1. Chaambwinyi chekala hayuma yitwakeñaña hakwila tuhandi nayitwafwilaña?

YUMA yakeñekaña hakwila tuhandi yantesha, ilaña yitwafwilaña yayivulu. Antu amavulu eluka wanyi chaambu chekala hayuma yakeñekaña hakwila tuhandi nihayuma yitwafwilaña. Chaambwinyi chekalahu? “Yuma yakeñekaña,” hiyuma yatukwashaña kutwalekahu kuhanda. Yuma yidi neyi, yakuda, yakuvwala nihakukama. Ilaña “yuma yitwafwilaña,” hiyuma yitwakeñaña chakwila hela tunayibuli tukutwalekahu kuhanda.

2. Yumanyi yafwilañawu antu?

² Yuma yitwafwilaña yinateli kwambuka kwesekeja neluña kutwashakamaña. Mumatuña ahutwa, antu amavulu akeñaña hohu mali akulandamu selufoni, honda hela iluña hakushakama. Ilaña mumatuña aheta, antu afwilaña kwikala nayakuvwala yalema wuseya, matala amaneni nikwikala namotoka yalema wuseya. Dichi, hela chakwila tunakufwila yuma yayivulu hela nehi, hela tukutwesha kuyilanda hela nehi tunateli kufwa mumuhetu wakufwila maheta.

3. Kufwila maheta kwatalisha mudihi?

³ Kufwila maheta kwatalisha mudihi? Hikusweja kusha maana kuyuma yakumujimba kubadika yakuspiritu. Kufwila maheta kwenzaña muloña wayuma yitwafwilaña, yitwalemesha niyuma yitwasha maana nankashi muchihandilu chetu. Kwaleteshaña twikali nampwila yakufwila kwikala nayuma yayivulu. Muntu wafwilaña maheta hanateli kwikala namali amavulu hela kulanda yuma yawuseyaku. Niatuzweñi anateli kufwa mumuhetu wakufwila maheta nawa akuleka kusambila kukeña Wanta.—Heb. 13:5.

4. Satana wazatishaña ñahi “kufwila kwamesu”?

⁴ Satana wazatishaña yuma yamukaayi kutukokola kulonda tutoñojokeña netu tukwikala namuzañalu chitwekala namaheta. Waletaña yuma kwesekeja ‘nakufwila kwamesu.’ (1 Yow. 2:15-17; Kutach. 3:6; Yish. 27:20) Mukaayi mudi yuma yayivulu, yayiwahi niyamukunkulwayi nawa yaletaña ikoku. Mwalandahu dehi chuma chakwila himwachikeñeliku, ilaña mwachilandili muloña mwachimweni anachitanjiki? Komana mukuhita kwampinji mwelukili nenu mwadi kutwalekahu kuhanda hela chakwila mwachilandili wanyi? Yuma yamuchidiwu yaluwañeshaña hohu chihandilu chetu nikutufuntisha munyima. Tukuleka kudiza Bayibolu, kuloñesha kupompa nikuya nakushimwina mpinji yejima. Anukenu nenu, kapostolu Yowanu watusoñamishili nindi: “Mpata yamunu mwishina yikuhita, nikufwila kwayu kwatama.”

5. Yumanyi yinateli kumwekana kudi antu azataña nañovu kulonda ekali nayuma yayivulu?

⁵ Satana wakeñaña nindi tukalakelaña Maheta chatela tumukalakeleña Yehova. (Mat. 6:24) Antu azatishaña ñovu jawu kufwila maheta ekalaña atuzweñi kuspiritu nawa ekalaña nachineñi muloña wanyikudi. (1 Tim. 6:9, 10; Chim. 3:17) Chidi neyi chalumbulwiliyi Yesu muchishimu chamukwakukuwa. Neyi nsañu yaWanta ‘anayikuwi munyiña, kufwila yuma yikwawu, hikukwiñilamu, hikukuvumbisha mazu, hiyakubula kusoña.’—Maku 4:14, 18, 19.

6. Yumanyi yitwadizilaña kudi Baruki?

⁶ Toñojokenu hadi Baruki, nsoneki wakaprofwetu Yeremiya. Musumba waYerusalema chiwadiña kwakwihi nakujilumuka neyi chashimwinuwu, Baruki watachikili “kukeñakeña yuma yamaneni,” yuma yahakampinji kantesha. Ilaña, wadi kuchiñeja chuma chamukaniniwu kudi Yehova, chakwila nawu: “wumi weyi nakakwinkawu wakekala neyi chuma chakupupa kunjita.” (Yere. 45:1-5) Nzambi wadi kukiña wanyi maheta mumusumba wadiña kwakwihi nakujilumuka. (Yere. 20:5) Chineli tunakuswila kwakwihi nakukuma kwakanu kaayi, bayi tufwila kwikala namaheta amavuluku. Bayi tutoñojoka netu yuma yitukweti, hela chakwila yalema chamuchidinyi, twakapuluka nayu halukadi lwaswejaku.—Yish. 11:4; Mat. 24:21, 22; Luka 12:15.

7. Tukuhanjekadi, nawa muloñadi?

⁷ Yesu watufumbili chakuwana yuma yakeñekaña hakwila tuhandi chakadi kufwila maheta hela kutachika kwakama yuma yabula kutelela. Iku kufumba kwekala mumpanji yahaniniyi hampidi. (Mat. 6:19-21) Tuhanjekenu hachibalu chekala hamukanda waMatewu 6:25-34.  Kuhanjeka iyi nsona kukutukwasha kwiluka chikupu netu twatela ‘kukeña Wanta,’ bayi mahetaku.—Luka 12:31.

8, 9. (a) Muloñadi wutwatelela kubula kwakamena? (b) Yesu welukilidi hadi antu niyuma yakeñañawu?

⁸ Tañenu Matewu 6:25. Yesu chalejeliyi atumbanji twindi ‘kuleka kwakama wumi wawu,’ wayilejeleña kubula “kusweja kwakama.” Adiña nakwakama yuma yateleleliwu kubula kwakamawu. Yesu wayilejeli kuleka kwakama, nawa kudi chaletesheli yayileji mwenimu. Muloña kusweja kwakama hayuma yitunakaankili kunateli kutukañesha kusha maana kuyuma yakuspiritu. Yesu wayikeñeli atumbanji twindi dichaletesheli yayisoñamishi mapampa kawana mumpanji yindi yahampidi hawubanji wekala mukwakama.—Mat. 6:27, 28, 31, 34.

⁹ Yesu watukanishililidi kuleka kwakama yakuda, yakunwa hela yakuvwala? Komana yumiyi hidiyi yakeñekaña muchihandiluku? Yakeñekaña nankashi! Neyi tukañanya njila yakuwaninamu iyi yuma, komana tukwakamena wanyi? Chakadi nikujina tukwakamena, nawa Yesu welukili chumichi. Welukili yuma yakeñañawu antu mukuhanda kwawu. Kubombelahu, welukili kukala kwakamonañawu atumbanji twindi akashakamaña ‘mumafuku akukuminina,’ mwakekala “nyaka yakala.” (2 Tim. 3:1) Iku kukala kunabombelimu, kubula nyidimu, kukandama wuseya, kukeha kwayakuda, niwuzweñi wunakumonawu antu amavulu. Hela chochu, Yesu welukili nindi ‘wumi wabadika kuda nawa mujimba wabadika yakuvwala.’

10. Yesu chayilejeliyi atumbanji twindi chakulomba, yumanyi yahosheliyi yalema yatela kutwamijawu?

¹⁰ Chatachikiliyi mpanji yindi yahampidi, Yesu walejeli antiyilili jindi kulombaña kudi Tata yawu wamwiwulu kuyinka yuma yakeñañawu, wayilejeli kulomba nawu: ‘Twinki kuda kwetu kutukukeña lelu.’ (Mat. 6:11) Hampinji yacheñi wayilejeli kulomba nawu: ‘Twinkaña hefuku hefuku kuda kwetu kutunakeñi.’ (Luka 11:3) Ilaña iku kufumba hikunatalishi mukwila nawu hitwatela kutoñojokaña hohu hayuma yitwakeñañaku. Muniku kulomba kwachitalilu, Yesu washili maana hakulomba nindi Wanta waNzambi winzi. (Mat. 6:10; Luka 11:2) Hakwila antiyilili jindi abuli kwakama, Yesu wayilejeli nindi Yehova hiMukwakuhana.

11, 12. Yumanyi yitunadizi hachakamenañayi Yehova atujila ahaluzwizu? (Talenu mwevulu wakutachikilahu.)

¹¹ Tañenu Matewu 6:26. Twatela ‘kutala chachiwahi atujila ahaluzwizu.’ Hela chakwila itu tujila twanyanya, twadaña nyikabu yayivulu, tububu nindulu jajivulu. Neyi twadiña nanyijimba yamamaneni, twadi kudaña yakuda kubadika antu. Ilaña, hitwadimaña hela kutumba mbutuku. Yehova watudishaña itu tujila. (Mas. 147:9) Hela chochu, watwinkaña wanyi yakuda kunyivumbu yatu! Ilaña awa atujila atela kuya nakukeña yakuda nawa iyi yakuda yayivulu nankashi.

¹² Yesu welukili chikupu nindi chineli Tata yindi wamwiwulu wakamenaña atujila, kwila yakañanya kwakamena antu nehi. ^[1] (1 Pet. 5:6, 7) Bayi neyi wukusha yakuda mukanwa ketuku, ilaña nateli kutukiswila neyi tuzata nañovu kudima yakuda hela kuwana mali akulanda yuma  yakudikwasha nachu. Neyi tunakankili, nateli kuzatisha antu amakwawu kutukwasha. Hela chakwila Yesu wahosheli wanyi Yehova chayakamenañayi atujila hakukama, wayinka maana niyuma yayivulu yakutuñisha nachu yisakala. Munjila yoyimu, Yehova nateli kutukwasha kwikala netala dakushakamamu nachisaka chetu.

13. Chumanyi chamwekeshaña nawu twalema kubadika atujila ahaluzwizu?

¹³ Yesu wehwili antiyilili jindi nindi: “Enu himwayibadika nankashi [atujila ahaluzwizu] kulemaku?” Chakadi nikujina, Yesu welukili nindi keña yahani wumi windi kukoola antu. (Esekejenu Luka 12:6, 7.) Mulambu wefutu daKristu awuloñesheleli wanyi atunyama. Yesu wafwilili wanyi atujila ahaluzwizu, ilaña wafwilili etu kulonda twakadiluñishi wumi wahaya nyaaka.—Mat. 20:28.

14. Chumanyi chinateli kubula kwilayi muntu wakamenaña?

¹⁴ Tañenu Matewu 6:27. Muloñadi Yesu chahosheleliyi nindi, muntu wakamenaña hakutwesha kunuñaku chikunku chakwesekana munkotwelu yachikasa yimuku? Muloña kusweja kwakamena kukutukwasha wanyi kutwalekahu kuhanda. Ilaña kukuletesha tufwi swayi.

15, 16. (a) Tunakudizila kwodi kuchakamenañayi Yehova wuluya wamwisaña? (Talenu mwevulu wudi hefu datachi.) (b) Malwihwinyi itwatela kudihula, nawa muloñadi?

¹⁵ Tañenu Matewu 6:28-30. Hinyi wabulaña kukeña kwikala nayakuvwala yayiwahi yakuzatisha hakushimwina nihakupompa? Hela chochu, komana  twatela ‘kwakamena yakuvwala’? Yesu watulejeli cheñi kushinshika yileñaleña yaYehova. Tunateli kudiza yuma yayivulu neyi tushinshika “wuluya wamwisaña.” Yesu watela wadiña nakutoñojoka nkenu jajiwahi. Iyi yileñaleña hiyachimaña yakuvwalaku. Ilaña yamwekanaña lubanji! Nawa “mwalemeneniyi Solomoni mwejima, havweli chakweseka hela nawuluya iwu wumuku”!

¹⁶ Toñojokenu mazu ahosheliyi Yesu akwila nawu: “Nzambi wavwikaña matahu amwisaña chochichi . . . , abuli kuyivwikenu chakubadika, enu mukweti kukuhwelela kwantesha?” Chakadi nikujina, wukutuvwika! Ilaña, atumbanji twaYesu mpinji yikwawu adiña nachikuhwelelu wanyi. (Mat. 8:26; 14:31; 16:8; 17:20) Ateleleli kwikala nachikuhwelelu chakola nikumukuhwelela Yehova. Ndochu etu? Komana twamukuhwelela chikupu Yehova netu wukweti ñovu yakutukwasha neyi tunakaankili?

17. Yumanyi yikuletesha wubwambu wetu naYehova kumana?

¹⁷ Tañenu Matewu 6:31, 32. Bayi twimbujola ‘akwanyuza,’ abula kumukuhwelela Tata yetu wamwiwulu wakukeña wakamenaña antu atwamijañaku Wanta windi muchihandilu chawuku. Kufwila kwikala ‘nayuma yejima yakeñañawu akwanyuza’ kukuletesha wubwambu wetu naYehova kumana. Ilaña, twatela kukuhwelela netu neyi tukwila yuma yitwatela kwila, dikwila nawu kutwamijaku yuma yakuspiritu muchihandilu chetu, Yehova wukutwinka yuma yayiwahi. “Kwakama Nzambi” kukutukwasha kwiluka netu “yakuda niyakudivwika,” hela hakukama yinawanini.—1 Tim. 6:6-8.

18. Yumanyi yelukayi Yehova hadi etu, nawa wukutwililadi?

¹⁸ Tañenu Matewu 6:33. Atumbanji twaYesu atela kutwamijaku Wanta muchihandilu chawu. Neyi tukwila mwenimu, Yesu wahosheli nindi, “niyuma yejimiyi” akatushilaku. Muloñadi chahosheleliyi awa mazu? Walumbulwili muvasi 32 nindi: “Tata yenu wamwiwulu neluki chimunakaankili yuma yejimiyi,” dikwila nawu yuma yakeñekaña muchihandilu. Henohu kanda twiluki netu tunakukeña yakuda, yakuvwala nihakukama, Yehova welukañahu dehi. (Fwi. 4:19) Welukaña yitukavwala ifuku dikwawu. Welukaña yakuda yitwatela kuda nihakukama hatelela, kwesekeja nachisaka chitukweti. Yehova wukutwinkaña yuma yitunakukeña.

19. Muloñadi wutwatela kubulila kwakama yuma yikamwekana kumbidi?

¹⁹ Tañenu Matewu 6:34. Yesu wahosheli cheñi kamuchiyedi nindi ‘Bayi mwakamaku.’ Dichi hitwatela kwakamena yuma yakumbidiku muloña Yehova wukutwakamenaña mafuku ejima. Neyi muntu yakamenaña nankashi yuma yikamwekana kumbidi, wukuleka kukuhwelela Nzambi, nawa wubwambu windi naYehova wukumana.—Yish. 3:5, 6; Fwi. 4:6, 7.

20. (a) Nyidimwinyi yimunateli kuzata mukuloñesha kwaYehova? (b) Munateli kupelesha ñahi chihandilu chenu?

²⁰ Chikutama nankashi neyi tukuleka kusha maana kuyuma yakuSpiritu muloña wakufwila maheta. Dichi twatela kusha maana hayuma yakuspiritu. Chakutalilahu, kwila muya nakuzatila kuchipompelu kudi kukaankila kwawakwakushimwina aWanta nehi? Komana kwila muzataku wupayiniya nehi? Neyi mudi apayiniya, mwatoñojokahu dehi kuya kuShikola yawakwaKushimwina aWanta? Hela kuzataku mudimu wakukwasha haBeteli, hela hakasanji kakubalumwinahu nyikanda nehi? Kwila muzataku mudimu waLocal Design/Construction volunteer niwakukwasha kutuña Matala aWanta nehi? Toñojokenu chimunateli kupelesha chihandilu chenu kulonda muzateña chikupu nyidimu yaWanta. Shinshikenu nakanañachima chikasha chinakwila nawu “Chimunateli Kupelesha Chihandilu chenu,” nawa londelenu njila jidihu kulonda mutweshi kupelesha chihandilu.

21. Chumanyi chikuyikwasha kukundama kwakwihi naYehova?

²¹ Yesu watulejeli kukeña Wanta bayi mahetaku. Neyi tukwila mwenimu, tukwakamenaña wanyi yuma yitwakeñaña. Tukukundama kwakwihi naYehova neyi tumukuhwelela chikupu nawa neyi tubula kwikala nayuma yejima yidi mukaayi hela chakwila tunatweshi kwikala nayu. Kupeleshaku chihandilu chetu chayinu mpinji chikutukwasha ‘kukwatisha kuwumi walala chikupu’ wunakwinza.—1 Tim. 6:19.