Yehova wamulejeli Ezekeli nsañu yakuchiñeja yakunuñañana kwawaIsarela neyi aneñili dehi Mwituña daChikaninu. Iyi nsañu yakundama cheñi kukunuñañana kwawantu jaNzambi kwatachikili mumafuku akukuminina.

Yehova wamulejeli kaprofwetu kindi Ezekeli kusoneka hatunyitondu tuyedi. Wateleli kusoneka hakamutondu kamu nindi, ‘kaYuda nawantu amuIsarela adi nanami’ kakwawu nindi, ‘kaYosefu, kamutondu kaEfweremi nawakwawu akwamutaña waIsarela adi nanami.’ Tunyitondu tuyedi twakekala ‘kamutondu kamu’ muchikasa chaEzekeli.—Ezek. 37:15-17.

WIzu dakwila nawu “Efweremi” demenañaku kwodi? Yerobowami Mwanta watachi wakunyitaña ikumi yakukabeta kaluwunda, wafumini kumuchidi waEfweremi, muchidi waswejeli  kutoha. (Kuhit. 33:13, 17; 1 Anya. 11:26) Iwu muchidi wafumini kudi Efweremi mwana kaYosefu. (Kuch. 1:32, 33) Yosefu watambwilili nkisu yeneni kudi tata yindi, Yakoba. Komana, nyitaña ikumi yawanta yashikililimu kuyitena netu yemenañaku ‘kamutondu kaEfweremi.’ Hampinji yasonekeli Ezekeli wuprofwetu watunyitondu tuyedi, mutaña wawaIsarela wakukabeta kaluwunda adiña awutwala dehi muwuduñu kudi Asiriya mu 740 B.C.E. (2 Anya. 17:6) A Isarela amavulu haniyi mpinji apalañeneni muWanta waweni Babiloni, wasinsili haWanta waSiriya.

Mu 607 B.C.E., wanta wanyitaña yiyedi wakukabeta kambwela hadaha niantu amakwawu ashalili akumutaña wakukabeta kaluwunda ayitwalili muwunkoli muBabiloni. Anyanta awaYuda ayulileña iyi nyichidi yiyedi, nawa kwadiña niatupristu muloña atupristu adiña nakukalakela hatembeli muYerusalema. (2 Kushi. 11:13, 14; 34:30) Dichi iyi nyitaña yiyedi yashikililumu kwimenaku kamutondu ‘kawaYuda.’

Hanu dinu mpinjinyi yatubombeliwu itu tunyitondu tuyedi twachifwikija? Yadiña mpinji yafuntiliwu aIsarela kuYerusalema nakutuñulula tembeli mu 537 B.C.E. Añimeni awanta wanyitaña yiyedi niwanta wanyitaña ikumi afuntili hamu kufuma muwunkoli. Haniyi mpinji, kwadiña kwosi chaambu hakachi kawanyana kaIsarela. (Ezek. 37:21, 22) A Isarela atachikili cheñi kudifukula kudi Yehova mukunuñañana. Iku kunuñañana akwishimwineñahu dehi kudi kaprofwetu Isaya niYeremiya.—Isa. 11:12, 13; Yere. 31:1, 6, 31.

Nsañwinyi yalala yalema yahosha hakudifukula yashimunawu muniwu wuprofwetu? Hinsañu yakwila nawu: Yehova wakelisha akwakudifukula indi “akekala wumu.” (Ezek. 37:18, 19) Mwalala iwu wuprofwetu wakunuñañana wunakushikijewa makonu? Eña. Chatachi, iwu wuprofwetu watachikili kushikijewa mu 1919, helili antu jaNzambi atachiki kuyiluka chovu chovu, anayiloñeshi nikuyinuñañesha. Satana neseki kuyeseka nindi adaambuli ilaña nakañanyi.

Hayina mpinji, antu amavulu anuñañesheliwu ekala nakuchiñeja kwakwikala anyanta niatupristu mwiwulu hamu naYesu. (Chim. 20:6) Adiña neyi kamutondu kaYuda muchifwikija. Mukuhita kwampinji, antu amavulu ekala nakuchiñeja kwakushakama hamaseki atachikili kudinuña nawaYudeya akuspiritu. (Zek. 8:23) Adiña neyi kamutondu kaYosefu nawa hiyadiña nakuchiñeja kwakuyuula naKristuku.

Makonu mazanvu ejima ayedi azatilaña hamu nakunuñañana neyi antu jaYehova nawa anakuyiyuula kudi Mwanta wumu, Yesu Kristu, washimunawu muwuprofwetu nawu “kambuñami Davidi.” (Ezek. 37:24, 25) Yesu walombeli nindi ejima amulondaña ‘akekali wumu, neyi chekalayi Tata yindi mudi yena nawa yena mudi Tata yindi.’ * (Yow. 17:20, 21) Yesu washimwineñahu dehi nindi kamukanka kanyanya kawawayishewa ‘kakekala mukanka wumu’ ‘nanyikoku acheñi.’ Ejima wawu akayilombolaña kudi “kabiña wumu.” (Yow. 10:16) Mazu aYesu ashimwiniyi hakunuñañana kwawantu jaYehova makonu anakushikijewa hela chakwila akweti kuchiñeja kwashiyashana.