila hakwila Yehova atukundeji muniyi njila?

16. Yumanyi yitwatela kwila hakwila Yehova atukundeji? (Talenu cheñi mwevulu.)

¹⁶ Yuma yitwatela kwila. Dikundenuña naYehova mpinji yejima kuhitila mukulomba kudi yena nikutaña Izu dindi. (Mas. 77:1, 12-14) Kuhiñahu neyi munakuhita mukukala, hadaha chuma chatachi chimukutoñojokaña kwila, hikumulejamu Tata yenu wamwiwulu kulonda ayikwashi. Mulejenu Yehova yuma yinakuyitiyisha woma nikuyakamisha. Mwitejenu ahoshi nanenu nikuyikundeja kuhitila muNsona. (Mas. 119:28) Mukuwana nenu nsañu yimu yamuBayibolu yinateli kuyikundeja neyi munatiyi woma. Chakutalilahu, nsañu yekala mumukanda waYoba, waMasamu niwaYishimu kushilahu nimazu aYesu ekala muMatewu kapetulu 6 anateli kuyikolesha. Chimukulombaña kudi Yehova nikutaña Izu dindi, mukukundejewaña.

17. Twatela kukuhwelela chikupu netudi?

¹⁷ Twatela kukuhwelela chikupu netu Yehova wukutukwashaña hampinji yitukumonaña kukala muchihandilu chetu. Hakatushiya chisayikilaku. (Mas. 23:4; 94:14) Yehova watukana nindi wukutuhembaña, wukutukwashaña kwikala akiñewa, wukutukwashaña nawa wukutukundejaña. Isaya 26:3 yahosha kutalisha hadi Yehova nawu: “Eyi wakahemba antu akushindamenaña chikupu; wakayinka kuwunda kwabulaña kumana, muloña akuhwelela mudi eyi.” Dichi mukuhwelelenuña Yehova, nawa itejenuña njila jejima jazatishañayi hakuyikwasha. Neyi mwila mwenimu, mwakekalaña nañovu yakuumika nihampinji yimunakumona kukala.