1. Muloñadi chitukuhoshela netu yuma yejima yambala yaYehova? (Talenu mwevulu wakutachikilahu.)

YUMA yejima yambala yaYehova. Diyi mwini “iwulu, niiwulu damawulu, niiseki, hamu nayuma yejima yekalamu.” (Kuhit. 10:14; Chim. 4:11) Chineli yena diyi waleñeli antu, antu ejima ambala aYehova. (Mas. 100:3) Muchihandilu chawantu chejima, Nzambi natondi mazanvu awantu amu kwikala antu jindi munjila yadimena.

2. Anyi anashimuniwu muBayibolu atondayi Yehova munjila yadimena?

² Chakutalilahu, Masamu 135 yatena akwakudifukula aYehova ashinshika, aIsarela akushankulu nawu ‘chozelu chindi.’ (Mas. 135:4) Cheñi mukanda waHoseya washimwineñahu dehi nawu antu abulili kwikala aIsarela akekala antu jaYehova. (Hos. 2:23) Wuprofwetu waHoseya washikijeweli mpinji yelili Yehova yabombelihu antu abulili kwikala aYudeya kwikala nakuchiñeja kwakuyuula hamu naKristu. (Yilw. 10:45; Rom. 9:23-26) Iwu “muza wajila” “hiheta dadimena” daYehova munjila yakuhayamisha, antu ekalamu ayiwayisha dehi naspiritu yajila nawa ayitonda kuya nakushakama mwiwulu. (1 Pet. 2:9, 10) Indi akwaKristu ashinshika akweti kuchiñeja kwakushakama  hamaseki? Yehova wayitenaña niwena nindi “antu” jindi nawa ‘atondayi.’—Isa. 65:22.

3. (a) Anyi adiluñishaña wubwambu naYehova makonu? (b) Yumanyi yitukuhanjeka muchinu chibaaba?

³ Makonu, “kamukanka kawanyikoku” adi nakuchiñeja kwakuya mwiwulu “nianyikoku acheñi” akweti kuchiñeja kwakushakama hamaseki ekala “mukanka wumu” watondayi Yehova kwikala antu jindi. (Luka 12:32; Yow. 10:16) Mwamweni twatela kumwekesha kusakilila kudi Yehova hakututiyila luwi nakwikala amabwambu jindi. Chinu chibaaba chikuhosha jinjila jashiyashana mutunateli kumwekeshela kusakilila kudi Yehova hakutwinka iku kukooleka.

4. Njilanyi yimu mutunateli kumwekeshela kusakilila kudi Yehova hakutwiteja kwikala amabwambu jindi, nawa Yesu welili ñahi chuma chadifwanaku?

⁴ Twamwekeshaña kusakilila kudi Yehova kuhitila mukudihana namuchima wetu wejima kudi yena. Twamwekeshaña hatooka netu tunekali antu jindi nawa tunadihani kudi yena, neyi tupapatishewa mumenji. (Heb. 12:9) Yesu welili chochimu hampinji yamupapatishiliwu, wahosheli kudi Yehova nindi: “Natiyi kuwaha nakwila muchima weyi, eyi Nzambi yami.” (Mas. 40:7, 8) Yesu wadihanini yomweni kwila nkeñelu yaYehova, hela chakwila kufuma kuwansi windi wadiña wakumuza wadihana kudi Nzambi.

5, 6. (a) Yehova welili ñahi hampinji yamupapatishileñawu Yesu? (b) Shimunenu chakutalilahu chinakumwekesha nawu Yehova watiyaña kuwaha neyi tudihana hela chakwila yuma yejima yindi.

⁵ Yehova welili ñahi hampinji yamupapatishileñawu Yesu? Bayibolu yahoshaña nawu: “Chamupapatishiliwu, hohenohu Yesu wafumini mumenji; mwiwulu mwenzunukili nawa wamweni spiritu yaNzambi yamwekeneña neyi kapompa yenjileña nakuwila hadi yena. Cheñi nawa, mwiwulu mwafumini izu nadu: ‘Iwu diyi Mwanami, inakeña, inatiyaña kuwaha.’” (Mat. 3:16, 17) Hela chakwila Yesu wadiña wakundama dehi kudi Tata yindi wamwiwulu, Yehova watiyili kuwaha hakumona Mwanindi nadihani kwila nkeñelu Yindi namuchima wejima. Munjila yoyimu Yehova watiyaña kuwaha nikwiteja kudihana kwetu, nawa wukutukiswila nkisu jindi.—Mas. 149:4.

⁶ Chakutalilahu, fwikijenu tata yawantu wadima kabaka. Ifuku dimu mwanindi wamumbanda wanyanya yateña kabaka kamu yamwinka nitata yindi kwikala chawaana. Komana aka kabaka, hikabaka kindiku? Mwana nateli kumwinka ñahi tata yindi kabaka henohu kabaka katata yindi? Tata yawantu hanateli kutoñojoka malwihu amuchidiwuku. Ilaña, wukutiya kuwaha nawa wukutambwila ichi chawaana chinakumwekesha kukeña kunamwekeshiyi mwanindi. Wukutiya kuwaha nanaka kabaka kanamwinkiwu kubadika kadi mwiha. Yehova watiyaña kuwaha neyi tudihana kudi yena namuchima wejima.—Kwid. 34:14.

7. Malaki wamwekesha ñahi chatiyañayi Yehova nawantu adihanaña kumukalakela?

⁷ Tañenu Malaki 3:16. Neyi kanda mudihani nikupapatishewa, shinshikenu hakulema kwakupapatishewa. Kuhosha hohu walala, kufuma hohu himwasemukili, mwekalili muntu wambala waYehova kushilahu niantu ejima. Toñojokenu kuwaha kukutiyayi Yehova neyi yeluka nindi munamwiteji yena kwikala nyuuli yenu nawa mudihana kudi yena nikwila nkeñelu yindi. (Yish. 23:15) Yehova niyena welukaña antu ejima amuzatilaña mukudikeñela nawa wasonekaña majinawu “[mumukanda] wakwanukaña nachu.”

8, 9. Yehova wakeñañadi kudi antu asonekayi majina “[mumukanda windi] wakwanukaña nachu”?

 ⁸ Neyi tunakukeña netu majina etu ayisoneki “[mumukanda] wakwanukaña nachu” waYehova, twatela kwilahu chuma chimu. Malaki washimwini nindi twatela ‘kumutiya Yehova woma nikutoñojoka hejina dindi.’ Neyi tutachika kudifukula kudi muntu wacheñi hela kuchuma chacheñi, ijina detu akudifumisha mumukanda waYehova wawumi wachifwikija.—Kwid. 32:33; Mas. 69:28.

⁹ Kudihana kwetu kudi Yehova mwabombela yuma yayivulu kubadika hohu kumukana nawu nakelaña nkeñelu yindi nikupapatishewa mumenji. Iyi yuma yakapinji kantesha hohu nawa yahitaña nakwikala yakunyima. Kwikala kukabadi kaYehova nakwikala antu jindi kwakeñekaña kutwalekahu kumwovwahila yinu mpinji nikumbidi, chakala hohu tuchidi kuhanda.—1 Pet. 4:1, 2.

10. Chaambwinyi chekala hadi antu amukalakelaña Yehova nawantu abulaña kumukalakela?

¹⁰ Chibaaba chinafumihu chashimuna nsañu yamuBayibolu yahosha hadi Kena, Solomoni niaIsarela. Ejima wawu ahosheleña nawu adifukwileña kudi Yehova, ilaña hiyadihanini chakufuma hamuchimaku. Iyi yakutalilahu yinakumwekesha hatooka nawu antu jaYehova ejima atela kwilaña yuma yaloña nakuhela yuma yatama. (Rom. 12:9) Hanyima yakwila Malaki nateni dehi “mukanda wakwanukaña nachu,” Yehova wahosheli ‘hachaambu chekala hadi muntu waloña namuntu watama, muntu wamukalakelaña Nzambi namuntu wabulaña kumukalakela.’—Mal. 3:18.

11. Muloñadi chitwatela kudimwekeshaña kudi akwetu netu twadihana kudi Yehova chikupu?

¹¹ Tuhoshenu cheñi hanjila yikwawu mutunateli kumwekeshela kusakilila kudi Yehova hakututonda kwikala antu jindi. Kupama kwetu kwakuspiritu kwatela “akumoneña hatooka kudi antu ejima.” (1 Tim. 4:15; Mat. 5:16) Dihulenu nenu: ‘Komana antu amakwawu ammonaña nawu nadihana kudi Yehova? Komana nadimwekeshaña nami nidi chiNsahu chaYehova?’ Yehova nateli kutiya kutama  neyi yamona nindi tunakudimwekesha wanyi netu tudi antu jindi henohu watutonda kwikala antu jindi.—Mas. 119:46; tañenu Maku 8:38.

12, 13. Yumanyi yelañawu antu amakwawu yaleteshaña abuli kuyiluka nawu hiyaYinsahu jaYehova?

¹² Chawushona, antu amakwawu anateli kukañanya ‘kuyambula nawantu abulaña kumukalakela Nzambi’ muloña wakwimbujola “spiritu yamukaayi.” (1 Kor. 2:12) Iyi diyi spiritu ‘yakufwila kwamuntu wakumujimba.’ (Efwe. 2:3) Chakutalilahu, hela chakwila anayifumbi chamuchidinyi, antu amakwawu atondañahu kuvwala yakuvwala yabula kutelela. AkwaKristu amakwawu avwalaña yakuvwala yayikwata hamujimba niyamwekeshaña mujimba. Amakwawu atewulaña chatama nikuyinda hela kusakula nsuki chatama. (1 Tim. 2:9, 10) Dichi, neyi adi hadi antu amavulu, chakalaña kuyiluka neyi hiyantu jaYehova hela hiyantu akwata “wubwambu nakaayi.”—Yak. 4:4.

¹³ Munjila yikwawu, aYinsahu amakwawu aleka wanyi chikupu yilwilu yamukaayi. Chahañanañawu hayawija niyilwilu yamwekeshañawu hiyatelela kudi akwaKristuku. Nyevulu yawu yashañawu haintaneti nimazu asonekañawu haintaneti amwekeshaña nawu hiyantu abula kwikala akwaKristu. Hadaha kanda ayibabesheñahu dehi muchipompelu chawakwaKristu hanshidi yamaneni, ilaña anateli kuluwañesha akwawu anakufwila kutwalekahu kwikala nayilwilu yayiwahi hakachi kawantu jaYehova.—Tañenu 1 Petulu 2:11, 12.

14. Yilwilwinyi yalema yitwatela kwikala nayu neyi tunakukeña kuhemba wubwambu wetu naYehova?

¹⁴ Kaayi kanakutiyakesha nankashi “yuma yafwilaña mujimba, yuma yafwilaña mesu nikudisamba nayuma yikwetiyi muntu.” (1 Yow. 2:16) Hela chochu, chineli tudi antu jaYehova, atukonkomwenaña “kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu.” (Tit. 2:12) Nhoshelu yetu, chitwadaña, chitwanwaña, nvwalilu nimmwekenu yetu, nyidimu yetu hela  yuma yejima yitwelaña yatela yimwekaneña kudi antu nawu twadihana kudi Yehova.—Tañenu 1 Akorinda 10:31, 32.

15. Muloñadi chitwatela kuyitiyila akwetu akwakudifukula luwi nikuyikeña?

¹⁵ Neyi twalemesha akwetu akwakudifukula, dikwila nawu tunakumwekesha kusakilila kudi Yehova hawubwambu wetu walema nayena. Niwena hiyantu jaYehova. Neyi twanukaña chumichi, mpinji yejima tukuyitiyilaña amanakwetu niahela luwi nikuyikeña. (1 Tes. 5:15) Yesu wayilejeli antu amulondeleleña nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.”—Yow. 13:35.

16. Chakutalilahwinyi chekala munshimbi yaMosi chinakumwekesha Yehova chatiyañayi hadi antu jindi?

¹⁶ Shinshikenu chakutalilahu chinateli kutukwasha kudakamena wumu namukwawu muchipompelu. Yipwepu yamutembeli yaYehova ayihanini kulonda yizatikeña kukudifukula kwalala. Nshimbi yaMosi yashimwini chakuhemba iyi yipwepu, antu akisañeneña iyi yipwepu ayijahileña. (Kuch. 1:50, 51) Neyi Yehova wakiñileña yuma yabula wumi yazatikileña hakudifukula, dikwila nawu nateli kukiña chikupu akwakudifukula indi ashinshika adihana atondayi kwikala antu jindi. Yehova washimwini kutalisha hadi antu jindi nindi: “Muntu wukukunkeyi, nakunki hakantu kadisu [dami.]”—Zek. 2:8.

17. Yehova ‘watiyililaña’ kuyumanyi?

¹⁷ Malaki wamumwekesheli Yehova ‘nakutiyilila’ hampinji yahanjekeleñawu antu Jindi wumu namukwawu. (Mal. 3:16) Mwamweni, Yehova “weluka antu jindi.” (2 Tim. 2:19) Weluka yuma yejima yitwelaña niyitwahoshaña. (Heb. 4:13) Neyi tunakuyitiyila akwetu akwakudifukula luwi wanyi, Yehova ‘watiyililaña.’ Neyi tudi nachisambu, twahanaña, twanakenaña nikuditiyila luwi wumu namukwawu, Yehova niyena wamonaña.—Heb. 13:16; 1 Pet. 4:8, 9.

18. Tunateli kumwekesha ñahi kusakilila hakwikala antu jaYehova?

¹⁸ Mwamweni twatela kumusakilila Yehova hakututonda kwikala antu jindi. Twamwekeshaña netu twekalaña antu jindi, chitwadihana namuchima wumu kudi yena. Hela chakwila tunakushakama “mwikiñu datama dabulaña kukoña yuma yaloña,” twakeñaña antu eluki nawu twekala ‘akadi hakutwinkela muloña nawa ashinshika, . . . nakutoñeka neyi yejeji mukaayi.’ (Fwi. 2:15) Twakaanaña kwila yuma yatama. (Yak. 4:7) Nawa twakeña nikulemesha akwetu akwakudifukula, tweluka netu niwena hiyantu jambala jaYehova.—Rom. 12:10.

19. Yehova wakiswilaña ñahi antu jindi?

¹⁹ Bayibolu yashiika nawu: “Yehova wukuumba antu indi wanyi.” (Mas. 94:14) Hela chakwila tukumona kukala kwamuchidinyi Yehova hakutwishiyaku. Hela kufwa hikunateli kutwambula kukukeña kwatukeñayi Yehovaku. (Rom. 8:38, 39) “Neyi tunakuhanda, twamuhandilaña Yehova, nawa neyi tunafwi, twamufwilaña Yehova. Dichi neyi tunakuhanda hela tunafwi, tudi antu jaYehova.” (Rom. 14:8) Twatalilaña mpinji yakasañulayi Yehova amabwambu jindi ashinshika afwa dehi. (Mat. 22:32) Nimakonu twadiluñishaña nkisu yayivulu. Neyi chahoshaña Bayibolu, “Muza wukweti Nzambi yawu Yehova wunakooleki, diwu antu anatondiyi kwikala wuswana [windi.]”—Mas. 33:12.