1-3. (a) Masamu 147 atela ayisonekeli mpinjinyi? (b) Yumanyi yitunateli kudiza mukudiza Masamu 147?

NEYI muntu yazata chachiwahi mudimu wunamwinkiwu hela namwekeshi chilwilu chachiwahi chawakwaKristu, amushimekaña. Neyi twayishimekaña antu dikwila nawu twatela kumushimeka Yehova Nzambi nankashi! Twatela kumushimeka muloña wañovu yindi yasweja, yamwekenaña muyileñaleña yindi yakuhayamisha hela muloña wakeña antu, kukeña kwamwekeni haheniyi ifutu danyiloña daMwanindi.

² Nsoneki yaMasamu 147 wamushimekali Yehova. Welili niantu amakwawu kumushimeka Nzambi.—Tañenu Masamu 147:1, 7, 12.

³ Tuneluki wanyi wasonekeli idi isamu, ilaña chinamwekani neyi ñimbi yamasamu wadiñaku hampinji yayifumishiliyi Yehova aIsarela muwunkoli muBabiloni nakuyifuntisha muYerusalema. (Mas. 147:2) Chayifuntishiliwu antu jaNzambi kwiluña dakudifukula kwalala, chatela dichamuleñeleli ñimbi yamasamu kumushimeka Yehova. Hela chochu, washimwini yuma yikwawu yaletesheli yamushimeki. Hiyumanyi? Muloñadi chimwatela kubidikila nenu “Aleluya!” muchihandilu chenu?—Mas. 147:1

4. A Isarela atela atiyili ñahi chelili Mwanta Kirusi yayikuuli muwunkoli, nawa muloñadi?

⁴ Fwikijenu chatiyiliwu aIsarela hadiñawu muwunkoli muBabiloni. Antu ayitwalili muwunkoli ayilili nawu: “Twimbilenu kamina kakuZiyona.” Haniyi mpinji, Yerusalema mwateleliwu kumuzañalela Yehova, adiña amujilumuna dehi. (Mas. 137:1-3, 6) A Yudeya akeñeleña wanyi kwimba. Nyichima yawu yabalukili, akeñekeleña kuyikundeja nikuyikolesha. Hela chochu, neyi chochaprofweteliwu mwizu daNzambi, ayipulwishili kuhitila mudi Kirusi mwanta wakuPeresi. Washindili Babiloni nawa wabidikili nindi: “Yehova . . . nanleji kumutuñila itala muYerusalema . . . Hadenu ahadi antu indi ejima hadanyi? Yehova Nzambi yindi ekali nindi akayuku.” (2 Kushi. 36:23) Awa mazu atela ayikundejeli nankashi aIsarela adiña muBabiloni.

5. Ñimbi yamasamu wahosheli nindidi kutalisha hañovu yaYehova yakuuka?

⁵ Yehova hakuminini dakukundeja muza wawaIsarela wejima hohuku, ilaña wayikundejeli hamuntu-hamuntu. Dichatukundejañayi nimakonu. Ñimbi yamasamu wembili hadi Nzambi nindi: “Wakuswishaña abaluka nyichima; wakasaña hayilonda yawu.” (Mas. 147:3) Mwamweni, Yehova wakamenaña ejima akweti kukala, kumujimba nimuyitoñojoka. Makonu, Yehova nakufwila chikupu kutukundeja nikutuwundisha muyitoñojoka. (Mas. 34:18; Isa. 57:15) Watwinkaña maana niñovu yakutukwasha kuumika kukala kwejima kutunateli kumona.—Yak. 1:5.

6. Tunateli kuhetelamu ñahi chelili ñimbi yamasamu yatachiki kuhosha nsañu yidi haMasamu 147:4? (Talenu mwevulu wakutachikilahu.)

⁶ Ñimbi yamasamu washinshikili cheñi mwiwulu nakutuleja nindi Yehova “wachindaña tutumbwa” nawa “watutumbaña twejima majina.” (Mas. 147:4) Muloñadi chahimpiliyi nsañu nakutachika kuhosha hayuma yamwiwulu? Toñojokenu chumichi: Ñimbi yamasamu wamweneña tutumbwa namesu awuntu, ilaña welukili wanyi kuvula kwatu. Tutumbwa tutunakumona tunavuliliku nankashi hadi yaaka yayivulu yinahitihu. Antu amakwawu atoñojokaña nawu muMulalanji wumu mwekala mabiliyoni atutumbwa. Nawa kwekala matililiyoni anyilalanji. Etu, tweluka wanyi kuvula kwatutumbwa. Ilaña Nleñi watutumba twejima majina nawa watwinka yinjikijilu. Chumichi chinakumwekesha nawu katumbwa kejima kalema kudi Yehova. (1 Kor. 15:41) Indi antu jindi ahamaseki? Neyi Nzambi weluka hadi katumbwa kadi kejima, dikwila nawu ninenu wayiluka hamuntu-hamuntu kwejima kumudi, chimwatiyaña niyuma yejima yimwakeñaña mpinji yidi yejima.

7, 8. (a) Yumanyi yashinshikañayi Yehova neyi nakupulwisha antu jindi adi mukukala? (b) Lumbululenu Yehova chamwekeshañayi wushona neyi nakukwasha antu abula kuwanina.

⁷ Yehova wayakamenaña enu nkawenu nawa wukweti ñovu yakuyikwasha nakukala kumunakumona. (Tañenu Masamu 147:5.) Munateli kumona nenu kukala kunayiswejeli nawa mukutwesha wanyi kukwimanisha. Nzambi wayiluka chikupu nawa “waanukaña kwindi nindi hilunkuñu hohu kwalu.” (Mas. 103:14) Chineli hitwawaninaku, twakoñaña yiluwa yoyimu mpinji yejima. Twaditoñeshaña hayuma yitwahoshaña, yuma yatama yitwafwilaña mpinji yejima hela kutiya ichima nayuma yikwetiwu akwetu. Yehova kanda yeleñahu dehi yuma yamuchidiwu; ilaña, kwosi wukwiluka chatwilukayi.—Isa. 40:28.

 ⁸ Hadaha mwamwonahu dehi chikasa chaYehova chichayikwashili hampinji yimwadiña mukukala. (Isa. 41:10, 13) Talenu chakutalilahu chamuhela payiniya wejina daKyoko, waneñeli chiyamuhimpiliwu mudimu wazatileñayi. Yehova wamwekesheli ñahi nindi welukili chatiyileñayi iwu muhela nakukala kwindi? Kwayiliyi, Kyoko wazatileña nawantu elukili chatiyileñayi. Watiyileña neyi Yehova nakumuleja nindi: “Nakukeña bayi neyi muloña wudi payiniyaku, ilaña wudi mwanami wadihana kudami. Inakukeña nami wudiluñisheña neyi Chinsahu chami.” Indenu, Mukwakubadika nayimwekesheli ñahi nindi “maana indi hiyakumañaku”?

9, 10. Yehova watachikiña kutukwasha nayumanyi? Lumbululenu.

⁹ Mpinji yikwawu munateli kukankila yuma yakumujimba. Chakutalilahu, munateli kwakamena nenu mudi nayakuda yantesha. Hela chochu, Yehova diyi waleñeli nvula kulonda yimenesheña yakuda, niyakuda yadaña anyana kamakololu! (Tañennu Masamu 147:8, 9.) Neyi wadishaña makololu, mwatela kukuhwelela nenu Yehova wukuyinka yuma yakeñekaña.—Mas. 37:25.

¹⁰ Chuma chalema, Yehova watwinkaña yakuda yakuspiritu, yatwinkaña “kuwunda kwaNzambi kwabadika kwiluka kwejima.” (Fwi. 4:6, 7) Chakutalilahu, shinshikenu Mutsuo niñodindi chayikwashiliwu kudi Yehova hampinji yikwamwekeni tsunami kuJapan mu 2011. Apulukili kutsunami kuhitila mukukandama hewulu detala. Hanidi ifuku, ajimbesheli yuma yawu yejima. Akaamini mukapeka mwadiña mwidima nawa mutuuta ketala dawu dakundukili. Nantetemena, akeñakeñeli wukwashu wakuspritu. Awanini hohu mukadna waYearbook of Jehovah’s Witnesses wamu 2006. Mutsuo wamweni mutu wahosheleña nawu: “The Deadliest Tsunamis Ever Recorded” (“maTsunami Asweja Abulahu Dehi Kumwekana.”) Wahosheleña hamutentanshi waholokeleli kuSumatra mu 2004 wekala hakachi kaji tsunami jamaneni jamwekanahu dehi. Mutsuo nañodindi atachikili kudila hampinji yatañileñawu yuma yamwekeni. Amweni nawu Nzambi wayikeña hakuyikolesha kuspiritu hampinji yatelela. Yehova wayikwashili cheñi nayuma yakumujimba. Ayinkeli yuma kudi amanakwawu akwaKristu. Ilaña chuma chayikolesheli nankashi hikuyendela kwayendeleliwu kudi añimenu amukuloñesha kwaNzambi endeleleña yipompelu. Mutsuo wahosheli nindi: “Natiyili neyi Yehova wadiña kwakwihi nanetu nawa watwakameneni. Twakundejeweli nankashi!” Nzambi wasambilaña kutukolesha kuspiritu, kuhiñahu dinu hakutwinka yuma yakumujimba yakeñekaña.

11. Yumanyi yatela kwilawu antu akeñaña kuhetela muñovu yaNzambi yakupulwisha?

¹¹ Yehova wekala wadiloñesha kukwasha ‘nikukwata chachiwahi awunda.’ (Mas. 147:6a) Tunateli kuhetelamu ñahi mukudiloñesha kwindi kwakutukwasha? Twatela kwikala nawubwambu wawuwahi nayena. Hakwila twikali nawubwambu wawuwahi nayena, twatela kwikala adizoza. (Zef. 2:3) Antu adizoza amuhembelelaña Nzambi kulonda yololi yuma yaheña nikufumishahu yuma yatama. Yehova watiyaña kuwaha nawantu amuchidiwu.

12, 13. (a) Yumanyi yitwatela kutondolwela hakwila nawu tuheteli muwukwashu waNzambi? (b) Yehova watiyaña kuwaha nawantu amuchidinyi?

 ¹² Munjila yikwawu, Nzambi ‘wakadimbwisha atama hamaseki.’ (Mas. 147:6b) Awa mazu akuchinisha. Hakwila nawu tuheteli mukukeña kwaYehova nikutondolwela kuzuwa kwindi, twatela kuhela yuma yahelayi. (Mas. 97:10) Chakutalilahu twatela kuhela wuvumbi. Dikwila nawu twatela kutondolwela yuma yejima yinateli kutuleñela kwila iyi yuma yatama kushilahu nikutala nyevulu yanzekesi. (Mas. 119:37; Mat. 5:28) Chumichi chakala kuleka, ilaña nawukwashu waYehova nikuzata nañovu tunateli kuleka.

¹³ Hakwila nawu tushindi, twatela kushindamena hadi Yehova bayi nañovu jetuku. Komana wukuzañalala neyi tufwila kudamwina etu aweni “nañovu yakawalu,” hashindamenañawu antu? Inehi! Nawa cheñi bayi tushindamena ‘hanyikonu yeyalaku’ neyi kwiji antu anateli kutwamwina. (Mas. 147:10) Ilaña twatela kuya kudi Yehova nakumulembelela kulonda yatukwashi. Kwambukaku nawantu akwakufumba, yena wazeyaña wanyi kutiya kulemba kwetu, hela chakwila tukulomba kakavulu. “Yehova watiyaña kuwaha nawantu amwakamaña, nawantu achiñejaña luwi lwindi.” (Mas. 147:11) Tunateli kukuhwelela netu naluwi lwindi, wukwikala nanetu nikutukwasha kushinda kufwila kwatama.

14. Chumanyi chakuhweleliyi ñimbi yamasamu chamukolesheli?

¹⁴ Yehova watwinka yuma yatukwashaña kukuhwelela chikupu netu wakakwasha antu jindi neyi adi mukukala. Kutoñojoka hakutuñulula Yerusalema, ñimbi yamasamu wembili hadi Yehova nindi: “Diyi nakoleshi nyikomenu yakuyenzelu yampwembu yeyi; diyi nakiswili anyaneyi adi mukachi keyi nkisu. Diyi namweneshi mwahita ñinza jetuña.” (Mas. 147:13, 14) Ñimbi yamasamu watiyili kuwaha hakwiluka nindi Nzambi wukukolesha yisu yampwembu kulonda yakiñi akwakudifukula indi!

15-17. (a) Mpinji yikwawu twatiyaña ñahi nakukala kutwamonaña, ilaña Yehova wazatishaña ñahi Izu dindi hampinji yakutukwashañayi? (b) Lumbululenu ‘izu daNzambi chidatemukaña lufuchi nankashi.’

¹⁵ Munateli kumona kukala kunateli kuyiletesha kwakama. Yehova wukuyinka maana kulonda muumiki. Ñimbi yamasamu wahosheli kutalisha hadi Nzambi yindi nindi “watemeshaña lushimbi lwindi hamaseki; izu dindi datemukaña lufuchi nankashi.” Kuhiñahu, hakumutena Yehova nindi “wahanaña nvula yachishika yitooka neyi wanda; walukumunaña wuumi wachishika.” Ñimbi yamasamu wehwili nindi: “Wukudikaña nachishika chindi hinyi?” Wabombelelihu nindi Yehova “watemeshaña izu dindi hakuyinowesha.” (Mas. 147:15-18) Nzambi yetu wukweti maana nawa wasweja ñovu, walombolaña nvula niwuumi wachishika, nateli kuyikwasha kuumika kukala kumunakumona.

¹⁶ Makonu, Yehova watulombolaña Nezu dindi, Bayibolu. Nawa “izu dindi datemukaña lufuchi nankashi” chakwila watwinkaña yakuda yakuspiritu hampinji yatelela. Toñojokenu chimunateli kuhetela mukutaña Bayibolu, kudiza nyikanda yasonekawu kudi “nduñu wamaana nikashinshi,” kutamba JW Broadcasting, kuya ha jw.org/lun, kuhanjeka nawaeluda nikudikunda nawakwetu akwaKristu. (Mat. 24:45) Munakumona wanyi nenu Yehova nakunyakashana kuyilombola?

¹⁷ Simone namoni ñovu Yezu daNzambi. Wadimweneña nindi wamukunkulwayi nawa kwila amwiteja kudi Nzambi  nehi. Hela chochu, hampinji yaneñeliyi, watwalekelihu kulomba wukwashu kudi Yehova. Nawa watwalekelihu kudiza Bayibolu nkawindi. Wahosheli nindi, “Kanda nikaleñahu dehi mukukala kwakwila nitiya nami Yehova naleki kunkwasha nikunlombola.” Chumichi chinamukwashi kubula kudimona nindi wamukunkulwayi.

18. Muneluki ñahi nenu Nzambi wayikwashaña, nawa yumanyi yikuyileñela kubidika nenu “Mushimekenu Ya!”?

¹⁸ Ñimbi yamasamu welukili Nzambi chayikwashiliyi antu jindi kunyima. Diwu hohu muza wenkeliwu “izu” daNzambi, “yidika yindi nawuñaji windi.” (Tañenu Masamu 147:19, 20.) Makonu, yetu hohu antu adi hamaseki atenañawu nejina daNzambi. Tudi nawubwambu wawuwahi naYehova muloña twamwiluka nawa twazatishaña Izu dindi. Kufwana nsoneki Wesamu 147, komana ninenu kudi yuma yinateli kuleñela kubika nenu “Mushimekenu Ya!” nikulejaku amakwawu kuhosha chochimu?