1. Hanenu chakutalilahu chinakumwesha kulema kwakwiluka mpinji niyuma yinakumwekana. (Talenu mwevulu wudi hefu datachi.)

NEYI tumona mpinji hankoloku yinakuchinda 5, 4, 3, 2, 1, twelukaña netu mpinji yakushakama yinashiki kulonda tudiluñishi tumina tunatuloñesheliwu twakutachika nachu kupompa kweluña. Himpinji yakutiyilila nakanañachima kutumina twatuwahi twawa ñimbi awaWatchtower, kulonda tudiloñeshi kutiyilila kujimpanji jikulondelahu. Indi neyi antu akutachika kwendujola hela kuhanjeka nawamabwambu jawu, chakadi kwiluka nawu kupompa kunatachiki? Awa antu aneluki wanyi hanashiki mpinji niyuma yinakumwekana, cheyamani wudi hachinañamu, tumina tunakuvuma nawa antu mwizaza anashakami. Ichi chakutalilahu chinakutukwasha kwiluka yuma yinakumwekana yikuletesha twikali asoñama kuyuma yikumwekana katataka. Yumanyi yeniyi?

2. Yesu wayilejelelidi atumbanji twindi nindi “tonenu”?

² Hampinji yahosheleñayi ‘hakukuma kwanyaka yamakonu,’ Yesu Kristu walejeli atumbanji twindi nindi: “Babalenu, tonenu, lombenu; muloña himuneluki mpinji oyuku.” Chamanishiliyi, Yesu wayisoñamishili cheñi nindi: “Tonenu.” (Mat. 24:3 tañenu Maku 13:32-37.) Mukanda waMatewu  niwena wamwekeshaña nawu Yesu walejeli atumbanji twindi kwikala asoñama hahosheliyi nindi: “Tonenu, muloña himuneluki ifuku dakenzayi Mwanta wenuku. . . . Babalenu, muloña mpinji yimukubula kutoñojoka diyi yakenzayi Mwana kamuntu.” Wahosheli cheñi nindi: “Dichi dinu tonenu, muloña himuneluki hela ifuku hela mpinjuku.”—Mat. 24:42-44; 25:13.

3. Muloñadi chitwatiyililaña kusoñamisha kwaYesu?

³ Etu aYinsahu jaYehova, twatiyililaña kukusoñamisha kwaYesu. Tuneluki netu tunakushakama ‘mumpinji yakukuminina’ nawa katatakichi “lukadi lwasweja” lutachiki. (Dan. 12:4; Mat. 24:21) Tunakumona majita, yilwilu yatama yinakuswejelaku, kuluwa, nsakililu yinakudambujola, kukeha kwayakuda, yipupu ninyitentashi yinakumwekana mukaayi. Tuneluki chikupu netu mudimu wakushimwina waWanta anakuwuzata kudi antu jaYehova mukaayi kejima. (Mat. 24:7, 11, 12, 14; Luka 21:11) Tunakutalila yuma yakatwililayi Mwanta neyi nenzi nichikashikijewa nkeñelu yaNzambi.—Maku 13:26, 27.

4. (a) Tukuhosheladi netu Yesu weluka mpinji yikatachika njita yaAmagedoni? (b) Hela chakwila hituneluki mpinji yikatachika lukadi lwaswejaku, chumanyi chituneluki?

⁴ Tweluka netu chibalu chejima chahakupompa chekala nampinji yakutachika. Ilaña, hela tukweseka chamuchidinyi tukutwesha wanyi kwiluka chaaka, ifuku hela mpinji yikatachika lukadi lwasweja. Yesu hadiñayi hamaseki, wahosheli nindi: “Itañwodu hela mpinji oyu kwosi wayilukaku, hela añelu amwiwulu, chiña Tata hohu.” (Mat. 24:36) Ilaña Kristu amwinka ñovu mwiwulu kulonda yalwi njita nakaayi kaSatana. (Chim. 19:11-16) Dichi, tunateli kuhosha netu chayinu mpinji Yesu weluka mpinji yikatachika njita yaAmagedoni. Ilaña etu tweluka wanyi. Dichi tutwalekihu kwikala atona sampu lukadi lwasweja lunatachiki. Yehova weluka mpinji yakatachika lukadi lwasweja. Watonda mpinji yikenza kukuma. Nakuchinda mpinji kushika nifuku hamba katachika lukadi lwasweja nawa ‘hilwakalabajalaku!’ (Tañenu Habakuki 2:1-3.) Tukwiluka ñahi?

5. Shimunenu chakutalilahu chinakumwekesha nawu wuprofwetu waYehova washikijewaña hampinji yatoñolayi.

⁵ Wuprofwetu waYehova washikijewaña hampinji. Toñojokenu mpinji yatoñweliyi kufumisha aIsarela muEjipitu. Kutalisha haNisani 14, 1513 B.C.E., Mosi wahosheli nindi: ‘Chiyakumini nyaka 430, hohefuku dadeni diyakumini nyaka yina, mazaza aYehova ejima afumini mwituña daEjipitu.’ (Kwid. 12:40-42) Iyi ‘yaaka 430’ atachikili kuyichinda hampinji yatachikili kuzatika chitiyañenu chaYehova naAbarahama mu 1943 B.C.E. (Ŋal. 3:17, 18) Chimwahitili mpinji, Yehova walejeli Abarahama nindi: ‘Ilukaku chalala neyi anyaneyi akela añeji mwituña dambala, akayikalakela; akayikabisha nyaka 400.’ (Kutach. 15:13; Yil. 7:6) Iyi ‘nyaaka 400’ yawuduñu yatachikili mu 1913 B.C.E. helili Ishimeli yamusehi Isaka hampinji yasumukiliyi, nawa yamanini hafuminiwu aIsarela muEjipitu mu 1513 B.C.E. (Kutach. 21:8-10; Ŋal. 4:22-29) Mwalala, Yehova watoñweli mpinji yakufumisha antu jindi muwuduñu henohu kunashali yaaka yayivulu!

6. Muloñadi wutukukuhwelela netu Yehova wakapulwisha antu jindi?

 ⁶ Yoshuwa wadiña hakachi kawantu afumini muEjipitu wayanukishili aIsarela ejima nindi: “Enu muneluki nanyichima yenu yejima, nawumi wenu wejima, nenu hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakañanyuku.” (Yosh. 23:2, 14) Tunakuhweleli netu Yehova wukatupulwisha halukadi lwasweja neyi chatukanayi. Ilaña neyi tunakukeña netu twakapuluki hakajilumunawu kanu kaayi, twatela kwikala atona.

7, 8. (a) Mudimwinyi wazatileñawu atulama, nawa tukudizilaku kwodi? (b) Chumanyi chinateli kumwekana neyi atulama akama iku adi hamudimu?

⁷ Tunateli kudizila kudi antu akushankulu kutalisha hakulema kwakwikala atona. Hayina mpinji, nyisumba yamaneni chidi neyi Yerusalema, ayituñili nampwembu jajilehi. Iji mpwembu jakiñileña antu kudi ayilumbu jawu nawa jakwashileña antu kumona yuma yinakumwekana hahalehi. Atulama ashakamineña hewulu dampwembu nihayisu mwaana niwufuku. Asoñamishileña antu mumusumba neyi kudi ayilumbu anakwinza. (Isa. 62:6) Neyi atulama kusoñama nikusha maana kumudimu wawu nehi, antu akwikala muwubanji.—Ezek. 33:6.

⁸ Mukwakushimuna nsañu yakunyaka hadi aYudeya Josephus wahosheli nindi, mashidika awaRoma atwesheli kutambula musumba waAntonia mu 70 C.E., nawa ahumwini mpwembu jaYerusalema muloña atulama adiña mutulu. Dichi, aRoma eñilili mutembeli nakuyocha, dihatachikili lukadi lwasweja lwabulili kumonahu dehi muYerusalema nimudi aYudeya.

9. Yumanyi yabula kwilukawu antu amavulu makonu?

⁹ Matuña amavulu makonu akweti “atulama” nimakamela atalaña mujiñinza. Atalaña yuma yinateli kwiñila mwituña dawu nakuluwañesha kuwunda. Hela chochu, awa “atulama” amonaña hohu wubanji wafumaña kunfulumendi jawantu hela kudi antu. Eluka wanyi nfulumendi yaWanta waNzambi yekala mwiwulu niyuma yiwunakwila kuzatisha Kristu nawa niyuma yiwukela hakusompesha kunakwinza kwanyuza yejima. (Isa. 9:6, 7; 56:10; Dan. 2:44) Twatela kwikala asoñama nawa atona kuspiritu kulonda tudiloñeshi kwinza kwefuku dakusompesha.—Mas. 130:6.

10, 11. (a) Yumanyi yitwatela kubabala nayu, nawa muloñadi? (b) Yumanyi yinaleteshi mwiteji nenu Diyabolu naputishi yitoñojoka yawantu kudiwula wuprofwetu wamuBayibolu?

¹⁰ Toñojokenu hadi kalama wunachishi wufuku wejima nakuzata. Ilaña kukamwihi nakucha yazeya nawa yatachika kunoñoka. Munjila yoyimu, chinateli kutukalila kutwalekahu kutona chineli kukuma kwakanu kaayi kamakonu kudi mukamwihi. Tukafwa neyi tubula kwikala atona. Tuhanjekenu yuma yisatu yinateli kutuletesha tubuli kutona neyi kubabala nehi.

¹¹ Diyabolu nakuluwañesha antu kulonda abuli kwakamena wuspiritu wawu. Kukamwihi nakufwa kwindi, Yesu wasoñamishili atumbanji twindi mapampa  kasatu hadi “mwanta wayulaña mpata yamunu mwishina.” (Yow. 12:31; 14:30; 16:11) Yesu welukili nindi Diyabolu wukaluwañesha yitoñojoka yawantu kulonda akabuli kwiluka mpinji yakashikija wuprofwetu waNzambi wahosha hayuma chiyakekala kumbidi. (Zefwa. 1:14) Satana nakuzatisha nsakililu yakutwamba yamukaayi kulonda yaputishi mesu ayitoñojoka yawantu. Neyi munakuhanjeka nawantu, ahoshaña nawudi? Diyabolu ‘hanaputishi mesu ayitoñojoka yawantu abula kwitiya’ hakukuma kwanyaaka yamakonu nikwiluka nawu Kristu nakuyuula Wanta waNzambiku? (2 Kor. 4:3-6) Mapampa añahi imwatiyaña antu anakuhosha nawu, “Inakukeña wanyi”? Kakavulu, atiyaña kutama neyi tuyileja netu kanu kaayi keña akijilumuni.

12. Muloñadi wutukubulila kwiteja Diyabolu kutudimba?

¹² Bayi mwiteja antu ayidiwulaña ayikañeshi kwikala atonaku. Mweluka chikupu. Pawulu wayisonekeleli akwawu akakwitiya nindi: ‘Enu aweni muneluki chakashinshi, nenu ifuku daYehova dinakwinza’ nawa wabombelelihu nindi, ‘dakayishintakesha neyi ikombi.’ (Tañenu 1 Atesalonika 5:1-6.) Yesu watusoñamishili nindi: “Babalenu, muloña mpinji yimukubula kutoñojoka, diyi yakenzayi Mwana kamuntu.” (Luka 12:39, 40) Katataka Satana yadimbi antu amavulu amoneña nawu kudi ‘kuwunda nikukiñewa.’ Wukuyidimba kulonda atoñojokeña nawu yuma mukaayi yidi hohu chiwahi. Chumanyi chikatumwekena? Neyi twikala ‘atona nawa ababala,’ ifuku dakusompesha ‘hidakatushintakesha neyi ikombuku.’ Dichi twatela kutañaña Izu daNzambi mafuku ejima nikutoñojoka hayuma yinakutudizishayi Yehova.

13. Spiritu yamukaayi yinakuluwañesha ñahi muchidi wamuntu, nawa tunateli kuyikañesha ñahi?

¹³ Yilwilu yamukaayi yakojejaña antu kukaama kuspiritu. Antu amavulu anayiputishi nayuma yamukunkulwayi chakwila anakukañanya nikukeña ‘yuma yakuspiritu.’ (Mat. 5:3) Anadiñiji chikupu mumaheta amukaayi asañumunaña “kufwila kwachisemwa chaheseki, nikufwila  kwamesu.” (1 Yow. 2:16) Cheñi, akwakuhema yisela analetishi antu ‘kukeña yuma yawuseki seki’ nawa iyi yuma yinakuvulilaku chaaka nichaaka. (2 Tim. 3:4) Dichaletesheli Pawulu kuleja akwaKristu nindi “bayi mukeña yakukwasha nachu chisemwa chaheseki,” yaletaña tulu twakuspirituku.—Rom. 13:11-14.

14. Kusoñamishanyi kwekala haLuka 21:34, 35?

¹⁴ Twetejaña spiritu yaNzambi muchihandilu chetu yahanañayi Yehova kulonda yitukwashi kutiyishisha yuma yikukeña kumwekana hela chakwila spiritu yamukaayi yatwikañeshaña. ^[1] (1 Kor. 2:12) Hela chochu, twatela kubabala kuchina yuma yamunu mukaayi yitukañeshi kuzata nyidimu yetu yakuspiritu. (Tañenu Luka 21:34, 35.) Antu amakwawu atusehaña muloña wakutwalekahu kwikala atona, ilaña bayi chituzeyeshaku. (2 Pet. 3:3-7) Dichi twatela kudikundaña nawakwetu akwaKristu kukupompa kwatulombolañawu naspiritu yaNzambi.

15. A Petulu, Yakoba niYowanu elilidi, nawa chumichi chinateli kutumwekena ñahi ninetu?

¹⁵ Kubula kuwanina kunateli kutuleñela kukama tulu. Yesu welukili chikupu chaaku chawantu abula kuwanina chakuhuwankana muloña wakuzeyazeya kwamujimba. Talenu chuma chamwekeni nawufuku henohu Yesu kanda amujahi. Hakwila nawu yatwalekihu kwikala washinshika, wakeñekeleña kumukolesha kudi Tata yindi. Yesu wayilili aPetulu Yakoba niYowanu nindi ‘Tonenuña’ hampinji yalombeleñayi. Hela chochu, elukili wanyi kukala kwadiña kwakwihi nakumwekana. Chatela atwalekihu kutona hamu naMwanta wawu, azeyeli nawa alezumukilili mutulu. Hela chakwila Yesu wazeyeli kumujimba, ilaña wadiña wasoñama kuhitila mukulomba kudi Tata yindi chakubula kuleka. Atumbanji twindi niwena dichateleleliwu kwila.—Maku 14:32-41.

16. Kwesekeja naLuka 21:36, Yesu watulejeli kwikala ñahi “atona”?

¹⁶ Kwikala ‘atona’ kuspiritu kwatalisha hohu wanyi mukwikala namuchima wakufwila kutona. Henohu kunashali mafuku antesha nakumukwata Yesu mwitempa daÑesemani, wayilejeli atumbanji twindi kulomba nakulembelela Yehova. (Tañenu Luka 21:36.) Dichi hakwila nawu tutwalekihu kwikala atona kuspiritu, twatela kulombaña mpinji yejima.—1 Pet. 4:7.

17. Tunateli kumwekesha ñahi netu tunadiloñeshi nayuma yikumwekana katataka?

¹⁷ Chineli Yesu wahosheli nindi kukuma kwakenza ‘hampinji [yitukubula] kutoñojoka,’ ayinu bayi neyi himpinji yakunoñoka kuspiritu nakufwila yuma yamwituña yaletaña ikoku yakokwelañamu Satana niantu jindi niyuma yafwilaña mujimba wetuku. (Mat. 24:44) Nzambi naKristu atulejaña yuma yinatuhembeliwu kumbindi kuhitila muBayibolu nichitunateli kutwalekahu kwikala atona. Twatela kusha maana kuyuma yakuspiritu, wubwambu wetu naYehova nikutwamijaku Wanta hambidi. Twatela kwiluka mpinji niyuma yinakumwekana kulonda tudiloñeshi nayuma yinakwinza hambidi. (Chim. 22:20) Wumi wetu wudi hakatoña!