Hela chakwila akwaKristu elaña yuma yakudikiña nachu aweni, alondelaña yishina yamuBayibolu. Yishina yamuchidiwu yabombelamu kubula kuzatisha yitwa yidi neyi mata hakudikiña nachu kudi akwawu antu. Shinshikenu yishina yinalondelihu:

Yehova wamonaña nindi wumi wajila, sweje-e wumi wamuntu. Ñimbi yamasamu Davidi welukili nindi Yehova diyi “kaseloki kawumi.” (Mas. 36:9) Dichi, neyi mukwaKristu nakukeña kudikiña hela kukiña yuma yindi, watela kuzata nañovu kulonda yabuli kujaha muntu hela kwikala namuloña wamashi.—Kuhit. 22:8; Mas. 51:14.

Hela chakwila yuma yikwawu yinateli kuletesha kwikala namuloña wamashi, ilaña wuta wunateli kujaha muntu chamaposu hela kumujahilamu hohu. * Kubombelahu, neyi muntu wunakulukuka mukwawu yamona nindi wudi nawuta, yuma yikutaminaku nawa chikufumamu wumu hakachi kawu wukujaha mukwawu.

Yesu chayilejeliyi atumbanji twindi kusenda jimpoku jakabali hawufuku wakukumishaku hamaseki, hatoñojokeleña jakudikiñaku. (Luka 22:36, 38) Ilaña, Yesu wayilejeli kusenda jimpoku jawu kulonda yayidizishi kubula kuleta wubanji hela chakwila anayilukuki kudi ayilumbu. (Luka 22:52)  Hanyima yakwila Petulu namutapi dehi nduñu yakapristu muneni, Yesu wamulejeli Petulu nindi: “Funtishaku mpoku yeyi yakabali muchindalu chayu.” Dichi Yesu washimwini chikuma chalala chalema, chishina chinakulondelawu atumbanji twindi makonu nindi: “Antu ejima azatishaña mpoku yakabali akafwa kumpoku yakabali.”—Mat. 26:51, 52.

Neyi chahosha Mika 4:3, antu jaNzambi ‘mpoku jawu jatubali anakujichila matemwa, mayoñawu anakuyichila nyipanga.’ Ichi chinakwilawu akwaKristu alala chinesekani namazu onenawu ahosheliyi kapostolu Pawulu nindi: “Bayi mufuntisha katama nakatama kudi muntu hela wumuku. . . . Neyi chinatwesheki, ikalenu awunda nawantu ejima kwesekeja nahanakumini ñovu jenu.” (Rom. 12:17, 18) Hela chakwila Pawulu wamweni kukala kwashiyashana kudi neyi kukeña kumujaha “kudi atupondu,” welili kwesekeja nachahosheliyi, kubula kufumpa yishina yamuNsona. (2 Kor. 11:26) Wakuhweleleli mudi Nzambi nimaana ekala Mwizu Dindi, maana “abadika yitwa yanjita.”—Mukwa. 9:18.

AkwaKristu alemesha nankashi wumi kubadika maheta. “Wumi [wamuntu] hiwashindamena hayuma yahetayiku.” (Luka 12:15) Dichi, neyi akañanya kuwundisha mbanji namazu amawahi, akwaKristu alondelaña chishina chahosheliyi Yesu nindi: “Bayi mudikaña namuntu watamaku.” Munjila yikwawu munateli nikumwinka yakuvwala yenu yamukachi niyahewulu. (Mat. 5:39, 40; Luka 6:29) * Chuma chabadika hikudihemba. Neyi tukutondolwelaña ‘yuma yakudisamba yitukweti’ nawa atwiluka kudi antuñi netu nawu tudi aYinsahu jaYehova awunda, ayilumbu hiyakufwilaña kutulukukaku.—1 Yow. 2:16; Yish. 18:10.

AkwaKristu alemesha yinleji yawakwawu. (Rom. 14:21) Neyi antu muchipompelu eluka nawu kudi manakwetu wahemba wuta wakudikiña nachu kudi akwawu antu, akwawu akwakwitiya akuhayama nawa wukuyineñesha. Kukeña kwatukwashaña kulemesha yuma yakeñawu akwetu, hela chakwila yuma yitukuleka ayiteja munshimbi.—1 Kor. 10:32, 33; 13:4, 5.

AkwaKristu atela kwikala nayilwilu yayiwahi. (2 Kor. 4:2; 1 Pet. 5:2, 3) Hanyima yakushinshika kufumba kwamuNsona, mukwaKristu wukutwalekahu kuhemba wuta wakudikiña nachu kudi akwawu antu akumumona nawu wudi nayilwilu yatama. Wukwikala washikilamu wanyi kumwinka nyidimu hela kukooleka muchipompelu. Chumichi chinakundami nikudi mukwaKristu wazataña mudimu mwabombela kusenda wuta. Chikuwaha kukeña nyidimu yacheñi! *

MukwaKristu nateli kufuukula chakudikiña yomweni, chisaka chindi hela yuma yindi, neyi chochatondañayi mudimu wakwiñila. Yishina yamuBayibolu yamwekesheña maana aNzambi nikukeña kwatukeñayi. Dichi, akwaKristu apama azatishaña iyi yishina, azatishaña wanyi mata hakudikiña nachu kudi akwawu antu. Eluka nawu antu ekala nakukiñewa kwalala hiyantu amukuhwelela Nzambi muchihandilu chawu nawa azatishaña yishina yamuBayibolu.—Mas. 97:10; Yish. 1:33; 2:6, 7.