“Akwinki . . . Mwejima Muwafuukula”
“Tiyaku Yehova kuwaha, wakakwinka yakeña muchima weyi.”—MAS. 37:4.
TUMINA: 89, 140
1. Yumanyi yatela kufuukulawu atwansi hayuma yakelawu kumbidi, ilaña muloñadi chiyatela kubulilawu kusweje kwakama? (Talenu mwevulu wakutachikilahu.)
ENU atwansi munateli kwiteja nenu henohu kanda muyi hawenyi, mwatela kwiluka kumunakuya. Chihandilu chidi neyi wenyi nawa mwatela kutoñojoka kumunakuya henohu muchidi atwansi. Hela chochu, kufuukula kwakala. Kansi wamumbanda wejina daHeather wahosheli nindi: “Chatiyishaña woma. Watela kufuukula yuma yiwakelaña muchihandilu cheyi chejima.” Ilaña ikalaku wahamuka. Yehova wayileja antu jindi nindi: “Bayi wuyeñashanaku, ami yami Nzambi yeyi. nakakukwashañaku.”—Isa. 41:10.
2. Muneluki ñahi nenu Yehova wakeñaña nindi mwatela kufuukula yuma yikwakela kumbidi?
2 Yehova wayileja nindi mwatela kufuukulañahu dehi yuma yimwakela kumbidi. (Mukwa. 12:1; Mat. 6:20) Wakeñaña nindi mwikali namuzañalu. Yuma yayiwahi yaleñayi yamwekeshaña nawu nakukeña nindi mwikali namuzañalu. Shinshikenu cheñi chatwakamenañayi nikutuleja njila yayiwahi yakuhandilamu. Yehova walejaña antu akaanaña kufumba kwindi nindi: “Himukwila chuma chinantamini kumesu ami. . . . Tiyenu ambuñami akatiyaña kuwaha hakwila enu mwakatiyaña nsonyi. Tiyenu ambuñami akembaña tumina twachiseki mumuchima.” (Isa. 65:12-14) Yehova amulemeshaña neyi antu jindi afuukulaña chiwahi.—Yish. 27:11.
KUFUUKULA KUNATELI KUYILETELA MUZAÑALU
3. Yehova nakukeña nindi mwileñadi?
3 Yumanyi yakeñañayi Yehova nindi mufuukuleña? Waleñeli antu nindi ekaleña namuzañalu kuhitila mukumwiluka nikumukalakela nakashinshi. (Mas. 128:1; Mat. 5:3) Twambukaku chikupu nawatunyama aleñayi, wena akuminaña hohu dakuda, kunwa nikusema. Nzambi nakukeña nindi mwikaleña namuzañalu, kuhitila mukufuukula chiwahi kubadika kufuukula hohu yuma yelañawu anyama. Nleñi yenu ‘hiNzambi wakukeña,’ “Nzambi wamuzañalu,” waleñeli antu “neyi chekalayi yomweni.” (2 Kor. 13:11; 1 Tim. 1:11; Kutach. 1:27) Mukwikala namuzañalu neyi mumwimbujola Nzambi yetu wakukeña. Mwamonahu dehi kushikijewa kwansona yahosha nawu: “Mukuhana mwekala muzañalu chikupu kubadika wekala mukutambwila”? (Yilw. 20:35) Ichi dichatiyañawu antu. Dichi, Yehova nakukeña nindi kufuukula kwenu kumwekesheña nawu mwakeña akwenu niNzambi.—Tañenu Matewu 22:36-39.
4, 5. Yumanyi yamuzañalesheleña Yesu?
4 Atwansi atela kwimbujola Yesu Kristu. Hadiñayi kansi, wadiña nakuhema nawakwawu. Izu daNzambi dahosha nawu kwekala “mpinji yakuseha . . . nimpinji yakuhañana.” (Mukwa. 3:4) Yesu niyena waswinini kwakwihi naYehova kuhitila mukudiza jiNsona. Hadiñayi nayaaka 12, antañishi mutembeli ahayamini “nañakwilu yindi nikashinshi” kakutiyishisha yuma yakuspiritu.—Luka 2:42, 46, 47.
5 Yesu wadiña namuzañalu. Yumanyi yamuzañalesheleña? Welukili nindi, hakachi kayuma yejima, Nzambi wakeñeleña nindi yashimwini “nsañu yayiwahi kudi atuzweñi . . . nikutonesha amputamesu.” (Luka 4:18) Kwila yuma yamulejeliwu kudi Nzambi dikwamuletesheli Yesu kwikala namuzañalu. Masamu 40:8 yamwekeshaña chatiyañayi nawu: “Natiyi kuwaha nakwila muchima weyi, eyi Nzambi yami.” Yesu wayidizishileña antu hadi Tata yindi wamwiwulu. (Tañenu Luka 10:21.) Mpinji yimu, hanyima yakumudizisha mumbanda wumu hakudifukula kwalala, Yesu wayilejeli atumbanji twindi nindi: “Yakuda yami yowu kwila nkeñelu yanowu wantemesheli nikumanisha mudimu windi.” (Yow. 4:31-34) Kumukeña Nzambi niantu dikwamuzañalesheleña Yesu. Ninenu kunateli kuyizañalesha.
6. Muloñadi chichalemena kuhanjeka yuma yimunakufuukula kwila nawakwaKristu apama?
6 AkwaKristu amavulu adiña namuzañalu hampinji yazatileñawu wupayiniya henohu achidi atwansi. Kwila muhanjeka nawu yuma yimunakufwila kwila nehi? “Habula mpuña yuma yiwafuukwili kwila hiyamwekanañaku; ilaña havula akwakushakama hampuña yakolaña.” (Yish. 15:22) Awa antu apama kuspiritu anateli kuyileja nawu mumudimu wampinji yejima munateli kudiza yuma yimukazatishaña muchihandilu chenu chejima. Hanyima yakumudizisha kudi Tata yindi mwiwulu, Yesu watwalekelihu kudiza nihampinji yazatileñayi mudimu wakushimwina hamaseki. Chakutalilahu, wamweni muzañalu wafumaña mukushika antu hanyichima nansañu yayiwahi nimuzañalu wenzaña muloña wakutwalekahu kwikala washinshika neyi wudi mukweseka. (Tañenu Isaya 50:4; Heb. 5:8; 12:2) Tuhanjekenu nyidimu yekala mumudimu wampinji yejima yinateli kuyiletela muzañalu.
YUMA YAKWASHAÑA AKWAKWILISHA ATUMBANJI
7. Muloñadi atwansi amavulu chatiyilañawu kuwaha kwilisha atumbanji?
7 Yesu wahosheli nindi: “Yenu mwakelishi antu . . . ekali atumbanji. . . muyidizisheña.” Mat. 28:19, 20) Neyi munakufwila kwikala mukwakwilisha atumbanji, mukutonda mudimu wawuwahi, wakumulemesha Nzambi. Neyi chochekala nyidimu yejima, hatela kushimbula hakwila nawu mukulukili. Manakwetu Timothy watachikili wupayiniya hadiñayi kansi, katataka wahosheli nindi: “Nakeña kumukalakela Yehova mumudimu wampinji yejima muloña dimu munamwekeshelaña nami namukeña. Hatachi, nakañenyi kwikala nawatudizi aBayibolu, ilaña chinayili kwiluña dacheñi dakushimwina nekalili nawatudizi amavulu mukakweji kamu. Kadizi wumu watachikili kwinza Kwitala daWanta. Chinafumini Kushikola yaKudiza Bayibolu Yawamana Kwetu Ajiki hadi tukweji tuyedi, * antumini kwiluña dacheñi kunatachikili atudizi awaana. Nakeña kudizisha antu, nawa namoni nami spiritu yajila yinakuyikwasha.”—1 Tesa. 2:19.
(8. Atwansi amavulu akwaKristu anazati ñahi nankashi mudimu wakwilisha atumbanji?
8 Atwansi amakwawu anadizi madimi acheñi. Chakutalilahu, Jacob, wakuNorth America, wasonekeli nindi: “Hinadiña nayaaka 7 akwetu amavulu mutwatañilileña shikola adiña akuVietnam. Nakeñeleña kuyidizisha hadi Yehova, dichi mukuhita kwampinji nafuukwilihu kudiza idimi dawu. Kakavulu nadizili kuhitila mukwesekeja Kaposhi Kakutalila kaChizungu nakedimi daVietnamese. Cheñi nadiña nawamabwambu muchipompelu chazatishileña idimi daVietnamese. Chinashikijili yaaka 18, natachikili wupayiniya. Kuhiñahu, nayili kuShikola yaKudiza Bayibolu Yawamana Kwetu Ajiki. Chumichi chankwashili mumudimu wami wawupayiniya, chakwila yami hohu eluda mwizanvu dazatishaña idimi daVietnamese. Antu ahoshaña idimi daVietnamese azañalalaña hakumona nawu nadizi idimi dawu. Kakavulu antambikileña nawu nidizeña nawu Bayibolu. Amakwawu anapapatishewi.”—Esekejenu Yilwilu 2:7, 8.
9. Mudimu wakwilisha atumbanji watudizishañadi?
9 Kwilisha atumbanji kunateli kuyikwasha kwikala nayilwilu yayiwahi, kwiluka chakuhosha nawantu, kudikuhwelela nikwikala ababala. (Yish. 21:5; 2 Tim. 2:24, ftn.) Ilaña kakavulu kwaletaña muzañalu muloña kwayikwashaña kwiluka jiNsona hashindamena chikuhwelelu chenu. Mukwiluka cheñi chakuzata naYehova.—1 Kor. 3:9.
10. Munateli kwikala ñahi namuzañalu wakwilisha atumbanji hela chakwila mwiluña denu hiyatambwilaña nsañu yayiwahiku?
10 Munateli kwikala namuzañalu wakwilisha atumbanji hela chakwila antu antesha mwiluña denu, diwu etejaña nsañu yayiwahi. Kwilisha atumbanji himudimu wakuzatila hamu. Chipompelu chejima chakeñakeñaña antu ovwaha nyichima. Hela chakwila manakwetu hela muhela diyi wunamwilishi muntu kwikala kambanji, ejima wawu azatili mudimu wakukeñakeña nawa wejima wawu akwikala namuzañalu. Chakutalilahu, Brandon wazatili hadi yaaka 9 wupayiniya mwiluña mwabulaña kutambwilawu nsañu yayiwahi. Wahosheli nindi: “Nakeña kushimwina nsañu yayiwahi muloña Yehova diyi watuleja kwila mwenimu. Chinamanishili shikola Natachikili kuzata wupayiniya. Natiyaña kuwaha kukolesha amanakwetu atwansi muchipompelu nikumona chiyanakupaminaku kuspiritu. Chinafumini kuShikola yaKudiza Bayibolu Yawamana Kwetu Ajiki antemesheli kuya nakuzata wupayiniya kwiluña dacheñi. Hela chakwila hinadizishihu muntu hela wumu kushika kuchipapatishiku, ilaña amakwawu ayidizishaña nawa apapatishewaña. Natiyaña kuwaha muloña nafuukwilihu kuzata mudimu wakwilisha atumbanji.”—Mukwa. 11:6.
YUMA YAYIWAHI YAFUMAÑA MUKUFUUKULA CHIWAHI
11. Mudimwinyi wajila wunakuzatawu atwansi amavulu?
11 Kudi njila jajivulu jakumukalakelamu Yehova. Chakutalilahu, atwansi amavulu adihanaña kuzataku mudimu wakutuña. Matala aWanta amavulu anakukeñeka. Kuyituña himudimu wajila wamulemeshaña Nzambi nawa wunateli kuyiletela muzañalu. Neyi chochekala nyidimu yejima yajila, kuzatila hamu mukunuñañana nawakwetu kwatuletelaña muzañalu. Nyidimu yakutuña yawanta yatudizishaña yuma yayivulu, yatudizishaña kwikala asoñama hakuzata, kwikala adikita nikuzatila hamu nawantu anakulombola.
Nkisu jajivulu jinakutalila antu akufwila kuzata mudimu wampinji yejima (Talenu maparagilafu 11-13)
12. Mudimu wawupayiniya wunateli kuleñela ñahi muntu kwikala nakukooleka kwakuzata nyidimu yikwawu?
12 Manakwetu Kevin wahosheli nindi: “Kufuma tuhu kuwansi, nafwilileña kumuzatila Yehova mumudimu wampinji yejima. Dichi, chinashikijili yaaka 19, natachikili kuzata wupayiniya. Natachikili kukwasha manakwetu wadiña mukwakutuña. Nadizili kupopa malata, kusha mawindu nikupata yenzelu. Kuhiñahu, hadi yaaka yiyedi nazatili mwizanvu dakwashaña neyi kunamwekani hurricane, kutuñulula Matala aWanta nimatala awamanakwetu. Chinatiyili nawu kuSouth Africa kudi kukankila kwawakwakutuña, nenhwili nami niyi nakuzatilaku nawa antambikili. Munu muAfrica, nelaña chitwatuña Itala daWanta dimu munyilungu yantesha nayaña nakutuña dikwawu. Izanvu dakutuña mutwazatilaña dekala neyi chisaka. Twashakamaña hamu, twadizilaña hamu Bayibolu nawa twazatilaña hamu. Nashimwinaña cheñi nawamanakwetu amuchipompelu mulungu nimulungu. Yuma yinafuukwili hinadiña kansi yinankwashi kwikala namuzañalu wunabulili kukuhwelela.”
13. Nyidimu yahaBeteli yayizañaleshaña ñahi atwansi?
13 Amakwawu afuukwilihu kumukalakela Yehova mumudimu wampinji yejima
anakuzatila haBeteli. Kuzatila haBeteli kwaletaña muzañalu, muloña nyidimu yejima yiwukuzata yaYehova. Chisaka chaBeteli chakwashaña kuloñesha yakuda yakuspritu. Dustin wazatilaña haBeteli wahosheli nindi: “Hinadiña nayaaka 9, nafuukwilihu kuzata mudimu wampinji yejima nawa natachikili kuzata wupayiniya chinamanishili shikola. Mukumana kwachaaka chimu nachikunku, antambikili kuya haBeteli, nadizili chakuzatisha ikina dakupulintila nawa natachikili kuzatila kudipatimenti yamaprogilamu ahakompyuta. HaBeteli, natiyaña kuwaha kwikala watachi kutiya nsañu yamudimu wakwilisha atumbanji chiwunakuyilaku hambidi mukaayi kejima. Nakeña kuzatila haBeteli muloña nyidimu yitwazataña yakwashaña antu kuswina kwakwihi naYehova.”YUMANYI YIMUNAKUFWILA KWILA KUMBIDI?
14. Munateli kufuukula ñahi kuzata mudimu wampinji yejima?
14 Munateli kufuukulahu ñahi kwikala mukwaKristu wampinji yejima? Yilwilu yayiwahi diyikuyikwasha kumukalakela Yehova mpinji yejima. Dichi dizenuña Izu daNzambi mpinji yejima, toñojokenuñahu chikupu mudatalisha nawa nikumwekesha kashinshi kenu kuchipompelu. Hampinji yimudi kushikola, munateli kudiza chakushimwina chiwahi nsañu yayiwahi. Dizenu chakwihula antu chatoñojokañawu nikutiyilila kuñakwilu yawu. Cheñi, munateli kudihana kuzataku nyidimu yamuchipompelu, yidi neyi kuwahisha nikuloñesha Itala daWanta. Yehova watiyaña kuwaha kuzatisha antu adizoza, adihana. (Tañenu Masamu 110:3; Yilw. 6:1-3) Kapostolu Pawulu wazatili naTimotewu mudimu wawumishonali muloña “amuhamekeleña chachiwahi kudi anakwindi.”—Yilw. 16:1-5.
15. Munateli kudiloñesha ñahi kuzata nyidimu yakudikwasha nachu?
15 Akwakukalakala mudimu wampinji yejima akeñekaña kuzata nyidimu yakudikwasha nachu. (Yilw. 18:2, 3) Hadaha munateli kudizaku mudimu wunateli kuyikwasha kwiñila mudimu wudi mwiluña denu. Chimukufuukulaña, ihulenu nkoñi wañinza niapayiniya amwiluña denu. Yihulenu nyidimu yayiwahi yatela kwiñilayi payiniya. Nawa, neyi chochahosha Bayibolu nawu, “kunjikaku nyidimu yeyi kudi Yehova, niyiwafuukulaña akayikolesha.”—Yish. 16:3; 20:18.
16. Kumuzatila Yehova mumudimu wampinji yejima himuchidi atwansi kukayikwasha ñahi kuzata nyidimu yikwawu kumbidi?
16 Kuhwelelenu nenu Yehova nakukeña nindi ‘mukwatishi’ muzañalu wudi kumbidi. (Tañenu 1 Timotewu 6:18, 19.) Mudimu wampinji yejima wukuyikwasha kudikunda nawakwenu adi mumudimu wampinji yejima nawa wukuyikwasha kwikala mukwaKristu wapama. Amavulu anamoni nawu kumukalakela Yehova mumudimu wampinji yejima hadiñawu atwansi kunayikwashi kwikala nawulu wakola. Kakavulu, antu azataña wupayiniya henohu kanda adisumbuli atwalekañahu kuzatila hamu hanyima yakudisumbula.—Rom 16:3, 4.
17, 18. Kufuukula kwakeñekaña ñahi kuzatisha muchima?
17 Hakwila nawu wufuukuli watela kuzatisha muchima. Masamu 20:4 yahosha hadi Yehova nawu: “Akwinki mwakeña muchima weyi, eli mwejima muwafuukula.” Dichi toñojokenu yuma yimunakufwila kwila muchihandilu chenu. Toñojokenu yuma yinakwilayi Yehova makonu nichimunateli kuzata mudimu windi. Kufumahu fuukulenu yuma yikumuzañalesha.
18 Kumukalakela Yehova mumudimu wampinji yejima kukuyiletela muzañalu muloña diyi njila yayiwahi yakumulemeshelamu Nzambi. Mwamweni, “tiyaku Yehova kuwaha, wakakwinka yakeña muchima weyi.”—Mas. 37:4.
^ para. 7 Yinasinsiwu kudi Shikola Yawakwakushimwina aWanta.