1, 2. (a) Lumbululenu chakutalilahu chaYesu chamwiniitempa. (b) Ichi chakutalilahu chinakumwekesha ñahi chilwilu chaluwi nichisambu?

IFUKU dimu nantetemena muntu wadimineña nyivinyu wayili kuchisankanu nakukeña antu akuzata mwitempa dindi danyivinyu. Antu awaniniyi etejeli wufwetu wayilejeliyi nawa ayili nakuzata mwitempa. Chineli mwiniitempa wakeñeleña akwakuzata amavulu, wayili cheñi kuchisankanu nakukeñelahu akwakuzata amakwawu nawa wayilejeli kuyifweta nfwetu yoyimu nanana atachikili kuzata nantetemena. Chamanishiliwu kuzata namelela, wayitambikili ejima kulonda yayifweti, azatili maora amavulu ninana azatili ora yimu wayifweteli nfwetu yoyimu. Ana atachikili kuzata nantetemena chelukiliwu chumichi, atachikili kutooba. Mwiniitempa wayakwili nindi: ‘Himweteja nfwetu yitwatiyañanaku? Komana hinikweti wuswa wakwinka akwakukalakala ami nfwetu yinakeñiku? Munatiyi ichima nanichi chinahanaña, tahindi?’—Mat. 20:1-15.

² Chishimu chaYesu chatwanukishaña hachilwilu chaYehova chatenañawu kakavulu muBayibolu dikwila nawu  “luwi” lwindi. (Tañenu 2 Akorinda 6:1.) Akwakuzata azatili ora yimu hiyateleleli kutambula nfwetu yoyimu nanana azatili mwana wejimaku, ilaña mwiniitempa wayitiyilili luwi. Muntu wumu wadiza chikupu wahosheli nindi, “Izu dakwila nawu “luwi” datalisha mukwila nawu chawaana chamukunkulu, chinamwinkiwu muntu henohu nachizatili wanyi.”

3, 4. Yehova wayimwekeshela ñahi akwanshidi luwi nawa muloñadi?

³ Nsona jahoshaña ‘hachamukunkulu chaluwi lwaNzambi.’ (Efwes. 3:7) Yehova wahanaña ñahi ichi “chamukunkulu” nawa muloñadi? Neyi tulondela yuma yejima yakeñañayi Yehova, tukutambwila luwi lwindi. Ilaña twakañanyaña kwila yuma yejima yakeñayi. Dichaletesheli Mwanta wamaana Solomoni yasoneki nindi: “Hamaseki hihekala muntu waloña welaña chachiwahi, wabulaña kuvulumunaku.” (Mukwa. 7:20) Kapostolu Pawulu niyena wahosheli nindi: “Antu ejima anavulumuni, anakañanyi kushika mwashikila kulema kwaNzambi,” nawa “wufwetu wanshidi hikufwa.” (Rom. 3:23; 6:23a) Iyi diyuma yafumañamu.

⁴ Hela chochu, Yehova wayimwekesheleli kukeña antu akwanshidi hayimwekesheleliyi luwi lwabadika. Waheni chawaana chalema nankashi, “Mwanindi wumu hohu,” hamaseki kulonda yatufwili. (Yow. 3:16) Dichi Pawulu wasonekeli hadi Yesu nindi “kulonda akatompeli antu ejima kufwa naluwi lwaNzambi, anamuvwiki dehi chibañula chakulema nimpuhu, nanochu chamweniyi makabi akufwa.” (Heb 2:9) Eñañi, “Chamukunkulu chaNzambi hiwumi wahaya nyaka, mudi Kristu Yesu, Mwanta wetu.”—Rom. 6:23b.

5, 6. Yumanyi yafumañamu neyi atuyuulaña kudi (a) nshidi? (b) luwi lwaNzambi lwasweja?

⁵ Antu aswanini ñahi nshidi nikufwa kwatusambukila wejima wetu? Bayibolu yahoshaña nawu: “Chavulumwiniyi muntu wumu [Adama], kufwa hikukwila mwanta” hadi anyana kaAdama. (Rom. 5:12, 14, 17) Ilaña tukweti kukooleka, muloña tunateli kutondahu kubula kutuyuula kudi nshidi. Neyi tukuhwelela mulambu wefutu danyiloña waKristu, tukwikala muchiyuulu chaYehova chakukeña. Muloñadi? “Kwaswejeli nshidi, hikukubadika nankashi luwi, lwasweja nikusweja. Kulonda chelili nshidi mwanta mukufwa, chochenochu nawa luwi hilukwikala mwanta nakuloña, lwaya kuwumi wahaya nyaka, mudi Mwanta wetu Yesu Kristu.”—Aroma 5:20, 21.

⁶ Hela chakwila tudi akwanshidi, bayi twiteja nshidi yitwiyuleña muchihandilu chetuku. Neyi tuvulumuna, twatela kulomba Yehova yatwanakeni. Pawulu wasoñamishili akwaKristu nindi: “Nshidi hiyikwikala mwanta wenuku; muloña mudi kuluwi, himudi kunshimbuku.” (Rom. 6:14) Dichi, twekala muchiyuulu chaNzambi chakukeña. Yumanyi yafumañamu? Pawulu walumbulwili nindi: “Luwi lwaNzambi . . . lwatufumbaña nawu tuleki kusekesha Nzambi, nikufwila yatama yampata yamunu mwishina, tushakami nyaka yinu nakuwundisha mumesu, nikuloña nikwakama Nzambi.”—Tit. 2:11, 12.

7, 8. Mazu akwila nawu Yehova watumwekeshelaña ‘luwi munjila jeñi najeñi’ atalisha mudihi? (Talenu nyevulu yidi hefu datachi.)

⁷ Kapostolu Petulu wasonekeli nindi: “Wejima wenu kalakelenu akwenu mwaya chamukunkulu chimunatambuli, neyi atulama amawahi aluwi lwaNzambi lweñi nalweñi.” (1 Pet. 4:10) Awa mazu atalisha mudihi? Atalisha mukwila nawu hela tukumona kweseka kwamuchidinyi, Yehova wukutukwasha kuumika. (1 Pet. 1:6) Nzambi wukutumwekeshelaña luwi lukwesakana nakukala kutukweti.

⁸ Mwalala, Yehova wamwekeshaña luwi lwindi munjila jashiyashana. Kapostolu Yowanu wasonekeli nindi: “Kukwinzala kwindi wejima wetu tunatambuluku, niluwi lwakulunjika haluwi.” (Yow. 1:16) Twatambwilaña nkisu jajivulu muloña waluwi lwamwekeshañayi Yehova munjila jashiyashana. Nkiswinyi yeniyi?

9. Twahetelañamu ñahi muluwi lwaYehova, nawa tunateli kumwekesha ñahi kusakilila?

⁹ Kutwanakena nshidi jetu. Chineli Yehova wukweti luwi, watwanakenaña nshidi jetu neyi tubalumuka nikutwalekahu kuzata nañovu kubula kwila nshidi. (Tañenu 1 Yowanu 1:8, 9.) Luwi lwaNzambi lwatela kutusañumuna kumusakilila Nzambi nikumulemesha. Pawulu hasonekeleleñayi akwawu akwaKristu awayishewa, wahosheli nindi: “[Yehova] natupulwishi muñovu jamwidima, natututulwili twiñili muwanta waMwanindi akeñayi. Mudi yena tukweti kutukuula, yowu kutwanakena nyiloña yetu.” (Kol. 1:13, 14) Kutwanakena nshidi jetu kwatuleñela kutambwila nkisu jikwawu jajivulu.

10. Kukoolekanyi kutukweti chineli Nzambi wukweti luwi?

¹⁰ Kwikala nawubwambu wawuwahi naNzambi. Chineli tudi akwanshidi, twadiña ayilumbu jaNzambi kufuma tuhu hakuvwalika. Pawulu wahosheli nindi: “Chatukundamishiluwu kudi Nzambi hakufwa kwaMwanindi, hitwadiñi ayilumbu.” (Rom. 5:10) Iku kutukundamisha kwatukwashaña kwikala mukuwunda naYehova. Pawulu wesekejeli iku kukooleka naluwi lwaYehova, nindi: “Chitunekali [amanakwaKristu awayishewa] dehi aloña nakukuhwelela, tukweti kuwunda naNzambi mudi Mwanta wetu Yesu Kristu. Kudi yena nawa diku tunamweni kwiñila muluwi ilu mutwekala nakukuhwelela.” (Rom. 5:1, 2) Iku hikukooleka kwakweni!

11. Awayishewa akwashaña ñahi “anyikoku acheñi” kwikala aloña?

¹¹ Kwikala aloña. Wejima wetu twekala aloña wanyi. Ilaña kaprofwetu Danyeli wahosheli nindi mumafuku akukuminina, “akwamaana,” awayishewa ashalahu ‘akakondolaña akwawu amavulu ayi mukuloña.’ (Tañenu Danyeli 12:3.) Kuhitila mumudimu wawu wakushimwina nikudizisha, anakwashi “anyikoku acheñi” kwikala nañimenu yayiwahi naYehova. (Yow. 10:16) Hela chochu, chumichi chinamwekani muloña wakwila Yehova wukweti luwi. Pawulu walumbulwili nindi: “Akuyibalumuna kwikala aloña naluwi lwindi [lwaNzambi] chamukunkulwayi, nakukuula kwekala mudi Kristu Yesu.”—Rom. 3:23, 24.

12. Indi kulomba kunesekani ñahi naluwi lwaNzambi?

¹² Kukundama kwakwihi netanda daNzambi mukulomba. Yehova watwinka kukooleka kwakukundama kwakwihi  netanda dindi damwiwulu mukulomba muloña waluwi lwindi. Pawulu wateneni itanda daYehova nindi ‘itanda daluwi’ nawa watulejeli kukundama kwakwihi nanidi itanda “chakadi woma.” (Heb. 4:16a) Yehova watwinka iku kukooleka kuhitila mudi Mwanindi, “mudi yena dimu mutunabulili woma, tunamoni dehi hawiñililu wakadi kwakama, nakukuhwelela kutwamukuhwelelaña.” (Efwes. 3:12) Mwamweni, Yehova wamwekeshaña luwi hakutwinka kukooleka kwakumulomba.

13. Luwi lwaNzambi lunateli kutukwasha ñahi “hitukumona kukala”?

¹³ Kutukwasha hampinji yatelela. Pawulu watukolesheli kulomba kudi Yehova chakadi woma, kulonda “tutambuli kwanakena, tumoni luwi lwakutukwasha hitukumona kukala.” (Heb. 4:16b) Neyi tuholokela mukukala kudi kwejima, twatela kumulomba Yehova kulonda yatukwashi. Kakavulu, Yehova wakulaña kulomba kwetu kuzatisha akwetu akwaKristu, kulonda ‘tuhosheña chakadi woma netu, Yehova diyi nkwashi yami, hinukutiya womaku, antu akuñila chumanyi?’—Heb. 13:6.

14. Twahetelañamu ñahi muluwi lwaYehova?

¹⁴ Kutukundeja munyichima yetu. Nkisu yeneni yitwatambwila kuhitila muluwi lwaYehova yakundejaña muchima waneña. (Mas. 51:17) Pawulu wasonekeleli akwaKristu akabishileñawu muTesalonika nindi: “Mwanta wetu Yesu Kristu, niNzambi, Tata yetu, watukeñeli, watwinkeli kukundeja kwahaya nyaka, nikuchiñeja kwakuwahi naluwi, ayikundeji munyichima yenu, ayikoleshi.” (2 Tesa. 2:16, 17) Twatiyaña kuwaha kwiluka netu Yehova watwakamenaña muloña wakukeña kwindi kwabadika.

15. Kuchiñejanyi kutukweti muloña waluwi lwaNzambi?

 ¹⁵ Kwikala nakuchiñeja kwakushakama haya nyaka. Chineli tudi akwanshidi, twadi kwikala wanyi nakuchiñeja halwetu. (Tañenu Masamu 49:7, 8.) Ilaña Yehova watukwasha kwikala nakuchiñeja kwakuwahi. Yesu washikili atumbanji twindi nindi: “Muloña muchima waTata yami, nakeñi antu ejima atalaña Mwana amwitiyaña chakukuhwelela, muntu himuntu, amoni wumi wahaya nyaka.” (Yow. 6:40) Kuchiñeja kwakushakama haya nyaka, hichawaana mwamwekeshelañayi Nzambi luwi lwindi. Pawulu welukili ichi chikuma nakuhosha nindi: “Luwi lwaNzambi lwaletaña wamwinu wawantu ejima, lunamwekani dehi.”—Tit. 2:11.

16. AkwaKristu akusambila amakwawu azatishili ñahi luwi lwaNzambi munjila yatama?

¹⁶ Hela chakwila twatambwilaña nkisu jajivulu kufuma kudi Yehova muloña waluwi lwindi, bayi tutoñojoka netu wetejaña yilwilu yejimaku. Hakachi kawakwaKristu akusambila, hadiña amakwawu akeñeleña ‘kubalumuna luwi lwaNzambi kwikala kubajama.’ (Yuda 4) Awa akwaKristu abula kushinshika hadaha atoñojokeleña nawu anateli kukoña nshidi nawa Yehova wukuyanakena. Atachikili cheñi kukokola amanakwetu kulonda adibombi nawu hamu mukwila yuma yatama. Nimakonu, muntu wukwila mwenimu ‘nasawuli spiritu yaluwi.’—Heb. 10:29.

17. Petulu watufumbili nindidi?

¹⁷ Makonu, Satana nakudimba akwaKristu amakwawu kutoñojoka nawu chineli Nzambi wukweti luwi anateli kukoña nshidi chakubula kuyibabesha. Hela chakwila Yehova nateli kutwanakena neyi tubalumuka, wakeñaña nindi tuzateña nañovu kulonda tubuleña kwila nshidi. Woneneni Petulu kusoneka nindi: “Dichi enu akwetu twakeña, chimuneli mweluka dehi, babalenu mubuli kuhuñumuka nakuluwañesha kwawantu atama, mubuli kufuma mukukola kwenwenu aweni. Kulenu muluwi nimukumwiluka Mwanta wetu Chamwinu Yesu Kristu.”—2 Pet. 3:17, 18.

18. Nyidimwinyi yitukweti chineli Yehova watumwekeshela luwi?

¹⁸ Chineli twamusakililaña Yehova haluwi lwindi, twatela kuzatisha yawaana yatwinkayi kumulemesha Nzambi nikukwasha akwetu antu. Tunateli kwila ñahi mwenimu? Pawulu wahosheli nindi: “Etu chitukweti yamukunkulu yaambuka mwaya luwi lwatwinkeluwu . . . hela kumudimu, tushi muchima kumudimu wetu. Muntu mukwakuleja akwawu, ashi muchima kukuleja kwindi. Muntu mukwakukonkomwena, ashi muchima kukukonkomwena kwindi . . . Muntu waleña nyidimu yaluwi, eli nakuseha.” (Rom. 12:6-8) Luwi lwatumwekeshelayi Yehova lwatuleteshaña tudikiteña mumudimu wawakwaKristu, kudizisha antu Bayibolu, kukolesha akwetu akwaKristu nikwanakena antu atwilaña katama.

19. Mudimwinyi wutukweti wutukahanjeka muchibaaba chinalondeluhu?

¹⁹ Twatela kuzata chikupu “kushimuna nsañu yaluwi lwaNzambi yayiwahi” muloña watumwekeshela kukeña. (Yil. 20:24) Chibaaba chinalondeluhu chikuhosha nankashi hamudimu wakushimwina.