“MUDIMU wakwaañula weneni, ilaña akwakukalakala anakehi. Dichi, mulembelelenu Mwini mudimu wakwaañula kulonda yatemeshi akwakukalakala kumudimu windi wakwaañula.” (Luka 10:2) Awa mazu ahosheliyi Yesu hadi yaaka 2,000 yinahitihu anakumwekesha yuma yinakumwekana muMyanmar makonu. Muloñadi? MuMyanmar mudi hohu akwakushimwina 4,200 anakushimwina nsañu yayiwahi kudi antu 55 miliyoni.

Hela chochu “Mwini mudimu wakwaañula,” Yehova nakwashi amanakwetu niahela amavulu kufuma kumatuña ashiyashana kuya nakukwasha mudimu wakwaañula wakuspiritu munidi ituña dekala kuSoutheast Asia. Chumanyi chaletesheli ashiyi nyikala yawu? Ayikwashili ñahi hakwila nawu ayi kweniku? Nawa yumanyi yayiwahi yinakudiluñishawu? Tuwanenu ñakwilu.

Yaaka yinahitihu, Kazuhiro payiniya wakuJapan, wakatili chinkonya nawa amutwalili kuchipatela. Ndotolu wamulejeli nindi hadi yaaka yiyedi bayi yendesha motokaku. Kazuhiro watiyili kutama. Wadihwili nindi: ‘nukutwalekahu ñahi kuzata mudimu wami inakeñesha, wupayiniya?’ Wamulombeli chikupu Yehova nindi yamwenzunwini njila kulonda yatwalekihu kuzata wupayiniya.

Kazuhiro walumbulwili nindi: “Chimwahitili kakweji kamu ibwambu dami wakalakeleleña kuMyanmar watiyili kukala kunadiña naku. Wantemesheleli mazu nawa wahosheli nindi: ‘KuMyanmar twavula kuzatisha mabasi. Neyi winza kunu wukutwalekahu mudimu weyi wakushimwina chakadi kuzatisha motoka.’ Namwihwili ndotolu neyi nateli kuya kuMyanmar. Ndotolu wanlejeli nindi: ‘Ndotolu watalaña jawoñu nakwinza muJapan kufuma kuMyanmar. Nikumuleja kulonda yeluki. Neyi wukakonya cheñi wukakukwasha.’ Namweni mwanlejeliyi ndotolu nami Yehova diyi wunakuli kulomba kwami.”

Hashimbwili wanyi Kazuhiro watumini emelu kukasanji kamutayi kakuMyanmar nindi yena niñodindi anakukeña kuya nakuzatila wupayiniya kuMyanmar. Mwahitili hohu mafuku atanu, kasanji kayilejeli nawu “Twayenu, tunakukeña apayiniya amavulu!” Kazuhiro niñodindi Mari, alandishili nyotoka yawu, atambwili mapasi nawa alandili matiketi akukandama nachu ndeki. Chayinu mpinji anakuzatila muchipompelu chahoshaña idimi dawatumama muMandalay nawa azataña  namuzañalu. Kazuhiro wahosheli nindi: “Muloña wachumichi, twatiyaña netu chikuhwelelu chetu chinakoli chikupu muchikaninu chaNzambi chekala haMasamu 37:5 chakwila nawu: ‘Kunjikaku njila yeyi kudi Yehova, Mukuhweleli, yena wakachimwekesha.’”

Mu 2014, aYinsahu jaYehova muMyanmar adiña nakukooleka kwakwikala nakupompa kwadimena. Antu amavulu kufuma kumatuña acheñi enjili nakupompa. Wumu hakachi kawu himuhela Monique wudi nayaaka 34 wafumini kuUnited States, wahosheli nindi: “Chinafumini kukupompa namulombeli Yehova chuma chinatela kwila muchihandilu chami. Nayilejelimu cheñi anvwali jami yuma yinafwilileña kuzata mumudimu waYehova. Wejima wetu twahanjekelihu netu natela kufunta kuMyanmar, ilaña hahitili mpinji nawa nalombelelihu chikupu henohu kanda nifuukulihu.” Monique walumbulwili chuma chaletesheli.

“Yesu wayikolesheli akwakumulondela ‘kuchinda mali akuzatisha.’ Dichi nadihwili nami: ‘Nukutwesha kuya? Nukutwesha kudikwasha ami aweni kunidi ituña chakubula kuzatishaña mpinji yeneni kumudimu wakumujimba?’” Washimwini hatooka nindi: “Nadiña wanyi namali ashikila akuzatisha kunidi ituña.” Hanu dinu, watwesheli ñahi kuya?—Luka 14:28.

Monique washimwini nindi: “Ifuku dimu muntu wunazatilileña mudimu wanlejeli kuya nakudimona nindi. Natiyili woma nami hiyakunhaña mudimu. Ilaña chinashikili wansakilili chinazatileña chachiwahi. Kuhiñahu wanlejeli nindi wukunyinka nfwetu yahewulu, wanyinkeli wowu mali inakeñeleña akuya nachu.”

Monique natwalekihu kuzatila kuMyanmar kufuma tuhu muDecember 2014. Watiyaña ñahi kushimwina kudi kukaankila? Wahosheli nindi: “Natiyaña kuwaha kuzatila kunu. Nikweti atudizi aBayibolu asatu. Kadizi wami wumu wudi nayaaka 67. Mpinji yejima wañimushaña namuzañalu nawa wankumbataña. Chadiziliyi nindi ijina daNzambi diyi Yehova, wadilili. Wahosheli nindi: ‘Aka dikatachi muchihandilu chami kutiya nawu Nzambi ijina dindi diyi Yehova. Eyi wudi kansi nankashi ilaña wunandizishi chuma chalema chinabulili kwiluka.’ Nakañenyi kuhosha, dichi ninami nawulumwini madilu. Yuma yamuchidiwu yaleteshaña kutiya kuwaha chikupu kuzatila kwiluña kudi kukaankila.” Katataka, Monique waya kuShikola Yawakwakushimwina Nsañu Yayiwahi yaWanta.

Chuma chikwawu chayileñeleli antu amakwawu kuya kuMyanmar hiYearbook of Jehovah’s Witnesses yamu 2013. Muhela Li wudi nayaaka kubadika 30, washakamahu dehi kuSoutheast Asia. Wazatileña mudimu wakumujimba, ilaña Yearbook yamuletesheli kutachika kutoñojoka kuya nakuzatila kuMyanmar. Wahosheli nindi: “Mu 2014 chinayili kukupompa kwadimena muYangon, nawanini adisumbula akalakelaña kudi kukaankila mwiluña mwahoshañawu chiChinese muMyanmar. Chineli nahoshaña chiChinese, nafuukwilihu kuya kuMyanmar nakukwasha izanvu dahoshaña chiChinese. Nadibombeli naMonique nawa twayili kuMandalay. Yehova watukiswilili dichi tweñilili mudimu wawuntañishi wakuzataku mafuku amakwawu mumulungu nawa twawanini itala mukamwihi. Hela chakwila kwekala kutata nankashi niyuma yikwawu yamwekanaña, nadiluñishaña kushimwina. Antu amuMyanmar ashakamaña chihandilu chapela, ilaña akweti kavumbi nawa akeñaña kutiyilila kunsañu yayiwahi. Twazañalalaña chikupu hakumona Yehova chinakwendeshayi mudimu wakushimwina swayi. Nakuhweleli chikupu nami yadiña nkeñelu yaYehova ami kwinza kunu kuMandalay.”

Amanakwetu amavulu azatilaña kudi kukaankila anamoni kulomba chikwazatikaña. Shinshikenu  manakwetu Jumpei wudi nayaaka 37 niñodindi Nao wudi nayaaka 35. Adiña nakuzatila muchipompelu chazatishaña idimi dawatumama muJapan. Muloñadi chayililiwu kuMyanmar? Manakwetu Jumpei walumbulwili nindi: “Ami niñodami twafwilileña kuya nakuzatila kwituña dacheñi kudi kukaankila. Manakwetu itwadiña nindi muchipompelu chawatumama kuJapan wayili kuMyanmar. Hela chakwila twadiña hohu namali antesha itwahembeli, muMay 2010, ninetu twayili. Amanakwetu niahela kuMyanmar atushikijili namuzañalu!” Watiyaña ñahi kuzatila kwiluña kwahoshañawu idimi dawatumama kuMyanmar? “Antu amavulu adi nampwila. Neyi tuyitalisha mavidiyo awatumama, eni matala ahayamaña. Twatiyaña kuwaha chitwafuukwilihu kwinza nakumuzatila Yehova kunu!”

Manakwetu Jumpei nimuhela Nao ahandaña ñahi munsañu jamali? Ashimwini nawu: “Hanyima yakuzata yaaka yisatu, mali ejima itwadiña nawu amanini, dichi twadiña wanyi namali akusonkela nachu chaaka chalondelelihu. Ami niñodami twalombeli chikupu. Chakadi kukuhwelela, twatambwilili mukanda kufuma kukasanji kamutayi nawu tuzatiku wupayiniya wadimena hadi kapinji kantesha. Twamukuhweleleli Yehova nawa twelukili netu hanatumbiku. Wadiña nakutwakamena muyuma yejima.” Katataka, manakwetu Jumpei nimuhela Nao adiña muShikola Yawakwakushimwina Nsañu Yayiwahi yaWanta.

Chumanyi chaletesheli manakwetu Simone wakuItaly wudi nayaaka 43 niñodindi Anna muhela wakuNew Zealand wudi nayaaka 37 ayi kuMyanmar? Anna wakwili nindi: “Yearbook ya2013 yahosheleña nsañu yakuMyanmar diyaletesheli tuyi!” Simone wahosheli nindi: “Twatiyaña kuwaha nankashi chitwenjili kuMyanmar. Chihandilu kunu chapela nawa nazataña mpinji yeneni mumudimu waYehova. Twazañalalaña chatwakamenañayi Yehova muloña wakuzatila kudi kukaankila kweneni.” (Mas. 121:5) Anna wahosheli cheñi nindi: “Nidi namuzañalu wasweja kubadika wunadiña nawu kunyima. Tunakushakama chihandilu chapela. Mpinji yeneni nekalaña hamu nanfumwami nawa tunadikundi chikupu. Tunekali nawamabwambu amawahi. Antu ahela aYinsahu wanyi nawa atiyililaña kunsañu yayiwahi!” Munjilanyi?

Anna washimwini nindi: “Ifuku dimu nashimwinini mukashikola wahayunivesiti hamaketi nawa twatiyañeni kubulakana cheñi. Chitwahumañeni, wenjili namukwawu. Ifuku dikwawu wenjili nawakwawu. Nkumininaku wenjili cheñi namakwawu. Nawa chayinu mpinji ejima atanu nadizaña nawu.” Simone niyena wahosheli nindi: “Antu munidi iluña ekala chiwahi nawa akeña nankashi kudiza. Amavulu akweti mpwila hama. Tudana mpinji yeneni yakushimwina antu ejima.”

Hanu dinu yumanyi yakeñekaña hakwila nawu muntu yafuukulihu kuya kuMyanmar? Mizuho wakuJapan,  washimwini nindi: “Ami ninfumwami Sachio, twakeñeleña nankashi kuya nakuzatila kwituña kudi kukaankila, kwituñanyi? Hanyima yakutaña nsañu yadiña muYearbook ya 2013, yahosheleña hetuña daMyanmar, chatukwatili kumuchima nansañu yitwatañili dichi twatachikili kutoñojoka kuya kuMyanmar neyi chinatwesheki.” Sachio wabombelelihu nindi: “Twasambilili kuya nakutala muYangon hadi mulungu wumu, musumba weneni wamuMyanmar nakutala chidi iluña. Chitwafuntili twafuukwilihu kuya nakuzatilaku.”

Manakwetu Rodney niñodindi Jane wudi nayaaka 52 akuAustralia hamu nianyanawu, Jordan naDanica, anazatili kudi kukaankila kuMyanmar kufuma tuhu mu 2010. Rodney wahosheli nindi: “Chuma chatuletesheli himpwila yadiña nawantu yakukeña kumwiluka Nzambi. Dichi inakukolesha yisaka yikwawu kuya nakuzatila kumaluña adi neyi Myanmar.” Muloñadi? “Chumichi chinaleteshi chisaka chetu kuswina kwakwihi naNzambi. Atwansi amavulu asha maana kumafoni awu, kunyotoka, hanyidimu niyuma yikwawu. Anyanetu anakudiza mazu amaha akuzatisha hakushimwina. Anakudiza chakuhanjeka nawantu abula kwiluka Bayibolu, chakwakulahu hakupompa kwachipompelu nawa asha maana kunyidimu yikwawu yakuspiritu.”

Oliver, manakwetu wudi nayaaka 37 wakuUnited States, walumbulwili chuma chaletesheli yakeñi iwu mudimu nindi: “Kumuzatila Yehova kwituña dacheñi munafumi yuma yayivulu yayiwahi. Kuya nakuzatila kwacheñi kunankwashi kusweja kumukuhwelela Yehova hela chakwila nateli kumona kukala kwamuchidinyi. Kuzatila hamu nawantu inabulili kwiluka ilaña akuhwelela yuma yinakuhwelela kunankwashi kwiluka nami kwosi chuma chalema mukaayi chinateli kwesekana naWanta waNzambiku.” Makonu, manakwetu Oliver niñodindi Anna, anatwalekihu kuzata neyena mwiluña dahoshañawu chiChinese.

Trazel, muhela wakuAustralia wudi nayaaka 52, nakalakeli kuMyanmar kufuma tuhu mu 2004. Wahosheli nindi: “Inakukolesha antu ejima akweti wuswa, kuya nakuzatila kudi kukaankila. Namoni nami neyi wudi namuchima wakukeña kukalakala, Yehova wukukukiswila. Hinatoñojokelihu nami nakashakamahu chihandilu chamuchidiwuku. Dichuma chachiwahi nawa chihandilu chachiwahi chinabulili kukuhwelela.”

Awa mazu akukolesha anashimuniwu amanakwetu azatilaña kuMyanmar kudi kukaankila ayisañumuni kutoñojokahu kuya nakukwasha antu akweti nyichima yayiwahi kumaluña kuyabulahu dehi kuzatila. Dichi antu anakuzatila kudi kukaankila anakutambika nawu, “Mwani, zambukilenu kunu kuMyanmar mutukwashiku!”