1, 2. Pawulu wamwekesheli ñahi kusakilila haluwi lwaNzambi lwasweja?

KAPOSTOLU Pawulu wahosheli chakufuma hamuchima nindi: “Luwi lwantiyililiyi [Nzambi] hilunayi mwamukunkuluku.” (Tañenu 1 Korinda 15:9, 10.) Pawulu welukili chikupu nindi hatambwilili hela hateleleli luwi lwaNzambi lwaswejaku, muloña wadiña mukwakukabisha akwaKristu.

² Pawulu henohu kanda yafwi, wamusonekeleli Timotewu wazatileñayi nindi nindi: “Nasakilili Kristu Yesu, Mwanta wetu, wanyinkeli ñovu, nanochu chanmweniyi kushinshika, hakunkunjika kumudimu windi.” (1 Tim. 1:12-14) Mudimwinyi? Pawulu walejeli aeluda amuchipompelu chamu Efwesesa iwu mudimu chahosheliyi nindi: ‘Wumi wami hinawumoni kulemaku mwaka niwukeñi; chakala nakamanishi njila yami, nimudimu wanyinkeliyi Mwanta Yesu kukalakala, wakushimwina nsañu yayiwahi yaluwi lwaNzambi yayiwahi.’—Yililu 20:24.

3. Mudimwinyi walema wamwinkeliwu Pawulu? (Talenu mwevulu wakutachikilahu.)

 ³ ‘Nsañwinyi yayiwahi’ yashimwininiyi Pawulu yamwekesheli luwi lwaYehova lwasweja? Walejeli akwaKristu amuEfwesesa nindi: “Munatiyi chanankunjikuwu kumudimu wakuyishimwina luwi lwaNzambi.” (Efwes. 3:1, 2) Pawulu amwinkeli mudimu wakushimwina nsañu yayiwahi kudi antu abulili kwikala aYudeya kulonda niwena ekali hakachi kanowu akayuula hamu naKristu muchiyuulu chaWanta wawuMesiya. (Tañenu Aefwesesa 3:5-8.) Pawulu wazatili mudimu wakushimwina neyena, dichi twatela kumwimbujola etu kwaKristu ayinu mpinji nikumwekesha nawu luwi lwaNzambi lwasweja lwamumwekesheleliwu “hilunayi mwamukunkuluku.”

4, 5. Muloñadi chitukuhoshela netu ‘nsañu yayiwahi yaWanta’ yinesekani nansañu yayiwahi ‘yaluwi lwaNzambi lwasweja’?

⁴ Munanu mafuku akukuminina, antu jaYehova ayinka mudimu wakushimwina “nsañu iyi yaWanta yayiwahi . . . mwahita matuña ejima mwashakamawu antu, kulonda yakayilili nyuza yejima wunsahu.” (Mat. 24:14) Hakachi kansañu yitwashimwinaña hekala kutiyakesha ‘nsañu yayiwahi yaluwi lwaNzambi lwasweja’ muloña nkisu jejima jitwachiñejaña kutambwila neyi Wanta wunakuyuula yakenza kuhitila muluwi lwaYehova lwamwekesheliyi mudi Kristu. (Efwes. 1:3) Twasakililaña hamuntu nimuntu neyi cheliliyi Pawulu haluwi lwaYehova lwasweja kuhitila mukushimwina mumudimu neyena?—Tañenu Aroma 1:14-16.

⁵ Muchibaaba chinafumihu, twadizili etu akwanshidi chitunakuhetela muluwi lwaYehova lwasweja munjila jajivulu. Tudi namukudi kudi antu ejima wakuyileja Yehova chinakumwekeshayi luwi lwindi lwasweja nichiyanateli kuhetelamu hamuntu himuntu. Nzambi namwekeshi luwi munjilanyi jitunateli kulejaku amakwawu?

6, 7. Neyi tunakulumbulwila antu ifutu danyiloña, twatandishaña ñahi nsañu yayiwahi yaluwi lwaNzambi lwasweja?

⁶ Mukanu kaayi katama, antu neyi avulumuna amonaña nawu chidi hohu chiwahi, dichi eluka wanyi muloña waweni chakeñekelañawu ifutu danyiloña. Ilaña amonaña nawu chihandilu chawu chatama hichinakuyiletela muzañalu waweniku. Neyi ahosha nawaYinsahu jaYehova, antu amavulu elukaña chekala nshidi, yuma yafumaña munshidi nichitwatela kwila hakwila nawu tusubuki kuwuduñu wanshidi. Antu akweti nyichima yayovu adizaña nawu Yehova watemesheli Mwanindi hamaseki kulonda yatukuuli kunshidi nikukufwa muloña wakukeña kwindi kwabadika niluwi lwindi lwasweja.—1 Yow. 4:9, 10.

⁷ Talenu Pawulu chahosheli hadi Mwana kaYehova wakeñayi nindi: “Mudi yena [Yesu] dimu tukweti kukuula kwanatukuuluwu namashi indi, yowu kutwanakena nyiloña yetu, mweseka maheta aluwi lwindi [Yehova] lwasweja.” (Efwes. 1:7) Mulambu wefutu danyiloña daKristu wamwekeshaña kukeña kwaNzambi kwabadika niluwi Lwindi lwasweja. Neyi tukuhwelela mumulambu wefutu danyiloña daYesu, nshidi jetu akajanakena nawa  chinleji chetu akachitookesha. (Heb. 9:14) Iyi hinsañu yayiwahi yitwatela kulejaku antu amakwawu!

8. Muloñadi akwanshidi chatelelawu kukundama kudi Nzambi?

⁸ Tukweti mudimu wakuleja antu netu atela kwikala amabwambu naNleñi yawu. Neyi antu kanda akuhweleli mumulambu waYesu, Nzambi wayimonaña nindi hiyayilumbu jindi. Kapostolu Yowanu wasonekeli nindi: “Muntu wukukuhwelela Mwana wukweti wumi wahaya nyaka; hakwila muntu wabulaña kwovwahila Mwana hakamona wumuku, kuzuwa kwaNzambi kwashakama hadi yena.” (Yow. 3:36) Mulambu waKristu waletesha chitupeleli kukundama kudi Nzambi. Pawulu wahosheli nindi: “Ninenu hamwaka mwadiñi ambuka naNzambi, mwadiñi ayilumbu munyichima yenu, munyidimu yenu yatama; ilaña katataka nayikundamishi dehi mumujimba windi waheseki nakufwa kwindi.”—Kol. 1:21, 22.

9, 10. (a) Mudimwinyi wayinkeliyi Kristu amanakwindi awayishewa? (b) “Anyikoku acheñi” akwashaña ñahi amanakwawu awayishewa?

⁹ Kristu wayinka amanakwindi awayishewa ahamaseki mudimu wateneniyi Pawulu nindi “wakushimuna nsañu yakukundamisha.” Pawulu wasonekeleli akwaKristu awayishewa amumafuku awapostolu nindi: “Yuma yejima yakudi Nzambi, watukundamishili kudi yomweni mudi Kristu, watwinkeli mudimu wakushimuna nsañu yakukundamisha; yadiñiyi Nzambi mudi Kristu nakukundamisha antu ampata yamunu mwishina kudi yomweni, nakubula kuyifuukwila nyiloña yawu; natukunjiki mazu akukundamisha. Dichi etu tuyatuñanda twaKristu; chidi neyi Nzambi hakuyilembelela mudetu. Hitukuyilembelela hamujimba waKristu netu, kundamenu kudi Nzambi.”—2 Kor. 5:18-20.

¹⁰ “Anyikoku acheñi” atiyaña kuwaha kukwasha amanakwawu awayishewa mudimu wakushimwina. (Yow. 10:16) Chineli anakuzata neyi antemesha jaKristu, adi namudimu weneni wakudizisha antu chalala chakuspiritu nikuyikwasha kwikala nawubwambu wawuwahi naYehova. Iwu himudimu walema wakushimwina nsañu yayiwahi yaluwi lwaNzambi lwasweja.

11, 12. Muloñadi chitukuhoshela netu kudizisha antu chakulomba kudi Yehova hinsañu yayiwahi?

¹¹ Antu amavulu alombaña muloña kulomba kwayikwashaña, ilaña akañanyaña kwiluka nawu Nzambi watiyaña kulomba kwawu. Atela kwiluka nawu “Watiyaña mwalombañawu antu.” Davidi ñimbi yamasamu wasonekeli nindi: “Yeyi watiyaña mwalombañawu antu, antu ejima akwinza kudeyi. Nsañu jakuluwa hijikumbadika ñovu, ilaña eyi wakabuta nyiloña yetu.”—Mas. 65:2, 3.

¹² Yesu walejeli atumbanji twindi nindi: “Neyi mukulomba chuma mwijina dami nukuchila.” (Yow. 14:14) “Chuma” chinesekani nankeñelu yaYehova. Yowanu watuleja nindi: “Chitukubula kumutiya woma, tukwiluka netu neyi tukulomba chuma chamwaya muchima windi, wukututiya.” (1 Yow. 5:14) Twatiyaña kuwaha kuleja antu netu kulomba kwatukwashaña hohu wanyi ilaña dimu twakundaminaña kwakwihi ‘netanda daluwi  lwasweja’ lwaYehova! (Heb. 4:16) Neyi tuyidizisha chakulomba chiwahi, Muntu wuyatela kulomba niyuma yiyatela kulombawu, dikwila nawu tukuyikwasha kukundama kwakwihi naYehova nikukundejewa mumpinji yakala.—Mas. 4:1; 145:18.

13, 14. (a) Awayishewa akekala nakukooleka kwamuchidinyi kumbidi? (b) Awayishewa akazataña mudimwinyi?

¹³ Yehova wukatwalekahu kumwekesha luwi lwindi lwasweja nimwituña dadiha. Pawulu wasonekeli hakukooleka kwayinkayi Nzambi a 144, 000 atambikañawu kuya nakuyuula naKristu muWanta wamwiwulu nindi: “Nzambi wasweja kuheta luwi, nakukeña kwindi kwabadika kwatukeñeliyi nachu, hitwachidiñi twafwa nanyiloña yetu, watuhandishili chimu naKristu. Kuhandoku ayihandisha naluwi hohu. Watusañwili chimu nindi, watushakamishili chimu nindi mumawulu, mudi Kristu Yesu; kulonda akamwekeshi hanyaka yakenza mahetindi asweja aluwi lwakutukokweja mudi Kristu Yesu.”—Efwes. 2:4-7.

¹⁴ Chakala kwiluka yuma yayitentekelayi Yehova akwaKristu awayishewa neyi anashakami dehi hamatanda nakuyuula hamu naKristu mwiwulu. (Luka 22:28-30; Fwi. 3:20, 21; 1 Yow. 3:2) Yehova ‘wakayimwekeshela hanyaka yakenza mahetindi asweja aluwi.’ Akekala “Yerusalema Yayiha,” nsumbuki waKristu. (Chim. 3:12; 17:14; 21:2, 9, 10) Akazatila hamu naYesu ‘hakuuka nyuza,’ kulombola antu ovwahila nakuyisubula kunshidi nikukufwa nakuyilisha kwikala awanina.—Tañenu Chimwekeshu 22:1, 2, 17.

15, 16. Yehova wakayimwekeshela ñahi “anyikoku acheñi” luwi lwindi lwasweja kumbidi?

¹⁵ Twatañaña haAefwesesa 2:7 netu Nzambi wakamwekesha luwi lwindi lwasweja “hanyaka yakenza.” Chakadi nikujina, ituña dadiha hamaseki daYehova dakamwekesha “mahetindi asweja aluwi.” (Luka 18:29, 30) Hakachi kayuma yamaneni yakamwekesha luwi lwaYehova lwasweja hikusañula afu kufuma “mumajamu.” (Yoba 14:13-15; Yow. 5:28, 29) Amayala niambanda ashinshika afwili henohu mulambu waKristu kanda, kubombelahu “nianyikoku acheñi” ashinshika anakufwa munanu mafuku akukuminina, akayisañula kulonda akatwalekihu kumukalakela Yehova.

¹⁶ Yihita yawantu afwili chakubula kumwiluka Nzambi niwena akayisañula. Akekala nakukooleka kwakudiza hadi Yehova. Yowanu wasonekeli nindi: ‘Hinukumona afu, niamaneni nianyanya, hiyakwimena kumesu etanda dawanta; hiyakubakula nyikanda; hiyakubakula nimukanda wukwawu, wowu wawumi. Hiyakusompesha afu nansañu jayuma yelilañawu yasonekeluwu dehi munyikandoyu. Kaluñalwiji hakulubula afu adiñumu; kufwa Niijamu hiyakulubula afu adiñumu; hiyakuyisompesha wejima wawu hamuntu hamuntu mwomwelililañawu nyidimu yawu.’ (Chim. 20:12, 13) Hela chochu, ejima akasañulawu akalondelaña nshimbi jaNzambi jekala muBayibolu. Cheñi, akalondelaña nshimbi jajiha jakafumishawu ‘munyikanda’ jikashimuna chakakeñañayi Yehova nindi akashakameña mwituña dadiha. Neyi anayibakuli dehi iyi nyikanda, nsañu yakekalamu yikamwekesha cheñi luwi lwaYehova lwasweja.

17. Yumanyi yitwatela kwanukaña neyi tudi mumudimu wakushimwina?

¹⁷ Chineli kukuma kudi kwakwihi twatela kudikita chikupu mumudimu wakushimwina nsañu yayiwahi yaWanta. (Maku 13:10) Chakadi nikujina, nsañu yayiwahi yamwekeshaña luwi lwaYehova lwasweja. Twatela kwanukaña chumichi mpinji yejima neyi tudi mumudimu wakushimwina. Twatela kwiluka netu neyi tunakushimwina tunakumulemesha Yehova. Tunateli kwila mwenimu neyi tulejaña antu netu yikaninu yejima yamwituña dadiha yamwekeshaña luwi lwaYehova lwasweja.

18, 19. Twalemeshaña ñahi luwi lwaYehova lwasweja?

¹⁸ Chitukushimwinaña kudi antu, tunateli kuyilumbulwila netu muchiyuulu chaWanta waKristu, antu akahetela chikupu mumulambu wefutu nawa akekalaña awanina chovu chovu. Bayibolu yahosha nawu: “Kuleña kwakweni kufumi muwuduñu wakutoka kwiñili muwaana wawanyana kaNzambi wowu waana walema.” (Rom. 8:21) Chumichi chikamwekana kuhitila muluwi lwaNzambi lwasweja.

¹⁹ Tukweti mudimu wakuleja antu kutiyilila kuchikaninu chachiwahi chekala haChimwekeshu 21:4, 5: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Yehova washakama hetanda wahosheli nindi: “Tiya, hinukubalumuna yuma yejima yiikali yayiha.” Wahosheli cheñi nindi: “Sonekaku, muloña mazu awa atela kwitiya, alala.” Neyi tushimwinaña nsañu yayiwahi neyena kudi antu, tukulemesha luwi lwaYehova lwasweja.