1, 2. Muloñadi chitukuhanjekela hachitunateli kukundeja anafwishi? (Talenu mwevulu wakutachikilahu.)

SUSI wahosheli nindi: “Twaneñeli chikupu kwakwihi nachaaka chimu chelili mwanetu yafwi.” MukwaKristu wumu niyena wahosheli nindi chafwiliyi ñodindi, “wakatili nankashi.” Chawushona, antu amavulu anakumona kukala kwamuchidiwu. AkwaKristu amavulu muchipompelu akuhweleleli wanyi nawu antaña jawu akafwa henohu aAmagedoni kanda. Chili mwafwisha ntaña yenu hela mwelukahu antu amu anafwishi, munateli kutonojoka nenu, ‘Antu anafwishi anateli kukwashewa ñahi kulonda abuli kusweja kuneña?

² Hadaha mwatiyahu dehi antu anakuhosha nawu hahitaña mpinji hakwila nawu muntu yaleki kuneña. Hela chochu, komana chinayi mukwila nawu kuhita kwampinji kunateli kuuka muchima wunabaluki? Ntuluwa wumu wahosheli nindi, “Namoni nami yuma yikwilayi muntu hampinji yimu diyi yinateli kumukwasha.” Mwamweni, chineñi chinateli kumana chovu-chovu neyi chochakusukaña chilonda neyi  munakuchakamena. Chumanyi chinateli kuyikwasha antu anafwishi kumanisha chineñi?

3, 4. Tunekuki ñahi netu Yehova weluka nindi muntu wunafwishi watelela kukundejewa?

³ Chakadi nikujina, Yehova diyi Tata yetu wamwiwulu wasweja luwi watukundejaña. (Tañenu 2 Akorinda 1:3, 4.) Yehova, muntu wasweja luwi walejeli antu jindi nindi: “Ami, chalala yami, nayikundejaña.”—Isa. 51:12; Mas. 119:50, 52, 76.

⁴ Tata yetu wasweja luwi niyena wajimbeshahu dehi antu akeñayi adi neyi, Abarahama, Isaka, Yakoba, Mosi niMwanta Davidi. (Kuch. 12:6-8; Mat. 22:31, 32; Yilw. 13:22) Izu daNzambi datulejaña nawu Yehova nakufwila chikupu nindi yakayisañuli. (Yoba 14:14, 15) Akazañalala nawa akekala nanyijimba yakola. Shinshikenu cheñi hadi Mwanindi asweja kukeñayi ‘wamutiyishilaña kuwaha hefuku-hefuku,’ wafwili kufwa kwayeña. (Yish. 8:22, 30) Tukutwesha wanyi kulumbulula chatiyiliyi Yehova.—Yow. 5:20; 10:17.

5, 6. Yehova nateli kutukundeja ñahi?

⁵ Tunateli kukuhwelela chikupu netu Yehova wakatukwasha. Bayi tushintajala kumulejamu mukulomba chakufuma hamuchima chitunakutiyaku. Twakundejewaña chikupu kwiluka netu Yehova weluka chitwatiyaña nawa watukundejaña! Watukundejaña ñahi?

⁶ Nzambi watukundejaña kuhitila “mukuwunda kwaspiritu yajila.” (Yilw. 9:31) Ñovu yaNzambi yazatikaña yatukundejaña nankashi. Yesu washiikili nindi Tata yindi wamwiwulu wakenka “antu amulombaña spiritu yajila.” (Luka 11:13) Susi, itwatena hakusambila wahosheli nindi: “Kakavulu twafukamineña nakulomba kudi Yehova kulonda yatukundeji. Mpinji yejima, kuwunda kwaNzambi kwakundejeli nyichima niyitoñojoka yetu.”—Tañenu Afwilipi 4:6, 7.

7, 8. Tuneluki ñahi netu Yesu wakakundeja antu?

⁷ Luwi lwaYehova lwamwekeni mumazu nimuyilwilu yamwekesheliyi Mwanindi, Yesu hampinji yadiñayi hamaseki. (Yow. 5:19) Yesu amutemesheli kulonda yakundeji “abaluka nyichima” ‘niejima adilaña.’ (Isa. 61:1, 2; Luka 4:17-21) Dichi amwilukili nawu wadiña naluwi, watiyileña washona antu adiña nakukabakana nikufwila kufumisha makabi awu.—Heb. 2:17.

⁸ Hadiñayi kansi, Yesu watela watiyileña wushona chafwishiliyi antaña jindi niamabwambu jindi. Chinamwekani neyi tata yindi wakuwanamu Yosefu, wafwili hampinji yadiñayi Yesu mukwenzi. * Fwikijenu chatiyiliyi Yesu, hadiñayi kampululu indi kwiji nayaaka yamuma 20, wateleleli kudikundeja nikukundeja mama yindi, amanakwindi niahelindi.

9. Yesu wamwekesheli ñahi nindi watiyili wushona chafwiliyi Lazaru?

⁹ Yesu chatachikiliyi mudimu windi, washili maana hakushimwina  nikwakamena chatiyileñawu antu. Chakutalilahu, toñojokenu chatiyiliyi hampinji yafwiliyi ibwambu dindi Lazaru. Hela chakwila Yesu welukili nindi wukumusañula, watiyili wushona chadilileñawu aMariya naMata. Chamukatili chikupu kumuchima chakwila wadilili nikudila.—Yow. 11:33-36.

10. Tukukuhwelela ñahi netu Yesu nakutiyila antu wushona makonu?

¹⁰ Mazu aYesu awushona nawa akukundenja atukwashaña ñahi makonu? Nsona yatulejaña nawu “Yesu Kristu wekala yowumu nihaloshi, nilelu nihaya nyaaka.” (Heb. 13:8) Chineli “Ntwamina Muneni wawumi” weluka chatiyakanaña wushona, “nateli kukwasha antu anakwesekawu.” (Yilw. 3:15; Heb. 2:10, 18) Dichi, tunakuhweleli chikupu netu Yesu natwalekihu kumona chinakukabakanawu antu, chinakutiyawu wushona nawa nakuyikundeja “hampinji yatelela.”—Tañenu Aheberu 4:15, 16.

11. Nsonanyi jimunamoni nenu jinateli kuyikundeja?

¹¹ Nsañu yahosha hawushona watiyiliyi Yesu hampinji yafwiliyi Lazaru hinsañu yimu yakukundeja yekala Mwizu daNzambi. Dichayisonekeleliwu, “muloña yuma yejima yasonekeliwu kunyima, ayisonekeli kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.” (Rom. 15:4) Neyi munafwishi, ninenu munateli kukundejewa nansona jidi neyi iji jinalondelihu:

• “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.”—Mas. 34:18, 19.

• “Chimwekalaña yitoñojoka yayivulu mumuchima wami, kukundeja kundeja kuwankundejaña [eyi Yehova] kwatiyishaña muchima wami kuwaha nankashi.”—Mas. 94:19.

• “Nzambi Tata yetu watukeña, nawa muloña waluwi lwindi lwasweja, watwinkaña kukundeja kwahaya nyaaka nikuchiñeja kwakuwahi. Tunakulomba netu Yena niMwanta wetu Yesu Kristu, akundeji nyichima yenu nikuyikolesha chikupu.”—2 Tes. 2:16, 17. *

12. Njilanyi yimu yalema yitunateli kukundejelamu antu amakwawu?

¹² Antu ananeñi atambwilaña kukundejewa kuchipompelu chawakwaKristu. (Tañenu 1 Atesalonika 5:11.) Munateli kukolesha nikukundeja ñahi antu akweti “muchima wabaluka”? (Yish. 17:22) Ilukenu nenu kwekala “mpinji yakumwena, nimpinji yakuhosha.” (Mukwa. 3:7) Dalene wafwishili wahosheli nindi: “Antu anafwishi akeñaña kushimuna chinakutoñojokawu nichinakutiyawu. Dichi, chuma chimwatela kwila kudi muntu wunafwishi hikumutiyililila chakadi kumuketula neyi nakuhosha.” Junia, wadiña namanakwindi wadijahili niyena wahosheli nindi: “Hela chakwila hiwukutwesha kwiluka chinaneñiwuku, chuma chalema hikwiluka chinakutiyawu.”

13. Yumanyi yitwatela kwanuka hachineñi?

¹³ Ilukenu cheñi nenu, yuma yayineñeshaña antu yekala yambuka nawa hiyaneñaña munjila yoyimuku. Mpinji yikwawu, muntu wukufwila tuhu mukachi  nachineñi, kulejaku antu amakwawu nehi. Izu daNzambi dahosha nawu: “Muchima wamuntu diwu weluka kulula kwawu; hela muwukuzañalela muntu wacheñi kutwesha kwiñilamu nehi.” (Yish. 14:10) Hela chakwila muntu wukushimuna chinakutiyayi, chakala kutiyishisha chinakuhoshayi.

14. Tunateli kukundeja ñahi antu ananeñi?

¹⁴ Mwamweni, chinateli kukala kwiluka mazu akuhosha namuntu wunaneñi. Hela chochu, Bayibolu yahosha nawu “madimi awakwamaana akoleshaña antu.” (Yish. 12:18) Antu amakwawu akundejewaña nansañu yekala mubuloshuwa yakwila nawu Ilyo Untu Watemwa Afwa. * Kakavulu, chuma chapela chimwatela kwila hikudilila “hamu nawantu adilaña.” (Rom. 12:15) Gaby, wafwishili nfumwindi wahosheli nindi, “Kudila dikwankwashaña. Dichi nakundejewaña neyi akwetu ankwashaku kudila. Neyi ankwashaku kudila, namonaña nami naneñi nkawami wanyi.”

15. Tunateli kukundeja ñahi muntu neyi chatukalilaña kukundeja namazu amukanwa? (Talenu chikasha chinakwila nawu “Mazu Amawahi Akukundeja.”)

¹⁵ Neyi chayikalilaña kukundeja muntu namazu amukanwa, munateli kumukundeja kuhitila mukutemeshela kaadi, e-melu, meseji hela mukanda. Munateli kusonekamu mazu akukundeja ekala munsona, yuma yelileñayi muntu wunafwi, yilwilu yindi yayiwahi nichuma chachiwahi chayilililiyi chimwamwanukilañahu. Junia wahosheli nindi, “Kutambwila meseji yakukundeja hela kuntambika kudi akwetu akwaKristu kwankolesheña chikupu.  Chumichi chankwashaña kumona nami akwetu ankeña nawa añakamenaña.”

16. Njilanyi yimu yayiwahi yakukundejelamu?

¹⁶ Ilukenu nenu kulombelaku akwenu akwaKristu anafwishi kwalema. Hela chakwila chinateli kuyikalila kulomba iku munaneñi, ilaña kulomba kwenu kwakulemba kumukuyilombelaku iku munakudila hela munakushikoka, kunateli kuyikundeja ananeñi. Dalene wahosheli nindi, “Mpinji yikwawu neyi ahela enza nakunkundeja nayilaña nami alombi neyi chinatwesheki. Hakutachika kulomba, chayikalilaña kutena mazu ilaña chihahita mpinji atachikaña kuhosha chiwahi nawa alombaña chakufuma hamuchima. Chikuhwelelu chawu, kukeña kwawu, nichañakamenañawu chakoleshaña chikuhwelelu chami.”

17-19. Muloñadi chitwatelela kutwalekahu kukundeja antu?

¹⁷ Antu amakwawu atwalekañahu kuneña hadi mpinji yayilehi amakwawu nehi. Dichi, yihempulenuña mpinji yejima, bayi neyi hampinji yinafwishiwu hohuku, ilaña nihampinji yakwila antu ejima anapalañani dehi. “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” (Yish. 17:17) Akwetu akwaKristu akundejaña muntu wudi wejima sampu nichakamanishayi chineñi chindi.—Tañenu 1 Atesalonika 3:7.

¹⁸ Yidika yakwanuka afu, tumina, mafoto, nyidimu hela tuhu mavumba niyivumina hela yilaaka yinateli kukojeja antu anafwishi kutachika kuneña cheñi. Yuma yayivulu yelañayi muntu wunafwishi mwinikwindi yinateli kumuneñesha, chidi neyi kuya kukupompa kwañinza hela kuchanukishu. Manakwetu wumu wahosheli nindi, “Naneñeli chikupu ifuku dinanakeneña ifuku ditwadisumbwili, chadiña chakala. Ilaña amanakwetu niahela antesha afukwilihu kunloñeshela kachidika kanyanya nawamabwambu jami kulonda nibuli kwikala nkawami.”

¹⁹ Ilukenu nenu, antu anafwishi akeñekaña kuyikolesha mpinji yejima. Junia wahosheli nindi, “Kakavulu neyi muloñeshela muntu chidika munabuli kudibombela jakwanakana chakwashanaña nankashi. Mpinji yamuchidiwu yayiwahi nawa yaleñelaña muntu kukundejewa.” Mwamweni, hitunateli kumanisha chineñi chejima chamuntu wanafwishi muntu akeñayiku, ilaña tunateli kukundeja nikuwundishaku chineñi chamuntu wunafwishi neyi tumukwashaku nyidimu yimu. (1 Yow. 3:18) Gaby wahosheli nindi: “Namusakililaña Yehova hakukeña kwamwekesheliwu aeluda añendeleleli hampinji yinadiña nachineñi. Ankwashili nankashi kumona Yehova chakundejañayi.”

20. Muloñadi yikaninu yaYehova chiyatukundejaña?

²⁰ Chatukundejaña chikupu hakwiluka netu Yehova Nzambi wakukundeja kwejima, wakafumishahu chineñi chejima hampinji yakela ‘antu ejima adi mumajamu achanukishu anatiyi izu daKristu nakufumamu.’ (Yow. 5:28, 29) Nzambi washiika nindi wakafumishahu “kufwa chahaya nyaka; Yehova wakakombola madilu mumesu awantu ejima.” (Isa. 25:8) Dichi kwakekala wanyi kudilila “hamu nawantu adilaña,” ilaña antu ejima hamaseki akazañalalaña “hamu nawantu azañalalaña.”—Rom. 12:15.