AKWAKRISTU amumafuku awapostolu azatili nañovu kushimwina antu amavulu “nsañu . . . yayiwahi yaWanta.” (Mat. 24:14) Amakwawu ayileña nakuzatila kumatuña acheñi. Chakutalilahu, kapostolu Pawulu wayili kwiluña dinakutenawu makonu nawu Turkey nakushimwinaku chikupu hampinji yazatileñayi wumishonali. * Chimwahitili yaaka 2,000, mu 2014, antu ayili cheñi nakuzata kampeni kakushimwina muTurkey. Muloñadi chiyashililiku aka kampeni? Anyi azatili aka kampeni?

MuTurkey mudi akwakushimwina kubadika ha 2,800, ilaña mwituña dejima mudi antu 79 miliyoni. Dikwila nawu mukwakushimwina wumu muTurkey watela kushimwina antu kwakwihi na 28,000. Neyi chitunamoni, akwakushimwina ashimwinaña hohu antu antesha munidi ituña. Nkeñelu yanaka kampeni yadiña yakushimwina antu amavulu mumpinji yantesha hohu. Amanakwetu nawahela 550 ahoshaña idimi daTurkish afumini kumatuña acheñi ayili kuTurkey nakuzata aka kampeni hamu nawakwakushimwina amunidi ituña. Yumanyi yafuminimu?

Mudimu wakushimwina wayili mpuhu. Chipompelu chimu chamu Istanbul chasonekeli nawu: “Antu chatumweniwu, ehwileña nawu: ‘Mudi nakupompa kweneni tahindi? Tunakumona aYinsahu jaYehova kwejima!’” Chipompelu chamumusumba waIzmir chasonekeli nawu: “Muntu wumu wazatilaña kwemenaña matakisi wayili nakumwihula eluda wumu nindi, ‘Yumanyi yinakumwekana? Munatachi kudikita nankashi?’” Mwamweni, amweni chazatileñawu kampeni.

Amanakwetu afumini kwacheñi adikitili nankashi mudimu wakushimwina. Steffen, wakuDenmark, wahosheli nindi: “Mafuku ejima, nashimwinineña antu abulahu dehi kutiya nsañu hadi Yehova. Namweni nami inakutiyakesha ijina daYehova.” Jean-David wakuFrance wasonekeli nindi: “Mumukwakwa wumu twashimwinimu maora amavulu. Mudimu wawahili nankashi! Antu amavulu adiña ayiluka wanyi aYinsahu jaYehova. Hamatala ejima hitwayileña twahanjikileña, twayishimwinineña, kuyitalisha mavidiyo nikuyishila nyikanda eni matala.”

 Akwakushimwina 550 ahanini nyikanda 60,000 munyilungu yiyedi! Kampeni kaletesheli antu amavulu kutiya nsañu yayiwahi.

Iyena dakushimwina daswejeleliku. Mudimu wadimena wasañumwini amanakwetu amunidi ituña. Amavulu atachikili kutoñojoka kuzata mudimu wampinji yejima. Kuvula kwawapayiniya ampinji yejima muTurkey kwavuliliku mutukweji 12 twahiñili hanyima yakampeni.

Antu afumini kumatuña acheñi azatili kampeni, ahosheli kutalisha hakampeni chikayikwashili kushimwina chiwahi hampinji yafuntiliwu kwawu. Şirin, muhela wakuGermany, wasonekeli nindi: “Amanakwetu akuTurkey ashimwinaña chiwahi wunsahu wamumpanji. Natiyaña nsonyi kushimwina wunsahu wamumpanji. Ilaña nasakililaña hakampeni kadimena, chadikitileñawu amanakwetu nikulomba chankwashili kuzata kubadika chinazatileña. Nashimwinini nikuhana matilakiti munjila mwahitilaña antu! Ichi naleka dehi kutiya nsonyi.”

Johannes wakuGermany wahosheli nindi: “Nadizili yuma yayivulu mumudimu wakushimwina. Amanakwetu muTurkey anakufwila chikupu kushimwina chalala kudi antu amavulu. Ashimwinaña mpinji yejima. Nelileña chochimu chinafuntili kuGermany. Nawa chayinu mpinji inakushimwina antu amavulu nankashi.”

Zeynep wakuFrance wahosheli nindi: “Aka kampeni kankwashili kushimwina nankashi. Kankwashili cheñi kwikala wahamuka nikumukuhwelela Yehova.”

Akwakushimwina adikundili chikupu. Kukeña nikunuñañana kwadiña hakachi kawamanakwetu afumini kumatuña acheñi akwanukileña mpinji yejima. Jean-David itwatena hakusambila wahosheli nindi, “‘Twatompeli’ chisambu chawamanakwetu.” Wabombelelihu nindi: “Atutambwilili neyi amabwambu jawu nawa neyi antaña jawu. Twashakamineña mumatala awu. Namweni nami tudi amanakwetu niahela amukaayi kejima; neyi chochinatañileña munyikanda yetu. Ilaña nadimweneni namesu kapu!  Natiyili kuwaha kwikala hakachi kawantu jaYehova nawa nasakililaña haniku kukooleka.”

Claire wakuFrance wahosheli nindi: “Hela chakwila wafuma kuDenmark, France, Germany, hela Turkey, tudi chisaka chimu. Chadiña tuhu neyi Nzambi najimi jiñinza jejima jamatuña nachifutishu.”

Stéphanie wakuFrance wabombelelihu nindi: “Kampeni kadimena katudizishili nawu chuma chaleteshaña twikali anuñañana, bayi neyi muchidi hela yisemwaku ilaña kukeña kutwamukeña Yehova.”

Akwakushimwina akumatuña amavulu anakutoñojoka kuya nakuzatila kuTurkey muloña mudimu wakushimwina wuchidi weneni. Antesha aya dehi nakuzatilaku. Tunayisakilili nankashi enu ejima munayi nakukalakelaku.

Chakutalilahu, toñojokenu kadizanvu kanyanya kawakwakushimwina 25 adi mwiluña dimu. Hadi yaaka yayivulu adiña hohu naeluda wumu. Fwikejenu chatiyiliwu akwakushimwina chelili amanakwetu 6 kufuma kuGermany nikuNetherlands ayi nakuyikwashaku mu 2015.

Yumanyi yahoshañawu antu ayili nakuzatila kudi kukaankila muTurkey kutalisha hachihandilu? Kuhosha hohu chalala, mpinji yikwawu chakala, ilaña kuzatila kudi kukaankila mwafumaña yuma yayiwahi. Talenu chahoshañawu amakwawu:

Federico manakwetu wasumbula wudi nayaaka yamu 40 wafumini kuSpain wahosheli nindi: “Kubula kwikala namaheta amavulu kwankwashaña kwikala wakasunuka nikusha maana hayuma yalema.” Komana walemesha iwu mudimu? Wahosheli nindi, “Eña, nawulemesha nankashi! Neyi wuya kwiluña dacheñi nankeñelu yakukwasha antu kumwiluka Yehova, wukwikala mumakasa indi. Wukumona neyi Yehova nakukukwasha chikupu.”

Rudy, manakwetu wasumbula wudi nayaaka yamuma 50 wakuNetherlands wahosheli nindi: “Kukalakela kudi kunkankila nikudizisha antu abulahu dehi  kutiya chalala, kwatuletelaña muzañalu weneni. Kumona muzañalu wamwekeshañawu antu neyi eteja chalala, chatuzañaleshaña.”

Sascha, manakwetu wasumbula wudi nayaaka yamuma 40 wafumini kuGermany, wahosheli nindi: “Mpinji yejima yinashimwinaña, nawanaña antu abulahu dehi kutiya chalala. Kukwasha antu amuchidiwu kumwiluka Yehova kwanzañaleshaña nankashi.”

Atsuko, muhela wasumbuka wudi nayaaka yamuma 30 wakuJapan, washimwini nindi: “Kunyima, nakeñeleña nami Amagedoni yinzi swayi. Ilaña chinayili kuTurkey, namusakililaña Yehova nami wuchidi wadiwunjika. Chinamona Yehova cheleñayi yuma, chanleñelaña kuswina kwakwihi nayena.”

Alisa, muhela wudi nayaaka yamuma 30 wakuRussia, wahosheli nindi: “Kumuzatila Yehova mumudimu wamuchidiwu kunankwashi kumutompa nakutiya chawahayi.” (Mas. 34:8) Wabombelelihu nindi: “Yehova hiTata nawa Ibwambu dami nakeña, namwiluka chikupu mumpinji yayiwahi niyakala. Natiyaña kuwaha nayuma yayiwahi yinamonaña ninkisu jajivulu jinatambwilaña.”

Kampeni kadimena kakushimwina kadiña muTurkey, kaletesheli nsañu yayiwahi yishiki kudi antu amavulu. Hela chochu, maluña amavulu kanda ashikiku. Mafuku ejima, antu ayaña kudi kukaankila muTurkey awanaña antu abula kumwiluka Yehova. Kwila muya nakuzatila kwiluña damuchidiwu nehi? Neyi munakukeña, tunayikoleshi netu: “Fumbulenu mesu enu kulonda mutali maha, chiyanatookashaniwu dehi to-o, anashiki dehi hampinji yakwaañula.” (Yow. 4:35) Kwila mukwasha mumaluña amukaayi “anashiki dehi hampinji yakwaañula” nehi? Neyi munakukeña, tachikenu kudiloñesha kulonda mukatweshi kuya nakukalakelaku. Walala wudi wakwila nawu: Kuzata chikupu mumudimu wakutandisha nsañu yayiwahi “kwakumina iseki dejima” kukuyiletela muzañalu weneni wumwabulahu dehi kutiya.—Yilw. 1:8.