1, 2. Muloñadi wuzweñi chiwukutwalekelahu munshakaminu yakaayi kamakonu?

MAKONU yuma mukaayi yinakali. Atwansi amavulu anakukeña nyidimu ilaña anakuyimona wanyi. Amavulu anakusha mawumi awu muwubanji kuhitila mukuya mumatuña mwekala maheta amavulu. Wuzweñi wudi kwejima nimumatuña mwekala maheta. Akweti maheta anakuhetelaku nawa abula maheta niwena anakuswejelaku kukabakana. Kwesejekeja nakusandujola kwakatataka, awana nawu antu antesha nankashi akweti maheta keña ekali namaheta amavulu akwesekana namaheta ejima awantu mukaayi. Kwosi wunatweshi kwiluka kuvula kwanawa antu aheta, ilaña walala wudi wakwila nawu antu amavulu mukaayi hiyatuzweñi. Dihafumini Yesu kuhosha chakadi kuhita mumbadi nindi: “Mwekalaña nawatuzweñi mpinji yejima.” (Maku 14:7) Muloñadi yuma chiyinekalili muniyi njila?

² Yesu welukili nindi yuma mukaayi yikutwalekahu chochenichi sampu Wanta waNzambi wunenzi. Kaayi kaSatana mwabombela nyitayi yakulanda nakulandulula, nyitayi yamapolitiki niyansakililu. Diyashimunawu haChimwekeshu 18:3 nawu “akwakulanda nakulandulula.” Antu jaNzambi adiñijaña wanyi mumapolitiki nimunsakililu yakutwamba, ilaña amavulu chayikalilaña chikupu kubula kudiñija munsañu yakulanda nakulandulula yamukaayi kaSatana.

3. Malwihwinyi itukuhanjekahu?

 ³ Chineli tudi akwaKristu, twatela kudishinshika chitwamonaña nsañu jakulanda nakulandulula kuhitila mukudihula netu: ‘Nateli kuzatisha ñahi maheta ami hakumwekesha kashinshi kudi Nzambi? Nateli kubula kudiñija ñahi chikupu munsañu yakulanda nakulandulula mukanu kaayi? Yumanyi yinakumwekesha chikupu nawu antu jaNzambi amukuhwelela mukanu kaayi katama?’

4, 5. (a) Ñamba wamuchishimu chaYesu wadiña mukukalanyi? (b) Yesu wayisoñamishili nindidi atumbanji twindi?

⁴ Tañenu Luka 16:1-9. Twatela kutoñojoka chikupu hachishimu chaYesu chañamba wabula kuloña. Hanyima yakumwinka muloña wakukisañana yuma, iwu ñamba “welili mwamaana” kuhitila ‘mukukwata wubwambu’ nayuma yadi kumukwasha hampinji yajimbesheliyi wuñamba windi. * Hela chochu, Yesu walejeleña wanyi atumbanji twindi kwila yuma munjila yabula kuloña hakwila nawu ahandeña chiwahi mukanu kaayi. Wateneni iyi yilwilu nindi yidi neyi ‘yawanyana anshakaminu yamakonu,’ ilaña wazatishili ichi chishimu kulonda yalumbululi chikuma.

⁵ Yesu welukili nindi kufwana ona ñamba wadiña mukukala, atumbanji twaYesu amakwawu akakeñaña yuma yakudikwasha nachu mukanu kaayi munasweji kufwilawu antu maheta munjila yatama. Dichi wayisoñamishili nindi: ‘Kwatenu wubwambu namaheta abula kuloña, kulonda neyi amana, [Yehova naYesu] akayitambwili mumaluña akushakamamu ahaya nyaaka.’ Yumanyi yitunateli kudiza kukufumba kwaYesu?

6. Tuneluki ñahi netu kulanda nakulandulula hiyadiña nkeñelu yaNzambiku?

⁶ Hela chakwila Yesu halumbulula muloña waweni wateneneniyi maheta nindi ‘hiyaloñaku,’ Bayibolu yamwekeshaña chikupu nawu kulanda nakulandulula hiyadiña nkeñelu yaNzambiku. Yehova wayinkeli Adama naEva yuma yejima yakeñeleñawu muEdeni. (Kutach. 2:15, 16) Chimwahitili mpinji, chelili spiritu yajila yikwashi awayishewa adiña muchipompelu chamumafuku awapostolu, “hikwadiñahu muntu hela wumu wahosheli nindi yuma yaheteliyi yadiña yindi yomweniku, ilaña adiña nayuma yoyimu.” (Yilw. 4:32) Kaprofwetu Isaya washimwini mpinji yakadiluñishawu antu ejima yuma yahamaseki. (Isa. 25:6-9; 65:21, 22) Ilaña chayinu mpinji, atumbanji twaYesu atela kwikala “namaana” kulonda azatishi ‘maheta abula kuloña’ amukanu kaayi kamakonu hakwila nawu amutiyishi Nzambi kuwaha.

7. Kufumbanyi kwekala haLuka 16:10-13?

⁷ Tañenu Luka 16:10-13. Ñamba wamuchishimu chaYesu wakwatili amabwambu kulonda yaditiyishi yomweni kuwaha. Hela chochu, Yesu wayikolesheli atumbanji twindi kukwata amabwambu amwiwulu nankeñelu yakubula kuditiyisha aweni kuwaha. Mavasi alondelahu munichi chishimu ahosha hakuzatisha ‘maheta abula kuloña’ nakwikala ashinshika kudi Nzambi. Yesu walumbulwileña nindi tunateli ‘kwikala ashinshika’ nanawa maheta neyi tunekali dehi nawu. Munjilanyi?

8, 9. Shimunenu yakutalilahu yawantu anakumwekesha kashinshi hakuzatisha maheta abula kuloña.

⁸ Njila mutunateli kumwekeshela kashinshi namaheta etu, hikuhana yawaana yakukwasha mudimu wakushimwina wamukaayi kejima washimwineñahu dehi Yesu.  (Mat. 24:14) Kansi wamumbanda wakuIndia wahembeli kachikasha kanyanya kakuhembelamu mali, dichi wadiña nakushamu tumawayawaya hampinji-hampinji nawa walandishili tukadoli kulonda yawani mali akwinkamu. Chenzeli kachikasha, wahanini awa mali kulonda ayizatishi kumudimu wakushimwina. Manakwetu wumu muIndia wadimaña macoconut, watwalaña macoconut kukasanji kakubalumwinahu nyikanda kakuMalayalam. Watoñojokaña nindi chineli hakasanji akeñaña kulanda macoconut, neyi yayitwalila chikuyikwasha kubadika kuhana hohu yawaana yamali. Wazatishili maana chikupu. Amanakwetu kuGreece niwena ahanaña manji amuolivi, chizi, niyakuda yikwawu kuchisaka chaBeteli.

⁹ Manakwetu wakuSri Lanka, wunakushakama kwituña dacheñi, wahana itala niluña kulonda apompeleñamu kupompa kwachipompelu nikwañinza nawa mushakameña antu adi mumudimu wampinji yejima. Manakwetu wadihanini chikupu kukwasha amanakwetu abula yuma. Mumatuña mwakanishañawu mudimu wetu, amanakwetu azatishaña matala awu kwikala Matala aWanta kulonda apayiniya niantu amakwawu abula mali apompeña chakadi kuyifwetesha.

10. Nkiswinyi yafumañamu neyi tuhanaña chakufuma hamuchima?

¹⁰ Yakutalilahu yikwawu yinalondelihu yinakumwesha antu jaNzambi ‘chinakushinshikawu nayuma yantesha,’ dikwila nawu kuzatisha maheta awu, akehelamu namaheta akuspiritu. (Luka 16:10) Indi awa amabwambu jaYehova anakutiya ñahi hakudihana kwawu? Eluka chikupu nawu kuhana hinjila yimu yakwikalilamu “namaheta alala.” (Luka 16:11) Muhela wahanaña yawaana mpinji yejima kumudimu waWanta walumbulwili nkisu yinatambwiliyi nindi: “Kuhana kunankwashi chikupu kumona yuma yayiwahi hadi yaaka yinahitihu. Kukwasha antu namaheta kunankwashi kwikala nawamabwambu amavulu. Kunankwashi kwikala namuchima wakwanakena, kudiwunjika, kubula kuneña neyi anañili chatama nikutambwila kufumba.” Amavulu aneluki nawu kuhana kunayikwashi kupaminaku kuspiritu.—Mas. 112:5; Yish. 22:9.

11. (a) Kuhana kwetu kwakudikeñela kwamwekeshaña ñahi “maana”? (b) Antu jaNzambi adikwashaña ñahi munsañu yamali? (Talenu mwevulu wakutachilahu.)

¹¹ Kuzatisha maheta hakukwasha Wanta kwamwekeshaña nawu ‘tunakwila mwamaana.’ Maana atukwashaña kukwasha antu amakwawu adi mukukankila. Ejima akweti maheta ilaña abulaña kuzata mudimu wampinji yejima hela kuya kumatuña acheñi atiyaña kuwaha kwiluka nawu yawaana yawu yakwashaña akwawu azataña mudimu wakushimwina. (Yish. 19:17) Yawaana yakuhana mukudikeñela yatukwashaña kwidisha nyikanda nikukwasha mudimu wakushimwina mumatuña mwekala wuzweñi ilaña mudi akwakushimwina amavulu. Hadi yaaka yayivulu, matuña adi neyi Congo, Madagascar niRwanda, amanakwetu azatishaña mali anateli kwesekana namali atambulañawu mumulungu hela hakakweji  kumudimu kulanda yakuda yakukwasha chisaka hela kwikala namaBayibolu. Ilaña, kuloñesha kwaYehova kunazati nañovu kuzatisha yawaana yahanañawu antu amavulu nimali ‘esekana,’ kuyibalumwina maBayibolu nikuyitwalila antu ejima muchisaka kubombelahu niatudizi aBayibolu anakufwila kudiza chalala. (Tañenu 2 Akorinda 8:13-15.) Yehova wakwataña wubwambu nawantu ejima ahanaña niatambwilaña.

12. Abarahama wamwekesheli ñahi nindi wamukuhweleleli Nzambi?

¹² Njila yikwawu yitunateli kwikalila nawubwambu naYehova hikuzatisha mpinji yetu kukeña “maheta alala” bayi kudiñija chikupu munsañu yakulanda nakulandulula yidi mukaayiku. Abarahama wadiña nachikuhwelelu, wovwahilili nakushiya musumba waUri wamaheta nakuya nakushakama mumatenti muloña wakufwila kwikala nawubwambu naYehova. (Heb. 11:8-10) Mpinji yejima washindameneni hadi Nzambi Mukwakuhana maheta, nawa hafwilileña maheta adi kumwekesha nawu wadiña nachikuhweleluku. (Kutach. 14:22, 23) Yesu wakeñeleña antu kwikala nachikuhwelelu chamuchidiwu chamulejeliyi mukwenzi wadiña namaheta nindi: “Neyi wunakukeña kwikala wawanina, yaku wakalandishi yuma yiwukweti wuyinki atuzweñi mali; kulonda wiikali neheta mwiwulu; kuhiñahu dinu winzi wiikali mukwakunlondela.” (Mat. 19:21) Iwu muntu wadiña wanyi nachikuhwelelu neyi chadiña naAbarahama, ilaña amakwawu anakumukuhwelela Nzambi.

13. (a) Kufumbanyi kwamufumbiliwu Timotewu kudi Pawulu? (b) Tunateli kuzatisha ñahi kufumba kwaPawulu makonu?

¹³ Timotewu wadiña nachikuhwelelu. Hanyima yakumutena Timotewu nindi “ishidika wamuwahi waKristu Yesu,” Pawulu wamulejeli nindi: “Kwosi muntu wunakuzata mudimu wawushidika wadiñijaña mumudimu wakulanda nakulandululaku, kulonda amutiyi kuwaha kudi muntu wamwiñijili wushidika.” (2 Tim. 2:3, 4) Atumbanji twaYesu makonu, kushilahu niambuña aNzambi kubadika ha 1,000,000 anakukalakala mumudimu wampinji yejima, azatishaña kufumba kwaPawulu kwakudikita chikupu. Hakwila nawu abuli kudiñija munsañu yakulanda nakulandulula yidi mukaayi, anukaña chishina chakwila nawu: “Mukwakusondama hinduñu yamukwakusondamisha.” (Yish. 22:7) Satana watiyaña kuwaha neyi tuzatishaña mpinji niñovu yetu yejima kukalakela maheta amukaayi kindi. Kufuukula kukwawu kunateli kutwiñija muwuduñu. Kusonkela matala amaneni, kuya kumashikola amaneni hankongoli, kufwetela nyotoka yasweja wuseya, nikupanga chidika chasweja wuseya kunateli kumuleñela muntu kwikala mukukala kwamali. Twamwekeshaña maana neyi tupeleshaku chihandilu nikukeheshaku kudiñija munyikudi nijakulanda nakulandulula, kwikala akasunuka hakumukalakela Nzambi chatela tushi maana hakufwila maheta.—1 Tim. 6:10.

14. Twatela kufwila kwiladi? Shimunenu chakutalilahu.

¹⁴ Kupeleshaku chihandilu chetu kwabombelamu kwiluka yuma yalema. Antu amu adisumbula adiña nakampani. Hela chochu, chineli afwilileña mudimu wampinji yejima, alandishili kampani yawu, mbopolu niyuma yikwawu. Kuhiñahu adihanini kuya nakukwasha mudimu wakutuña Kasanji keneni kuWarwick, New York. Adiña nakukooleka kwakukalakela hamu haBeteli namwanawu wamumbanda ninfumwindi. Nawa hadi nyilungu yikwawu azatilaña hamu nawanvwali jamukuwawu kuWarwick. Muhela wumu payiniya muColorado, U.S.A., wazatilileña mubanki mafuku amu mumulungu. Mukulumpi  wamudimu watiyili kuwaha chazatileñayi, dichi wamulejeli nindi yazateña mafuku ejima nawa wamushililiku nfwetu kapampa kasatu. Hela chochu, chineli mudimu wadi kumukañeshaña kushimwina, wakaanini iwu mudimu wanfwetu yeneni. Iyi hiyakutalilahu yantesha yawambuña aYehova anakudihana chikupu. Kufwila kutwamijaku Wanta munjila yamuchidiwu kwamwekeshaña nawu twalemesha wubwambu wetu naNzambi nimaheta akuspiritu kubadika maheta adi mukaayi.

15. Mahetanyi aletaña nkisu yabadika?

¹⁵ Kwikala namaheta kwatalisha wanyi mukwila nawu tudi nankisu yaNzambi. Yehova wakiswilaña antu “aheta munyidimu yayiwahi.” (Tañenu 1 Timotewu 6:17-19.) Chakutalilahu, chelili Lucia * yeluki nindi muAlbania mudi kukankila kwawakwakushimwina, wayiliku kufuma kuItaly mu 1993 chakadi yuma yidi yejima yakudikwasha nachu, wakuhweleleli hohu mudi Yehova. Wadizili idimi daAlbanian nawa nakwashi antu akubadika ha 60 kupapatishewa. Chineli antu jaNzambi amavulu ashimwinaña wanyi mumaluña amuchidiwu mwatambwilañawu chalala, yuma yejima yitukwila hakukwasha antu kwikala munjila yaya kuwumi tukuyanukaña mpinji yejima nawa niwena akuyanukaña.—Mat. 6:20.

16. (a) Yumanyi yakamwekana kutalisha hamaheta adi mukaayi? (b) Yuma yitweluka kutalisha kumbidi yatukwashaña ñahi kwiluka chitwatela kumona maheta?

¹⁶ Yesu chahosheliyi nindi “neyi [maheta abula kuloña] amana,” chinakumwekesha nawu mwalala awa maheta akamana. (Luka 16:9) Kuholoka kwamali kunakumwekana munanu mafuku akukuminina kwanti, ilaña kumbidi akaholoka chikupu. Yuma yejima yamukaayi kaSatana, yidi neyi mapolitiki, jinsakililu ninsañu yakulanda nakulandulula jikamana. Kaprofwetu Ezekeli niZefwaniya ashimwineñahu dehi nawu wuru nasiliva, hashindamena maheta amukanu kaayi, jikekala jamukunkulwayi. (Ezek. 7:19; Zef. 1:18) Twakatiya ñahi neyi tushika kumakumishilu akanu kaayi nawa twiluka netu twadiña nakuhemba ‘maheta abula kuloña’ amukanu kaayi chatela tuhembeña maheta alala? Twadi kutiya neyi iyala wazatilili mali amavulu muchihandilu chindi chejima, hakwinza nakwiluka nindi awa mali amukunkulwayi. (Yish. 18:11) Maheta amuchidiwu akamana, dichi zatishenuña maheta imukweti kulonda ‘mukwati amabwambu’ mwiwulu. Yuma yejima yitwelaña hakukwasha Wanta waYehova yatukwashaña kwikala namaheta akuspiritu.

17, 18. Yumanyi yakadiluñishawu amabwambu jaNzambi?

¹⁷ Neyi Wanta waNzambi wunenzi dehi, kwakekala wanyi kusonkela, yakuda yakavula nawa yakekala yawaana, hikwakekala cheñi kuya kuyipatelaku. Antu jaYehova hamaseki akadiluñisha yuma yakafuma hamaseki. Wuru, siliva, nimalola awuseya jikekala jakupangilaku yuma yakudiwahisha nachu, bayi yakuheta nachuku. Nyitondu yayiwahi, malola niyikuñu yakekala yakutuña nachu matala amawahi. Amabwambu akatukwashaña kwikala namuzañalu bayi kwikala namaliku. Mwituña dadiha twakadikwashaña mpinji yejima.

¹⁸ Iyi diyi yuma yantesha yikadiluñishawu antu anakukwata amabwambu mwiwulu. Muzañalu wakatiyawu akwakudifukula aYehova ahamaseki wakasweja chakatiyawu mazu aYesu akwila nawu: “Twayenu, enu anakiswiliwu kudi Tata yami wekala mwiwulu, swanenu Wanta wayiloñeshelawu kufuma haaliliwu chikuku chakaayi.”—Mat. 25:34.