Tiyilenuña Wushona “Antu Ejima”
YESU chayidizishileñayi atumbanji twindi chakushimwina nsañu yayiwahi, welukili nindi nsañu Wanta hiyakayiteja kudi antu ejimaku. (Luka 10:3, 5, 6) Mumudimu wetu wakushimwina, tukuwanaña antu anateli kutwakula chatama hela tuhu nikutwitukola. Kuhosha hohu walala, neyi atumwekeshela yilwilu yamuchidiwu chinateli kutukalila kuyimwekeshela wushona antu itwashimwinaña.
Muntu wukweti wushona wamonaña kukaankila nikukala kudi nawantu amakwawu, kuyitiyila wushona nikuyikwsha. Hela chochu, neyi tuleka kutiyila antu itwawanaña mumudimu wakushimwina wushona, iyena dakushimwina dikukeha nawa hitukudikitaña nankashiku. Munjila yikwawu, neyi tutiyilaña wushona antu itwashimwinaña, chidi tuhu neyi tunakusonsela kesi, dikwila nawu tunakwiteja iyena detu dakushimwina kuswejelaku!—1 Tes. 5:19.
Tunateli kwikala ñahi nawushona hela chakwila chinateli kutukalila? Tushinshikenu yakutalilahu yawantu asatu alema itwatela kwimbujola, Yehova, Yesu nikapostolu Pawulu.
IMBUJOLENUÑA WUSHONA WAYEHOVA
Hadi yaaka yayivulu, Yehova nomiki chikupu kasawuntu kaletañawu hejina dindi. Hela chochu, yena “wamwekeshaña luwi kudi antu atama niabulaña kusakilila.” (Luka 6:35) Luwi lwindi lwamwekenaña mukudiwunjika kwindi. Yehova wakeñaña nindi “antu ejima ayamwini.” (1 Tim. 2:3, 4) Hela chakwila Nzambi wahela kutama, wamonaña antu nindi alema nawa hanakukeña nimuntu niwumu kujilumukaku.—2 Pet. 3:9.
Yehova weluka chinayiputishiwu antu abula kwitiya kudi Satana. (2 Kor. 4:3, 4) Antu amavulu anayidizishi yuma yakutwamba niyilwilu yatama kufuma tuhu kuwansi wawu, dichayileñelaña kubula kwiteja chalala. Yehova wakeñaña kukwasha antu amuchidi iwu. Tuneluki ñahi?
Shinshikenu Yehova chayililiyi antu akuNineve. Hela chakwila adiña nayilwilu yatama, Yehova wamwilili Yona nindi: “Komana ami nibuli kwanakena Nineve, mukala wuna weneni mwekala antu nkulakaji namakumi ayedi amakombakaji achidi kanda eluki nichikasa chachidiilu nichachimunswaku; mwekala nawa niayimuna amavulu?” (Yona 4:11) Yehova wamweni nindi akwaNineve abulili hohu kwiluka chalala nawa wayitiyililili wushona nakumuleja Yona nindi yayi nakuyisoñamisha.
Kufwana Yehova, tweluka netu antu alema. Tunateli kumwimbujola kuhitila mukukwasha antu adi nampwila yakutiya hela chakwila mpinji yikwawu anateli kutiya wanyi.
IMBUJOLENUÑA WUSHONA WAYESU
Kufwana Tata yindi, Yesu watiyilili wushona antu adiña nampwila yakudiza chalala. “Chamweniyi mazaza awantu, wayitiyilili wushona, muloña ayikabishileña nikuyidiwula neyi anyikoku akadi kabiña.” (Mat. 9:36) Yesu welukili chuma chaletesheli; welukili nindi awa antu enjili nakutiyilila kudi yena ayitañishileña nsañu yakutwamba nawa ayilileña chatama kudi akulumpi jansakililu. Hela chakwila welukili nindi kudi yuma yayivulu yikuyikañesha kutiya nsañu yindi, Yesu watwalekelihu “kuyitañisha yuma yayivulu.”—Maku 4:1-9.
Bayi muneña neyi muntu yabula kuyitambwila chiwahi hakusambilaku
Neyi chihandilu chawantu chinahimpiki anateli kukaana hela kwiteja chalala
Neyi antu akaana nsañu yetu, twatela kusambila kwiluka chuma chinaleteshi akaani nawa twatela kudihula netu, chumanyi chinaleteshi akaani? Amakwawu ahela Bayibolu hela akwaKristu muloña wayilwilu yatama yamwekeshañawu antu aditenaña nawu hiyakwaKristu. Hadaha antu amakwawu ayilejahu dehi nsañu yakutwamba kutalisha hayuma yitwakuhwelela. Amakwawu anateli kuyikañesha kudi antu ashakamañawu nawu hela amwiluña dawu hamuloña wakututambwila chachiwahi.
Amakwawu itwawanaña mumudimu wetu wakushimwina anateli kutwakula chatama muloña wakukala kuyanakumonawu. Mishonali wamumbanda wejina daKim wahosheli nindi: “Antu amavulu amwiluña detu dakushimwinamu ajimbesha yuma yawu yejima muloña wanjita. Hiyakweti kuchiñeja kwalala kwakumbidiku. Ahila chikupu nawa kwosi nimuntu niwumu iyakuhwelela. Munawa maluña, twawanaña antu akaanaña nsañu yetu. Ifuku dimu añilili chatama hampinji yinadiña nakushimwina.”
Muhela Kim natwalekihu ñahi kumwekesha wushona hela chakwila amwilili chatama? Wahosheli nindi: “Neyi anankoñi chatama nanukaña Yishimu 19:11, yahosha nawu: ‘Kutoñojoka kashinshi kwatoñojokañayi muntu kwamulabishaña kuzuwa.’ Kwanuka chihandilu chawantu amwiluña detu dakushimwina, kwankwashaña kuyitiyila wushona. Bayi neyi muntu wejima itwawanaña mumudimu wakushimwina watamaku. Mwiluña dodimu, tukweti antu itwafuntilañaku atwitambwilaña chiwahi.”
Twatela kudihula netu, ‘Nadi kwila ñahi neyi iyami ashimwinañawu nsañu yaWanta?’ Chakutalilahu, indi neyi iyetu alejeleñawu nsañu yakutwamba kutalisha hadi aYinsahu jaYehova? Muniyi njila, hadaha ninetu twadi kuyihoshaña chatama nawa twadi kukeñaña netu atutiyili wushona. Neyi twanukaña lushimbi lwaYesu kutalisha hayuma yitunakukeña netu atwilili, chatukwashaña kuyakula chiwahi hela chakwila yuma yinakali ñahi.—Mat. 7:12.
IMBUJOLENUÑA WUSHONA WAPAWULU
Kapostolu Pawulu wamwekesheli wushona nikudi antu amukabishileña. Muloñadi? Hajimbeli chadiñayi kunyimaku. Wahosheli nindi: “Kunyima nadiña mukwakusawula Nzambi nimukwakukabisha antu jindi nawa mukwakasawuntu. Hela chochu, antiyilili luwi muloña nakoñeleña yumiyi mukubula kwiluka nimukubula chikuhwelelu.” (1 Tim. 1:13) Welukili nindi amumwekesheleli luwi kudi Yehova niYesu. Wamweneña yilwilu yadiñayi nayu kunyima mudi antu ashimwinineñayi.
Mpinji yikwawu, Pawulu wawanineña antu akuhweleleli ntañishilu yakutwamba. Welili ñahi? Yilwilu 17:16 yahosha nawu hampinji yadiñayi Pawulu kuAtenisi, “watiyili kutama hakumona musumba chiwenzeli nawankishi.” Hela chochu, Pawulu wazatishili yuma yamutiyishili kumuchima kutama hakushimwina. (Yilw. 17:22, 23) Wahosheleña nawantu munjila yashiyashana kwesekeja nachidi chihandilu chawu kulonda ‘neyi chinatwesheki, yaamwiniku antu amu.’—1 Kor. 9:20-23.
Twatela kumwimbujola Pawulu neyi tunakushimwina “nsañu yayiwahi yayuma yayiwahi” kudi antu akuhwelela muntañishilu yakutwamba ahela nsañu yetu. (Isa. 52:7) Muhela Dorothy wahosheli nindi: “Antu amavulu mwiluña detu dakushimwina ayitañishaña nawu Nzambi wekala nalukambu nawa wasompeshaña. Nayisakililaña awa antu nayuma yakuhwelelawu, kuhiñahu dinu hinikuyileja chahosha Bayibolu kutalisha hayilwilu yaYehova niyuma yakanayi kumbidi.”
“IMIKENUÑA MUSHINDU KUTAMA KUHITILA MUKWILA YUMA YAYIWAHI”
Chitunakuswina chikupu “mumafuku akukuminina,” twatela kukuhwelela netu yilwilu yawantu itwashimwinaña ‘yikuyaña nakutaminaku.’ (2 Tim. 3:1, 13) Ilaña bayi twiteja yuma yamuchidiwu yituleteshi tubuleña kumwekesha wushona hela kutuletesha kubula muzañaluku. Yehova wukutwinka ñovu yakwimika “mushindu kutama kuhitila mukwila yuma yayiwahi.” (Rom. 12:21) Muhela Jessica payiniya wahosheli nindi: “Nawanaña antu abula kudizoza nawa atudiwulaña kushilahu ninsañu yetu. Chumichi chanhilishaña. Chinatachika kuhajeka namuntu, nalombaña wumweneni kudi Yehova nami yankwashi kumona antu neyi chayimonañayi yena. Chankwashaña kuleka kutoñojoka chatama, ilaña natachikaña kutoñojoka chinatela kukwasha muntu.”
Twatwalekañahu kukeñakeña antu adi nanyichima yashinshika yakukeña kwikala nawumi wahaya nyaaka
Neyi tudiwunjika nawa tuzata nañovu, amakwawu anateli kwiteja kudiza hadi Nzambi
Twatela kutoñojoka cheñi chitwatela kukoolesha akwetu mutwakalakelaña. Muhela Jessica walumbulwili nindi: “Neyi wumu hakachi ketu wudi nakukala, hinashaña maana haniku kukalaku. Ilaña natachikaña kuhosha hayuma yayiwahi chidi neyi yuma yafumaña mumudimu wetu wakushimwina hela chakwila antu amakwawu atuhoshaña chatama.”
Yehova welukaña kukala kutwamonaña mumudimu wakushimwina. Watiyaña kuwaha nankashi neyi twimbujola luwi lwindi! (Luka 6:36) Hela chochu, Yehova hakatwaleka kutiyila antu wushona haya nyaakaku. Twatela kukuhwelela netu weluka mpinji yatelela yakajilumunayi kanu kaayi kamakonu. Twatela kushimwina nsañu swayi-swayi henohu iyi mpinji kanda yishiki. (2 Tim. 4:2) Tutwalekihu kudikita mudimu wetu neyena nikuyimwekeshela wushona “antu ejima.”
