1, 2. Yumanyi yabombela mukushinshika mesu etu kudi Yehova?

TUNAKUSHAKAMA “mumpinji jakala” nawa chihandilu chikusweja kutaminaku chikupu henohu Yehova kanda yafumishihu yuma yatama nakuleta kuwunda kwalala hanu hamaseki. (2 Tim. 3:1) Dichi twatela kudihula netu ‘Kudihi kunatalaña nawa kwinateli kutambwila wunlomboli?’ Tunateli kushikena kwakula netu, “Kudi Yehova,” iyi diyi ñakwilu yalala.

² Yumanyi yabombela mukutala kudi Yehova? Nawa tunateli kutwalekahu ñahi kutala kudi yena hampinji yitukumonaña kukala muchihandilu? Yaaka yayivulu yinahitihu, ñimbi yamasamu washimwini chuma chacheni chitwatela kutalila mesu etu kudi Yehova kulonda yatukwashi mumpinji yitunakaankili. (Tañenu Masamu 123:1-4.) Wesekejeli chitwatalaña kudi Yehova nachatalañayi ñamba kudi nkaka yindi. Ñimbi yamasamu watalishili mudihi? Ñamba hakuminaña dakushindamena hadi nkaka yindi mukumukiña nikumukeñela hohu yakudaku, ilaña washaña cheñi maana kuyuma yakeñañayi nkaka yindi nindi yazateña nikulondela  yuma yakeñañayi. Munjila yoyimu, ninetu twatela kusandujola Mwizu daNzambi mafuku ejima kulonda twilukeña yuma yakeñañayi Yehova nindi twileña nikulondelamu. Iyi diyi njila yimu hohu mutwatela kukuhwelela netu Yehova nateli kutukwasha mumpinji yitunakaankili.—Efwe. 5:17.

3. Yumanyi yinateli kutukañesha kushinshika kudi Yehova?

³ Hela chakwila tweluka netu mpinji yejima twatela kutala kudi Yehova, mpinji yikwawu tunateli kuluwankana. Dichi chuma chamumwekeneni Mata, ibwambu daYesu. Mata “wakasikili nanyidimu yayivulu.” (Luka 10:40-42) Neyi chuma chamuchidiwu chamwekeni kudi muntu washinshika wadiña naYesu, dikwila nawu ninetu chinateli kutumwekena. Hanu dinu, yumanyi yinateli kutukañesha kusha mesu etu kudi Yehova? Muchinu chibaaba, tukushinshika yilwilu yawantu amakwawu chiyinateli kutuluwañesha. Tukudiza cheñi chitwatela kutwalekahu kushinshika kudi Yehova.

4. Muloñadi chitukuhayamina hakwiluka netu Mosi wajimbesheli kukooleka kwakwiñila Mwituña daChikaninu?

⁴ Mosi washili maana hadi Yehova kulonda yamulomboleña nikumutwaminina. Kafwampi, “muloña watwalekelihu kukola mbe-e neyi kwiji nakumona Owu abulaña kumonawu.” (Tañenu Aheberu 11:24-27.) Bayibolu yatulejaña nawu, “MuIsarela himunamwekani cheñi kaprofwetu wudi neyi Mosi, elukiliyi Yehova wakudimona nindi mesu namesuku.” (Kuhit. 34:10) Ilaña hela chakwila Mosi wadiña nawubwambu wamuchidiwu naYehova, wajimbesheli kukooleka kwindi kwakwiñila Mwituña daChikaninu. (Kuch. 20:12) Chumanyi chaletesheli Mosi kudimbuka?

5-7. Kukalanyi kwamwekeni hanyima yakwila aIsarela afumi muEjipitu, nawa Mosi welili ñahi naniku kukala?

⁵ Hanyima yakwila munahiti dehi kakweji kamu namafuku kufuma hafumini aIsarela muEjipitu, kwamwekeni kukala kweneni henohu kanda ashiki kuMpidi yaSinayi. Antu atachikili kuhoshahosha muloña wakubula menji. Atachikili kumutobela Mosi nawa yuma yamukalilili chakwila wabileleli kudi Yehova nindi: “Awa antu nukuyila ñahi? Keña ansoweli malola!” (Kwid. 17:4) Yehova wamwakwili kuhitila mukumwinka nshimbi jakulondela. Wamulejeli kunona mukombu windi nakuweta kwilola dakuHerobi, nawa nindi menji akutachika kwichika. Twatañaña netu: “Dichi cheliliyi Mosi kumesu awakulumpi awaIsarela.” Dichi aIsarela anwini menji nawa kukala kwamanini.—Kwid. 17:5, 6.

⁶ Bayibolu yatwalekahu kuhosha nawu Mosi “watumbiluku ijina nindi, kuMasa, cheñi nawa nindi, kuMeriba, Nanochu chamuzuñishiluwu anyana kaIsarela, nanochu chamwesekeluwu Yehova, nawu, Yehova tudi nindi mukachi ketu, tahindi nehi?’” (Kwid. 17:7) Awa majina ateleleli muloña alumbuluka nawu “Kweseka” “niKuzuñiisha.”

⁷ Yehova watiyili ñahi hachuma chamwekeni kuMeriba? Wamweni nindi aIsarela hiyakuminini dakudikaña naMosiku ilaña adiña nakumuzuñisha cheñi yena. (Tañenu Masamu 95:8, 9.) A Isarela aluwañesheli chikupu. Haniyi mpinji Mosi welili chachiwahi, watalili kudi Yehova nikulondela mwamulejeliyi.

8. Kukalanyi kwamwekeni hanyima yakukuma kwayaaka 40 halwendu lwamuchinkalampata?

⁸ Chumanyi chamwekeni, chelili chuma chochimu chimwekani hanyima yayaaka 40,  kukamwihi nakufuma muchinkalampata? A Isarela ashikili kwiluña diyenjili nakutachika kutena nawu Meriba. Idi iluña dadiña dacheñi, dadiña kwakwihi naKadeshi kwakwihi nañinza Yetuña daChikaninu. * A Isarela atachikili cheñi kuhoshahosha muloña wakubula menji. (Kuch. 20:1-5) Ilaña haniyi mpinji Mosi welili chuma chambukaku.

9. Mosi amulejeli nawu yelidi, ilaña yena welili ñahi? (Talenu mwevulu wakutachikilahu.)

⁹ Mosi welili ñahi naniku kudikaña? Watalili cheñi mesu indi kudi Yehova kulonda yamuleji mwakwilila. Ilaña haniyi mpinji Yehova hamulejeli kweta mwilolaku. Amulejeli Mosi kusenda mbwechi yindi, kupompesha antu kukamwihi nelola kuhiñahu yahoshi kwilola. (Kuch. 20:6-8) Hela chochu, Mosi hahosheli kwilolaku. Ilaña wabidikili nandulu nakuyileja antu apompeli nindi: “Tiyenu dinu enu akwakudikaña tuyiidishili menji mwilolidi tahindi?” Kuhiñahu weteli mwilola bayi kamu hohuku ilaña kayedi.—Kuch. 20:10, 11.

10. Yehova wamwilili ñahi Mosi?

¹⁰ Yehova wahilili nawa wamuzuwilili Mosi. (Kuhit. 1:37; 3:26) Muloñadi Yehova chazuwililiyi? Kwatela kudi yuma yayivulu yaleñeleli yazuwi. Neyi chitwahoshahu dehi hewulu, hadaha Yehova wamuzuwilili Mosi muloña wakwila wakañenyi kulondela mwamulejeliyi.

11. Mosi cheteliyi mwilola kayedi chaletesheli ñahi antu kubula kwiluka nawu Yehova diyi wakoñeli chihayamisha?

¹¹ Kudi chuma chikwawu chaletesheli. Ilola dadiña kuMeriba yatachi dadiña dakola nankashi. Hela chakwila muntu wukwetamu chamuchidinyi menji hiyanateli kwidikaku. Ilaña ilola dadiña kuMeriba yamuchiyedi dadiña dambukaku, dadwovu muloña wampemba. Chineli kwadiña mpemba, maluña amuchidawa ekalaña natuseloki mwafumaña menji kunateli kutahawu antu. Komana Mosi cheteliyi mwilola kayedi watoñojokeleña nindi antu akumona nawu menji anadidikili aweni tahindi Yehova diyi wunayidishi? Cheteliyi mwilola chatela yahoshiku, komana chidi neyi Mosi wakeñeleña nindi antu atoñojoki nawu Yehova diyi wakoñeleña chihayamisha wanyi ntahindi? * Tuneluki wanyi.

12. Yumanyi yikwawu yatela yaletesheli Yehova yayizuwili aMosi naAroni?

¹² Kudi cheñi chuma chikwawu chaletesheli Yehova yayizuwili aMosi naAroni. Talenu chahosheliyi Mosi kudi antu: “Tuyiidishili menji mwilolidi tahindi?” Mosi chazatishiliyi mazu akwila nawu “tuyiidishili,” chidi neyi watalishileña hadi yena naAroni. Awa mazu ahosheliyi Mosi amwekeshaña nawu wamudiwili Yehova Wakoñeli china chihayamisha. Chumichi chinamwekani neyi dimu muloña wamazu itwatañaña hamukanda waMasamu 106:32, 33 akwila nawu: “Amuzuwishili nikumeji akuMeriba, Mosi wamweni kukala hanyijimba yawu; Muloña wena aleteli chibeñu nayena, niyena hakuhosha lufuchi nakanwa kindi.” * (Kuch. 27:14) Hela dichichadiña, yilwilu yaMosi yamwekesheli  wanyi kalemesha kudi Yehova. Yehova wayilejeli aMosi naAroni nindi: “mwadikañili nezu dami.” (Kuch. 20:24) Akoñeli nshidi yeneni chikupu!

13. Muloñadi chitukuhoshela netu chashikilili Yehova kumubabesha Mosi?

¹³ Chineli adiña alomboli jawantu jaYehova, aMosi naAroni adiña namudimu weneni. (Luka 12:48) Hakusambila, Yehova wakaanini ikiñu dawaIsarela dejima kwiñila mwituña daKenani muloña wakudikaña kwawu. (Kuch. 14:26-30, 34) Dichi chashikilili Yehova kumubabesha Mosi muloña wakudikaña kwindi neyi chayibabesheliyi aIsarela adikañili. Kufwana ana akwakudikaña, niyena hiyamwitejeli kwiñila Mwituña daChikaninuku.

14, 15. Chumanyi chaletesheli Mosi kudikaña?

¹⁴ Chumanyi chaletesheli Mosi yekali nayilwilu yakudikaña? Shinshikenu cheñi Masamu 106: 32, 33: “Amuzuwishili nikumenji akuMeriba, Mosi wamweni kukala hanyijimba yawu; Muloña wena aleteli chibeñu nayena, niyena hakuhosha lufuchi nakanwa kindi.” Hela chakwila aIsarela amuvulokeli Yehova, ilaña Mosi diyi wahilili. Kubula kudihemba kwamuletesheli yahoshi chatama nakubula kutoñojoka kukala kwadi kufumamu.

¹⁵ Mosi wetejeli yilwilu yawakwawu kumukañesha kutwalekahu kushinshika kudi Yehova. Mosi wamanishili chiwahi kukala kwatachi. (Kwid. 7:6) Kubombelahu, hanyima yakuyilombola aIsarela akwakudikaña hadi yaaka yayivulu, wazeyeli nawa waneñeli. Komana Mosi wadiña nakutoñojoka nankashi hachatiyileñayi chatela yatoñojokeña hakumulemesha Yehova?

16. Muloñadi chitwatela kushinshikila hayilwilu yaMosi?

¹⁶ Neyi kaprofwetu washinshika wudi neyi Mosi yaluwankana nawa yadimbuka, dikwila nawu ninetu chinateli kutumwekena. Kufwana Mosi, ninetu tudi kwakwihi nakwiñila mwituña dadiha datukanayi Yehova dadifwanaku nadaKenani. (2 Pet. 3:13) Kwosi wunakukeña kubula kwiñila mwituña dadihaku. Hela chochu, hakwila nawu tukeñilimu, twatela kutwalekahu kutala mesu etu kudi Yehova, mpinji yejima tufwileña kwila nkeñelu yindi. (1 Yow. 2:17) Yumanyi yitwatela kudizila kuchiluwa chaMosi?

17. Chumanyi chikutukwasha kubula kuhila?

¹⁷ Bayi muhilañaku. Hela chakwila tunatwalekihu kumona kukala kwokumu hadi mpinji yayilehi, “bayi tuleka kwila yuma yayiwahiku, muloña mumpinji yatelela tukamuna neyi tubula kuzeya.” (Ñal. 6:9; 2 Tes. 3:13) Neyi anatuhilishi hela tunambukilimu nawakwetu, komana twafumbaña kanwa ketu nikubula kuhila? (Yish. 10:19; 17:27; Mat. 5:22) Neyi anatuhilishi kudi akwetu, twatela “[kumulekela]. . . yamwekeshi kuzuwa kwindi.” Kuzuwa kwanyi? Kuzuwa kwaYehova. (Tañenu Aroma 12:17-21.) Neyi tutwalekahu kutala kudi Yehova, tukumulemesha kuhitila mukumulekela kuzuwa kwindi, tukudiwunjika nakuhembelela kulonda yakoñi chuma chimu neyi chinatwesheki. Neyi tuditenda etu aweni chikumwekesha nawu tunamulemeshi wanyi Yehova.

18. Yumanyi yitwatela kwanukaña neyi tunakulondela wunlomboli wakatataka?

¹⁸ Londelenuña wunlomboli wakatataka. Komana mpinji yejima twalondelaña  wunlomboli wakatataka watwinkañayi Yehova? Neyi twalondelañamu, mpinji yejima hitukushindamenaña hakwila yuma neyi chitwayilileña kunyimaku. Ilaña tukulondelaña wunlomboli wejima wakatataka wunakutwinkayi Yehova kuhitila mukuloñesha kwindi. (Heb. 13:17) Hampinji yoyimu, tukwikalaña asoñama kulonda tubuli “[kubadika] hayuma yasonekawu.” (1 Kor. 4:6) Neyi twilaña mwenimu, dikwila nawu tunakutala mesu etu kudi Yehova.

19. Tunateli kutondolwela ñahi kuluwañesha wubwambu wetu naYehova hela chakwila tunakumona kukala muloña wayiluwa yawakwetu?

¹⁹ Bayi mwiteja yiluwa yawakwenu yiluwañeshi wubwambu wenu naYehovaku. Neyi tutalaña mesu etu achifwikija kudi Yehova, tukwiteja wanyi yilwilu yawakwetu kutuhilisha hela kuluwañesha wubwambu wetu nayena. Chumichi chalema nankashi sweje-e neyi tudi nanyidimu mukuloñesha kwaNzambi neyi chadiña Mosi. Dichi wejima wetu ‘twatela kwikala nawoma nikuzaala hampinji yitunakufwila kutambwila wamwinu,’ twatela kwanuka netu Yehova hekala nanjila yimu yatusompeshelañamuku. (Fwi. 2:12) Ilaña, wakeñaña etu kudishaku kwesekeja nanyidimu yitukweti. (Luka 12:48) Ilaña neyi twamukeña Yehova nankashi, kwosi chuma chikutudimbwisha hela kutwambula kukukeña kwindiku.—Mas. 119:165; Rom. 8:37-39.

20. Chumanyi chitwatela kufwila kwila?

²⁰ Muyinu mpinji yakala, tutwalekihu kufumbula mesu etu nakutala kudi Yena “washakama mumawulu,” kulonda tutwalekihu kwila nkeñelu yindi. Bayi twiteja wubwambu wetu naYehova awuluwañeshi nayilwilu yatama yawakwetuku. Chuma chamumwekeneni Mosi chitukwashi kwiluka kulema kwachumichi muyitoñojoka nimumuchima wetu. Chatela tuluwankani nakubula kuwanina kwawantu itwashakamaña nawu, tuzatenuña nañovu kulonda “mesu etu atalaña kudi Yehova Nzambi yetu, nakutalila nichamba katutiyilayi luwi.”—Mas. 123:1, 2.