Chakushinda Kukala Kwamuyitoñojoka Yenu
MUDI mukukala kwakweni! Nawa chilumbu chenu muneni Satana, nakuzatisha chitwa chafwana. Chitwanyi chenochu? Nsañu Yakutwamba! Chitwa chakukisañana nachu yitoñojoka yenu bayi mujimbaku.
Kapostolu Pawulu wadiña wasoñama kuwubanji wansañu yakutwamba yaSatana, ilaña akwaKristu amakwawu adiña asoñama wanyi. Chakutalilahu, antu amakwawu muKorinda, adishindameneni nakutoñojoka nawu adiña nachikuhwelelu chakola muchalala. (1 Kor. 10:12) Dichaletesheli Pawulu yayisoñamishi nindi: “Ami inakutiya woma, nami neyi chochamudimbiliwu Eva kudi kapela namakudi indi, hamwaha yitoñojoka yenu anateli kuyiluwañesha kuhitila mukuyifumisha kukashinshi nikukudihemba jatelela Kristu.”—2 Kor. 11:3.
Mazu aPawulu anakumwekesha nawu muntu hatela kudishindamenaku. Neyi munakukeña nenu mushindi kukala kwamuyitoñojoka yenu, mwatela kwiluka nsañu yakutwamba kulonda mwiluki chakudikiña.
NSAÑU YAKUTWAMBA, YATAMINADI?
Nsañu yakutwamba yekala ñahi? Muchinu chibaaba, hikuzatisha nsañu yakutwamba kulonda kuluwañesha yitoñojoka yawantu. Antu amakwawu ahoshaña nawu nsañu yakutwamba “hikutwamba, makudi, kuluwañesha muntu, kudimbana, kukojeja antu kwila chimunakutoñojoka, [ni]kudilumuna” nawa mwabombela “kubula kashinshi, kukisa nikuzatisha tufuta.”—Propaganda and Persuasion.
Nsañu yakutwamba, yataminadi? Muloña yafwana nawa yakisañanaña chakubula kwiluka, yinateli kwiñila muyitoñojoka yetu, yidi neyi mpepela yafwana yabulaña kumwekana. Chineli kutwamba kwamwekaña wanyi, muntu wadiza hayilwilu yawantu Vance Packard wahosheli nindi: “Etu amavula
atuluwañeshaña, chakadi nikwiluka.” Muntu wumu wadiza chikupu wahosheli nindi, amayala niambanda “anayikojeji kwikala nayilwilu yawubanji,” yidi neyi ‘kudijaha, njita, kuzuña muloña wakwambuka kwamakowa, kubula kulemesha nsakililu yacheñi niyuma yikwawu yahilishaña antu.’—Easily Led—A History of Propaganda.Neyi antu anateli kutuluwañesha nansañu yakutwamba, indi Satana wukukumina kudihi? Weluka chikupu yilwilu yawantu kufuma tuhu hampinji yayileñeliwu. Ichi “kaayi kejima” kadi mumakasa indi. Nateli kuzatisha chuma chidi chejima chidimu kutandisha makudi indi. (1 Yow. 519; Yow. 8:44) Satana ‘nakuputisha yitoñojoka yawantu’ chakwila “nakuluwañesha antu ashakama hamaseki hejima.” (2 Kor. 4:4; Chim. 12:9) Munateli kukaana ñahi nsañu yindi yakutwamba?
DIKIÑENU NANSAÑU YAKUTWAMBA
Hakwila nawu tukaani nsañu yakutwamba, Yesu waheni lushimbi lwakwila nawu: ‘Ilukenu chalala, chalala nichena chikuyifumisha muwuduñu.’ (Yow. 8:31, 32) Munjita, mushidika watela kwiluka kunateli kusendayi nsañu yalala neyi nehi chilumbu nindi nateli kumuleja nsañu yakutwamba kulonda yamudimbi. Yehova wahana nsañu yalala. MuBayibolu, munateli kuwanamu nsañu yikuyikwasha kukaana nsañu yakutwamba yafumaña kudi Satana.—2 Tim. 3:16, 17.
Hela chochu, Satana, mukwakushimuna nsañu yakutwamba weluka chumichi. Wazatishaña nshakaminu yamakonu kulonda yakañeshi antu kutaña nikudiza Bayibolu. Bayi mwiteja kufwa mutufuta twindiku. (Efwe. 6:11) ‘Tiyishishenu chikupu’ mwatalisha chalala. (Efwe. 3:18) Chumichi chakeñekaña kuzata nañovu. Ilaña anukenuña iyi nhoshelu yashimwiniyi nsoneki Noam Chomsky yakwila nawu: “Kosi wunateli kuyishila chalala muwoñu wenu. Hichuma chimwatela kukeñakeña enu aweni.” Dichi ‘keñakeñenu enu aweni’ kuhitila ‘mukutalatala muNsona hefuku-hefuku’ nakanañachima.—Yilw. 17:11.
Neyi munakukeña nenu mushindi kukala kwamuyitoñojoka yenu, mwatela kwiluka nsañu yakutwamba kulonda mwiluki chakudikiña
Mwatela kwiluka nenu Satana nakukeña nindi mubuleña kutoñojoka chiwahi. Muloñadi? Mukanda wumu wahosha nawu, nsañu yakutwamba “yikuswejelaku neyi antu . . . anakuyikañesha kutoñojoka chikupu.” (Media and Society in the Twentieth Yish. 14:15) Zatishenuña wuswa wenu wakutoñojoka nikutoñojoka kwakashinshi kwayinkayi Nzambi kulonda mwilishi chalala chikali chenu.—Yish. 2:10-15; Rom. 12:1, 2.
Century) Dichi bayi mukuminaña dakwiteja nikuhwelela nsañu yejima yimukutiyaku. (BAYI MUDAMBULA HELA KULEKA KUSHINDAKU
Mashidika anateli kuzatisha nsañu yakutwamba kulonda atiyishi woma ayilumbu jawu. Anateli kuleñela ayilumbu jawu kuzuña mulwawu hela kuyikojeja kutemuka kunjita. Mukulumpi wamashidika wakuGermany, wahosheli nindi, antu ayishindili muNjita Yakaayi Yatachi muloña “ayikwatilili kafuta kudi ayilumbu jawu nansañu yakutwamba neyi mboma nakachinchi.” Satana wazatishaña tufuta twotumu kulonda yatwambuli nikutushinda. Chakutalilahu, nateli kuletesha amanakwetu niahela akwaKristu kutoboka hela kuyikojeja ambuki mukuloñesha kwaYehova muloña wawuñanji waheña.
Bayi ayidimbaku! Itejenu izu daNzambi diyilomboleña. Chakutalilahu, hakwila mwikali anuñañana nawamanakwenu niahela, Bayibolu yinakuyikolesha nawu ‘danakenenuña wumu namukwawu chakufuma kumuchima’ nawa nyakalenuña kumanisha kukala. (Kol. 3:13, 14; Mat. 5:23, 24) Yatukanishaña chikupu kudambula nachipompelu. (Yish. 18:1) Dishinshikenu mumoni neyi munateli kubula kwiteja nsañu yakutwamba yaSatana. Dihulenu nenu: ‘Natoñojokeli namidi hampinji yinatiyili nsañu yakutwamba? Nadiña nayitoñojoka yakaayi tahindi yaNzambi?’—Ñal. 5:16-26; Efwe. 2:2, 3.
BAYI MUZEYAKU
Mushidika wabulaña kwovwahila nlomboli yindi wakañanyaña kuzuña chiwahi. Dichi, akwakuleta nsañu yakutwamba aluwañeshaña wubwambu hela kudikuhwelela kwekala hakachi kamushidika nimukulumpi windi. Anateli kuzatisha mazu akutwamba adi neyi: “Himwatela kukuhwelela anlomboli jenuku!” nawa “Bayi mwiteja ayitwali mukukalaku!” Hakwila nawu aswejeliku kuyidimba, anateli kuhosha chatama hachiluwa chinateli kwilawu anlomboli. Dichelañayi Satana. Watwalekañahu kuyikañesha kukuhwelela mudi anlomboli ashaku Yehova.
Tit. 1:10) Londelenu kufumba kwamufumbiliwu kansi Timotewu. Kakelenu kuchalala chimwadizili nawa anukenuña kumwachidizili. (2 Tim. 3:14, 15) Kuhosha hohu chalala, tunateli kukuhwelela njila yinazatishiyi Yehova kwakwihi nayaaka 100 yinahitihu kutulombola kunjila yachalala.—Mat. 24:45-47; Heb. 13:7, 17.
Munateli kudikiña ñahi? Fwilenu kukakela kukuloñesha kwaYehova nikukwasha alomboli enkaku hela chakwila akukoñaña yiluwa. (1 Tes. 5:12, 13) Bayi “muluwankana swayi-swayi muyitoñojoka yenu” neyi mutiya nsañu yakutwamba yahoshañawu akwakusekesha hela antu amakwawu atwambañaku, hela chakwila yinakutiyakana neyi yalala. (2 Tes. 2:2;BAYI MWITEJA KUYIZEYESHA KUDI TUFUTA TWATAMAKU
Ilukenu nenu, bayi neyi nsañu yejima yakutwamba yaSatana yelukewañaku. Mpinji yikwawu wazatishaña tufuta twatama, “twazatishileñayi kunyima.” (Easily Led—A History of Propaganda) Chakutalilahu, Professor Philip M. Taylor wakuBritain wasonekeli nindi, Ashuri ashindileña ayilumbu jawu kuzatisha “kafuta mwadibombeleli nsañu yakutwamba.” Satana wukuletesha antu kutiya antu woma, kutiya woma makabisha, kutiya woma kufwa, niyuma yikwawu yikuyitiyisha woma kulonda muleki kumuzatila Yehova.—Isa. 8:12; Yere. 42:11; Heb. 2:15.
Bayi mwiteja Satana kuyileñela kutiya woma kulonda mufumpi kashinshi kenuku. Yesu wahosheli nindi: “Bayi mutiya woma antu anateli kuyijahaku, muloña neyi anayijahi dehi, kwosi chuma chikwawu chelañawuku.” (Luka 12:4) Kuhwelelenu chikupu muchikaninu chaYehova chakuyikiña kulonda yayinki “ñovu yabadika hañovu jawantu,” nikuyikwasha kushinda kweseka kwejima kunateli kuyitiyisha woma.—2 Kor. 4:7-9; 1 Pet. 3:14.
Hela chochu, munateli kumona yuma yinateli kuyitiyisha woma hela kuyizeyesha. Ilaña anukenuña mazu aYehova amukolesheliyi Yoshuwa nindi: “Kadikwatishaña, Wakomikaña chacheni, bayi wakatiyaña womaku, bayi wakaakama akwenuku; muloña Yehova Nzambi yeyi wudi naneyi mwejima muwukuya.” (Yosh. 1:9) Neyi mwaakama, mulejenumu Yehova yuma yejima yimunakwakamena mukulomba. Kuhwelelenu nenu “kuwunda kwaNzambi . . . kwakahemba nyichima yenu niyitoñojoka yenu” kulonda mwakekali nañovu yakukaana nsañu yakutwamba yaSatana.—Fwi. 4:6, 7, 13.
Munakwakunaka nsañu yakutwamba yazatishiliyi ntemesha yawaAshuri, Rabisheki, kutalisha hadi antu jaNzambi? Wahosheli nindi, ‘Kwosi chuma chinateli kuyikiña kudi Ashuri. NiNzambi yenu, Yehova, kwosi chinateliyi kwilayi.’ Wahosheli cheñi nindi: ‘Yehova yomweni diyi nantemeshi kujilumuna idi ituña.’ Yehova wahosheli nindidi? “Bayi wutiya woma wamazu iwunatiyi anantukuwu kudi ambuñamwanta wakuAshuruku.” (2 Anya. 18:22-25; 19:6) Nkumuninaku watemesheli kañelu nakujilumuna Ashuri 185,000 hawufuku wumu!—2 Anya. 19:35.
IKALENU NAMAANA, MUTIYILILENUÑA YEHOVA MPINJI YEJIMA
Mwelahu dehi munakutala filimu yakwila munakumona nawu muntu anakumudimba nikumuluwañesha? Himukudihoshesha enu aweni nenu: ‘Kuyikuhwelela nehi! Anakukudimba!’ Fwikijenu añelu anakuyileja mazu wowamu nawu: “Bayi ayidimba kudi Satanaku!”
Bayi mutiyilila nsañu yaSatana yakutwambaku. (Yish. 26:24, 25) Mutiyililenu Yehova nawa mukuhwelelenu muyuma yejima yimwelaña. (Yish. 3:5-7) Londelenu mazu indi akwila nawu: “Eyi mwanami, ikalaku mukwamaana, wutiyishaña muchima wami kuwaha.” (Yish. 27:11) Neyi mwila mwenimi, mukushinda kukala kwamuyitoñojoka!