KUDUHU manakwetu hela muhela wumweluka wayili kwituña dacheñi kwadiña kukaankila kwawakwakushimwina aWanta? Mwadihulahu dehi nenu: ‘Chumanyi chaleteshaña ayeña nakuzatila kwituña dacheñi? Adiloñeshaña ñahi hakwila azati iwu mudimu? Ninami nukutwesha kuzata iwu mudimu?’ Hakwila nawu tuwani ñakwilu yanawa malwihu, twatela kuhanjeka nanawa amanakwetu niahela. Twayenu tuhanjeki nawu.

Chumanyi chayisañumwini kutachiki kutoñojoka kuya nakuzatila kwituña dacheñi kudi kukaankila kweneni? Amy, wudi nayaaka yamuma 30, wafuma kuUnited States. Wahosheli nindi: “Hadi yaaka yayivulu, nafwilileña kuya nakuzatila kwituña dacheñi, ilaña natoñojokeleña nami nikutwesha wanyi.” Chumanyi chaletesheli yahimpi yitoñojoka yindi? “Mu 2004 adisumbula azatilileña muBelize antambikili kulonda nizati nawu wupayiniya hadi kakweji kamu. Nayili nawa natiyili kuwaha. Chimwahitili chaaka, nayili nakuzata wupayiniya kuGhana.”

Yaaka yinahitihu, Stephanie, wudi nayaaka kwakwihi na 30 niyena wafuma kuUnited States, watoñojokeli hachihandilu chindi nawa wahosheli nindi: ‘Nakola kumujimba nawa hinikweti chisaka chakwakamenaku. Natela kumukalakela Yehova chikupu kubadika chinnakuzata chayinu mpinji.’ Kutoñojoka muniyi njila kwamusañumwini kuya nakuzata mudimu wakushimwina kuGhana. A Filip nawañodawu aIda, adi nayaaka yamuma 50 apayiniya adisumbula akuDenmark, afwilileña kuya nakuzatila kudi kukaankila kweneni. Atachikili kutoñojoka njila yikuyikwasha kushikija mwatoñojokeleñawu. A Filip ahosheli nawu,  “Chitwatambwilili iku kukoleka, chadiña neyi kwiji Yehova natuleji nindi ‘Yenu!’” Mu 2008 abukilili kuGhana nawa anazatiliku kubadika yaaka yisatu.

A Hans nawaBrook, apayiniya adisumbula adi nayaaka yamuma 30 anakuzatila kuUnited States. Mu 2005 azatiliku mudimu wakukwasha antu adiña muwubanji wanvula yapepela yeneni yaKatrina. Kuhiñahu, akeñeleña kuya nakuzataku mudimu wakutuña wamukaayi kejima ilaña ayitambikili wanyi. A Hans ahosheli nawu, “Twatiyilili kumpanji hakupompa kweluña yahosheli nawu Mwanta Davidi wetejeli chamukanishiliwu kutuña tembeli nawa wahimpili yitoñojoka yindi. Iyi mpanji yatukwashili kwiluka netu chachiwahi kuhimpa chikokwanyi chakuspiritu.” (1 Kushi. 17:1-4, 11, 12; 22:5-11) A Brook ahosheli cheñi nawu, “Yehova wakeñeleña nindi tuzati mudimu wacheñi.”

Chatiyiliwu yuma yayiwahi yamweniwu amabwambu jawu ayili nakuzatila kumatuña acheñi, aHans nawaBrook atoñojokeli kuya nakuzatila wupayiniya kwituña dacheñi. Mu 2012 ayili nakukwasha chipompelu chawatumama kuGhana hadi tukweji tuwana. Hela chakwila afuntili kuUnited States, yuma yamweniwu hampinji yadiña nakuzatilawu kuGhana yayiletesheli asambili kukeña Wanta muchihandilu chawu. Atwalekelihu kukwasha mudimu wakutuña kasanji kamutayi muMicronesia.

Mwadiloñesheli ñahi kuya nakuzatila kudi kukaankila kweneni? Stephanie wahosheli nindi, “Nasandujoleli yibaaba muKaposhi Kakutalila yahosheleña hakuzatila kudi kukaankila kweneni. * Nahanjekeli cheñi nawaeluda niankoñi endaña nawañodawu hakufwila kwami kwakuya nakuzatila kwituña dacheñi. Sweje-e dinu,  nalejeleña Yehova mukulomba yuma yinafwilileña.” Hampinji yoyimu, Stephanie wapelesheliku chihandilu chindi, kulonda yahembi mali akudikwasha nachu neyi nayi nakuzatila kwituña dacheñi.

A Hans ahosheli nawu: “Twalombeli kudi Yehova kulonda yatukwashi muloña twakeñeleña kuya kwatulejeliyi. Mukulomba kwetu twabombelelimu niifuku ditwakeñeleña kutachika kuzata iwu mudimu.” A Hans nawañodawu atemesheli nyikanda kutusanji twamutayi tuwana. Chayitambikiliwu kukasanji kamutayi kuGhana, akeñeleña kuya nakushakamaku tukweji tuyedi. A Hans ahosheli nawu, “Twadiluñishili kuzatila hamu nachipompelu chakwila twanuñililiku tukweji tukwawu.”

A George nawaAdria, adisumbula adi nayaaka kwakwihi na 40 akuCanada, elukili nawu Yehova wakiswilaña antu afuukulaña chiwahi. Dichi azatili nañovu hakwila nawu ashikiji mwafuukwiliwu. Atemesheleli muhela wazatilileña kwadiña kukaankila kuGhana nakumwihujola malwihu amavulu. Atemesheli cheñi mukanda kukasanji kamutayi kuCanada nikuGhana. A Adria, ahosheli nawu,“twakeñakeñeli njila yakupeleshelamu chihandilu chetu kubadika chitwelili hatachi.” Kufuukula kwawu kwayikwashili ayi kuGhana mu 2004.

Kukalanyi kumwamweni chimwayili, nawa mwakumanishili ñahi? Kukala kwatachi kwamweniwu aAmy, anukileña nankashi kwitala. “Chihandilu chaambukili nankashi.” Chumanyi chayikwashili? “Mafoni adiña nakuntemeshela antaña jami nakuhameka iwu mudimu, aletesheli nishi maana  hamudimu. Twatachikili kuhanjeka nachisaka chami kuzatisha vidiyo. Chineli twadiña nakudimona, namweneña nami chisaka chami chidi mukamwihi.” A Amy ahosheli nawu kukwata wubwambu namuhela wamuchipompelu wapama kwayikwashili kwiluka chahandañawu antu kudina iluña. “Nayileña kudi iwu muhela neyi inakukeña yankwashi kwiluka chinakuletesha antu eleña yuma munjila yambukaku. Chankwashiliyi, nelukili yuma yinatela kwila niyinatela kubula kwila, chakwila nazatili chachiwahi mudimu wakushimwina.”

A George nawaAdria ahosheli nawu chayiliwu kuGhana, amweni neyi atachiki kushakama neyi chashakamineñawu kunyima. Adria ahosheli nawu, “Chatela tuzatisheña ikina dakukosa nachu, twazatisheleña mbeketi. Yakuda yashimbwileña hakwila yihi. Ilaña chimwahitili mpinji, twenjilili.” A Brook ahosheli nawu: “Hela chakwila etu apayiniya twamonaña kukala, twekala namuzañalu. Neyi tutoñojoka hayuma yejima yayiwahi yitunamoni, twekalaña nayuma yayiwahi yakwanuka muchihandilu chetu.”

Muloñadi chimukulejela antu amakwawu kuzataku iwu mudimu waWanta? Stephanie wahosheli nindi, “Kushimwina mwiluña mudi antu afwilaña kwiluka chalala nawa akeñaña kudiza Bayibolu mpinji yejima kwaletaña muzañalu. Nafukwili chiwahi kuya nakuzatili kudi kukaankila.” Mu 2014, Stephanie wasumbukili naAaron, nawa chayinu mpinji anakukalakela hakasanji kamutayi kuGhana.

Christine, payiniya wakuGermany wudi nayaaka kwakwihi na 34 wahosheli nindi: “Kushakama kwakulehi nawantaña jami, kwaletesheli nishindameni hadi Yehova. Namwiluki chikupu. Nawa namoni kunuñañana kwekala hakachi kawantu jaYehova. Iwu mudimu wanzañaleshaña chikupu.” Christine wasumbuka naGideon, nawa wejima wawu anakuzatila kuGhana.

A Filip nawa Ida ashimwini yuma yelileñawu hakwila nawu akwasha atudizi aBayibolu kupaminaku. Ahosheli nawu, “Twadiña nawatudizi aBayibolu 15 hela kubadikahu, ilaña chayinu mpinji tunakeheshiku kushika ku 10 kulonda tuyidizisheña chiwahi.” Atudizi ahetelelimu? A Filip ahosheli nawu: “Nadizishileña kansi weyala Michael. Wadizileña hefuku hefuku nawa waloñesheleña chiwahi chakwila twamanishili mukanda waChatañishaña Bayibolu mukakweji kamu. Chitwamanishili, Michael wekalili mukwakushimwina wabula kupapatishewa. Chayiliyi katachi nakushimwina, wañihwili nindi: ‘Mukuntwalaku nakudizisha atudizi ami aBayibolu?’ Nahayamini! Michael wahosheli nindi watachikili atudizi asatu nawa wakeñeleña wukwashu wakulombola.” Mwamweni kwadiña kukaankila kweneni muloña niatudizi aBayibolu adiña nakudizisha antu Bayibolu.

A Amy chamweniwu nawu kudi kukaankila kweneni ahosheli nawu: “Chitwashikili muGhana, twashimwinini mumukala wanyanya nakukeñakeña atumama. Mumukala wumu hohu, twawaninimu atumama 8!” Chimwahitili mpinji, aAmy ayisumbwili kudi aEric, nawa wejima wawu anakuzata wupayiniya wadimena. Azatilaña muchipompelu chawatumama kulonda akwashi akwakushimwina awatumama 300 niakwakukeña kwakuwahi amunidi ituña. A George nawaAdria, kuzatila kuGhana kwayikwashili kwiluka chichatiyakana kuzata wumishonali. Dichi atiyili kuwaha chayitambikiliwu kuya Kushikola yaGileyadi yanaamba 126! Chayinu mpinji, anakuzata wumishonali kuMozambique.

Twatiyaña kuwaha chitwamona antu amavulu kufuma kumatuña acheñi anakuzatila hamu nawamanakwetu niahela mumudimu wakumuna. (Yow. 4:35) Mulungu nimulungu, avaleji yawantu akushika ku 120 apapatishewaña muGhana. Kufwana antu 17 anakuzatila kudi kukaankila kuGhana, akwakushimwina amavulu mukaayi kejima ‘anakudilambula’ aweni muloña wakumukeña Yehova. Azatilaña kumaluña kudi kukaankila kwawakwakushimwina aWanta. Awa amanakwetu niahela amutiyishaña Yehova kuwaha.—Mas. 110:3; Yish. 27:11.