DIFWIKIJENU munakwenda mumukwakwa mukachi kawufuku. Himukutiya muntu nakuyilondela hanyima. Neyi mwimana, nshindu hanyima yileka kutiyakana. Neyi mwendesha, muntu wunakuyilondela hanyima niyena hakwendesha. Mutemukila hetala debwambu denu didi mukamwihi. Ibwambu denu yashinkula chenzelu nawa yayiñija mwitala, mutiya nimuchima mwivumu wuwunda nikuwunda.

Hadaha kukala kwamuchidiwu kanda kuyimwekeneñahu dehi, ilaña kwatela kudi yuma yikwawu yayitiyishili woma. Chakutalilahu, mudihu nakuzeyazeya kumunakufwila kushinda ilaña munakukañanya kukwishinda? Munashakami yaaka yayivulu chakadi kwiñila mudimu hela chakwila mwazataña nañovu nenu mwiñili? Munakwakamena hakukula niyikatu yenzaña muloña wakushinakaja? Tahindi kuduhu yuma yikwawu yayakameshaña?

Neyi mudi nakukala kwamuchidiwu, kwila mutiya kuwaha kwikalaku namuntu imukuleja kukala kwenu nawa wukuyikwashaku chakumanisha iku kukala nehi? Mwekalahu nebwambu wamuchidiwu? Eña, mukweti. Yehova hiibwambu denu wamuchidiwu, neyi chochadiñayi kudi nkakulula yetu Abarahama, kwesekeja nachasonekawu hamukanda waIsaya 41:8-13. Mumavasi 10 na 13, Yehova wayilejeli añamba jindi nindi: ‘Bayi mutiyaña womaku, ami nidi nenu. Bayi muyeñashanaku, ami yami Nzambi yenu, nakayinkaña ñovu; chalala nakayikwashañaku; chalala nakayikwataña chachiwahi nachikasa chami chachidiilu chakuloña kwami. Muloña ami Yehova Nzambi yenu nakayikwataña kuchikasa chenu chachidiilu, nakayilaña nami, ‘Bayi mutiya womaku, nukuyikwashañaku.’’

Komana awa mazu ayikoleshaña wanyi? Fwikijenu Yehova nayikwati kuchikasa. Bayi neyi mudi hamu nawa munakwenda munjilaku. Neyi mwendeleña hamu naNzambi wadi kuyikwata nachikasa chindi chachidiilu kuchikasa chenu chachimunswa. Ilaña yena wayikwataña “kuchikasa chenu chachidilu” “nachikasa chindi chachidiilu chakuloña” kulonda mubuleña kwakama muchihandilu chenu. Chinakwilayi mwenimu nakuyikolesha nanawa mazu nindi, ‘Bayi mutiya womaku, nukuyikwashañaku.’

Mweluka nenu Yehova hiNvwali wukweti kukeña nawa Ibwambu wunateli kuyikwasha neyi munamoni kukala? Wayikeña, wayakamenaña nawa wukuyikwashaña. Neyi mumona kukala, Yehova wakeñaña nindi muditiyeña akiñewa muloña wayikeña nankashi. “Watukwashañaku muyuma yakala, wudi mwamwihi, hakala kumuwanaku.”—Masamu 46:1.

Antu amakwakwu aneñaña hayiluwa yakoñeliwu kunyima nawa akamenaña neyi chakwila Nzambi wayanakena dehi. Neyi dichimunakutiya ninenu, toñojokenu hadi iyala washinshika Yoba, wetejeli “nshidi hawukwezi windi.” (Yoba 13:26) Ñimbi yamasamu David niyena dichatiyiliyi nawa wamulembeleleli Yehova nindi: “Bayi wanuka nshidi jami jawukwenzi, hela nyiloña yamuku.” (Masamu 25:7) Chineli twawanina wanyi, wejma wetu “tunamuvulumuni, tunakañanyi kushika mwashikila kulema kwaNzambi.”—Aroma 3:23.

Nsañu yashimunawu mumukanda waIsaya kapetulu 41, hinsañu yayilejeliwu antu akunyima kudi Nzambi. Akoñeleña nshidi chakwila Yehova wetejeli ayitwali muwuduñu muBabiloni. (Isaya 39:6, 7) Hela chochu, Nzambi watoñojokeleña hampinji yakakuulayi antu jindi neyi anabalumuki nakufunta kudi yena. (Isaya 41:8, 9; 49:8) Makonu Yehova wamwekeshaña muchima wowumu kudi antu akeñaña nawu yayanakeni.—Masamu 51:1.

Toñojokenu hadi Takuya * wakeñeleña kuleka chaaku chakutala nyevulu yanzekesi nikudichuka. Mpinji yejima wadiña nakufuntila kuchaaku chindi chakutala nyevulu yanzekesi nikudichuka. Watiyileña ñahi? “Nadimweneña nami nidi wamukunkulwayi, ilaña chinalombeli kudi Yehova nami yañanakeni, wankwashili.” Yehova welili ñahi mwenimu? Aeluda amuchipompelu mwadiñayi Takuya amulejeli kuyileja neyi nafuntili kunichi chaaku. Wahosheli nindi: “chadiña chapela wanyi kuyileja aeluda, ilaña neyi niyileja, ankwashileña.” Dichi aeluda amulejeli nkoñi wañinza kumwendela kulonda yakamukwashi. Nkoñi wañinza wamulejeli nindi: “bayi neyi nenzi hohu halwamiku. Aeluda diwu ananleji kwinza kunu. anakutondi kulonda nikwendeli.” Takuya wahosheli nindi: “Yami nakoñeleña nshidi ilaña Yehova wankwashili kuzatisha aeluda.” Takuya wazatili nañovu chakwila wekalili payiniya wampinji yejima nawa chayinu mpinji nakuzatila hakasanji kamutayi. Neyi chochamukwashiliwu iwu manakwetu, Nzambi wukayikwasha ninenu kumanisha kukala kwenu.

Antu amavulu akamenaña muloña wakubula kwiñila mudimu. Amakwawu nyidimu yamanaña nawa chayikalilaña kuwana mwakuhandila. Fwikijenu chimunateli kutiya neyi chakwila kwejima kumunakuya nakukeña nyidimu anakuyikanina. Neyi chuma chamuchidiwu chimwekana, antu amakwawu adimonaña nawu amukunkulwayi. Yehova nateli kuyikwasha ñahi? Hadaha wukuyikwasha wanyi kuwana mudimu hohenohu, ilaña wukuyikwasha kwanuka mazu ahosheliyi Mwanta Davidi nindi: “Nadiñi kansi, hanu nakula dehi nankashi, kanda nimonañahu dehi hashiyilawu muntu waloña, hela anyanindi nakulomba yakudyaku.” (Masamu 37:25) Mwamweni, Yehova wayikeña chikupu nawa wukayikwasha ‘nachikasa chindi chachidiilu chakuloña’ kuwana yuma yimunakukeña kulonda mutwalekihu kumuzatila.

A Sara ashakamaña kuColombia, amweni chayikwashiliyi Yehova. Azatileña hakampani  yayampuhu nawa mudimu wawu wayisendeleleña mpinji nankashi, ilaña atambwileña mali amavulu. Ilaña akeñeleña kuzata chikupu mumudimu waYehova, dichi alekeli mudimu nakutachika wupayiniya. Hela chochu, mudimu wakeñeleñawu wakuzataku hohu maora antesha wakalili kuwana. Atachikili kulandisha ayisikilimu ilaña mali atachikili kumana chovu-chovu nawa alekeli kulandisha. A Sara ahosheli nawu “Mwahitili yaaka yisatu, ilaña Yehova wankwashili kuumika.” Adizili kwambula yuma yachiseki nayuma yakeñekaña hakwila muntu yahandi nikubula kwakamena ifuku dakumadiki. (Mat. 6:33, 34) Mukuhita kwampinji, mukulumpi wamudimu kuyazatileñawu hakusambila wayitambikili kulonda atachiki kuzata mudimu wazatileñawu hatachi. A Sara akwili nawu akwiteja hohu kuzata maora antesha nawa cheñi neyi akuyinkaña mpinji yakuzata nyidimu yakuspiritu. Hela chakwila anakutambwila wanyi mali neyi atambwileñawu hatachi, anatwalekihu kuzata mudimu wawupayiniya. Hela chakwila adiña naniku kukala, ahosheli nawu, “Yehova wankwashili.”

Chuma chikwawu chaleteshaña antu kwakama hikushinakaja. Antu amavulu neyi anashikiji dehi yaaka yakuleka kuzata, adakamenaña chakuwana mali akudikwasha nachu muchihandilu. Adakamenaña cheñi hayikatu yenzaña muloña wawushinakaji. Davidi watela diyi wamulembeleli Yehova nindi: ‘Bayi wuñumba hawushinakaji wamuku; neyi ñovu jami jinamani bayi wunshiyaku.’—Mas. 71:9, 18.

Hanu dinu, yumanyi yikuyikwasha ambuña aYehova kubula kwakamena neyi anashinakaji? Atela kutwalekahu kumukuhwelela Nzambi nikukuhwelela nawu wukuyakamenaña. Ilaña, neyi adiñahu namaheta muchihandilu chawu, atela kupelesha chihandilu chawu nikubula kusha maana hakwikala nayuma yayivulu. Atela kwiluka nawu “kudya mafu” kubadika “ñombi wakudiisha chachiwahi,” kunateli nikukwasha mujimba wawu. (Yish. 15:17) Neyi musha maana hakumukalakela Yehova, wukayakamenaña nimuwushinakaji wenu.

Toñojokenu hadi aJosé nawaRose, anamukalakeli Yehova hadi yaaka kubadika ha 65. Hadi yaaka yayivulu, adiña nakwakamena atata yawaRose akeñekeleña wukwashu mwaana niwufuku. Cheñi, aJosé ayiladikili nachikatu chakansa nawa anwineña yitumbu yayizeyesheleña. Komana Yehova wayikwashili awa adisumbula? Eña, munjilanyi? Kuhitila mudi aTony nawaWendy, adisumbula amuchipompelu abalwili itala dawu hakachi nakuyinka kabadi kamu. A Tony nawaWendy akeñeleña kwinka chibalu chetala dawu apayiniya ampinji yejima. Henohu kanda, aTony ayimweneneña aJosé nawaRose hanjanina yashikola yawu anakuya mumudimu wakushimwina. Atiyileña kuwaha neyena damwekesheleñawu, dichi atoñojokeleñahu chikupu. A Tony nawaWendy chamweniwu awa adisumbula anashinakaji dehi nakumukalakela Yehova muwumi wawu wejima, ayilili kulonda ashakameña nawu. Hadi yaaka 15 yinahitihu, anayikwashi aJosé nawaRose, anashikiji dehi yaaka kwakwihi na 85. Awa adisumbula eluka nawu iwu wukwashu wayikwashañawu kudi adisumbula atwansi hichawana kufuma kudi Yehova.

Nzambi nakuyikwata ninenu ‘nachikasa chindi chachidiilu chakuloña.’ Ninenu kwila mukwata kuchikasa chaMuntu wunayileji nindi: “Bayi wutiya womaku, Nakakukwashañaku” nehi?