1, 2. (a) Muloñadi chichatelela kwikala kukabadi kaYehova? (b) Yumanyi yitukuhanjeka muchinu chibaaba?

CHATELELA kumulamata Yehova. Kwosi muntu wukweti ñovu, maana hela kukeña kubadika Nzambi yetuku! Hinyi hakachi ketu wukubula kukeña kwikala kukabadi kindi? (Mas. 96:4-6) Hela chochu, antu amakwawu adifukulaña kudi Nzambi ajinokaña kwikala kukabadi kaYehova neyi yuma yinayikalili.

² Muchinu chibaaba tukushinshika hadi antu amwekesheleña neyi adi kukabadi kaYehova hampinji yoyimu anakwila yuma yamuneñeshaña. Muniyi nsañu mudi yikuma yalema yikutukwasha kutwalekahu kwikala ashinshika kudi Yehova.

3. Muloñadi Yehova chahosheleliyi naKena, nawa Wamulejeli nindidi?

³ Shinshikenu chuma chamumwekeneni Kena. Hadiña nakudifukula kudi nzambi wacheñiku, ilaña kudi Yehova. Hela chochu, Nzambi hetejeli kudifukula kwaKenaku. Mumuchima windi mwadiña yitoñojoka yatama. (1 Yow. 3:12) Yehova wahosheli naKena nakumuleja nindi: “Neyi wukwila chachiwahi hiyakukwitiyaku? Ilaña neyi hiwukwila chachiwahiku nshidi yinafukami  kuchisu; wakata muchima hadeyi, nineyi wakela mwanta windi.” (Kutach. 4:6, 7) Yehova wamulejeleña Kena nindi: “Neyi wukubalumuka mumuchima nakwimana kukabadi kami, ninami nukwikala kukabadi keyi.”

4. Kena welilidi chiyamwinkeliwu kukooleka kwakwikala kukabadi kaYehova?

⁴ Yehova wadi kumutiyila Kena luwi neyi hohu wahimpili yitoñojoka yindi. Ilaña Kena hatiyili mwamufumbiliwuku. Yitoñojoka nikufwila kwindi kwatama kwamuletesheli kukoña chuma chatama. (Yak. 1:14, 15) Kuwansi windi, hadaha Kena watoñojokeleña nindi hanateli kufuma kukabadi kaYehovaku. Hela chochu, mukuhita kwampinji welili chuma chabuliliyi kutoñojokahu, wadikañili naNzambi nawa wamujahili manakwindi.

5. Yitoñojoka yamuchidinyi yinateli kuletesha muntu kujimbesha wubwambu windi naYehova?

⁵ Kufwana Kena, mukwaKristu nateli kudifukula kudi Yehova iku nakukoña yuma yatama kumbadi. (Yuda 11) Chakutalilahu, muntu wumu nateli kwikala nayilwilu yakufwila kwila wuvumbi, lwisu hela kuhembela mukwawu mukwaKristu nkunyi. (1 Yow. 2:15-17; 3:15) Yitoñojoka yamuchidiwu yinateli kuleñela muntu kukoña nshidi. Hampinji yoyimu, muntu nateli kwikala wadikita mumudimu wakushimwina nikupompa mpinji yejima. Antu amakwawu hiyanateli kwiluka yitoñojoka niyilwilu yetuku, ilaña Yehova wamonaña yuma yejima nawa weluka neyi twadihana kwikala kukabadi kindi namuchima wejima hela nehi.—Tañenu Yeremiya 17:9, 10.

6. Yehova watukwashaña ñahi ‘kwikala mwanta’ hanshidi neyi twimana kukabadi kindi?

⁶ Hela chochu, Yehova washikenaña dakutulekaku wanyi. Neyi muntu yafuma kudi Nzambi, Yehova wamulejaña nindi: ‘Funtaku cheñi kudami, ami nawa nikufunta kudeyi.’ (Mal. 3:7) Sweje-e neyi tunakulwisha nakuzeyazeya kwetu, Yehova wakeñaña nindi tutondolweleña yuma yatama. (Isa. 55:7) Neyi twikala kukabadi kindi, niyena wukwikala kukabadi ketu kuhitila mukutwinka ñovu niyitoñojoka ‘yakwikala mwanta’ hanshidi jetu.—Kutach. 4:7.

7. Solomoni wajimbesheli ñahi wubwambu windi naYehova?

⁷ Twatela kudizila nsañu yayivulu kuyuma yamumwekeneni Mwanta Solomoni. Hampinji yadiñayi kansi, Solomoni wadiña nakovwahila wunlomboli waYehova. Nzambi wamwinkeli maana chikupu nawa wamwinkeli mudimu wakutuña tembeli yalubanji muYerusalema. Ilaña Solomoni wajimbesheli wubwambu windi naYehova. (1 Anya. 3:12; 11:1, 2) Nshimbi yaNzambi yakaanishili Mwanta wakaHeberu “kuvulisha . . . ambanda, akenza kamuteñulula muchima windi.” (Kuhit. 17:17) Solomoni wadikañili, nkumininaku wasumbwili ambanda 700. Wabombelelihu cheñi antombu (ambanda awujila) 300. (1 Anya. 11:3) Añodi jindi amavulu hiyadiña aIsarelaku, adifukwileña kudi anzambi akutwamba. Dichi, Solomoni wafumpili nshimbi yaNzambi yakubula kusumbula ambanda akumatuña acheñi.—Kuhit. 7:3, 4.

8. Solomoni wamuvulumwini ñahi Yehova?

⁸ Solomoni wadambwileña kudi Yehova chovu-chovu, nkumininaku wakoñeli nshidi yeneni. Solomoni watuñili kameña kanzambi wamumbanda Ashitoreti nawa watuñili cheñi kameña kanzambi wakutwamba Kemoshi. Kweniku wadibombeli hamu nawañodi jindi nakudifukula kudi ankishi. Watuñili twenitu tumeña kumaluña ejima, kumpidi yadiña kumbidi yaYerusalema, kwatuñililiyi tembeli  yaYehova. (1 Anya.11:5-8; 2 Anya. 23:13) Hadaha Solomoni wadidimbileña yomweni nakutoñojoka nindi Yehova wukudiwula yiluwa yindi chakala hohu yatwalekahu kuhana nyilambu mutembeli.

9. Yumanyi yafuminimu chelili Solomoni yabuli kwovwahila mwamufumbiliwu kudi Nzambi?

⁹ Yehova hadiwulaña nshidiku. Bayibolu yashimuna nawu: “Yehova wazuwili naSolomoni nanochu chabalumukili muchima windi hiwukufuma kudi Yehova . . . , wamumwekeneni kayedi wamulejeli chena chumichi chakubula kulondela akishi; yena kwindi kuhemba mwamulejeliyi Yehova nehi.” Chafuminimu, Yehova wadambwili kudi yena nawa walekeli kumukwasha. Answana jaSolomoni hiyatwalekelihu kuyuula muIsarela yejimaku nawa amweni yihuñu yayivulu mumakiñu awu ahiñileñahu.—1 Anya. 11:9-13.

10. Yumanyi yinateli kuluwañesha wubwambu wetu naYehova?

¹⁰ Neyi chichamumwekeneni Solomoni, chuma chinateli kutuletesha kujimbesha wubwambu wetu naNzambi, hikudikunda nawantu abulaña kwovwahila nikulemesha nshimbi jaYehova. Amakwawu anateli kwikala antu amuchipompelu ilaña azeya kuspiritu. Amakwawu anateli kwikala antaña, antu itwashakama nawu, akwetu mutwazatilaña hela itwatañaña nawu abulaña kudifukula kudi Yehova. Neyi antu itwadikundaña nawu alemeshaña wanyi nshimbi jaYehova, mukuhita kwampinji anateli kuluwañesha wubwambu wetu naNzambi.

11. Yumanyi yinateli kutukwasha neyi tunakukeña kumanisha wubwambu nawantu?

¹¹ Tañenu 1 Akorinda 15:33. Antu amavulu ekala nayilwilu yayiwahi. Nawa antu amavulu abula kwikala muchipompelu hiyakoñaña yuma yatama mpinji yejimaku. Neyi dichekalawu amabwambu jenu, komana chinayi mukwila nawu hiyamabwambu amawahi? Dihulenu nenu, anateli kunkwasha kuwahisha wubwambu wami naYehova? Yumanyi yidi munyichima yawu? Chakutalilahu, ahoshaña hayumanyi, ahoshaña hayakuvwala yinediki, hamali, hamafoni, hayisela indi kwiji hakufwila yuma yakumujimba? Nhoshelu yawu yamasensi atama hela yakutuñula akwawu? Yesu wasoñamishili nindi: “Yuma yidi mumuchima diyi yahoshañayi muntu.” (Mat. 12:34) Neyi mumona nenu amabwambu jenu anateli kuluwañesha wubwambu wenu naYehova, zatilenuhu swayi kuhitila mukuleka kudikunda nawu, neyi chinatwesheki, manishenu wubwambu wenu.—Yish. 13:20.

12. (a) Yehova wayilejeli aIsarela nindidi hanyima yakufuma muEjipitu? (b) A Isarela akwili nawudi chelili Nzambi yayileji nindi atela kwikala ashinshika?

¹² Tunateli cheñi kudizila kuchuma chamwekeni chelili aIsarela ayifumishi muEjipitu. Antu apompeli kuMpidi yaSinayi. Yehova wamwekeni kweniku muchihayamisha. Kwamwekeni ivu dashishita hela diyila bwi-i. Yehova waleteli kudidima, kukenashana, wishi, nichuma chatwalekelihu kuvuma nañovu neyi mpuña. (Kwid. 19:16-19) Kweniku, Yehova wadimwekesheli yomweni kudi aIsarela nindi “hiNzambi wamukawu.” Wayikonkomweneni nindi wukwikala washinshika kudi antu amukeña nawa alondelaña nshimbi jindi. (Tañenu Kwidika 20:1-6.) Munjila yikwawu, Yehova wadiña nakuleja antu jindi nindi, “Neyi mwikala kukabadi kami, ninami nikwikala kukabadi kenu.” Mwadi kwila ñahi neyi yenu akaniniwu kwikala ashinshika kudi Yehova? Mwadi kwila neyi cheliliwu aIsarela. “Ejima akwili nezu dawu dimu hohu, nawu: ‘Mazu ejima anahoshi Yehova tukwila.’” (Kwid. 24:3) Hela chochu, hashimbwili wanyi, kwamwekeni chuma chaletesheli kashinshi kawaIsarela kwikala mukweseka.

13. Chumanyi chamwekeni chaletesheli kashinshi kawaIsarela kekali mukweseka?

¹³ A Isarela atiyili woma nevu dashishita, kukenashana niyinjikijilu yikwawu yakuhayamisha yamwekesheliyi Nzambi. Alombeli nawu Mosi yayihosheleñaku, Mosi wetejeli kuyihoshelaña hayuma yejima yahosheleñayi Yehova haMpidi yaSinayi. (Kwid. 20:18-21) Mosi washimbwili hewulu dampidi. Komana aIsarela alulutili muchinkalampata hakubula nlomboli wawu iyakuhweleleliwu? Chinamwekani neyi awa antu chikuhwelelu chawu chashindameneni hadi Mosi neyi wudi hohu. Akameneni nawa amulejeli Aroni nawu: “Nyamukaku wutwilili [nzambi yetu] atwaminaña kumbidi kutukuya; yeniwu Mosi, iwu iyala watufumishili mwituña daEjipitu, hituneluki kwanayiyuku.”—Kwid. 32:1, 2.

14. A Isarela adidimbileña nawudi, nawa Yehova welili ñahi nachuma chakoñeliwu?

¹⁴ Antu elukili nawu kudifukula kudi ankishi hikufumpa nshimbi jaYehova. (Kwid. 20:3-5) Ilaña hashimbwili wanyi atachikili kudifukula kudi mwana kañombi. Hela chakwila elileña chumichi, aIsarela adidimbileña nakutoñojoka nawu achidi kukabadi kaYehova. Dichaletesheli Aroni kutena kudifukula kudi mukishi nindi “chawija chaYehova”! Yehova welili ñahi? Wazuwili. Yehova wamulejeli Mosi nindi antu “anaditokeshi dehi bululu,” nawa “anasenuki dehi . . . munjila [Mwayilejeliyi.]” Kuzuwa kwindi “kuyitatili neyi kesi,” Yehova wakeñeleña kujilumuna muza wawuha waIsarela watuñiliyi.—Kwid. 32:5-10.

15, 16. Mosi naAroni amwekesheli ñahi nawu adiña kukabadi kaYehova? (Talenu mwevulu wakutachikilahu.)

¹⁵ Yehova wafuukwilihu kubula kuyijilumuna aIsarela. Luwi lwindi lwasweja lwaletesheli yayinki akwakudifukula ashinshika kukooleka kwakutondahu kuya kukabadi kindi. (Kwid. 32:14) Mosi chamweniyi antu anakuzañalala nakudikuwa nyiñula, kwimba nikuhañena mukishi, wamufumpili mwana kañombi nakwikala wuña. Kuhiñahu, wabidikili nindi: ‘Hinyi Wudi Kukabadi kaYehova? Enzi kunu kunidami.’ “Anyana kaLevi amayala ejima apompa nikupompa kudi” Mosi.—Kwid. 32:17-20, 26.

¹⁶ Hela chakwila Aroni niyena wadibombelimu mukutuña mukishi, wabalumukili mumuchima nakudinuña hamu nawaAlevi kukabadi kaYehova. Awa antu ashinshika hiyayili hohu kukabadi kaYehovaku, ilaña adambwileña kudi antu  akoñeleña yuma yatama. Elili chiwahi kudambula; muloña antu amavulu afwili hansañu yakudifukula kumukishi. Dichi, antu adiña kukabadi kaYehova ayikanini nawu akuyikiswila.—Kwid. 32:27-29.

17. Mazu aPawulu kutalisha hadi mwana kañombi atudizishañadi?

¹⁷ Kapostolu Pawulu washimwini chikuma chitwatela kudizila kunsañu yamwana kañombi nakusoñamisha nindi: “Yumiyi yekala yakutalilahu kudi etu kulonda tubuleña . . . [kwikala] akwakupesha neyi cheliliwu amu mukachi kawu. [Yumiyi] ayisonekeli kulonda yiikali yakutusoñamisha etu tunakushakama kukukuma kwanshakaminu yamakonu. Dichi muntu wunakutoñojoka nindi nemani, yababali kulonda yabuli kudimbuka.” (1 Kor. 10:6, 7, 11, 12) Neyi chashimwiniyi Pawulu, niakwakudifukula alala anateli kudiñija muyilwilu yatama. Antu elaña yuma yatama anateli kutoñojoka nawu achidi amabwambu jaYehova. Kukeña kwikala ibwambu daYehova hela kumwekesha neyi tudi ashinshika kudi yena hichinayi mukwila nawu Yehova hibwambu detuku.—1 Kor. 10:1-5.

18. Yumanyi yinateli kutuletesha kufuma kudi Yehova, nawa yumanyi yinateli kufumamu?

¹⁸ Neyi chochakameneniwu aIsarela nawu Mosi nashimbuli hampidi yaSinayi, akwaKristu makonu niwena anateli kwakamena nawu ifuku daYehova dakusompesha niituña dadiha dinalabi kwinza. Kushikijewa kwaniwu wuprofwetu kunateli kumwekana neyi kudi kwakulehi chikupu hela netu wukashikijewa wanyi. Neyi kubabala nehi, yitoñojoka yamuchidiwu yikuletesha tutachiki kutwamijaku yuma yakumujimba chatela tufwileña yuma yakeñayi Yehova. Mukuhita kwampinji tunateli kufuma kudi Yehova nakutachika kwila yuma yitwamweneña netu yatama hitwadiña nawubwambu wawuwahi naNzambi.

19. Chikumanyi chalema chitwatela kwanukaña, nawa muloñadi?

¹⁹ Twanukeña netu Yehova wakeñaña nindi tumwovwahileña nikudihana namuchima wejima. (Kwid. 20:5) Neyi twila chuma chejima chahelayi Yehova, dikwila nawu tunakwila nkeñelu yaSatana nawa mwafumaña kukala. Dichi, Pawulu watwanukishaña nindi: “Himwatela kunwa mukaapu kaYehova nimukaapu kawandemoniku; himwatela kuda ‘kumesa yaYehova’ nikumesa yawandemoniku.”—1 Kor. 10:21.

20. Hela chakwila tunasenuki munjila, Yehova nateli kutukwasha ñahi?

²⁰ Kudi chuma chimu chalema chitwatela kudizila kunsañu yamuBayibolu yahosha hadi Kena, Solomoni nichuma chayimwekeneni aIsarela kuMpidi yaSinayi. Awa antu adiña nakukooleka ‘kwakubalumuka munyichima yawu nakufunta kudi Yehova.’ (Yilw. 3:19) Mwamweni, Yehova hashikenaña dakuyileka antu asenukaña munjilaku. Chakutalilahu, Yehova wamwanakeneni Aroni. Makonu, Yehova nateli kutusoñamisha kuhitila muBayibolu, munyikanda yashindamena haBayibolu hela akwetu akwaKristu. Neyi tutiyilila kukusoñamisha kwindi, Yehova wukutwanakena.

21. Chumanyi chitwatela kwila neyi kashinshi ketu kudi Yehova kadi mukweseka?

²¹ Luwi lwaYehova lwasweja lukweti nkeñelu. (2 Kor. 6:1) Lwatukwashaña “kukaana yilwilu yakubula kumwakama Nzambi nikufwila kwayuma yamukaayi.” (Tañenu Titusa 2:11-14.) Chitunakushakama “muyinu nshakaminu yamakonu,” tukumonaña yuma yikuleteshaña kashinshi ketu kudi Yehova kwikala mukweseka. Dichi twikali asoñama mpinji yejima nawa twikaleña kukabadi kindi, muloña ‘Yehova Nzambi yetu diyi itwatela kutiya woma, diyi itwatela kukalakela nawa diyi itwatela kulamata.’—Kuhit. 10:20.