1. Chumanyi chitwafwilaña wejima wetu, nawa mwabombeladi?

MWATIYAÑA ñahi neyi muntu imweluka hela imwalemesha yajimbala ijina denu, sweje-e dinu neyi nakañanyi kuyiluka? Munateli kutiya kutama. Muloñadi? Muloña wejima wetu twakeñaña kutwiluka. China chitwakeñaña netu atwiluki hitwafwilaña hohu netu atwilukiku, ilaña twakeñaña netu eluki chitwekala niyuma yituneli.—Kuch. 11:16; Yoba 31:6.

2, 3. Kufwila kutuhameka kunateli kutuluwañesha ñahi? (Talenu mwevulu wakutachikilahu.)

² Neyi chekala kufwila kukwawu kutwekala naku, kufwila kutwafwilaña netu atuhameki kunateli kuhambakana nikutuluwañesha muloña wakubula kuwanina. Kunateli kutuleñela kusweja kukeña kutwiluka munjila yabula kutelela. Kaayi kaSatana kakeñaña antu asweji kutumbakana nikuyiluka kulonda abuli kwiluka muntu wuyatela kwilukawu nawa itwatela kudifukulaku, Tata yetu wamwiwulu Yehova Nzambi.—Chim. 4:11.

³ Mumafuku aYesu, akulumpi ansakililu amakwawu akeñeleña  kuyiluka munjila yabula kutelela. Yesu wayisoñamishili nindi: “Babalenu nawansoneki akeñaña kwendujola iku anavwali nyinkukumba nawa akeñaña nawu ayimusheña muyisankanu, mumasinagogi nimwena akeñaña kushakama hayitwamu yakumbidi [“yayiwahi nankashi” tth] nimumaluña alema hakuda yakuda yamelela.” Watwalekelihu nindi: “Awa antu akayibabesha chikupu.” (Luka 20:46, 47) Kwambukaku, Yesu wamuhamekeli mumbanda nfwila wahanini tuyawaana twanyanya twabulileñayi kukeña nindi antu amakwawu atumoni. (Luka 21:1-4) Yesu wakeñeleña kumwiluka munjila yambukaku chikupu nachakeñeleña antu amakwawu. Achinu chibaaba chikutukwasha chitunateli kwiluka njila yayiwahi yakutwilukilamu, njila yetejayi Yehova Nzambi.

4. Muntwinyi wabadika itwatela kufwila netu yatwiluki, nawa muloñadi?

⁴ Hanu dinu muntwinyi wabadika itwatela kufwila netu yatwiluki? Bayi neyi himpuhu yafwilañawu antu amavulu nawu ayiluki munsañu jakutaña, jakulanda nakulandulula nimujayisela yamukaayiku. Ilaña, hikwiluka kwashimwiniyi Pawulu munawa mazu nindi: “Chineli munamwiluki dehi Nzambi, hela netu chinayilukiwu dehi kudi Nzambi, muloñadi chimunakufuntila cheñi kuyuma yabula kukola nikuyuma yawansi yamukunkulwayi nakukeña kwikala anduñu ayumiyi cheñi?” (Ñal. 4:9) Hikukooleka chikupu “[hakutwiluka] kudi Nzambi,” Nyuuli Wabadika wakuleña kwejima! Wakeñaña nindi twikali nawubwambu wakola nayena. Neyi chahosheli muntu wumu wadiza chikupu nindi: “Twekalaña yuma yaswejayi kusha maana nankashi.” Neyi Yehova yatwiluka nindi tudi amabwambu jindi, twelukaña chuma chacheni chitwekalilaku.—Mukwa. 12:13, 14.

5. Tunateli kwila ñahi hakwila Nzambi yatwiluki?

⁵ Mosi amwilukili chikupu. Chamulembeleliyi Yehova nindi yamwiteji kwiluka njila Jindi, Yehova wakwili nindi: “Ami nukwila chumichi chiwunahoshi, muloña nakutoñi, nakwiluki ijina deyi.” (Kwid. 33:12-17) Ninetu tunateli kutambwila nkisu neyi Yehova yatwiluka hamuntu. Tunateli kwila ñahi hakwila Yehova yatwiluki? Tunateli kwila mwenimu kuhitila mukumukeña nikuhana wumi wetu kudi yena.—Tañenu 1 Akorinda 8:3.

6, 7. Yumanyi yinateli kutuleñela kujimbesha wumbwambu wetu naYehova?

⁶ Hela chochu, twatela kutwalekahu kuhemba wumbwambu wetu naTata yetu wamwiwulu. Kufwana akwaKristu amuÑalija asonekeleliyi Pawulu, ninetu twatela kutondolwela kukalakela ‘yuma yabula kukola nawa yamukunkulwayi’ yamukanu kaayi kushilahu nikukeña netu atuhameki. (Ñal. 4:9) Awa akwaKristu amumafuku awapostolu asonekeleliyi Pawulu adiña apama dehi nikushika hakuyiluka kudi Nzambi. Hela chochu, Pawulu wahosheli nindi amanakwetu wowamu ‘afuntileña cheñi’ kuyuma yamukunkulwayi. Munjila yikwawu Pawulu wayilejeleña nindi: “Henohu munafumi dehi kwakulehi, muloñadi chimunakufuntila kuyuma yawusupi, yuma yakadi mudimu yimwashili dehi kunyima?”

⁷ Komana ninetu makonu tunateli kukoña chuma chochimu? Eña tunateli. Kufwana Pawulu, hadaha ninetu chitwamwilukili Yehova, twalekeli kukeña netu atwiluki mukaayi kaSatana. (Tañenu Afwilipi 3:7, 8.) Hadaha twakaanini kutaña shikola yahewulu, hela twakaanini yifulu yamaneni indi kwiji kwikala namali amavulu mukaayi mudi jakulanda nakulandulula. Waana wetu wakwimba tumina hela wuswa wakuhema yisela wadi kutuletesha kuya mpuhu nikuheta, ilaña  twalekeli yuma yejimiyi. (Heb. 11:24-27) Chikwikala chaluwa neyi tutachika kutoñojoka netu yuma yitwafuukwilihu ‘yinakutukañesha yuma yayiwahi!’ Yitoñojoka yamuchidiwu yikutukojeja kutachika kukeña yuma yitwamweneña netu yadiña hakachi ‘kayuma yabula kukola nawa yamukunkulwayi’ yamukanu kaayi. *

8. Chumanyi chinateli kutukwasha kuzata nañovu kulonda Yehova yatwiluki?

⁸ Tunateli kuzata ñahi nañovu kulonda Yehova yatwiluki chatela atwiluki kudi kaayi? Hakwila twili mwenimu, twatela kwanuka yuma yiyedi yalema. Chatachi, Mpinji yejima Yehova welukaña antu amuzatilaña nakashinshi. (Tañenu Aheberu 6:10; 11:6) Wahamekaña ambuñindi ejima nawa wamonaña nindi ‘chaloña wanyi’ kudiwula antu amukalakelaña nakashinshi. “Yehova weluka antu jindi.” (2 Tim. 2:19) Weluka “antu amwakamaña” nawa weluka chakuyipulwisha mukweseka.—Mas. 1:6; 2 Pet. 2:9.

9. Shimunenu chakutalilahu chinakumwekesha Yehova chakwashiliyi antu jindi.

⁹ Mpinji yikwawu, Yehova wakwashaña antu jindi jindi munjila yambukaku chikupu. (2 Kushi. 20:20, 29) Chakutalilahu, shinshikenu Yehova chayipulwishiliyi antu jindi haKaluñalwiji Kachinana hampinji yayihañileñawu kudi mashidika aFwaru añovu. (Kwid. 14:21-30; Mas. 106:9-11) Chuma chamwekeni chadiña chakuhayamisha chakwila antu atwalekeli kuhoshahu hadi yaaka 40. (Yosh. 2:9-11) Chumichi chatukoleshaña chikupu neyi twanuka Yehova chakamwekeshelayi kukeña niñovu hampinji yakulukuka kwaGogi waMagogi kwashimwineñahu dehi. (Ezek. 38:8-12) Haniyi mpinji, tukazañalala hakwiluka netu atwiluka kudi Nzambi bayi kudi kaayiku.

10. Chumanyi chitwatela kwanuka hadi Yehova chelukañayi antu?

¹⁰ Twatela cheñi kwanukaña chikuma chamuchiyedi chalema: Yehova nateli kutwiluka munjila yitunateli kubula kukuhwelela. Antu ejima elaña yuma yayiwahi kulonda ayimoneña kudi antu, ayileja nawu hiyakatambwila wufwetu kudi Yehovaku. Muloñadi? Muloña wufwetu wawu anawutambwili dehi chadimu chineli anayihameki dehi kudi antu. (Tañenu Matewu 6:1-5.) Hela chochu, Yesu wahosheli nindi Tata yindi “wamonaña yuma yejima” hela “wamonaña kumbadi” antu elaña yuma yayiwahi abulaña kutambwila wufwetu kudi akwawu. Wayilukaña nawa wafwetaña muntu wejima kwesekeja namudimu windi. Hela chochu, mpinji yikwawu Yehova watufwetaña munjila yitunabuli kukuhwelela. Tushinshikenu yakutalilahu.

11. Yehova wamwekesheli ñahi nindi wamwilukili kansi wamumbanda Mariya?

¹¹ Chashikili mpinji yakusemuka kwaMwana kaNzambi muwuntu, Yehova watondeli mumbanda wabulahu dehi kukama neyala, Mariya kwikala mama yamwana walema. Mariya washakamineña mumusumba wakehelamu waNazareta, wadiña hahalehi naYerusalema mwadiña Tembeli yalubanji. (Tañenu Luka 1:26-33.) Muloñadi chamutondeleliwu Mariya? Amulejeleli kudi kañelu Gabireli nindi “Nzambi nakutiyi kuwaha.” Mariya wamwekesheli chamukeñayi Nzambi chelili yahoshi nantaña yindi Elizabeta. (Luka  1:46-55) Yehova wadiña nakumushinshika Mariya, nawa wamwinkeli iku kukooleka muloña wakashinshi kindi.

12, 13. Munjilanyi mwamumwekesheleliwu Yesu hampinji yasemukiliyi nihampinji yamutwaliliwu kutembeli chimwahitili mafuku 40?

¹² Chelili Mariya yavwali Yesu, Yehova wayilejeli wanyi akulumpi hela anlomboli amuYelusalema nimuBetelemi yuma yamwekeni. Añelu amwekeni kudi atubiña akehelamu adiña nakuhemba nyikoku mumasaña hanji yaBetelemi. (Luka 2:8-14) Kuhiñahu, awa atubiña ayili nakutala mwana wasemukili. (Luka 2:15-17) Mariya naYosefu atela atiyili kuwaha hakumona chamulemesheliwu Yesu muyina njila. Shinshikenu Yehova chelañayi yuma kwambukaku nachelañayi Diyabolu. Satana chatemesheliyi akwakuhoña natutumbwa kuya nakumutala Yesu nianvwali jindi, antu ejima muYerusalema akameneni hansañu yakuvwalika kwaYesu. (Mat. 2:3) Chelukiliwu nawu Yesu navwaliki, chaletesheli anyana amavulu akadi muloña kuyijaha.—Mat. 2:16.

¹³ Chimwahitili mafuku 40 kufuma hasemukiliyi Yesu, Mariya wateleleli kuya nakuhana mulambu kudi Yehova kutembeli muYerusalema, hadiña makilomita 9 kufuma muBetelemi. (Luka 2:22-24) Mariya hayileñayi hamu naYosefu niYesu, hadaha watoñojokeleña neyi chakwila atupristu akulombolaña akuhoshahu nsañu yalema kutalisha hamudimu wukazatayi Yesu kumbidi. Yesu amwilukili, ilaña munjila yambukaku nachakuhweleleliyi Mariya. Ilaña Yehova wazatishili muntu “waloña nawa wamwakama Nzambi,” Simeyona nikaprofwetu wamumbanda nfwila Anna, wadiña nayaaka 84 kwiluka nawu iwu mwana diyi wukekala Mesiya akaniniwu hela Kristu.—Luka 2:25-38.

14. Nkiswinyi yatambwililiyi Mariya kudi Yehova?

¹⁴ Indi Mariya? Komana Yehova watwalekelihu kumwiluka Mariya muloña wakwakamena nikukulisha Mwanindi nakashinshi? Eña watwalekelihu. Nzambi wasonekeli yilwilu yindi nimazu indi muBayibolu. Chinamwekani neyi, Mariya halondeleleña kwejima kwayileñayi Yesu hadi yaaka yisatu nachikunku yazatiliyi mumudimu windi wakushimwinaku. Hadaha chineli Mariya wadiña nfwila, watela washakamineña muNazareta. Hela chakwila washalilihu kukooleka kwakuvulu, ilaña hampinji yafwileñayi Yesu wadiña hohu. (Yow. 19:26) Hela chochu, chimwahitili mpinji, Mariya wadiña hamu nawatumbanji hamafuku akutwala kuPentakosta hayichililiwu antu spiritu yajila. (Yilw. 1:13, 14) Hamwaha niyena amuwayishilili hamu nawantu apompeli. Neyi dimu, dikwila nawu amwinkeli kukooleka kwakwikala hamu naYesu mwiwulu haya nyaaka. Amukiswilili muloña wakashinshi kindi.

15. Yesu hadiñayi hamaseki, Yehova wamwekesheli ñahi nindi wamwiluka Mwanindi?

¹⁵ Yesu hakeñeleña nindi amulemesheña kudi akulumpi jakwitiya hela anyuuli ajipolitikiku. Watela wakoleli chikupu chelili Yehova yamwekeshi nindi wamwiluka hahosheliyi kapampa kasatu hampinji yashiyashana iku wudi mwiwulu. Chelili hohu Yesu amupapatishi muKaloña Yodana, Yehova wahosheli nindi: “Iwu diyi Mwanami, inakeña, inatiyaña kuwaha.” (Mat. 3:17) Chinamwekani hatooka nawu Yowanu Mupapatishi hohu diyi muntu mukwawu watiyiliku awa mazu. Chikwashalili chaaka chimu henohu Yesu kanda yafwi, apostolu indi asatu atiyili Yehova chahosheliyi hadi Yesu nindi: “Iwu diyi Mwanami, inakeña,  inatiyaña kuwaha. Mutiyililenu.” (Mat. 17:5) Nkumininaku, henohu kunashali hohu mafuku antesha hakwila nawu Yesu yafwi, Yehova wahosheli cheñi naMwanindi iku wudi mwiwulu.—Yow. 12:28.

16, 17. Yehova wamulemesheli ñahi Yesu munjila yabuliliyi kukuhwelelayi yena?

¹⁶ Hela chakwila Yesu welukili nindi akamujiha munjila yakusawuka, akamutwambila nawu mukwakutukana, walombeli nindi nkeñelu yaYehova yizatiki bayi nkeñelu yindiku. (Mat. 26:39, 42) “Womikili hamutondu wakuyandishila, wadiwili nsonyi,” hakeñeleña nindi amwiluki kudi kaayiku, ilaña amwiluki kudi Tata yindi hohu. (Heb. 12:2) Yehova wamwilukili ñahi?

¹⁷ Hampinji yadiñayi hamaseki, Yesu wamwekesheli chakeñeleñayi kufunta mukulema kwadiñayi naku mwiwulu hamu naTata yindi. (Yow. 17:5) Kwosi hamwekeshañawu nawu Yesu wafwilileña chuma chikwawuku. Hakeñeleña nindi amwinki chifulu “chikwawu cheneniku.” Ilaña Yehova welilidi? Wamulemesheli Yesu munjila yambukaku kuhitila mukumusañula “nakumwinka chifulu chahewulu” nikumwinka chuma chiyabulilihu kutambwila antu amakwawu kushika nihayina mpinji, wumi wakafwaña. * (Fwi. 2:9; 1 Tim. 6:16) Muloña wakashinshi kindi, Yesu amwilukili munjila yambukaku chikupu.

18. Chumanyi chikutukwasha kutondolwela mpuhu yamukanu kaayi?

¹⁸ Chumanyi chikutukwasha kutondolwelela mpuhu yamukanu kaayi? Anukenuña nenu mpinji yejima Yehova welukaña ambuña indi ashinshika nawa kakavulu wayifwetaña munjila yinabuli kukuhwelelawu. Hinyi wuneluki yuma yitunabuli kukuhwelela yitukatambwila kumbidi? Ilaña chayinu mpinji, chitunakutwalekahu kuumika makabi nikweseka mukanu kaayi katama, mpinji yejima twanukeña netu kanu kaayi nikwiluka kwafwilañawu antu jinakuhita. (1 Yow. 2:17) Tata yetu wukweti kukeña, Yehova, ‘waloña hakavulamena nyidimu yetu nikukeña kutwakeña ijina dindiku.’ (Heb. 6:10) Mwamweni, wakatumwekeshela luwi—hadaha munjila yitunateli kubula kukuhwelela makonu.